Fagbulun 23
23
1Ay Pablu nalingaman fiya fiya sas Taw Udyu Tiba Tungud Tagmagurang ay nalong te, “Ku ngay fadugsay, nu maugalian aw, dakdi e naplan sas Diyus anggan katsi.” 2Ay fun taganyun Ananias, nasugu sik ngay taw at malindug makbang Pablu te, “Falangi at bibig.” 3Ay Pablu nalong sas Ananias te, “Sik tagfanluk way o. Diyus ban malang yay emu. Igmalunggung o sanya laman nanfaning o Muisis at Suguwan. Ay roro gina o nasugu te, falangi angku, nafamabo o Muisis at Suguwan.” 4Ay tibak taw at malindug makbang Pablu nalong te, “Igfalingun yay o Diyus at fun taganyun.” 5Ay Pablu nabalus te, “Ku ngay fadugsay, kwa nasaful te, kanya wa mangaro fun taganyun. Anway marirukan sis Diyus at longan te, ‘Lag glong mauri nut sa wa ay fun baliwa.’#23:5 Nu Galin 22:28.”
6Ay Pablu nu nalag te, e taw Sadusiyu ay taw Parisiyu sanya, kanya gbiya nu gelongan sas Taw Udyu Tiba Tungud Tagmagurang te, “Ku ngay fadugsay, anggan aw sik Parisiyu akyangay. Ay anggan ku mama ay ku ngay aguyangan sik Parisiyu yangay. Ay ay fagfauriun angku katsi, anway e fagsegun aw te, at kinkate gdog yay gleleg.”
7Ay Pablu nu nalong wa katanya, taw Parisiyu ay taw Sadusiyu garingangan dawdaw. Ay Taw Udyu Tiba Tungud Tagmagurang we fagmasadiun. 8Fakatanyaun, taw Sadusiyu wa gafanud te, at kinkate wa ban gdog gleleg. Ay wa gafanud te, e ngay tagfabarita ay e ngay falad. Ay roro taw Parisiyu gafanud tuwa fagayu takatanya. 9Ay fagayu taw garingangan ayuwayu. Ay tibak Parisiyu at tagfoyung Muisis at Suguwan inlindug ay matvngvd nu nafoyung te, “Wami e nalag tuy fag taw at asalanan. Labon sik tagfabarita ay ate sik falad tagfasulitanan anya.” 10Ay inkugat yay nu garingangan ay anggan nu kadotama. Ay at tagfangguna sundalu gafanawa te, at ngay taw maradranggutan Pablu. Ay kanya nasugu at ngay sundalu te, “Sanyai wan. Ay buli Pablu sanya fag ngay taw. Ay tabani wa sas sundalu at fagmafulan.”
11Ay ginanya fag yabi, tam Fun Isus inkakbang sas Pablu ay nalong anya te, “Fatvngvdi am amatanganan! Nus nga setaw nu gfoyung o sa angku baliwa sas Erusalem, katanyai yangay ban nu gfoyung o sas talun Ruma.”
Ngay Taw Udyu Gananfateun Pablu
12Ay nus balabag wan, tibak taw Udyu inke fagmasadiun ay igfatuyanan te, “Ya ban tam gfangon, ay ya ban tam ginum, yap ngay ban tam nafate Pablu.” 13Ay at nadiyuganan glabi yay 40k taw. 14Ay kayunya at nananlag sa sangay taganyun daul ay sa sangay taw Udyu at ngay tagmagurang. Ay nalong anya te, “Matvngvd wan aro em fatuyanan te, ya ban ami gfangon yap ngay ban ami nafate Pablu. 15Ay nu katanya, fagayu am ay anggan Taw Udyu Tiba Tungud Tagmagurang foyungi sa tagfangguna sundalu te, laman kanya tumaban Pablu ste, kata nu gsarap am at matuyan sas Pablu baliwa. Ay roro ami, kamasadan wami gananfateun gina ro umdasug ste.”
16Ay Pablu e fadugsay sik mangena. At baguwama nadungug ka fag ngay taw at fasadan. Nu katanya, ka fag baguwama nasakbo sas sundalu at fagmafulan ay nafoyung sas Pablu. 17Ay Pablu nafatsanya at sadik fun sangay sundalu ay nasugu te, “Tabani tuy fag baguwama sas tagfangguna sundalu, anway kanya e foyungan ro sa anya.” 18Ay nataban wa fiya sas tagfangguna sundalu. Ay nafoyung sat fun te, “Pablu at kinsungsung at nasugu angku te, tabani tuy fag baguwama sa emu, anway kanya e foyungan ro sa emu.” 19Ay tagfangguna sundalu nated ka fag baguwama at take. Ay nataban anya sat dayu laman tiba wa gdungug at longan. Ay ginto te, “Nataw am fagalongunun sa angku?” 20Ay ka fag baguwama nabalus te, “Taw Udyu nadiyuganan get sa emu te, balabag ban tabani wa unu Pablu sas Taw Udyu Tiba Tungud Tagmagurang, laman kanya nansarap unu at matuyan sas Pablu baliwa. 21Ay lagi, lag gfaning ka fag ngay taw Udyu at fasadan. Glabi yay 40k taw at nadiyuganan te, wa ban unu gfangon, ay ginum, yap ngay ban nafate Pablu. Ay katsi kamasadan wa gananfateun Pablu ay igfanya am famalus.” 22Ay ka fag tagfangguna sundalu nalong sa ka fag baguwama te, “Lag gfoyung nus nga sinu am nalong angku. Loi wan.”
E Nataban Pablu sas Gubernadur Feliks
23Ay rodi ka fag tagfangguna sundalu nafakbang sa anya duwak fun sundalu. Ay nalong te, “Katsi fafuli 200k sundalu, ay 70k tagsakay sis kabayu, ay 200k sundalu yangay at ke bangko. Ay katsi ro sisad yabi sfasiyam loi wan sas Sesaria. 24Buli tibak kabayu laman Pablu ro at sakayan. Ay nu gtaban am anya, matagakani laman di e mdasug mauri sa anya kaduge glo sas gubernadur Feliks.” 25Ay ka fag tagfangguna sundalu nariruk te,
26“Siginan angku, Klaudiu Lisias. Sa emu Feliks, em nesugan fag gubernadur. Nariruk aw laman nanfadasug aw sa emu ku fagusegananun. 27Tuy fag taw ku nafataban sa emu katsi, taw Udyu at nagamat ay at fagafateun. Ay ginanya ndasug aw sanya gfaudgufudan ku ngay sundalu, ay nafalfas aw anya. Anway e nafoyung sa angku te, kanya sik taw Ruma way. 28Ay ginanya kaumsig aw gyasafulun te, taw manga taw Udyu at fakalimataun anya. Ay nu katanya, nafataban aw anya sas Taw Udyu Tiba Tungud Tagmagurang. 29Ay roro nasaful akwan taw Udyu at fakalimataun sa anya baliwa, anway kanya wa gfaning taw Udyu at suguwan. Ay nu katvngvd way anya, lag gsak nanfate ay nansungsung anya. 30Ay nu nasaful aw te, sik fulan taw insadi gananfateun anya, nafataban akwa anya sanya sa emu. Ay nalong kwa sanya fag ngay taw at ke nalimatan te, sa emui wa ban nu glong at fakalimataun sa anya baliwa. Kanya way ku fagnarirukun sa emu.”
31Ay ngay sundalu nafaning at longan. Ay nataban Pablu sad yabi ay indasug sas fulan Antipatris. 32Ay balabag di, ka fag ngay sundalu noli wa sat fagmafulan. Ay kayu way tagsakay sis kabayu at kinkubun laman gufud Pablu gina yangay glo. 33Ay nu ndasug wa sas Sesaria, nafon at ba rirukan sas Feliks, ay nafanusetaw Pablu sa anya. 34Ay Feliks nu natap wa at ba rirukan, ginto sas Pablu te, “Dada at matuyan am talun?” Ay nu nasaful te, Pablu siginans talun Silisya, 35kanya nalong yangay te, “Gadungugun aw am longan kaduge ban at ngay takalimata emu umdasug.” Ay kanya nafatanud Pablu sis Erudes at nafaawat fag bale daul.
ទើបបានជ្រើសរើសហើយ៖
Fagbulun 23: TAWEAST
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Copyright © 2023 by OMF International, Philippines
