Fagbulun 22
22
1Pablu glong te, “Ku ngay fadugsay ay ku ngay magurang, dungugani yap nu gfoyung aw ayu te, kwe nafagbulun mauri.” 2Ay at ngay taw nu nadungug Pablu nu gelongan sis Fangebriyu, glabi yay aro ataw nu maragangan. Ay Pablu nalong yangay fiya te, 3“Aw, sik taw Udyu kway. Nu kasalug aw sas fulan Tarsus sis Silisya fag talun. Dewa katanya, nu kadaul aw stiye ways fulan Erusalem. Kaduge aw gadal ku takamoyung at ngayan, Gamaliyel. At foyungan sa angku gfadiyuganan yangay sa tam aguyangan at longan at matuyan. Ay faggugat maseganama aktuwa sas Diyus at fagbulun fagayu, kata yangay am nu maseganama am katsi. 4Ay nafauri akwan ay nafate akwan tagfaning sa ka fag ugali at bagu. Ay nagamat aw anya ay nataban aw sas fagsungsungan, dewa mangama ay dewa mangena. 5Ay at fun taganyun ay anggan taw Udyu at ngay tagmagurang tagfatuyan ku longan. Madyay kanya nafon angku sik rirukan laman ku ubanan sa tam ngay kalongan taw Udyu. Ay nalo akwa sas fulan Damasku, laman nan-gamat aw ay nantaban aw kayu tagfaning sa ka fag ugali baliwa at bagu, laman gfauri ban anya stiye sas Erusalem.”
Pablu Nafoyung at Fagbulun gina Bagu Gafanud sas Isus
(Fagbulun 9:1-19; 26:12-18)
6“Gina swa bilug menit, kaduge aw gadasugun sas Damasku, rodi tv insure wa daw sa angku sik damlag siginans banwa. 7Ay inlub aw sas daga ay ginanya e dungganan aw nu e glong sa angku te, ‘Saulu, Saulu. Taw ro am fagfauriun angku?’ 8Ay dewa katanya, ginto akyay sa anya te, ‘Sinu o, ku Fun?’ Ay kanya nabalus angku te, ‘Aw wan Isus, sik taw siginans Nasaret, am fagfauriun.’ 9Ay manga ku ngay ufud dewa nalag ka fag damlag, wa nasaful at elongan sa angku. 10Ay nainto aw sa at naelongan sa angku te, ‘Ku Fun, tain ban ku fagbulun?’ Ay tam Fun nabalus angku te, ‘Alindugi wan. Ay loi wa sas Damasku. Ay sanya e gfoyung yay ban emu at nafili fag fagbulun sa emu.’ 11Ay dakwa glag, insulo aw at nadamlag dawdaw angku. Ay ku iba nated way angku nu gtaban angku sas Damasku.
12“Ay sanya sik taw at ngayan Ananias. Kanya sik maseganama nu gfaning Diyus at longan. Ay taw Udyu gseg anya. 13Ay kanya nananlag angku, ay nalong te, ‘Sama, linggati, glag wa ro o.’ Ay rodi glag kwa fiya, ay nalag aw anya. 14Ay kanya nalong yangay sa angku te, ‘Tam aguyangan at Diyus at nafili emu, laman sumaful ban o at fakaumsigun. Ay lumag o Diyus at Matuyan fag Taw, ay anggan dumungug o nu gelongan sa emu. 15Anway nanfoyung ban o sas fagayu taw sa baliwa am nalag ay am nadungug. 16Ay katsi lag gfalugoan. Alindugi wan. Ay e gfasurung emu sasad safa, ay eti sa tam Fun te: Falyami ku ngay asalanan.’ ”
Diyus Nasugu Pablu sa at Yud Udyu fag ngay Taw
17“Ay noli kwa sas Erusalem. Ay gina aw gdarangin sis Diyus bale, nalag aw 18tam Fun Isus ay nalong angku te, ‘Mafalii nu glo o ste ginans Erusalem, anway at ngay taw ste kalimata way nu gfoyung o sa angku baliwa.’ 19Ay nabalus aw te, ‘Ku Fun, kanya wa fag ngay taw at nasaful ku ngay fagbulun ebi sa at ngay bale fakafulan. Nasungsung aw ay nafalang aw at ngay tagafanud sa emu. 20Ay gina nafate am tagfatuyan, Esteban, anggan aw sanya kyangay. Ay nafadiyuganan aw sanya fag fagbulun baliwa. Madyay aw wan at tagtanud tagfate ngay balukas.’ 21Ay Isus nalong yangay sa angku te, ‘Loi wan, teway nansugu akwa emu sat yud Udyu fag ngay taw at ngayayu.’ ”
22Ay ka fag ngay taw Udyu gdungugan yama Pablu at longan. Ay Pablu nu nalong wa te, “Glo akwa sat yud Udyu fag ngay taw,” rodi tv, ka fag ngay taw Udyu nauro te, “Fatei wa anya! At masine kanya lag nangus gleleg!” 23Ay ka fag ngay taw gfatunglus yay nu guro. Ay gfalelegan at falefe sat tungud, ay anggan nafalayug ngay dafug siginans daga. 24Ay at tagfangguna sundalu nasugu at ngay sundalu te, “Fasakboi wa Pablu sa tam fagmafulan. Ay falangi anya, laman ro kanya moyung antam at asalanan mandi. Madyay at ngay taw nauro wa te, fatei wan.” 25Ay gina gsiyuk Pablu laman nanfusfus, Pablu ginto yay sas fun sundalu te, “Go sangay katanya wan fun Ruma at longan, dewam gfusfus sik taw Ruma ay dewa gyud am e nalag at asalanan?” 26Ay ka fag fun nu nadungug Pablu at longan, nalo sat tagfangguna sundalu ay nalong te, “Amatangani tuwa am fagbulun. Tuy fag taw sik taw Ruma way.” 27Ay at tagfangguna sundalu nkakbang sas Pablu ay ginto te, “Foyungi angku. Go sik taw Ruma o?” Ay Pablu nabalus te, “Kin. Sik taw Ruma akwa fiya.” 28Ay at tagfangguna sundalu nalong sas Pablu te, “Ebi nasali aw dawdaw laman umsik taw Ruma aw.” Ay Pablu nabalus te, “Aw, sik taw Ruma akwa fiya, madyay iste wa sis Ruma nu kasalug aw.” 29Ay rodi tagananfusfusun fag ngay taw sas Pablu, inyayu wa anya. Ay anggan at tagfangguna sundalu malimuwanan way, anway nasaful te, Pablu sik taw Ruma way mangaro. Ay kanya wan aro at nasugu te, “Kadinai Pablu.”
E Nataban Pablu sas Taw Udyu Tiba Tungud Tagmagurang
30Nus balabag wan, at tagfangguna sundalu kaumsig yay fiya nangasaful te, “Taw madyay taw Udyu at fakalimataun sas Pablu?” Ay nu katanya nasugu te, “Luwasi wan Pablu kadina.” Ay nafaful yangay at ngay taganyun daul ay anggan Taw Udyu Tiba Tungud Tagmagurang. Ay nataban yay Pablu sa at fagmafulan.
ទើបបានជ្រើសរើសហើយ៖
Fagbulun 22: TAWEAST
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Copyright © 2023 by OMF International, Philippines
