Aroma 6
6
1TETI nga tinenenji? Kansi tinkaleve mviipa kuti chawanzi chipake? 2Mlungu nalesye. Se tifwila ku viipa, nga soti tingankale syani mwamene? 3Mwati mnaziŵe kuti seo sonse tibatiziwa mwa Kristo Yesu tibatiziwa mu imfwa yake? 4Teti tiikiwa pa msitu pamo naye pobatizo mu imfwa: kuti umo Kristo mwechiushiwira kwa akufwa kwa mchinzi wa Awisi, tetyo nase kumo toyendayenda na moyo walomba. 5Chikomo kati tulundikiwa naye mchipazyo cha kufwa kwake, tikalundikiwe naye soti mchipazyo chozyuka kwake. 6Tuziŵa ichi, chakuti untu wasu wakale wipachikiwa muli yeve, kuti muŵili wa viipa wochenekeka, tisaŵa soti pokapolo wa viipa; 7pakuti uyo echifwa ochishiwa wolungama pali viipa. 8Lomba kati tichifwa muli Kristo, tugomezya kuti takuŵa moyo soti muli yeve, 9patuziŵa kuti Kristo poushiwa kwa akufwa saafwa soti; imfwa iliye nsaka lomba pali yeve. 10Pakuti pechifwa efwila ku viipa limo mpera: sembe moyo wali nawo ali nawo kwa Mlungu. 11Tetyo namwe molilinga akufwa ku viipa, sembe amoyo kwa Mlungu mwa Kristo Yesu.
12Teti msaleka viipa kuŵa mfumu mmiŵili yanu ikufwa, kumvwila makumbwilo a ine: 13pambi msatwala vizo vyanu ku viipa mchitireko vyosalungama; lomba molitwala mweka kwa Mlungu, nga ni amoyo mwifuma mkufwa, na vizo vyanu kwa Mlungu mchitireko vyolungama. 14Pakuti viipa siviti vyochitofumu pali mweo, pamsali a dango, sembe a chawanzi.
15Ni chinji? kansi tiifye, pitisali a dango, sembe a chawanzi? Mlungu nalesye. 16Mwati mnaziŵe kuti umulitwalako kuŵa alanda nommvwila, nimwe alanda a uyo umumvwila, kano a viipa ku imfwa, kano a mvwano ku chilungamo? 17Sembe Mlungu nalumbiwe pakuti, chukanga mwenze alanda a viipa, mwiyaruka noumvwila mu mtima mlingo ula wa mayeruzyo umwilitwalako; 18nipo pochishiwa wanoŵene mviipa mwichiŵa alanda a chilungamo. 19Nulaŵira nga ni ŵantu chikomo cholenda kwa muŵili wanu: pakuti umo mmwitwalira vizo vyanu kuŵa alanda a usali na a vyoifya mkuifya, tetyo lomba twalani vizo vyanu kuŵa alanda a chilungamo mkutuŵishiwa. 20Pakuti apo pemwenze alanda a viipa mwenze ŵanaaŵene pa mlandu wa chilungamo. 21Nga mwenze na vyotwala vyanji nsita ila pa ivyo vimupuvuka navyo lomba? pakuti posila pa ivyo ni imfwa. 22Sembe lomba pemwichishiwa ŵanaaŵene pa mlandu wa viipa na kuŵa alanda a Mlungu, muli navyo vyotwala vyanu mkutuŵishiwa, na posila pake ni moyo wa chizyazya. 23Pakuti chilambu cha viipa ni imfwa; sembe chabule cha Mlungu ni moyo wa chizyazya mwa Kristo Yesu Asikuru wasu.
ទើបបានជ្រើសរើសហើយ៖
Aroma 6: MA23
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Mapangano Alomba © Bible Society of Zambia, 1923.
