Aroma 5
5
1TETI patuchishiwa ŵolungama pa mvwano, natikuŵa na mtendere na Mlungu mwa Asikuru wasu Yesu Kristo, 2muli yeve soti ni mtenze namo moloŵera kwa mvwano mchawanzi ichi chitupanamamo; nase natutemwa mkulolera mchinzi wa Mlungu. 3Nte teti mpera, sembe natutemwa soti na matamano ŵasu, patuziŵa kuti matamano ochita makoselelo, 4na makoselelo kuzomereka, na kuzomereka chigomezyo: 5na chigomezyo sichupuvula, pakuti chintemwa cha Mlungu chusakatiliwa mmitima yasu mwa Mzimu Mtuŵa epewa kuli seo. 6Pakuti petenzolenda, pa nsita yake Kristo eŵafwila aŵo aliye Mlungu. 7Ni kovufya muntu kufwila wolungama: sembe muntu angakaŵalale kano kumfwila muweme. 8Sembe Mlungu olumbisya chintemwa chake kuli seo, pakuti petenze aipa Kristo etifwila. 9Teti kwenekwene, patuchishiwa ŵolungama lomba na mlopa wake, tipulukwe muli yeve pokali wa Mlungu. 10Chikomo kati petenze tupondo tiyanishiwa kwa Mlungu mkufwa kwa Mwana wake, ngakongako patuyanishiwa tipulukwe mkuŵa na moyo kwake; 11nte teti mpera, sembe seo tutemwa soti na Mlungu mwa Asikuru wasu Yesu Kristo, muli yeve ni mwitipoka lomba kuyanishiwa.
12Teti nga ni mmuntu umo viipa mviloŵera mcharo cha pansi, na imfwa mviipa, na imfwa ikumana teti ku ŵantu ŵonse, pechiifya ŵonse,— 13pakuti viipa vyenze mcharo mpaka nsita ya dango: sembe viipa sivupendewa pakaŵave dango. 14Chukanga teti imfwa yenze mfumu, chitatikile kwa Adamu kuza na kwa Musa, chukanga pa ŵala aliyoifya mchipazyo chosula kwa Adamu, wamene elatizya uyo ati aze. 15Lomba chabule sichulingana soti na msulo. Pakuti kati anyinji echifwa na msulo wa umo, kwenekwene vipaka kwa anyinji chawanzi cha Mlungu, na mtulo wopewa na chawanzi cha muntu umo, Yesu Kristo. 16Lomba mtulo siuli nga ni mwa umo eifya: pakuti upinguzi wifumila mwa umo kocheneka, sembe mtulo wabule wifumila mmisulo inyinji kochisya ŵolungama. 17Chikomo kati mu msulo wa umo imfwa yenze mfumu mwa umo, kwenekwene ŵala opoka winji wa chawanzi na wa mtulo wa chilungamo aŵekuŵa mafumu mmoyo mwa umo, Yesu Kristo. 18Teti nga ni mu msulo umo upinguzi muwizila ŵantu ŵonse kocheneka, tetyo na mchilungamiko chimo mtulo wabule ni muwizila ŵantu ŵonse kochisya ŵolungama ku moyo. 19Pakuti nga ni anyinji mwechichitiwira aipa mkusamvwila kwa muntu umo, tetyo na mkumvwila kwa umo ni mwati achishiwire ŵolungama anyinji. 20Nalo dango liloŵa lampuzyo, kuti misulo ipake; sembe pevipaka viipa chawanzi chipaka kopulamo: 21kuti umo viipa mvyenzele mfumu mu imfwa, tetyo na chawanzi ni mchiti choŵera mfumu kwa chilungamo ku moyo wosasila mwa Yesu Kristo Asikuru wasu.
ទើបបានជ្រើសរើសហើយ៖
Aroma 5: MA23
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Mapangano Alomba © Bible Society of Zambia, 1923.
