Aroma 1
1
1PAULO, kapolo wa Yesu Kristo, woitiwa kuŵa mpostolo, wopatuliwa ku evangelo ya Mlungu, 2yechipangana kale mwa aŵirizi ŵake mmalembo ŵozila, 3ya Mwana wake, evyalikwa mu mbuto ya Davide mwa muŵili, 4eikiwa kuŵa Mwana wa Mlungu kwa mpamvu mwa mzimu wa utuŵa pozyuka soti kwa akufwa; ni Yesu Kristo Asikuru wasu, 5mwitipokera muli yeve chawanzi nopostolo komvwila kwa mvwano mmitundu yonse, chikomo cha zina lake: 6mwa aŵa ni mmuli soti, ŵoitiwa kuŵa a Yesu Kristo: 7kuli ŵonse ali mu Roma, ŵotemweka na Mlungu, ŵoitiwa kuŵa asanto: Chawanzi kwanu na mtendere kufumila kwa Mlungu Ausu wasu na Asikuru Yesu Kristo.
8Potatika numuŵonga Mlungu wangu mwa Yesu Kristo kwa mweo monse, pakuti mvwano wanu uŵirikila mvyaro vyonse. 9Pakuti Mlungu ni ntoni yangu, unutumikila mu mzimu wangu pa evangelo ya Mwana wake, yakuti numtomolani kosaleka, 10nosenga nsiku zyonse mmalombero ŵangu, kano lomba posila niŵe na shuko pa chipangwilo cha Mlungu lomzilani. 11Pakuti nulyokalyoka kumuŵonani, kuti nimpekoni mtulo wa mwa mzimu lona kuti mnkazikike; 12wakuti neo pamo namwe nipuzishiwe muli mweo, tonse na mvwano wa ayasu, wanu na wangu. 13Sinupangwa muŵe ŵosaziŵa, akwasu, kuti kanyinji nichiti mu mtima mwangu nikamzileni (lomba nuchenjerekwa kuza na lero), niŵe na chotwala muli mweo soti, nga ni mwa a Mitundu ŵambi. 14Nina mangaŵa kwa Ahellene na kwa Akunja, kwa anzeru na kwa aliye nzeru. 15Teti, umo mnukumikirako neo, nuliikilatu kuŵirizya evangelo kwanu soti mwe muli mu Roma. 16Pakuti sinikumvwa nsoni na evangelo: chikomo ni mpamvu ya Mlungu ya ku upuzumushi ku ali wonse ozomera, ku Muyuda potatika, na ku Muhellene soti. 17Pakuti muli yeve ni muvundululiwa chilungamo cha Mlungu chofumila ku mvwano nopewa ku mvwano: umo mkwilembewera, Sembe ŵolungama azaŵe moyo na mvwano.
18Chikomo ukali wa Mlungu uvundululiwa kufumila kumulu kosusya kusasoŵa Mlungu konse nosalungama kwa ŵantu, ovindikizya vyendi pa vyosalungama; 19pakuti icho chingaziŵikwe cha Mlungu chuŵoneka muli ŵeve, chikomo Mlungu echiŵonesya kuli ŵeve. 20Pakuti vyosaŵoneka vya yeve chitatikile popoza vyaro vuŵonekesya, pavuziŵikwila na vyochitiwa, ni mpamvu yake ya mtatakuya nomlungu wake; tetyo ni paaliye mpandila: 21pakuti pomziŵa Mlungu aliyomlemekezya nga ni Mlungu, kano kuŵonga; lomba enze atyalatyala pa masusyano ŵaŵo, na mtima waŵo wopululila wifipishiwa. 22Polisokolola kuŵa anzeru echiŵa ŵopusa, 23nosintanisya mchinzi wa Mlungu wosaŵola ku maŵonekero a kalango ka muntu woŵola, na ka tuni, na vilwani vya mendo ŵane, na vyokalaŵa.
24Tetyo Mlungu ni pechiŵatailizya mmakumbwilo a mmitima yaŵo ku vyachiputa, vyakuti miŵili yaŵo ichitiwa mpuvu mwa ŵeve: 25pakuti esintanisya vyendi vya Mlungu ku wenye, nolambila notumikila chopozewa kumpula Wopoza, woŵirikila mperampera. Amen.
26Chikomo choteti Mlungu ni pechiŵatailizya ku makumbwilo a mzundu: pakuti anakazi ŵaŵo esintanisya unkalo wa chivyalikwilo ku uyo usali wa chivyalikwilo: 27tetyo na analume soti eleka unkalo wa chivyalikwilo wa anakazi nochentulana mmakumbwilo ŵaŵo umo na muyake, analume kuchita vyansoni na analume ayaŵo, nolipokera chilambu chowamila umavyavya waŵo.
28Nipo nga ni umo mwechikanila kuŵa naye Mlungu nomziŵilatu, Mlungu eŵatailizya ku mtima woluvika, kuchita vyosawamila, 29powanda vyosalungama, uŵipa, kaso, chigwininti; nopaka ukwa, upondo, mulomo, chiŵepeko, kapate; ŵoŵereŵesya, 30akulya nkonto, ŵomtinka Mlungu, anchululila, ampuvya, ŵolilumba, ŵosonsomba viipa, ŵosamvwila eŵavyala, 31aliye nzeru, ŵosula mapangano, aliye chintemwa, aliye chifundo: 32amene, poŵaziŵa matetulo a Mlungu akuti ŵala ochita vyoteti owamila imfwa, ntovichita vyamene ivi tyala, lomba ozomerana na ŵala ovichita.
ទើបបានជ្រើសរើសហើយ៖
Aroma 1: MA23
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Mapangano Alomba © Bible Society of Zambia, 1923.
