Machitilo 25
25
1NAYE Festo akaloŵe mcharo icho pavuli pa nsiku zitatu echiya ku Yerusalemi kufumila ku Kaisariya. 2Nipo akuru a ansembe na Ayuda ŵoziŵikwa emuuzya zya Paulo; 3empapatira kwachitira lusungu lomuita aze ku Yerusalemi, komuŵendamizya pa njira kuti ampaye. 4Lomba Festo eyasuka kuti Paulo esungiwa pa Kaisariya, na yeve yeka esakoyako lomba pano. 5Teti aŵo ŵena nsaka mwa mweo, echiti, naaye pamo na neo; kati muntu uyo eifya kantu akamsimikizye.
6Lomba akalaleko kwaŵo nte kupula nsiku zisano na zitatu kano kumi esikila ku Kaisariya; mmawa mwake enkala pa chilimba chopinguzi nosuzula kuti eletewe Paulo. 7Akaze yeve Ayuda ŵala efumila ku Yerusalemi epanama kumzinga, nomnenera vikomo vinyinji vikuru vyosaziŵikwa paweme. 8Paulo polikanila echiti, Niliyoifisya kantu kano dango la Ayuda, kano chipupilo, kano Kaisari. 9Sembe Festo, posakoŵatemwesya Ayuda, emyasuka Paulo echiti, Upangwa kuya ku Yerusalemi, ukapinguliweko kwamene zya ivi kwangu? 10Sembe Paulo echiti, Nupanama pa chilimba chopinguzi cha Kaisari, pamene panuwamila kupinguliwa: Ayuda niliyoŵaifisya kantu, umo mmuziŵisyira. 11Teti kati nne muŵipa nochita kantu kowamila imfwa, sinukana kufwa: sembe kati ivi vyonse vyakuninenera ni vyatyala, paliye muntu ati anitwale kwaŵo. Naniye kwa Kaisari. 12Pamene apo Festo akauzyane na ansaka eyasuka, Wati naniye kwa Kaisari: kwa Kaisari ni kuuti uye.
13Lomba akasile masiku ŵambi Agrippa mfumu na Berinike efwika ku Kaisariya nomlonjera Festo. 14Pechilalako nsiku zinyinji Festo eitulila mfumu mlandu wa Paulo echiti, Pali muntu muyake wechisiya Felike womangiwa: 15penenze neo pa Yerusalemi akuru a ansembe na akuru a Ayuda eniuzya zyake nosenga umkonde mlandu. 16Ŵiniyasuka kuti nte msango wa Aroma kusuzula muntu pamene wosimikizyiwa pakaliyoŵonana na ŵomsimikizya menso na menso, na kuŵa na nsita iweme yolikanila mu mlandu wechipewa. 17Teti pechilongana pano sinilembuka, lomba mmawa mwake ninkala pa chilimba chopinguzi nopanga ŵaze naye muntu. 18Akapaname ŵomkanikizya ntenena chikomo cha viipa nga ni vinilinga; 19enze nayo milandu yomsusya yolambilo waŵo ŵene, soti ya chite Yesu, wamene echifwa, wechinenesya Paulo ni wamoyo. 20Nane pozuvikazuvika munti nifwangile zya ivi, nimkonsha kati opangwa kuya ku Yerusalemi nopinguliwako zya mlandu uyu. 21Sembe Paulo pesakosungiwa akapinguliwe na Augusto uyo, nisuzula kuti asungiwe mpaka penti nimtumizye kwa Kaisari. 22Lomba Agrippa emnenera Festo, Nane kumo nupangwa kulimvwila zya uyu. Echiti, Mailo mumumvwe.
23Teti mmawa mwake akaze Agrippa na Berinike ŵozila kofumu noloŵa momvwila milandu, pamo na vilolo vikuru na ŵantu ŵoziŵikwa a mmunzi, pechisuzula Festo ŵeloŵa naye Paulo. 24Nipo Festo echiti, We mfumu Agrippa, na mweo monse muli nase muno, muŵona uyu muntu wilinitetelela zyake liumba lonse la Ayuda pa Yerusalemi na pano, nosema kuti ntowamila kuŵa moyo soti. 25Sembe neo ntenifwanga kuti echita kantu kowamila imfwa: naye akalinenere kuti naniye kwa Augusto ni penichiti nimtumizye. 26Niliye kantu konenesya ka yeve komlemberani, mfumu. Teti ni panamfumizya pa menso panu, ngakongako kwa mweo, kalonga Agrippa, kuti mkamkonsinsha niŵe na mfundo yolemba. 27Pakuti chuniŵera chopusa, potumizya wa mnsinga, kosaziŵisya soti vikomo vyomsusyira.
ទើបបានជ្រើសរើសហើយ៖
Machitilo 25: MA23
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Mapangano Alomba © Bible Society of Zambia, 1923.
