Machitilo 24
24
1ZIKAPITE nsiku zisano mkuru wa ansembe Ananiya efwika, na ŵambi akuru na chilongosola muyake zina lake Tertullo; naŵo echiyomlululira mmbili mlandu wa Paulo. 2Nipo akaitiwe Tertullo eyambomsimikizya echiti,
Pakuti kuli mweo tunkala mtendere ngawo, na poyondolola kwanu viipa vuleshewa ku mtundu uyu, 3tuzomerezya nako mvyonse na mmalo monse noyamika, mwe Felike mwaŵomvwika. 4Lomba nisamuŵevyani, napapata mtimvwile malizu a kandusu posisikanya kwanu. 5Pakuti timfwanga uyu muntu ni chinkanga, notwangisya ŵantu mwa Ayuda ŵonse a mvyaro vyonse, na chipimfya wa chipatuko cha Anazarayo. 6Wamene soti esakochenda chipupilo, ni pitimkata: tichiti timpingule mwa dango lasu. 7Sembe Lusiya chilolo echizomsompola kwa mpamvu mmanja ŵasu, 8noŵapanga ŵomsimikizya aze kuli mweo; pali ŵeve mngaziŵe pomkonsinsha mweka ivi vyonse vutumsimikizya navyo. 9Na Ayuda ezomerezyana pomsimikizya, kunenesya kuti ni vyendi.
10Nipo mmbili akamcheuzye kuti alaŵire Paulo eyasuka,
Poziŵa kuti mwankala chipingula wa mtundu uyu virimika vinyinji nulikanila motemwa: 11pakuti mngaziŵe kuti nte kupula nsiku kumi na ziŵiri penichiyolambila ku Yerusalemi: 12naŵo aliyonifwanga mchipupilo nususyana na ŵantu kano kunyesya liumba mitima, kano mmasunagoge, kano umo mmunzi. 13Soti sangazomerezye kwanu vintu vyakunisimikizya navyo. 14Sembe ichi nuchisokolola kwanu, chakuti mwa Njira yakutula chipatuko ni mnumtumikila Mlungu wa ausu wasu, nozomera vyonse viri mdango na vilulembewe mwa aŵirizi: 15panili na chigomezyo kwa Mlungu, chakulolera aŵa soti, chakuti paze paŵe kuzyuka kwa ŵolungama na ŵosalungama. 16Pali ichi nane soti nupimpilila nakuŵa na chikumbutima chosapontera Mlungu na ŵantu nsiku zyonse. 17Lomba vikapitepo virimika vinyinji nichizotwala vyabule ku mtundu wangu, na nsembe: 18mkutwala ivi enifwanga wowamyiwa mchipupilo, ntenenze na chinyonganyonga kano na chiwawa: lomba enzemo Ayuda ŵambi a mu Asiya, 19amene nkasa angati ali pano pa menso panu nonisimikizya, kati ana mlandu nane. 20Pambi aŵa nalaŵire ŵeka viipa vyechifwana penipanama pa nsaka, 21sembe lizu ili limo linikuwa penipanama paŵo, Zya mlandu wozyuka kwa akufwa ni zinusimikizyiwa kwanu lero.
22Sembe Felike, poziŵisya wino zya Njira iyi, eŵasimpika echiti, Apo pati aze Lusiya chilolo nize nitende mlandu wanu. 23Naye emuuzya kenturiyo kuti amsunge nomchitira paweme, asaŵalesya anansi ŵake kumtumikila.
24Lomba pavuli pa nsiku ziyake Felike echiza pamo na Drusilla mkazi wake, enze Muyuda; emuita Paulo nomumvwa zya mvwano wa mwa Kristo Yesu. 25Naye penzolulula vya chilungamo na malilesyo nopinguzi ukuza Felike echita chintente chikuru noyasuka, Nkoya lomba; nikazoŵona nsita iweme nikuite uze kwangu. 26Echetekera soti kuti Paulo ampe ndalama, ni pechimuita kaŵirikaŵiri nolaŵirana naye. 27Lomba vikasile virimika viŵiri Porkiyo Festo epyana Felike; naye posakoŵatemwesya Ayuda Felike emsiya Paulo mnsinga.
ទើបបានជ្រើសរើសហើយ៖
Machitilo 24: MA23
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Mapangano Alomba © Bible Society of Zambia, 1923.
