1 Akorinti 1
1
1PAULO, woitiwa kuŵa mpostolo wa Yesu Kristo mchipangwilo cha Mlungu, na Sostene mkwasu, 2ku eklezya ya Mlungu ya ku Korinti, ŵala otuvyiwa mwa Kristo Yesu, ŵoitiwa kuŵa asanto, pamo na ŵonse oliita zina la Asikuru wasu Yesu Kristo mmalo monse, Asikuru waŵo na wa seo: 3Chawanzi kwanu na mtendere kufumila kwa Mlungu Ausu wasu na Asikuru Yesu Kristo.
4Numyamika Mlungu wangu nsita zyonse pali mweo ku chawanzi cha Mlungu chipewa kuli mweo mwa Kristo Yesu; 5chakuti pa vyonse mwisambazyiwa muli yeve, mkulaŵira konse noziŵisya konse, 6nga ni umo untoni wa Kristo muwitang'ira muli mweo: 7chingamsoŵeni chabule chiri chonse, pamulindila mavundululiwe a Asikuru wasu Yesu Kristo. 8Uyo soti azamtang'isyeni mpaka na kunsilililo, kuti mkaŵe ŵosasimikizyika pa siku la Asikuru wasu Yesu Kristo. 9Mlungu ni wochetekereka, wimwiitiwa muli yeve mchiyanjano cha Mwana wake Yesu Kristo Asikuru wasu.
10Lomba numpapatirani, mwakwasu, mzina la Asikuru wasu Yesu Kristo, kuti monse mulaŵire pamo na pamo, msaŵa mapatukano muli mweo; sembe kuti mulungamikiwe pamo pa mtima umo na popinguzi umo. 11Pakuti kwiziŵikwa kuli neo zya mweo, mwakwasu, na ŵala a kwa Klowe, zyakuti muli masusyano muli mweo. 12Nikuti ichi, chakuti ali wonse wa mweo akuti, Ne nine wa Paulo; ne nine wa Apollo; ne nine wa Kefa; ne nine wa Kristo. 13Kansi Kristo oyaŵanikana? kansi Paulo ni epachikiwa pa mlandu wanu? kansi mwibatiziwa mzina la Paulo? 14Numuŵonga Mlungu kuti sinimbatiza yeka umo wa mweo, sembe Krispo na Gayo, 15ali wonse angati kuti mwibatiziwa mzina langu. 16Nane nibatiza soti a mchiŵanza cha Stefana: mwa ampuzyo sinuziŵa kati nibatiza umbi. 17Chikomo Kristo ntenituma kubatiza, sembe kuiŵirizya evangelo: nte pa mano a malizu, ungasuliwe msalaba wa Kristo.
18Pakuti lizu la msalaba ni la mapuso kwa aŵo ochenekeka; sembe kwasu tupulukwa ni la mpamvu ya Mlungu. 19Pakuti kwilembewa,
Nize nicheneke nzeru zya anzeru,
Na kasansauko ka ŵosansauka nize nikakane.
20Ali kuni wanzeru? ali kuni mlembi? ali kuni wantota wa nsita ino? kansi Mlungu aliyopusika nzeru zya mcharo cha pansi? 21Chikomo mnzeru zya Mlungu charo pachiliyomziŵa Mlungu mnzeru zya chine, kwimtemwesya Mlungu kwapuzumusya ŵala amvwano mmapuso a icho chiŵirizyiwa. 22Ayuda pakusenga viziŵikwilo, na Ahellene pakusakila nzeru: 23sembe seo tumuŵirizya Kristo wopachikiwa, kwa Ayuda ni chokumbulwako, na kwa a Mitundu ni mapuso; 24sembe kwa ŵala oitiwa, Ayuda na Ahellene, ni Kristo mpamvu ya Mlungu na nzeru zya Mlungu. 25Pakuti mapuso a Mlungu ana nzeru kupula ŵantu, nolenda kwa Mlungu ni kokosa kupula ŵantu.
26Lomba lolani kuitiwa kwanu, mwakwasu, umo mwasaitiwira anyinji anzeru mwa muŵili, nte anyinji ampamvu, nte anyinji amchinzi: 27sembe Mlungu evisalula vyopusa vya mcharo aŵatozole ŵala anzeru; na Mlungu evisalula vyolenda vya mcharo avitozole vyokosa, 28na vyosaziŵikwa vya mcharo na vyopeluka ni vyechisalula Mlungu, inde na vintu visalipo, avilofye vintu vilipo: 29miŵili iri yonse isalitamya pa menso pa Mlungu. 30Sembe yeve ni mmufumila mwa Kristo Yesu, wamene echitiwa kuli seo nzeru zya kwa Mlungu, na chilungamo na chituvyilo nonunuli: 31kuti, nga ni umo mkwilembewera, Uyo olitamya nalitamye mwa Asikuru.
ទើបបានជ្រើសរើសហើយ៖
1 Akorinti 1: MA23
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Mapangano Alomba © Bible Society of Zambia, 1923.