मरकुस 5
5
भुंडली आत्मासी भोरायलु माणसोक वारू कोरनो
(मत्ती 8:28-34; लुका 8:26-39)
1एने येसु एने तेरा चेला दोरीयान पोरले धोळे गिरासेन देसोमा पुग्या, 2एने तेत्यार येसु ढोंड्यामा गोथू उतऱ्यु ती तेत्यारुत एक माणूस जीनामा भुंडली आत्मा होती, मोळवाट्यामा गोथू निकवीन तीना काजे मेव्यू. 3चू मोळवाट्यामा रोयतू होतु एने कुदू तीना काजे साकवे कोरीन बी नि बांद सोकता होता, 4काहाकि चू घोळी-घोळी बेड्या एने साकव्या कोरीन बांदायलु होतु, बाकीन चू साकव्या काजे तुळ देदु एने बेड्यान तुकडा-तुकडा कोर देदलु होतु, एने कुदू तिना काजे ताबामा नी कोर सोकता होता. 5चू एक सारकु रात-दाहळू मोळवाट्यामा एने बोयळामा आयेळतेलु, एने खुदो काजे दोगळे कोरीन छेंद लेतलू. 6चू येसु काजे नांबे देखीन दोवळ्यु, तीना काजे नोमोन कोऱ्यु, 7एने उचेत ओवाजसी आयळीन कोयू, “हे येसु, परमप्रधान परमेश्वरोन पुऱ्या, मेसेक तारेसी काय काम? मे तुसे काजे परमेश्वरोन कोसोम आपो कि मेसेक तोकलीत मा आपे.” 8काहाकि चू तीनु काजे कोयलु होतु, “हे भुंडली आत्मा, इना माणसोमा गोथी निकवी आव.” 9चू तिना काजे पुछु, “तारो काय नाव छे?” चू तीना काजे कोयू, “मारो नाव सेना छे; काहाकि आमु लोकेत छे.” 10एने चे तीनाक घोणा विनता कोऱ्या, “आमु काजे इना देसोमा गोथा बारथे मा मुकले.” 11चा बोयळा पोर सुवऱ्यान एक मोटूत टूवू चोरतू होतु. 12एने भुंडली आत्मा तीना काजे विनता कोरीन कोया, “आमु काजे हीनु सुवऱ्यामा मुकली दे कि आमु तिंदरे माहाय जाजे.” 13आखरी चू तीनु काजे आग्या आप्यू एने भुंडली आत्मा निकवीन सुवऱ्यामा भोराय गोयी एने टूवू चे काय दुय होजारोन होता, आळखे गोथा झोळवायीन दोरीयामा जायीन पोळ्या एने डूबीन मोऱ गोया. 14एने तिंदरा गुवाव्या दोवळीन सोहोरोमा एने गावोमा खोबर सोमवाळ्या. 15एने जो होयलो होतो, माणसे चो देखणे येसुनचा आव्या एने आवीन चे तीना काजे जीनामा भुंडली आत्मा होती, मतलब जीनामा सेना भोरायली होती, छिंदरा पेहेरीन एने सुदपोर बोस रोयलू देखिन बिही गोया. 16देखणे वावा तेरी, जीनामा भुंडली आत्मा होती, एने सुवऱ्यान आखी हालोत तीनु काजे कोयीन सोमवाळ्यु. 17एने तेत्यार चे तीना काजे विनता कोरीन कोयने बाज गोया कि आमरा हदमा गोथू जात रोय.
18एने जेतार चू ढोंड्या पोर चोळने बाज गोयू ती चू जीनामा पेहेले भुंडली आत्मा होती, तीना काजे विनता कोरणे बाज गोयू, “मेसे काजे तार साते रोयने दे.” 19बाकीन येसु तीना काजे आग्या आप्यू, एने तीना काजे कोयू, “तारे घोर जायीन तारा माणसो काजे कोय कि तारे पोर दया कोरीन प्रभू तारेन कोरता कोसू मोटलो कामे कोरलु छे.” 20चू जायीन दिकापुलीसमा इनी वातो काजे प्रचार कोरणे बाज गोयू कि येसु मारेन कोरीन कोसू मोटा काम कोऱ्यु; एने आखा माणसे वाहराय जाता होता.
यायीरोन मोरली पुराय एने मांदली बायोर
(मत्ती 9:18-26; लुका 8:40-56)
21जेतार येसु पोछु ढोंड्यामा पोरले धोळे गोयू, ती एक मोटीत गोरदी तेरेनचा एखठी होय गोयी चू दोरीयान धोळेत होतु. 22एने याईर नावोन प्रार्थना घोरोन सरदारो मायलु एक आव्यु, एने तीना काजे देखीन तेरा पायो पोर पोळ्यु, 23एने ओसो कोयीन तीना काजे घोनु विनता कोऱ्यु, कि मारी नानली पुराय मोरने पोर छे तू आवीन तिनी पोर हात मेक कि ची वारू होयीन जीवती रोये. 24तेत्यार चू तेरे पुठी गोयू; एने मोटीत गोरदी तेरे पोछोव गोयी, न्या तोक कि माणसे तीना पोर पोळ जाता होता.
25एने एक बायर होती, तिनी काजे बारा साल गोथो लुय वोयनेन बिमारी होती. 26एने ची घोणा सोवटा डाक्टरसी घोनो दुख उठावी, एने आपनु आखू माल पोयशा खोरचू कोरणे पोर बी तिनी काजे काय फोरोक नि आवलु होतु, बाकीन ओवी बी मांदवाय गोयली होती. 27ची येसुन वात सोमवीन गोरदीमा तेरे पोछोव गोथी आवी, एने तेरा छिंदरा काजे छिम लेदी, 28काहाकि ची कोयती होती, “जत्यार मे तेरा छिंदरा काजे बी छिम लीस, ती वारू होय जायीस.” 29एने तेत्यारुत तेरो लुय वोयनो बोंद होय गोयो, एने ची तेरा डीलोमा जान लेदी कि मे इनी बिमारीमा गोथी वारू होय गोयली छे. 30येसु तेत्यारुत आपनेमा जान लेदू कि मारेमा गोथो ताकत निकवलो छे, एने गोरदीमा पोछु फिरीन पुछु, “मारा छिंदरा कुन छिमलो छे?” 31तेरा चेला तीना काजे कोया, “तू देखतेलू कि गोरदी तारे पोर पोळ जातेली, एने तू कोय रोयू कि कून मेसेक छिमलो छे?” 32तेत्यार चू तिनी काजे देखणे कोरीन जू यो काम कोरलु होतु, चारू धोळे नोजोर नाख्यू. 33तेत्यार ची बायर यो जाण गोयी कि मारी कोसी भोलाई होयली छे, बिहती एने कापती जाईन आवी, एने तेरा पायो पोर पोळीन तीना काजे आखी हालत खोरी-खोरी कोय देदी. 34चू तिनी काजे कोयू, “पुराय, तारू भुरसू तुसेक वारू कोरलु छे, खुशाली सी जा, एने आपनी इनी बिमारीसी सोमावीन रोय.”
35चू ओसो कोयतूत होतु कि प्रार्थना घोरोन सरदारोन घोर गोथा माणसे आवीन कोया, “तारी पुराय ते मोर गोयी, हिमी गुरु काजे काहा दुख देतलू?” 36जी वात चे कोयता होता, तीना काजे येसु सोमव्यू नि कोवाळने, प्रार्थना घोरोन सरदार काजे कोयू, “मा बिहे; निस्तु भुरसू मेक.” 37एने चू पतरस एने याकुब एने याकुबोन भाश योहान काजे छुळीन, एने दिसरा कुदा काजे आपने साते आवने नी देदू. 38एने प्रार्थना घोरोन सरदारोन घोरोमा पुगीण, चू माणसो काजे घोना रोडतेला एने आयळतेला देख्यू. 39तेत्यार चू माहाय जायीन तीनु काजे कोयू, “तुमु काहा कोचाट कोरतेला एने रोड रोया? पुराय मोरी नि, बाकीन सुवने बाज रोयी.” 40चे तेरी मोजाक कोरणे बाज गोया, बाकीन चू आखा काजे निकावीन पुरायन आसी-बासा एने आपना सातीदारोपुठी माहाय, जा पुराय पोड रोयी होती, गोयू. 41एने पुरायन हात धोरीन चू तिनी काजे कोयू, “तलीथा कूम” एरू मतलब छे, “हे पुराय, मे तुसेक कोय, उठ” 42एने पुराय तेत्यारुत उठीन चालने फिरने बाज गोयी; काहाकि ची बारा सालोन होती इनापोरसी माणसे वाहराय गोया. 43ओवतेन चू तीनु काजे जोताळीन आग्या आप्यू कि जो वात कुदाक मालम नि पोळनो जुवे एने कोयू, “इनी काजे काहीन खाणे आपु.”
ទើបបានជ្រើសរើសហើយ៖
मरकुस 5: BFBNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Bareli Pauri (बारेली पावरी) Bible by The Love Fellowship is licensed under Creative Commons Attribution-ShareAlike 4.0 License.