मरकुस 4
4
बीज वेरने वावान दाखलू
(मत्ती 13:1-9; लुका 8:4-8)
1येसु ओवी दोरीया धोळे भोनावने बाज गोयू एने ओसी मोटी गोरदी तीनानचा एखठी होय गोयी कि चू गलीली दोरीयामा एक ढोंड्या पोर चोळीन बोस गोयू, एने आखी गोरदी भूयमा दोरीया धोळे उबरोय रोयी. 2एने येसु तीनु काजे दाखलामा लोकेत वाते सिकाळने बाज गोयू, एने सिकाळतू जाईन तीनु काजे कोयू, 3“सोमवू! देखू एक वेरनेवावु बीज वेरणे निकव्यू.” 4एने वेरणेन टेमे काहनो वाटी धोळे पोळ्यो एने चिल्ला आवीन तीना काजे चूट लेदा. 5एने काहनो चाफऱ्या वावे जागे पोळ्यो चा तीना काजे जादा धुवू नी जोळ्यू, एने जादा धूवू नि जोळनेन वोजेसी छाटो उग गोयो, 6एने जेतार दाहळू निकव्यू ती बोव गोयो, एने मुवे नी धोरणे वोजेसी सुक गोयो. 7एने काहनो झाडवाट्यामा पोळ्यो, एने झाडक्या वोदीन तीना काजे डाब देदा, एने चो फोव नी लायो. 8बाकीन काहनो वारला जागा पोर पोळ्यो, एने चो उग गोयो एने वोदीन फोव गोयो एने काहनो तीस गुणा, काहनो साठ गुणा, एने काहनो सोव गुणा फोव लाव्या. 9तेत्यार चू कोयू, “जीना जूव सोमवनेन कोरीन कानटा होय, चू सोमवे.”
दाखलान महत्व
(मत्ती 13:10-17; लुका 8:9-10)
10जेतार चू एखलु रोय गोयू, ती तेरा सातीदार बारा जोना तीना काजे इना दाखलान बारामा पुछ्या. 11चू तीनु काजे कोयू, “तुमु काजे ते परमेश्वरोन राजोन भेदोन सोमोज आपलो छे, बाकीन बारथे वावा जुगू आखा वाते दाखलासी होयतेली.” 12इनान कोरता कि
“चे देखता जायीन देखे एने तीनु काजे समजाये नी
एने सोमवता जायीन सोमवे बी एने नी सोमजे;
ओसो नि होये कि चे फिरे, एने माफी कोराय जासे.”
बीज वेरणे वावा दाखलान मतलब
(मत्ती 13:18-23; लुका 8:11-15)
13ओवतेन येसु तीनु काजे कोयू, “काय तुमु यु दाखलू नि सोमजतला? ती ओवते ओवी आखा दाखला काजे कोसा सोमजसु?” 14वेरणेवावु वचन वेरतेलू. 15जो वाटीन धोळे वावो छे जा वचन वेराय जातलो, ये जे छे कि जेतार चे सोमव्या, ती भुतडू तेत्यारुत आवीन वचन काजे चो तिंदरेमा वेरलो होतो, चूटीन लीजात रोयतलु. 16एने ओसात चो चाफऱ्यावावा जोमीनपोर वेराय जातलो, ये जे छे चे वचन काजे सोमवीन तेत्यारुत खुशीमा स्वीकार कोर लेतला. 17बाकीन आपने माहाय मुवे नि राखनेण वोजेसी चे थुलाक दाहळान कोरता रोयतेला; तेरे ओवतेन जेतार वचनोन वोजेसी तीनु पोर दुख नीती तोकलीत होयतेली, ती चे तेत्यारुत ठूकर खातला छे. 18एने जो झाडक्यामा वेराय गोयो ये चे छे जे वचन सोमव्या, 19एने संसारोन चिंत्ता, एने धोनोन धोकू, एने दिसरा चीजोन लालच तीनामा भोरायीन वचन काजे डाब देतला एने चे निसफोव रोय जातेला. 20एने जो वारले जागे वेराय गोयो, ये चे छे जे वचन सोमवीन स्वीकार कोरतेला एने फोव लावतेला काहनो तीस गुणा, काहनो साठ गुणा एने काहनो सोव गुणा.
दिवान दाखलू
(लुका 8:16-18)
21एने चू तीनु काजे कोयू, “काय दिवा काजे इनान कोरता लावतेला कि मापो तोवे नीती खाटलान तोवे मेकनो जुवे? काय इनान कोरता नि कि पाटळी पोर मेकनो जुवे? 22काहाकि कहानली चीज ढाकायली नि होय बाकीन इनान कोरता छे कि देखायनो जुवे. एने नि काय ढाकायलो छे, बाकीन इनान कोरता छे कि देखाय जाय, 23अगर कुदान सोमवनेन कानटा होय, ती चू सोमवी लेये.” 24एने चू तीनु काजे कोयू, “हुशारीमा रोयु कि काय सोमवतला, जीने मापोसी तुमु मापतेला तिनासी तुमरे जुगू बी मापायसे, एने तुमु काजे सोवटो आपायसे. 25काहाकि जीना जूव छे, तीना काजे आपसे; बाकीन जीना जुव नि होय, तिना जुव जो बी छे तेरे जुव गोथा बी ली लेसे.”
उगने वावा बिजोन दाखलू
26एने येसु कोयू, “परमेश्वरोन राज ओसो छे, जोसू काहनु माणूस धोरती पोर बीज नाखे, 27एने राती सुवे एने दिसू जागे, एने चो बीज ओसो उगे एने वोदे कि चू नि जाणे. 28धोरती आपेआप फोव लावतेली, पेहेले डीरु, ओवतेन कोनसे एने ओवतेन कोनसोमा तीयार दाणा. 29बाकीन जेतार दाणा पाक जातेला छे, तेत्यार चू तेत्यारुत दातवू घालतेलु छे, काहाकि काटनी आव लागली छे.”
रायोन दानान दाखलू
(मत्ती 13:31-32,34-35; लुका 13:18-19)
30एने ओवी येसु कोयू, “आमु परमेश्वरोन राजोन नाव काहनो आपसु, एने काहना दाखलासी चो जुळावसु? 31चो राईन दानान तोसो छे जेतार धोरती पोर वेराय जातलो ती जोमीनोन आखा बीज गोथो नानलो रोयतेलो, 32बाकीन जेतार वेरतेला, ती उगीन आखा झाडे पाल्यामा गोथो मोटो होय जातलो, एने तेरा ओसा मोटा डाव्या निकेवतेला छे कि सोरग मायला चिल्ला तेरा साहावामा वस्ती कोर सोकतेला.” 33चू तीनु काजे इना रितीसी घोन सोवटा दाखला आपी आपीन तिंदरे सोमोजणेन अनसारे वचन सोमवाळतू होतु, 34एने बिगर दाखलू कोये चू तीनु काजे काहीन बी नी कोयतू होतु; बाकीन सुनलामा चू आपना प्रेषितोन चेला काजे आखा वातोन मतलब देखाळतू होतु.
आंजी काजे शांत करनो
(मत्ती 8:23-27; लुका 8:22-25)
35तिने दाहळे जेतार सांतो होयो, ती येसु चेला काजे कोयू, “आवू, आमु पोले धोळे जाता.” 36एने चे गोरदी काजे छुळीन जोसू चू होतु, तोसुच तीना काजे ढोंड्यामा पुठी लीगोया; एने तीना साते एने बी ढोंड्या होता. 37तेत्यार मोटली आंजी आवी, एने झेलके ढोंड्यामा न्या तोक आव्या कि चो ढोंड्यो पाणीसी भोराय जातलो. 38बाकीन येसु पोछले धोळे गादीपोर सुव रोयू होतु तेत्यार चे तीना काजे जागाळीन तीना काजे कोया, “हे गुरु, काय तुसेक चिंता नि होय कि आमु मोरने पोर छे?” 39तेत्यार येसु उठीन आंजी काजे धोमकाव्यू, एने पाणी काजे कोयू, “हुग रोय, बोंद होय जा” एने आंजी बोंद होय गोयी एने शांत होय गोय; 40एने तीनु काजे कोयू, “तुमु काहा बिहीतेला? काय तुमु काजे हिमी तोक भुरसू नि होय?” 41एने चे घोणा बिही गोया एने आपोसमा बूल्या, “यु कुन छे कि आंजी एने पाणी बी तेरी आग्या मानतेला.”
ទើបបានជ្រើសរើសហើយ៖
मरकुस 4: BFBNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Bareli Pauri (बारेली पावरी) Bible by The Love Fellowship is licensed under Creative Commons Attribution-ShareAlike 4.0 License.