रोमि 8
8
सॆङ्सॆङॆ लावाबाङ् टक्चाऎ हिङ्खामा
1मसॆ ह खिरिस्ट येसु नुङ् एक्कन लिमिम्पा याॽमिचि निवाँहाङ्ऎ आब्डिक टिसुचिनि। 2मान्ठाभनॆ निवाँहाङ्मि लावाऎ खिरिस्ट येसुमि याॽमिचि हिङ्खामा पिकुचि हाङ् हिङ्वामि चॆक्मावा नुङ् सिखॆॽमॆ खानावाँबाङ् कानि फाःक्डि। 3कानि हिङ्वा नुङ्मा याॽमि लिमिम्पासॆ कानिऎ मोसामि यायेॽमा टिङ्मा माहेमिम्पासॆ आक्कसॆ कानि हिङ्पक्मिॽमा माहेसि। मसॆ कानिमि लागि आक्क यायेॽमाऎ मुमा माहेमिम्पा योम्पक् निवाँहाङ्ऎ मुसु। आक्क योम्पक् चाइ माङ्भनॆ, निवाँहाङ्ऎ खोम् पासा कानि हिङ्वा नुङ्मा कानिम् रक्मान सालुङ्पि ग बाखाटेम्पि पाङ्हाङ्सु। हाङ् खोसॆ खिरिस्ट कानिमि हिङ्वामि लागि सङ्टिसे कानि सक्पि ढुप्पाट्ट लॆखुबा हिङ्वाबाङ् फाक्बकि। 4ह चाइ कानिऎ यायेॽमाऎ लोसिन्टक्न चोब्न लॆःॽमा हेकि मान्ठाभनॆ सालुङ्ऎ लोसिन्ट हॆॽनॆ, टर सॆङ्सॆङॆ लावाऎ लोसिन्ट पाइहिसिर कामानुङ् निवाँहाङ्ऎ ग योम्पक् यिगु। 5हाम्पॆ याॽमिऎ चाइ उम् सालुङ्मि ढुप्पाट्टबि पेन्मा यगुक् खोसॆ उम् निवाँ सालुङ्पिऎ हिङ्वा योम्पक्पि टिकु। टर हाम्पॆ याॽमि चाइ सॆङ्सॆङॆ लावामि ढुप्पाट्टबि पेनुक खोसॆ उम् निवाँ सॆङ्सॆङॆ लावाऎ लोमिम्पा खानावाँबि टिःकु। 6सालुङ्ऎ माङ् लॆःॽमा मिनुकु मरहाङन लॆःॽमार आक्कसॆ सिखॆॽमॆ लाम्फुबि टॆकि। टर सॆङ्सॆङॆ लावाऎ माङ् लोकु मरहाङ्न लॆःॽमार हिङ्खामा नुङ् सान्टि टक्चाकि। 7हाङ् हाम्पॆ याॽमि चाइ उम् सालुङ्ऎ लोसिन्ट पाइ खो निवाँहाङ् सिच्चाखुबा याॽमि लि। खो निवाँहाङ्मि यायेॽमा रक्न लॆःॽनि हाङ् आक्रहाङ् लॆःॽमा सङ्क हेसुनि। 8हाङ् हाम्पॆ याॽमिऎ चाइ उम् सालुङ्ऎ लोमिम्पा रक्न पाइ खोसॆ निवाँहाङ् चेन्चामिॽमा हेसुनि।
9निवाँहाङ्मि लावा आन्नाबि चु हाङ्ग, आन्नॆ टाङ्पा सालुङ्ऎ माङ् लोकानि मन खेम्खुबा याॽमि लिसानिनि, टर सॆङ्सॆङॆ लावाऎ लोमिम्पा रक्न पाइखुबा याॽमि लिकानि। हाम्पॆ याॽमि नुङ् खिरिस्टमि लावा माआ आक्क खिरिस्टमि याॽमि हॆॽनॆ। 10टर खिरिस्ट आन्नाबि चु हाङ्ग, आन्नानुङ् हिङ्वामि सालुङ् चुऎसॆ सिखॆकानिन हाङ्स आन्ना निवाँहाङ्मि ङारिङ्पि निवाँनेन् याॽमि लिमिम्पासॆ, सॆङ्सॆङॆ लावाऎ आन्ना हिङ्खामा पिकानि। 11सॆङ्सॆङॆ लावाऎ खिरिस्ट येसु सिखॆॽमिम्पाबाङ् हिङ्पमिट्टु हाङ् आक्क सॆङ्सॆङॆ लावा आन्ना हङ्सि सङ्क चु। मसॆ आन्ना आन्नामि सालुङ्पि सिखॆकानि हाङ्स आन्ना हङ्सिॽयु पेनुऎ आक्क सॆङ्सॆङॆ लावाबाङ् निवाँहाङ्ऎ आन्ना होइक हानाम्स लुक्खॆनिए हिङ्खामा पिकानि।#१ कोरेन्ठि ३:१६
12मसॆ बुबुनानुसाचि, आन्नॆ हिङ्वा नुङ्मा सालुङ्ऎ माङ्माङ् लोकिर ममन आन्नॆ लॆःॽमान लॆ लोमॆ लिनि। 13मान्ठाभनॆ हिङ्वा नुङ्मा निवाँऎ माङ्माङ् लोकानि मरहाङ्न काइर पाइकानि हाङ्ग, लुक्खॆकानि। टर सॆङ्सॆङॆ लावामि चॆक्मावाऎ काइसॆ योक्पक् याइकाम्नि हाङ्ग, निवाँहाङ्बाङ् हानाम्स सिखॆॽनॆ हिङ्खामा टक्चाकाम्नि। 14मान्ठाभनॆ आसा चाइ निवाँहाङ्मि सॆङ्सॆङॆ लावा रक्न पाइ खो निवाँहाङ्मि पासा यो। 15मान्ठाभनॆ निवाँहाङ्ऎ आन्ना खोम् लावा पिडानि। मसॆ योम्पक् मुखुबा एक्क याॽमि उम् टुङ्घङ्पा नुङ् मान्टहाङ् किसि होइखेपा सङ्क आन्ना आक्रहाङ् किसिमा पाब्नि। खोसॆ कानि खोम् पासाचि मुःॽडि मसॆॽन कानिऎ खो “आब्बा#८:१५ आब्बा लोमिम्पा चाइ आरामाइक खाप्पि टाङ्पाम्न आपा लोमिम्पा यो, आपा कामानुङ् लोक।”#मारकुस १४:३६; गालाटि ४:६ 16हाङ् सॆङ्सॆङॆ लावाऎ कानि निवाँहाङ्मि पासाचि कामानुङ् कानिमि लावा चुमॆक्सङ् पिकु। 17मान्ठाभनॆ कानि निवाँहाङ्मि पासाचि लिमिम्पासॆ खोसॆ टाङ्पामि पासाचिमि लागि युङ्मिम्पा चोब्न आसिका इॽया कानिऎ टक्चाकि। हाङ् कानिऎ सङ्क निवाँहाङ्ऎ खिरिस्टमि लागि युङ्मिम्पा निङ्लावा टक्चाकि। टर कानिऎ खिरिस्टऎ रक्न डुखा आङि हाङ्टेःॽन खोसॆ टक्चामॆ निङ्लावाबि खॆॽहिकि।#गालाटि ४:५-७
निवाँहाङ्मि याॽमिचिमि डॆङ्पिऎ काम्नुऎ हिङ्खामा
18ग काङॆ काम्नुःर लेकुङ् निवाँहाङ्ऎ डॆङ्पि कानि खाङ्मिऎ निङ्लावा चाइ ह कानिऎ आङ्मिम्पा डुखाबाङ् एट्टान ढ्या लॆ। 19निवाँहाङ्ऎ खोम् पासाचि खाङ्मिॽमॆ डिना हानाम् टाऎ कामानुङ् चोब्न सिरिस्टिऎन सङ्क आक्क डिना एट्टान निवाँ टिमानुङ् हुङ्मॆ पाइकु। 20मान्ठाभनॆ निवाँहाङ्ऎ मुमिम्पा चोब्न खानावाँ योम्पक् आपिक्खुबा लिमिम्पा लॆटा।#उट्पाटि ३:१७-१९ ग खानावाँ चाइ खोचिऎ टाङ्पॆ मिन्मिम्पासॆ लिमिम्पा हॆॽनॆ, टर निवाँहाङ्ऎन आक्कबि एक्क आस मिन्पक्मिर कामानुङ् ग लिमिटु। 21आक्क आस चाइ माङ्भनॆ, निवाँहाङ्ऎ मुमिम्पा खानावाँ इॽया नासॆलिमाबाङ् हिङ्प। निवाँहाङ्ऎ आक्क निवाँहाङ्मि पासाचिऎ टक्चामॆ निङ्लावा पिॽमामि लागि आक्क नासॆलिमाबाङ् हिङ्पमिकु। 22हाङ् कानिऎ ग खानावाँ ले हढारि निवाँहाङ्ऎ मुमिम्पा चोब्न ठकाऎ चाचा टक्खुबा एक्क मेॽनुङ्माऎ डुखा आङिन्टॽन डुखा आङ्मॆ पाइकु। 23ग सिरिस्टिऎ टे हेॽनॆ, टर सॆङ्सॆङॆ लावा ग लावा चाइ निवाँहाङ्ऎ कानि याॽलऎ उम्चा रक्न पिकानि कामानुङ् चुप्लाङ् टक्चाखुबा कानि सङ्क डुखाऎ निवाँ हङ्सिॽयु हाःब्मे पाइकि। मान्ठाभनॆ खोसॆ हानाम् कानि खोम् चाइबान पासाचि मुमानुङ् कानिमि सालुङ्बिऎ डुखाबाङ् फागुकिहा कामानुङ् हुङ्मे पाइकि।#२ कोरेन्ठि ५:२-४ 24कानिनुङ् ग आस चुऎसॆन निवाँहाङ्ऎ हिङ्पक्मिट्टि। हाङ् आस लॆःॽमिम्पा खानावाँ खाङ्सिडा हाङ्ग आक्क आस न हॆॽनॆ। एक्क याॽमिऎ याॽलिन टक्चामिम्पा खानावाँबि आस लॆटुनि। 25टर हढारि मान्टक्चामिम्पा खानावाँबि आस लॆकि हाङ्ग, आक्क खानावाँ माटक्चारढारि निवाँ मान्सेॽलेम हुङ्ढाङ्कि।
26गरहाङ्न कानिऎ आहेमॆ ठालबि सङ्क सॆङ्सॆङॆ लावाऎ कानि मुबाकि मान्ठाभनॆ कानिऎ मान्टहाङ् पारठाना लॆःॽमॆ लोमॆ खानावाँ लेसिनि, टर कानिऎ साम्देन्पि इमा हेनिए खानावाँ सॆङ्सॆङॆ लावाऎन हङ्सिॽयुबाङ् इकु। 27हाङ् निवाँहाङ्ऎ याॽमिचिमि चोब्न निवाँ हङ्सिहा खानावाँऎ लावाबाङ् माङ् लोकु म लेकु। सॆङ्सॆङॆ लावाऎ निवाँहाङ्मि याॽमिचिमि लागि निवाँहङ्मि निवाँ आनुसारा पारठाना लॆपिकुचिमि।
28हाङ् कानिऎ ग खानावाँ ले निवाँहाङ् नाम्नाम् पिसिखुबाचि हाङ् खोम् निवाँ रक्न खोसॆ सॆःक्मिम्पा याॽमिचिमि लागि चोब्न खानावाँबि निवाँहाङ्ऎ नुऎन लॆपिकुचि। 29मान्ठाभनॆ आक्खा याॽमिचि चाइ निवाँहाङ्मि याॽमिचि लोमॆ खानावाँ निवाँहाङ्ऎ याॽलिन लेमिम्पा लॆटु, हाङ् आक्खाचि खोम् पासा रक्मान लिमामि लागि सॆःगुचि। मसॆ पासा चाइ चोब्न निवाँयुङ् लॆखुबा बुबुनानुसाचिम् लुम्पि चोब्बाङ् टुम्मि यो। 30हाङ् खोसॆ याॽलिन सॆःक्मिम्पा याॽमिचि सेःरुचि। हाङ् खोसॆ सेःॽमिम्पा याॽमिचि निवाँनेन् मुसुचि। हाङ् खोसॆ निवाँनेन् मुमिम्पा याॽमिचि खोम् निङ्लावाबि पेन्मा पिट्टुचि।
माङ्ऎ सङ्क कानि खिरिस्टमि नाम्नाम् पिसिॽमाबाङ् फाक्मा हेसिनि
31निवाँहाङ्मि आक्खा योम्पक् कानिऎ मिॽलामार कानिऎ गर लोमा, निवाँहाङ् कानिनुङ् चु मसॆ आसॆस कानि हेचाइ हिसिनि। 32हाङ् निवाँहाङ्ऎ खोम् पासान सङ्क मान्युङु, टर कानि चोब्न हिङ्चामिॽमाम् लागि पिइटु। मसॆ निवाँहाङ्ऎ खोम् पासान सङ्क टा कानिमि लागि पिट्टि हाङ्ग, माल् खोसॆ कानि चोब्न खानावाँ पिट्टिनिहॆ टा? 33निवाँहाङ्ऎन खोम् याॽमिचि मुमिम्पा कानि सक्पि आसॆ सङ्क आब्डिक् टिमा हेसुचिनि मान्ठाभनॆ निवाँहाङ्ऎन कानि खोम् ङारिङ्पि निवाँनेन् याॽमि मुडि। 34कानि सक्पि आब्डिक् टिहिखुबा आसास माआमि मान्ठाभनॆ खिरिस्ट येसुन कानिमि लागि सिखारा हाङ् आक्कबाङ्स ढ्या खानावाँ चाइ कानिम् लागिन सिखॆॽमिम्पाबाङ् हिङ्पका। हाङ् निवाँहाङ्मि चुप्ठिङ् हुक् पोट्टा पेन्डा। आक्कुबि खोसॆ कानिमि लागि पारठाना लॆढाङ। 35हाङ् खिरिस्टमि नाम्नाम् पिस्सिॽमाबाङ् माङ्ऎ सङ्क कानि फाग्मा हेसिहिनि। कानि डुखाबि लिकि हाङ्स आठावा पाबुहा खानावाँ माइ हाङ्स, याॽमिचिऎ कानि काइर लॆकि हाङ्स, कानिनुङ् चामाडुङ्मान माआ हाङ्स, चाङ्मामि लागि माङ्स माआ हाङ्स हाङ् सिखॆॽमान ठाबाक्डि हाङ्स अठावा याॽमिचिऎ सेॽमान परःक्डामि हाङ्स, गरहा खानावाँऎ कानि खिरिस्टमि नाम्नाम् पिसिॽमाबाङ् फाक्मॆ खानावाँन लिनि। 36आक्खा डुखामि बारेबि ग निवाँनेन साब्चिराबि गरहाङ् साब्डा,
“काङ्कॆ निवाँहाङ् टिङ्मिम्पासॆ हानाम्स काङ्का याॽमिचिऎ सेरुॽमॆ लाम्फुबि लाम्ढुमा सिडिङ्का।
याॽमिचिऎ काङ्का सेस्सि लाखॆॽमिम्पा सामुङ्र ङॆबुकिङ्का।”#खोम्मिम्पासाम् ४४:२२
37टर कानिऎ इघा चोब्न डुखा आङ्मा सिडि हाङ्स, आक्खा खानावाँ कानिऎ हेचाइखॆ मान्ठाभनॆ कानि खिरिस्टऎ नाम्नाम् पिसिडि। 38निवाँहाङ्मि नाम्नाम् पिसिॽमॆ खानावाँबाङ् कानि माङ्स फाक्मा हेसिनि कामानुङ् कॆ नुःर लेकुङ। सिखॆॽमॆ खानावाँऎ, हिङ्खामाऎ, निङ्वाँखाटॆखुबाचिऎ, बाखाटेम्पिऎ काइसॆ चॆक्मावाऎ, निवाँखाटॆखुबाचिऎ हाङ् चाप्चिऎ, आयु हाङ् वेन्डा सिन्डा टाहा खानावाँऎ, लावाबिहा चॆक्मावाऎ, 39मिट्टु नाम्फॽलिॽवा हाङ् पाट्टालाबिहा चॆक्मावाऎ हाङ् निवाँहाङ्ऎ मुमिम्पा होइढा खानावाँ माङ्ऎ स कानि फाक्बक्मा हेसिनि। मान्ठाभनॆ निवाँहाङ्ऎ खिरिस्ट येसु कानिमि पारभुबाङ् कानि नाम्नाम् पिसिडि।
ទើបបានជ្រើសរើសហើយ៖
रोमि 8: LBR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society
