रोमि 7
7
भ्यामि खानावाँ
1काङामि बुबुनानुसाचि, यायेॽमामि बारेबि आन्नॆ लेकाम्नि लोमॆ खानावाँ कॆ लेकुङ। मसॆ आन्नॆ यायेॽमाऎ एक्क याॽमि हिङ्चारढारि टेःॽन ठुबुकु लोमॆ खानावाँ लेकाम्निन। 2हाङ् ग खानावाँ वाप्माम् लागि ग खानावाँ खाङ्मा, एक्क मेॽनुङ्माऎ भ्या लॆःॽडु हाङ्ग, खोम् खिम्टाङ्पा हिङ्चारढारि खो यायेॽमा रक्न खोम् खिम्टाङ्पानुङ् ठुप्टिखॆॽमिम्पा लि। टर खोम् खिम्टाङ्पा लुक्खारा हाङ्ग, खो ठुप्भुङ्डुवॆ आक्क यायेॽमाऎ लोसिन्ट लॆःॽमा पाब्नि। 3गरहाङ्न, खोम् खिम्टाङ्पा चुभॆरक्न एक्क मेॽनुङ्माऎ होइक वाठाङ्पा नुङ् भ्या लॆ हाङ्ग, खोसॆ ब्याबिचारा लॆकु। टर खोम् खिम्टाङ्पान लुक्खॆडा हाङ्ग आक्क मेॽनुङ्माऎ आक्क यायेॽमा टिङ्मा पाब्नि हाङ् होइक वाठाङ्पा नुङ् भ्या लॆकु हाङ्स खोसॆ ब्याबिचारा लॆटुनि। 4मसॆ बुबुनानुसाचि, खिरिस्ट नुङ् सोरि आन्ना सङ्क यायेॽमामि लागि ग सिखॆडानि हाङ् आक्कमि ढुप्पाट्टबि माआनि। हाङ् सिखॆॽमिम्पाबाङ् हिङ्पॽमिम्पा खिरिस्ट नुङ् एक्क लिडानि। मसॆ कानि निवाँहाङ्मि ङारिङ्पि नुऎ योम्पक् मुहिकि। 5कानि याॽलि कानिमि सालुङ्बिऎ निवाँ रक्न पाइयुक्सि। हाङ् यायेॽमाऎ कानिमि निवाँबि चङ्पक्मिम्पा हिङ्वा नुङ्मा योम्पक् यिक्युक्सि। हाङ् आक्क योम्पक्ऎ कानि सिखॆॽमॆ लाम्फुबि टॆटि। 6टर ह कानि यायेॽमाबाङ् फाॽलिङ्खॆडि मान्ठाभनॆ कानि सक्पि ढुप्पाट्ट लॆखुबा आक्कमि लागि सिखॆडि। मसॆ ह याॽलि साप्मिम्पा यायेॽमाऎ लोसिन्ट कानिऎ निवाँहाङ्मि योम्पक् मुसिनि, टर सॆङ्सॆङॆ लावाबाङ्ऎ होइकन लाम्फुबाङ् खोम् योम्पक् मुकि।
यायेॽमाऎ कानिमि हिङ्वा खाङ्मिकि
7ह कानिऎ माल लोमॆ टा? माल् यायॆॽमान हिङ्वा नुङ्मा लॆऎ टा? आक्र हॆॽनॆ, टर यायॆॽमाऎ हिङ्वा माङ्रटा लोमॆ खानावाँ खाङ्मिटिङ्। मान्ठाभनॆ यायेॽमाऎ “आनॆ लोभा आलॆटॆ” ऎलोमिम्पा हाङ्ग लोभा लॆःॽमा काइसॆ यो लोमॆन काङॆ आलेखुबा लॆटुङ्। 8टर हिङ्वाऎ ग यायेॽमाबाङ् काङा चोब्न खालाहा लोभा लॆःॽमिटिङ्। गुबि काङॆ लोमा यकुङॆ खानावाँ चाइ माङ् भने काङाबि यायेॽमान मान्चु ग काङाबि हिङ्वाऎ योम्पक् मुमान आहेखुबा लॆटा। 9याॽलि यायेॽमाऎ लोमिम्पा खानावाँ मावाप्लेम काङा हिङ्चायुङ्सिङ्। टर हानाम् चाइ काङॆ यायेॽमा चिनिङ् हिङ्वामि चॆक्मावा काङामि हिङ्खामाबि टाआ, 10हाङ् काङा सिखॆॽमा सिट्टिङ्। मसॆ काङॆ ग खानावाँबाङ् माङ् चिनिङ् भनॆ काङाबि हिङ्खामा लाटॆॽमा लॆऎ यायेॽमाऎ लोमिम्पा खानावाँऎ ग लावाबि सिखॆॽमॆ खानावाँरे टॆटु। 11मान्ठाभनॆ काङा बङ्सिॽमामि लागि हिङ्वाऎ यायेॽमा यकु हाङ् सेरिङ्#उट्पाटि ३:१३ 12मरहाङ्स यायॆॽमा हाङ् आक्कसॆ लोमिम्पा खानावाँ सॆङ्सॆङॆ लॆ हाङ् आक्कबि साब्मिम्पा चोब्न खानावाँ चाइबानऎ हाङ् नुऎ लॆ। 13हाङ् माल नुऎ यायॆॽमाऎ काङा सेरिङ् कामानुङ् काहिकिहॆ टा? आक्र हॆॽनॆ, आक्क ग हिङ्वाऎ लाटॆॽमिम्पारे। का आब्डिक् टिमामि लागि हिङ्वा नुऎ यायेॽमा नुङ् टाआ। गरहाङ् हिङ्वाऎ काङा सेरिङ् हाङ् यायेॽमाऎ हिङ्वा चाइ एट्टान काइसॆ यो कामानुङ् खाङ्मुसु।
हिङ्वा नुङ् नुऎ निवाँ
14यायॆॽमा निवाँहाङ्ऎ लावाबाङ् पिॽमिम्पा कामानुङ् लेकि हाङ्स, काङा सालुङ्पि चुॽङॆसॆ हिङ्वाबि फोप्सिङा। 15हाङ् काङॆ माङ् नेन्चाकुङ् म चाइ लॆःॽङानि हाङ् माङ् चाइ सिच्चाकुङ् म योम्पक्न यिगुॽङा। टर काङा मान्ठा आक्र लॆःॽङॆ लोमॆ काङॆन मावाप्टिॽङा।#गालाटि ५:१७ 16गरहाङ् सिच्चाकुङॆ योम्पक् चाइ यिगुॽङा हाङ्ग काङॆ यायॆॽमान नुऎ मिकुङ। 17मसॆ आक्क पाइखुबा काङा हॆॽनॆ, आक्क चाइ काङा हङ्सि चुऎ हिङ्वान। 18काङा हिङ्वा याॽमि लिमिम्पासॆ काङा हङ्सि माङ्स काम्नुऎ खानावाँ माआ कामानुङ् कॆ लेकुङ। मसॆ काङॆ नुऎ योम्पक् यिक्मा मिकुङ्, टर आक्क लॆःॽहिङानि। 19मान्ठाभनॆ काङॆ लॆःॽमा मिनुॽङॆ नुऎ योम्पक चाइ मुङानि, टर लॆॽमा मिङ्ङानॆ काइसॆ योम्पक् चाइ काङॆ मुकुङ। 20ह काङॆ यिक्मा मिन्ङानॆ योम्पक् यिगुॽङा हाङ्ग म योम्पक् काङॆ यिक्मिम्पा हॆॽनॆ, टर काङा हङ्सि चुऎ हिङ्वाऎ यिक्मिम्पा यो।
21मसॆ काङॆ काम् हिङ्खामाबि योम्पक् यिगुकुवॆ चॆक्मावामि बारेबि माङ् चिनिङ् भनॆ काङॆ नुऎ योम्पक् यिक्मा मिनुॽङा, टर काङाबाङ् आक्कुब्न काइसॆ लि। 22का काङामि निवाँ हङ्सि निवाँहाङ्मि यायेॽमाबि चेन्चाःॽङा। 23टर काङाबि चाइ होइकन चॆक्मावाऎ योम्पक् यिक्मिम्पा कॆ खाङुकुङ। आक्क चॆक्मावा काम् निवाँ हङ्सि निवाँहाङ्मि यायेॽमा नुङ् खिक्। हाङ् काङा हङ्सि चुऎ हिङ्वाऎ काङा खोम् योम्पक् मुखुबा मुःॽङा। 24काङा निवाँबि खिक्कॆ मिनुॽङा। ग सिखॆखुबा हिङ्खामामि लाम्फुबि टॆखुबाबाङ् आसॆ काङा फागुॽङॆ? 25कॆ निवाँहाङ् ओहाक पिकुङ, येसु खिरिस्ट कानिम् पारभुऎ आक्क योम्पक् यिगुकु। मसॆ कामि निवाँबाङ्न निवाँहाङ्मि यायेॽमा टिङ्मा मिनुकुङ, टर काङामि निवाँबि काइसॆ निवाँ सङ्क चुऎसॆ हिङ्वाऎ लोमिम्पा योम्पक् हसहस यिगुॽङा।
ទើបបានជ្រើសរើសហើយ៖
रोमि 7: LBR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society
