रोमि 13
13
टुङ्घङ्पाचिमि ढुप्पाट्टबि पेन्मॆ
1चोब्न याॽमिचिऎ खोचि सक्पि हाङ्डाम् लॆखुबा टुङ्घङ्पाऎ लोमिम्पा खेम्मा लॆ मान्ठाभनॆ खोचि टाङ्पॆ टाङ्पाबाङ्न आक्क ढुप्पाट्टबि पेन्मिम्पा हॆॽनॆ, टर निवाँहाङ्एन खोचि आक्क ठालबि युङ्मिम्पा लि। 2मसॆ आसॆ चाइ खो सक्पि हाङ्डाम् लॆखुबा टुङ्घङ्पाऎ लोमिम्पा खेमुनि खोसॆ निवाँहाङ्ऎ आक्क ठालबि युङ्मिम्पा टुङ्घङ्पामि खानावाँ खेमुनि। आक्र लॆखुबा याॽमिचिऎ डान्डा टक्चाकुचि। 3हाम्पॆ याॽमिचिऎ चाइ नुऎ योम्पक् यिगुकु खोसॆ खो सक्पि हाङ्डाम् लॆखुबा टुङ्घङ्पाचि नुङ् किसिमा पाब्नि। टर खोसॆ काइसॆ योम्पक् यिक्मॆ पाइकु हाङ्ग खो किसिमा लॆ। मसॆ आन्ना हाङ्डाम् फॆक्खुबा नुङ् मॆङ्किसिरे पाइमा मिनुकानि हाङ्ग, नुऎ योम्पक् यिगानॆ हाङ् हाङ्डाम् लॆखुबाचिऎ आन्ना ङेबुकानि। 4मान्ठाभनॆ टुङ्घङ्पाचि निवाँहाङ्मि योम्पक् मुखुबाचि यो। खोचि आन्नामि नुऎमि लागि निवाँहाङ्ऎन पाङ्हाङ्मिम्पा याॽमिचि रेम। टर आन्ना काइसॆ योम्पक् मुकानि हाङ्ग खोचिनुङ् आन्ना किसिमा लॆकानि मान्ठाभनॆ खोचिनुङ् आन्ना डान्डा पिॽमॆ ढुप्पाट्ट चु। खोचि निवाँहाङ्ऎ काइसॆ योम्पक् यिक्खुबाचि डान्डा पिॽमामि लागि निवाँहाङ्ऎ पाङ्हाङ्मिम्पा याॽमिचि रेम। 5मसॆ आन्ना खोचिऎ डान्डा पिकि कामानुङ् टेःॽन हॆॽनॆ, टर आन्नामि निवाँ नुऎ ठालबि युङ्मामि लागि सङ्क खोचिमि ढुप्टाबि पेन्मा लॆकानि।
6मसॆॽन आन्नॆ यावॆङ्ग फङ्मा लॆकानि मान्ठाभनॆ टुङ्घङ्पाचिऎ खोचिऎ यिक्मा लॆऎ योम्पक् निवाँ टिःमानुङ् योम्पक् यिगुक्मि। 7आन्नॆ आसा आसा फङ्मा चु, म चोब्न फङ्इटानॆ। हाङ् यावॆङ्ग फङ्मा चु हाङ्ग फङ्इटाम्नॆ। हाङ् आन्नॆ होइक हाङ्टेम्बाङ् लाटॆॽमिम्पा खानावाँमि यावॆङ्ग फङानॆ। हाङ् स्यामिॽमा लॆःॽमिहा याॽमिचि स्यामिटाम्चिनॆ हाङ् ङेःप्मा लॆःॽमिहा याॽमिचि ङेबाम्चिनॆ।
नाम्नाम् पिस्सिपॆ चुमॆ
8एक्कसॆ होइक नाम्नाम् पिसिॽमॆ योम्पक्बाङ् होइढा खानावाँमि सिङि आन्नाबि आसिॽल। मान्ठाभनॆ आसॆ चाइ होइढा याॽमिचि नाम्नाम पिसिकुचि खोसॆ निवाँहाङ्मि यायेॽमाऎ लोकुवॆ खानावाँ खेम्कु। 9यायेॽमाऎ गर लोकु, “आनॆ ब्याबिचारा लॆःॽमा, याॽमि सेॽमा, खुमा, हाङ् आनॆ लोभा लॆःॽमा फॆन्नि।”#पारास्ठान २०:१३; यायेॽमा ५:१७-१९; २१ टर “टाङ्पामि गॆअङ्मॆअङ्हा याॽमिचि टाङ्पा रक्न नाम्नाम पिसिटॆचॆ”#लेबि ५:१८ लोमॆ गरहा खानावाँ कानिऎ खेमि हाङ्ग, मिट्ठाहा याॽलिहा हाङ् होइढा खानावाँ सङ्क खेम्मिम्पा लि। 10हाङ् कानिऎ होइढा याॽमिचि नाम्नाम पिस्सिमि हाङ्ग, कानिऎ खोचि काइर लॆःॽमॆ खानावाँन लिनि। मसॆ कानि हङ्सि नाम्नाम् पिसिॽमॆ निवाँ चु हाङ्ग, कानि निवाँहाङ्मि यायेॽमाऎ लोमिम्पा चोब्न खानावाँ लॆखुबा याॽमि लिकि।
11काङॆ लोमिम्पा खानावाँ खेमानॆ मान्ठाभनॆ कानिऎ याॽलि निवाँयुङ् लॆःॽमिम्पा लःबाङ् कानि फाक्मॆ लः मुबिॽन टाखॆॽमिम्पा लःबि हिङ्चाःडि लोमॆ खानावाँ लेकाम्नि। मसॆ आन्ना इम्टिखॆॽमिम्पाबाङ् हुम्पकानॆ। 12ग बाखाटेम् चाइ हिङ्वामि माॽयाक्टऎ डॆक्खॆडु, टर सॆॽलॽन डिना टा। मसॆ कानिऎ माॽयाक्टबि यिःक्मॆ कानिमि काइसाहा योम्पक् याइमा लॆ। हाङ् कानि लेन्टाऎ नुऎ योम्पक् मुसि परकियॆ। 13हाङ् कानि लेन्टा हिङ्चाखुबा याॽमचिऎ चोब्न याॽमिचिऎ खाङ्टक्मॆ गारि नुऎ योम्पक् टे यिक्मा लॆ। सालुङ्मि नुऎ मिन्मॆ खानावाँबि, सेङ्खेॽमाबि निवाँ आटिसियॆ, ब्याबिचारा आलॆटिये, खिमाटुमा फॆन्नि हाङ् होइढाचि नुङ् सिरि लॆःॽमा फॆन्नि। 14टर कानि कानिमि पारभु येसु खिरिस्ट रक्न पाइटिऎ हाङ् कानिमि सालुङ्ऎ यगुकुवॆ खानावाँ पोट्टा निवाँ आटिसियॆ।
ទើបបានជ្រើសរើសហើយ៖
रोमि 13: LBR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society
