रोमि 12
12
आन्नामि हिङ्खामा निवाँहाङ् पिट्टाम्नॆ
1मसॆ काम् बुबुनानुसाचि, निवाँहाङ्ऎ कानि ढ्या नाम्नावाँ पिॽमिम्पासॆ, कॆ आन्ना नुःर लोकानि, आन्नॆ टाङ्पान निवाँहाङ्मि लागि हिङ्चामा नुङ् पिइटाम्नॆ आक्क चाइ सॆङ्सॆङॆ हाङ् निवाँहाङ् चेन्चामिक्खुबा योम्पक् रेम। आन्नॆ निवाँहाङ् चुङ्मा लॆऎ चाइबानऎ लाम्फु सङ्क गन यो। 2हाङ् आन्ना बाखाटेम्बिहा याॽमिचिर पाइमा फॆन्नि, टर आन्नामि निवाँबि निवाँहाङ् योम्पक् मुमा पिट्टाम्नॆ हाङ् खोसॆ आन्ना एक्क उम्चङ् याॽमि मुकानि। आक्र लॆटानि हाङ्ग, निवाँहाङ्ऎ आन्नामि लागि मिॽमिम्पा खानावाँ वाप्हिकाम्नि। आक्क खानावाँ चाइ नुऎ, निवाँहाङ् हाङ्हाङ् मुखुबा नुङ् चाइबानऎ लि।
3निवाँहाङ्मि नाम्नावाँ टक्चाडुङॆसॆ कॆ आन्ना चोब्न नुःर लोकानि, आन्ना मान्टक्मा याॽमिर मबाङ्; नुऎ लॆःॽङा आमिनानॆ। टर निवाँहाङ्ऎ आन्ना पिॽमिम्पा निवाँयुङ् आनुसारा आन्ना मान्टक्मा याॽमि लॆकानि मरक्टे मिॽलाआनॆ। 4मान्टहाङ् कानिमि एक्क सालुङ्मि होइढा ओइर भाग चु हाङ् आक्खा चोब्न भागमि टाटाङ्पामि होइक होइकन योम्पक् चु, 5गरहाङ्न कानि डिरिक् लॆकि हाङ्स, खिरिस्टबि कानि एक्कन हाङ् कानि चोब्न एक्कमि लागि होइक पाप्खुबा याॽमिचि यो। हाङ् एक्क सालुङ्बि होइढा भाग लिसिन्टक्न, कानि खिरिस्टमि एक्क सालुङ्बिऎ भाग यो। 6हाङ् निवाँहाङ्ऎ खोम् नाम्नावाँबाङ् कानि चोब्न होइक होइकन बारडाना पिडि। आक्खा बारडाना कानिऎ नुःर फॆरुम्यॆ। मसॆ एक्कसॆ निवाँहाङ्बाङ् यामुमॆ बारडाना टक्चाडु हाङ्ग, निवाँहाङ्ऎ खो पिॽमिम्पा निवाँयुङ् रक्न खो यामुमा लॆ। 7हाङ् आसॆ चाइ होइढा याॽमिचि पाइबाक्मॆ बारडाना टक्चाडु, खोसॆ होइढाचि नुःर मुबाक्मा लॆ। हाङ् आसॆ चाइ होइढाचि चिन्मॆ बारडाना टक्चाडु, खोसॆ नुःर चिन्मा लॆ। 8हाङ् आसॆ चाइ होइढा याॽमिचि खानावाँऎ चॆकुवॆ मुमॆ बारडाना टक्चाडु, खोसॆ आक्क योम्पक् यिक्मान लॆ। हाङ् आसानुङ् चाइ हाचामॆ बारडाना चुबिकु, खोसॆ आक्क योम्पक् निवाँ हङ्सिॽयुबाङ् लॆःॽमा लॆ। हाङ् आसानुङ् चाइ होइढाचि लाम्फु खाङ्मिॽमॆ बारडाना चु, खोसॆ आक्क योम्पक् निवाँऎ हेर लॆःॽमा लॆ। हाङ् नाम्नाम् पिसिखुबा डारडाना चुखुबॆ चेन्चामानुङ् नाम्नाम् पिसिॽमा लॆः।
9आनॆ होइढा याॽमिचि नाम्नाम पिस्सिॽमिम्पा खानावाँ चाइबानऎ लिमा लॆः। काइसॆ खानावाँ सिच्चाआम्नॆ। टर माङ् चाइ नुऎ लॆ म खानावाँ टिङ्ढाङ्साम्नॆ। 10आन्नामि लुम्पि एक्कसॆ होइक टाङ्पाम् बुबुनानुसाचिर नाम्नाम् पिसिपे चुआनॆ। टाङ्पाबाङ्स होइढाचि ङेबाम्चिनॆ। 11हाङ् एट्टुबाङ् आलिसानॆ। हेर योम्पक् मुसानॆ हाङ् आनामि चोब्न निवाँऎ पारभुमि योम्पक् यिगानॆ। 12आन्नॆ हुङुकाम्नॆ खानावाँबि आन्ना चेन्चाआनॆ। डुखाबि सङ्क आन्नॆ निवाँ सेॽमा फॆन्नि हाङ् पारठाना लॆढाङ्सानॆ। 13हाङ् मुबाक्मा लॆःॽमिहा निवाँहाङ्मि याॽमिचि मुबाकाम्चिनॆ। हाङ् आनामि खिम्पिऎ लङ्भॆरॆङ्मा होइढा टाबाङ्चिमि लागि सङ्क हेम्बक्मा लॆ। 14हाङ् आन्ना काइर डुखा पिक्खुबा याॽमिचि आसिका पिट्टाम्चिनॆ। खोचिबि चाप्हिमा सिॽल आलोसाम्चिनॆ, टर खोचिमि लागि पारठाना लॆटानॆ। 15हाङ् चेन्चामाबि चुखुबाचिनुङ् चेन्चाआनॆ हाङ् हाःब्खुबाचिनुङ् हाबानॆ। 16चोब्ननुङ् टङ्चासे पेनानॆ। कायाङ्पा आमिनानॆ। चोब्न याॽमिचि नुङ् मिःछुपा लॆङानॆ हाङ् चोब्न खानावाँ लेक्खुबा आलॆङानॆ।
17एक्कसॆ आन्ना काइर लॆटानि हाङ्ग, खो काइरन आलॆटाम्नॆ। टर चोब्न याॽमिचिमि ङारिङ्पि नुऎ योम्पक् यिगानॆ। 18हाङ् हेरढारि चोब्न याॽमिचि नुङ् सान्टिबि पेनानॆ। 19बुबुनानुसाचि, आन्नॆ सङ्क सिरि ऎन्मॆ योम्पक् आयिगानॆ। खोचि निवाँहाङ्मि सिरिबिऎ डान्डामि लागि याइटाम्चिनॆ। मान्ठाभनॆ निवाँनेन् साब्चिराबि पारभुऎ गरहाङ् लोडु, “काङॆ सिरि एन्मॆ योम्पक् यिगुकुङ। काइर लॆखुबाचि डान्डा पिॽमॆ काम योम्पक्न यो।” 20बोरु निवाँनेन् साब्चिराबि गरहाङ् लोसिन्ट, “आना सिच्चाखुबा याॽमिचि साक्मेन्चा लॆःॽमि हाङ्ग, चामा पिट्टाम्चिनॆ हाङ् खोचि वाइमेसिडुचि हाङ्ग, डुङ्मा पिट्टाम्चिनॆ। खोचि सक्पि आन्ना आक्रहाङ् पाइटानि हाङ्ग, खोचिऎ आन्ना सक्पि यिक्मिम्पा योम्पक्बि खोचि ङेसिखॆःक्मि।” 21हाङ् काइसॆ खानावाँऎ आन्ना आहेचाइटानिर टर नुऎ योम्पक् यिगानॆ हाङ् काइसॆ खानावाँ हेचाहिकाम्नि।
ទើបបានជ្រើសរើសហើយ៖
रोमि 12: LBR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society
