सेन्चि 2
2
एफिसिबिऎ मान्डालिमि लागि खानावाँ
1खोसॆ काङा लोसिङ्, “एफिसिमि मान्डालिबिऎ निवाँखाटॆखुबामि लागि ग खानावाँ साबॆ।”
“इघा खानावाँ वाङ्चि साङ्कॆम्मा चुब्ठिङ् हुक्पि खिङ्खुबा हाङ् वाङ्चि फिःइयामि ओप्लिङ् युङ्ठाम् लुम्पि लाम्ढुखुबा कॆ लोमिम्पा यो।” 2काङॆ आन्नामि चोब्न योम्पक् लेकुङ्, आन्नॆ निवाँ टिमानुङ् यिक्मिम्पा योम्पक् हाङ् आन्नॆ आङ्से हुङ्मिम्पा खानावाँ सङ्क लेकुङ। हाङ् आन्नॆ काइसॆ याॽमिचि आङाम्चिनिनि लोमॆ खानावाँ कॆ लेकुङ। हाङ् सॆःक्ढुङ्पाचि ग हॆॽनॆ, टर टाङ्पा सॆःक्ढुङ्पाङा काटिखुबाचि आक्खाचि आन्नॆ ठाःक्मानुङ् हुन्नहाचि कामानुङ् लेटःक्डाम्नि। 3हाङ् आन्नॆ काङाबि निवाँयुङ् लॆःॽमिम्पासॆन एट्टान डुखाबि सिडानि हाङ् खोप्चिनाँवाँ आङ्डाम्नि हाङ् आन्नॆ काङा मायाइटिॽङानि लोमॆ खानावाँ काङॆ लेकुङ्।
4“टर आन्ना काइर लोमॆ मिःक्म खानावाँ काङानुङ् चु। आन्नॆ याॽलर नाम्नाम् पिस्सिॽमा याइडाम्नि। 5मसॆ आन्ना मान्टहाङ् नासॆलिसानिहा लोमॆ मिॽलापाम्नॆ। आन्नामि हिङ्वाबाङ् ऎम्पकानॆ हाङ् याॽलि यिक्मिम्पा रक्न योम्पक् यिगानॆ। आन्ना आन्नामि हिङ्वाबाङ् ऎम्पकानिनि हाङ्ग, काङा आन्नाबि टाःॽङाहाङ् आन्नामि ओप्लिङ् युङ्ठाम् रक्मा मान्डालि आक्कमि ठालबाङ् लाबहाङ्पिकानि। 6टर आन्नानुङ् एक्क काम्नुऎ खानावाँ चु। काङॆ सिच्चोकुङॆ आक्खा निकोलाइटास लोमाहा याॽमिचिमि योम्पक् आन्नॆ सङ्क सिच्चोकाम्नि।
7“आसाम् नाबाक् चु खोचिऎ निवाँहाङ्मि लावाऎ मान्डालि माङ् लोमॆ पाइकुवॆ लोमॆ निवाँबि मिॽलाआम्नॆ।
“आसॆ काइसॆ खानावाँ हेचाकु, काङॆ खो निवाँहाङ्मि चोप्लिङ्बि चुऎ हिङ्खामा सिकुवॆ बोटाबाङ् चामॆ ढुप्पाट्ट पिकुङ्।”
इस्मारना मान्डालिमि लागि खानावाँ
8“इस्मारनामि मान्डालिबिऎ निवाँखाटॆखुबामि लागि ग खानावाँ साबॆ।
“इघा खानावाँ चाइ याॽलऎ बाङ्न चुखुबा हाङ् डॆङ्पि सङ्क लिःखुबामि यो। काङा सिखॆम्पा लॆटिङ् हाङ् होइखेपा सङ्क हिङ्पःडिङ्। 9काङॆ लेकुङ् याॽमिचिऎ आन्ना डुखा पिडानि हाङ् आन्ना माङ्स माआनिहा लॆकानि। टर चाइबान मिॽलामार आन्ना निवाँहाङ्मि ङारिङ्पि चुचाखुबा लॆकानि। हाङ् याहुडिङाये काखुबाचिऎ आन्ना काइर लोमिम्पा सङक् काङॆ लेकुङ्। खोचि याहुडिचि हॆॽनॆ, टर साइटानमि याॽमिचि रेम। 10हाङ् आनॆ आङ्मा परक्मिम्पा डुखा नुङ् आकिसिऎ। कॆ आना लोक्ना, आनामि निवाँयुङ् ठाःक्मामि लागि साइटानऎ ऎॽवा याॽमिचि सॆक्चिम्पि सॆक्मा परःक्डु। हाङ् आन्नॆ एपङ् डिनाढारि डुखा आङ्मा लॆ। आना सिखॆॽलढारिन सङ्क काङा निवाँयुङ् लॆःॽङॆ हाङ् कॆ आना हानाम्स लुक्खॆॽनॆ हिङ्खामामि नाम्याक् पिक्खाना।
11“आसाम् नाबाक् चु खोचिऎ निवाँहाङ्मि लावाऎ मान्डालि माङ् लोमॆ पाइकुवॆ लोमॆ निवाँबि मिॽलाआनॆ।
“काइसॆ हेचाखुबाचिऎ होइखेपा सिखॆॽमॆ डान्डाबि सिॽमा पाब्पानिनि।”#सेन्चि २०:१४
पारगामाम मान्डालिमि लागि खानावाँ
12“पारगामाम् मान्डालिबिऎ निवाँखाटॆखुबामि लागि ग खानावाँ साबॆ।
“इगा खानावाँ चाइ हिच्चि पोट्टान येम्कुवॆ फेया खिन्खुबा काङामि यो। 13काङॆ लेकुङ् आन्ना चुकानिहा ठाल साइटानऎ हुक्पि लाडु हाङ् आन्नॆ काङा निवाँयुङ् लॆःॽडिङ्नि हाङ् आन्नॆ काङा मायाइटिॽङानि। काम खानावाँ निवाँ टिमानुङ् खेम्मिखुबा एन्टिपास साइटान पेनुऎ आन्ना चुकानिहा हाटाबिॽन याॽमिचिऎ सेरुचि हाङ्स आन्नॆ काङा निवाँयुङ् लॆःॽमा मायाइटिङ्नि। 14टर आन्ना काइर लोमॆ मिःक्म खानावाँ काङानुङ् चु। आन्नामि लुम्पि ऎॽवाचिऎ बालाम लोमॆ निवाँहाङ्मि हुन्नऎ खानावाँ लोखुबा याॽमिमि खानावाँ टिङुकुचि।#ङेःप्मा २२:५,७ खोसॆ इस्राएलि याॽमिचि हिङ्वा योम्पक् यिगुचिर कामानुङ् मुर्टिबि सङ्टिमिम्पा चामा ठका हाङ् ब्याबिचारा लॆःॽमॆ योम्पक् मोआबबिऎ हाङ् बालाक चिनु। 15गरहाङ्न आन्नामि लुम्पि ऎॽवाचिऎ निकोलाइटस लोमाहा याॽमिचिमि खानावाँ टिङ्खुबा चुकानि। 16मसॆ आन्ना आक्रहा आम्नि हिङ्वाबाङ् ऎम्पकानॆ। हॆॽनॆ हाङ्ग काङा आन्नाबि सॆॽलन टाॽङा हाङ् काङाम् याबाङ् आम्पऎ खानावाँबाङ् खोचिनुङ् खिःॽङा। आक्क काङामि खानावाँ चाइ फेया रक्मान लॆ।
17“आसाम् नाबाक् चु खोचिऎ निवाँहाङ्मि लावाऎ मान्डालि माङ् लोमॆ पाइकुवॆ लोमॆ निवाँबि मिॽलाआनॆ।
“हाङ् आसॆ चाइ काइसॆ खानावाँ हेचाकु काङॆ खोचि मान्ना लोमॆ पारुबि चुम्मिम्पा चामॆ ठका पिकुङ्चि।#पारास्ठान १६:१४ हाङ् काङॆ खो उम्चङ् निङ् साप्मिम्पा एक्क बिऎ लुङ्कॽवा पिकुङ्। हाङ् आक्क निङ् पिॽमिम्पा याॽमिबाङ् होइढा आसॆस म लेसुचिनि।”
ठिआटिराबिऎ मान्डालिमि लागि खानावाँ
18“ठिआटिरा मान्डालिबिऎ निवाँखाटॆखुबामि लागि ग खानावाँ साबॆ,
“ग खानावाँ मिः हाऎ रऎ मिक् लॆऎ हाङ् लाङ् एट्टान हाऎ काँसा रक्मान लॆखुबा निवाँहाङ्मि पासामि यो। 19आन्नामि चोब्न योम्पक् काङॆ लेकुङ्। काङॆ आन्नामि नाम्नाम् पिसिॽमॆ खानावाँ, निवाँयुङ्, एक्कसॆ होइक पाइबाक्मिम्पा खानावाँ हाङ् आङ्मिम्पा खानावाँ कॆ लेकुङ्। हाङ् याॽलिऎबाङ्स ह आन्ना नुःर पाइमॆ पाइकानि लोमॆ सङ्क लेकुङ्। 20टर आन्ना काइर लोमॆ एक्क खानावाँ काङानुङ् चु। आन्नॆ काङा निवाँहाङ्मि खानावाँ लोखुबाङाये काटिखुबा इजबेल लोमॆ मॆॽनुङ्मामि हुन्नऎ खानावाँ फुमिःडाम्नि। हाङ् आक्कसॆ काङामि योम्पक् मुखुबाचि फोःप्सिॽमानुङ् ब्याबिचारा लॆःॽमॆ योम्पक् हाङ् मुरटिबि सङ्टिॽमिम्पा चामा ठका चामा चोन्पकुचिमि। 21काङॆ आक्क उम् हिङ्वाबाङ् ऎम्पऎरु कामानुङ् हुङुङ्, टर खोसॆ आक्क योम्पक् यिक्मा मामिनु। 22खाङाम्नॆ, काङॆ खो टुक्मावॆ इम्ढॆॽमिकुङ् हाङ् खोनुङ् ब्याबिचारामि योम्पक् यिक्खुबाचि खोमि योम्पक् मायाइलढारि एट्टान ढ्या डुखाबि सिॽमिकुङ्चि। 23हाङ् काङॆ खो टिङ्खुबाचि सेरुकुङ्चि। हाङ् निवाँयुङ् लॆखुबा चोब्पसॆ काङान चोब्न याॽमिचिमि निवाँ नुङ् आक्कुबिहा खानावाँ वाप्खुबाङा कामानुङ् लेटकुचि। हाङ् आन्ना चोब्न काङॆ आन्नॆ यिक्मिम्पा योम्पक् आनुसारान पिॽमा लॆऎ खानावाँ पिक्खानि।
24“टर ठिआटिरा मान्डालिबि चुखुबाचिबि ऎॽवाचिऎ जिजाबेलमि खानावाँ माटिङ्टिटाम्नि। साइटानऎ खाङ्मिॽमिम्पा चुम्मिम्पा खानावाँ कामानुङ् जिजाबेलमि टिङ्खुबाचिऎ इमिम्पा खानावाँबि आन्नॆ निवाँयुङ् मालॆटाम्नि। मसॆ होइढा खानावाँ आन्ना सक्पि येट्टिङानि। 25टर काङा फेरि माटारढारि आन्ना आन्नामि निवाँयुङ्पि नुःर पेनानॆ। 26-27हाङ् आसॆ हेचाकु हाङ् सिखॆॽलढारिन काङॆ लोमिम्पा आनुसारा पाइ, काङॆ खो काम आपाऎ काङा ढुप्पाट्ट पिॽमिम्पा रक्न ढुप्पाट्ट पिकुङ्। काङॆ खो चोब्न सामॆक् सक्पि ढुप्पाट्ट पिकुङ्। हाङ् खोसॆ एक्क चॆक्चिमि टोम्राङ्ऎ बाखामि सिब्बु पगिन्ट पक्मानुङ् आक्खा याॽमिचि सक्पि ढुप्पाट्ट लॆकु। 28हाङ् खोसॆ नाम्सऎ साङ्कॆम्मार हाऎ ढुप्पाट्ट टक्चाकु।#खोम्मिम्पासाम् २:८
29“आसाम् नाबाक् चु खोचिऎ निवाँहाङ्मि लावाऎ मान्डालि माङ् लोमॆ पाइकुवॆ लोमॆ निवाँबि मिॽलाआनॆ।”
ទើបបានជ្រើសរើសហើយ៖
सेन्चि 2: LBR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society