सेन्चि 1
1
1ग साब्चिराबि निवाँहाङ्ऎ येसु खिरिस्ट खाङ्मिॽमिम्पा खानावाँ साप्डा। ह सॆॽलन लिमा परक्मिम्पा खानावाँ निवाँहाङ्मि योम्पक् मुखुबाचिऎ लेसुचिर कामानुङ् येसु खिरिस्टऎ खोम् निवाँखाटॆखुबा खोम् योम्पक मुखुबा युहान्नाबि पाङ्हाङ्सु। 2हाङ् काङा युहान्नाऎ येसु खिरिस्टमि चुमॆक्सङ्मि बारेबि खाङ्मिम्पा हाङ् खेम्मिम्पा चोब्न खानावाँ नुःर इःडुङ्। येसु खिरिस्टऎ काङा खाङ्मिॽमिम्पा निवाँहाङ्मि चाइबानऎ खानावाँ इघान।
3हाङ् निवाँहाङ्बाङ् टाडॆ ग खानावाँ होइढा याॽमिचिमि लागि पाढालॆपिखुबा हाङ् आक्क खानावाँऎ लोमिम्पा खेम्खुबाचि हाङ् आक्रहाङ्न पाइखुबाचि निवाँहाङ्ऎ आसिका पिकुचि मान्ठाभनॆ इघा खानावाँ सॆॽलन लि।
वाङ्चि मान्डालि युहान्नाऎ स्यामिॽमिम्पा
4-5काङा युहान्नाऎ ग साब्चिरा एसिया छेटाराबि चुखुबा वाङ्चि मान्डालिचि साप्मेपाइकुङ्। याॽलऎ बाङ्न चुऎ हाङ् ह सङ्क चुऎ हाङ् डॆङ्पि सङ्क टाखुबा निवाँहाङ् हाङ् हानाम्स हाङ्पेन्ठाम ठाल कॆक्पि पेन्खुबा वाङ्चि लावा नुङ् येसु खिरिस्टऎ आन्ना नाम्नावाँ नुङ् सान्टि पिट्टानिर। येसु खिरिस्टऎ इमिम्पा चोब्न खानावाँबि खो निवाँयुङ्मा लॆ। खो सिखॆॽमिम्पाबाङ् हिङ्पॽमिॽमिम्पाचिबि चोब्बाङ् याॽलिऎ लॆ, हाङ् खो बाखाटेम्बिहा हाङ्चिमि सङ्क हाङ् यो।
हाङ् येसुऎ कानि नाम्नाम् पिसिकि हाङ् खोसॆ खोम् हारि अङ्मिॽमानुङ् कानि कानिमि हिङ्वाबाङ् फाःक्डि। 6खोसॆ कानि निवाँहाङ् खोम् आपामि योम्पक् मुखुबा एक्क याटाङ्पामि जाटि मुःसि।#पारास्ठान १९:६ येसु खिरिस्टमि निङ्लावा हाङ् चॆक्मावा हानाम्स लिढाङ्र। आमेन।
7खाङाम्नॆ, येसु खिन्डुमाबि टाः हाङ् चोप्पसॆ खो खाङ्टकुचि। खो सेस्सि कुरुसाबि कॆङ्खुबा चोब्नऎढारि खो खाङ्टकुचि। हाङ् बाखाटेम्पिहा चोब्न याॽमिचि खो खाङ्मानुङ् हाःबुक्मि। चाइबान गरहाङ्न लिर। आमेन।#डानियाल ७:१३; मट्टि २४:३०; मारकुस १३:२६; लुका २१:२७; १ ठेसलोनिकि ४:१७
8पारभु निवाँहाङ् गर कासा, खो चाइ खो याॽलिऎबाङ्न चुआ हाङ् ह सङ्क चुः हाङ् डॆङ्पि सङ्क लि।#पारास्ठान ३:१४ “काङा आल्फा हाङ् ओमेगाङा,” खोमि चॆक्मावा होइढा खानावाँबाङ् सङ्पि चु।
येसु खिरिस्टमि सेन्चि
9निवाँयुङ् लॆखुबा काङा आन्नामि बुबु युहान्ना रेम। हाङ् आन्नॆ रक्न काङॆ सङ्क येसुमि हाङ्डाम्पिहा याॽमिचिबि टाऎ डुखा आङ्मॆ पाइकुङ्। काङॆ निवाँहाङ्मि खानावाँ हाङ् येसु खिरिस्टमि बारेबि चुमॆक्सङ् पिॽमिम्पासॆ याॽमिचिऎ काङा पाड्मोस यिॽमॆ योवाऎ ऎक्सिडुवॆ ठालबि सॆक्ढामिम्पा लॆटिङ्मि। 10पारभु चुङ्मॆ डिनाबि काङाबि सॆङ्सॆङॆ लावा टाआ हाङ् काङामि डॆङ्कॽवा पोट्टा एक्क पॆँपॆँलिमामि रक्मान ढ्या साम्ला काङॆ खेमुङ। 11आक्क साम्लाऎ गर लोसिङ, “आनॆ माङ्माङ् खाङ्कुना, आक्खा खानावाँ एक्क साब्चिराबि साबॆहाङ् एफिसास, इस्मारना, पारगामाम, ठिआटिरा, सार्डिसा, फिलाडेल्फिया नुङ् लाउडिकिया लोमॆ हाटाबि चुऎ वाङ्चि मान्डालिमि लागि आक्क साब्चिरा पाङ्हाङ्सॆ।”
12हाङ् काङानुङ् यामुखुबा आसार कामानुङ् काङा ऎम्पकिङ्हाङ् खाङमार, काङॆ वाङ्चि फिःइयामि ओप्लिङ् युङ्ठाम खाङुङ। 13हाङ् काङॆ आक्क ओप्लिङ् युङ्ठाम् ठालमि लुम्पि याॽमिमि पासा रक्मान एक्क याॽमि खाङ्टकुङ् खोसॆ मिम्मु लाङ्सुॽवाढारिन चे चाङ्मिम्पा लॆटा हाङ् सॆङ्कॆरॆक्बि फिःइयामि हन्डङ् हिक्मिम्पा लॆःटा।#डानियाल ७:१३; १०:५ 14खोम् निङ्टवाँबिऎ टाङाक खाप्सिक हाङ् नाङ् रक्मा बिॽयाक्टऎ लॆटा। हाङ् खोम् मिक् चाइ मिःमि ज्वाला रक्न हामिम्पा लॆटा। 15हाङ् खोम् लाङ् मिःबि डिग्मिम्पा काँसारॽऎ हाऎ लॆटा हाङ् खोम् साम्ला चाइ अङुऎ ढ्या हङ्मामि साम्ला रक्मा लॆटा। 16हाङ् खोम चुब्ठिङ् हुक्ऎ वाङ्चि साङ्कॆम्माचि लाब्मिम्पा लॆटुचि। हाङ् खोम् याबाङ् हिच्चि पोट्टान येम्कुवॆ लॆऎ फेया आम्पॽमिम्पा लॆटा। हाङ् खोम् ङाचिक् लेन्टाऎ नाम्र हामिम्पा लॆटा। 17काङॆ खो खाङुङ्हाङ् काङा ग सिखारिन्टन लिमानुङ् खोम् लाङ्पि पोप्सिइङ्, टर खोसॆ खोम् चुब्ठिङ् हुक काङा सक्पि युङ्मानुङ् गर लोसिङ, “आकिसिऎ, काङा चोब्न खानावाँ मुखुबाङा हाङ् लुक्पिखुबाङा यो। 18हिङ्चाखुबा काङान। काङा सिखॆम्पा लॆटिङ्, टर खाङानॆ, चोब्न लःमि लागि काङा हिङ्पःडिङ। हाङ् सिखॆॽमॆ खानावाँ नुङ् सिखॆखुबाचि पेन्ठाम् ठालबि ढुप्पाट्ट काङानुङ् चु।
19“मसॆ आनॆ माङ् खाङ्डुना हाङ् ह लिढाङ्मिम्पा हाङ् आक्क डॆङ्पि लिटाऎ खानावाँ साबॆ। 20आनॆ काङामि चुब्ठिङ् हुक्पि खाङ्डुनॆ वाङ्चि साङ्कॆम्मा हाङ् फिःइयामि वाङ्चि ओप्लिङ् युङ्ठाम्ऎ चुम्मिम्पा खानावाँ चाइ माङ्भनॆ, वाङ्चि साङ्कॆम्माचि चाइ वाङ्चि मान्डालिबिऎ निवाँखाटॆखुबाचि हाङ् वाङ्चि ओप्लिङ् युङ्ठाम्ऎ लोमा यकुवॆ खानावाँ चाइ वाङ्चि मान्डालि रेम।”
ទើបបានជ្រើសរើសហើយ៖
सेन्चि 1: LBR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society