फिलेमोन 1
1
1खिरिस्ट येसुमि नुऎ खानावाँ खेम्मिॽमिम्पाबि सॆक्चिम्पि सॆक्ढिङ्खॆम्पा काङा पावल हाङ् निवाँयुङ्बि काङ्कामि नुसा टिमोठिऎ, काङ्कामि नाम्नाम् पिसिॽमा लुऎ लाङ्काम् हाङ् योम्पक् मुबाक्खुबा फिलेमोन, 2हाङ् काङ्कामि मेॽनुङ्मा नुसा आप्फिया नुङ् काङ्का नुङ्न नुःर पाइखुबा लाङ्काम् आरखिपास नुङ् आनाम् खिम्पि खोम्खुबाचिमि लागि ग साब्चिरा साप्हाङमे पाइकुङ।#कालास्सि ४:१७ 3काङ्कामि निवाँहाङ् आपा नुङ् पारभु येसु खिरिस्टऎ आन्ना नाम्नावाँ नुङ् सान्टि पिट्टानिर।
पावलऎ ओहाक् पिॽमिम्पा हाङ् खोम् पारठाना
4फिलेमोन नुसा, काङॆ आनामि लागि पारठाना लॆःॽङार हानाम्स आना मिॽलासे काङॆ काम् निवाँहाङ् ओहाक् पिकुङ। 5मान्ठाभनॆ पारभु येसु सक्पि चुऎ आनाम् निवाँयुङ् हाङ् आनॆ निवाँहाङ्मि याॽमिचि नाम्नाम् पिस्सिमिम्पा खानावाँ कॆ खेम्ढाङ्कुङ। 6हाङ् आनाम् निवाँयुङ्बाङ् याॽमिचि नुङ् टङ्चामॆ खानावाँ पुःसे खॆॽल मसॆ कानि खिरिस्टबि चुमार लिऎ चोब्न काम्नुहा खानावाँ आनॆ काम्नुःर वाप्हिसे कामानुङ पारठाना लॆःॽङा। 7काम नुसा, आनाम् नाम्नाम् पिसिॽमॆ योम्पक्बाङ् काङा एट्टान चेन्चाडिङ् हाङ् निवाँबि हाङ्हाङ् मिन्डिङ् मान्ठाभनॆ आनॆ निवाँहाङ्मि याॽमिचिम् निवाँ हाङ्हाङ् मुःबिडुचिना।
ओनेसिमासमि लागि खानावाँ इपिॽमिम्पा
8मसॆॽन आनॆ निवाँयुङ् लॆखुबा याॽमिचि नाम्नाम् पिसिॽमिम्पासॆ आनॆ माङ् योम्पक् यिक्मा लॆऎ लोमॆ खिरिस्टबि लिमिम्पासॆ लोहिसाना हला। 9बोरु आना नाम्नाम् पिसिॽमिम्पा हाङ् खिरिस्ट येसुमि निङ्पि ह सॆक्चिम्पि सॆक्ढिङ्खॆॽमिम्पा काङा पासिङ् पावलऎ आना स्यामिसे लोःक्ना, 10आनॆ काम निवाँयुङ्पिऎ पासा ओनेसिमोस नाम्नाम् पिसिटॆ कामानुङ् लोःक्ना। काङा इग सॆक्चिम्पि खोम् निवाँयुङ्मि आपा लिडिङ।#कालास्सि ४:९ 11याॽल ओनिसिमास#१:११ गिरिक खाप्पि ओनिसिमास लोमिम्पा चाइ योम्पक् पिक्खुबा लोमिम्पा रेम। आनाम् लागि माङ्स योम्पक् आपिक्खुबा याॽमि लॆःॽयुक्सा, टर ह चाइ खो आनाम् नुङ् काम् लागिॽन योम्पक् पिक्खुबा याॽमि लिडा। 12खो आनाबि ऎन्हाङ्मेसिकुङ। खो चाइ काम लुङ्माबिऎ याॽमि यो। 13काङा नुऎ खानावाँ खेम्मिॽमिम्पासॆ सॆक्चिम्पि सॆक्ढिङ्खॆमिम्पा लॆटिङ्र खो काङॆ कानुङ्न युङ्मा मिट्टुङ् मान्ठाभनॆ खोसॆ आनाम् साट्टबि योम्पक् मुबाक्ङा। 14टर आना मासिम्ले माङ्स योम्पक् यिक्मा मामिङ्ङा। मान्ठाभनॆ आनॆ काङाम् लागि काम्नुऎ योम्पक् मुमान लॆ लोमिम्पासॆ हॆॽनॆ, टर आनाम् निवाँ हङ्सिॽयुबाङ् लिर। 15आनानुङ् हानाम्स पेन्माम् लागि ओनिसिमास ऎच्छक्मि लागि फाक्मिम्पा हला। 16हयॆबाङ् मरक् खो योम्पक् मुखुबा याॽमि टेः हॆॽनॆ, टर योम्पक् मुखुबा बाङ्स खो निवाँयुङ् लॆखुबा नाम्नाम् पिसिॽमा लुऎ एक्क नुसा यो। खो काम् लागि एट्टान नाम्नाम पिस्सिमिम्पा नुसा लॆ। हाङ् आनाम् लागि स खो योम्पक् मुबिॽमाबि नुङ् पारभुबि एट्टान नाम्नाम् पिसिॽमा लुऎ याॽमि लिः हला।
17मसॆ आनॆ काङा योम्पक् मुबाक्खुबा एक्क लाङ्काम् मिॽलाङाना हाङ्ग खोसॆ काङा रक्न नुःर लॆटॆ। 18खोसॆ आनाम् काइर लॆपिडा हाङ्ग गर माङ् फङ्मालॆहा खानावाँ चु हाङ्स आक्क काम निङ्पि युङ्पिॽङॆ। 19काङा पावलमि हुगॆॽन ग साब्चिरा साःब्डुङ। आक्खा सिङि कॆःॽन फङ्पिकुङ। काङॆ आना निवाँहाङ्मि लाम्फुबि लाम्ढुमा चिन्मानुङ् आना सक्पि काङॆ टिमिम्पा सिङिमि खानावाँ लोढाङ्मा ग पाब्नि। 20मसॆ नुसो, पारभुबि काम लागि सङक गर लॆपिॽङॆ हाङ् खिरिस्टबि काम निवाँ हाङ्हाङ् मुबिॽङॆ कामानुङ् मिङ्ङा।
21काङॆ आना ङाग्मिम्पाबाङ्स डिरिक् आनॆ मुबिङाना लोमॆ वाप्से ग साब्चिरा साप्मे पाइकुङ। 22हाङ् होइक खानावाँ चाइ मान्ट हाङ्स काम् लागि टाबाङ् पेन्ठाम एक्क ठावाँ टङ्पिङॆ, मान्ठाभनॆ आन्नामि पारठाना निवाँहाङ्ऎ खेम्कु मिन्ङा हाङ् का सङ्क आन्नाबि टाहिङा। 23येसु खिरिस्टमि निङ्पि काङानुङ् सेक्चिङ्पि सॆक्ढिङ्खॆॽमिम्पा इपाफारासऎ आना स्यामिडा।#कालास्सि १:७; ४:१२ 24हाङ् आक्रहाङ्न कानुङ्न योम्पक् यिक्खुबाचि मारकुस, आरिस्टिखास, डेमास नुङ् लुकाऎ सङ्क स्यामिडा यो। 25पारभु येसु खिरिस्टमि नाम्नावाँ आन्नाबि लिर।
ទើបបានជ្រើសរើសហើយ៖
फिलेमोन 1: LBR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society