हिबुरु 12
12
निवाँहाङ् कानिमि आपा
1कानिम् लागि ग कानिम् गॆअङमॆअङ्न निवाँयुङ् लॆखुबाचिम् हिङ्खामामि बारेबि चुमॆक्सङ् पिक्खुबाचि ओइर चुःक्मि। मसॆ कानि लाम्ढुमिम्पा लाम्फुबि टाहा खोप्चिनावाँ हाङ् हाप्ठाम्खुबा हिङ्वा वेन्हाङ्सुम्ये हाङ् निवाँहाङ्ऎ कानि लाम्ढुमिम्पा लाम् नुःर निवाँ टिमानुङ् लाम्ढुसिये। 2हाङ् कानि निवाँयुङ् मिन्मिखुबा हाङ् आक्क यॆक्खुबा येसुबि निवाँ टिसिये। डुखा आङ्सिॽमाहाङ् आक्क डॆङ्पि टाऎ हाङ्हाङ्मि लागि खोसॆ कुरुसामि डुखा हाङ् ङेसिमा लुऎ खानावाँ सङ्क माङ्स मामिन्रे आङु। ह खो ढ्या निवाँहाङ्मि पेन्ठाम् ठालमि चुप्ठिङ् पोट्टा पेन्डा।
3आक्रवॆॽलि सिच्चामॆ खानावाँ हिङ्वा याॽमिचिबाङ् आङ्खुबा येसु निवाँबि मिॽलाआनॆ खोसॆ खो हिङ्वा याॽमिचिऎ खो काइर लॆःॽमिम्पा डिरिक् खानावाँ आङु। हाङ् आन्ना याक्टाखॆॽमानुङ् याइखुबा याॽमिचि लिमा फॆन्नि। 4आन्ना हिङ्वा नुङ् चुङानि, टर आन्नामि हिङ्खामामि सक्मान ग टेॽमा मासिट्टिटानि।
5हाङ् गरहाङ् निवाँहाङ्ऎ आन्ना टाङ्पाम्न पासाचिर मिन्मानुङ् नुःर लोमिम्पा खानावाँ मिखॆटाम्निहॆ?
“काम् पासा, पारभुऎ आना नुऎ लाम्फुबि टॆःॽमा यक्मार नुःर निवाँ टिसे,
हाङ् खोसॆ वोमार निवाँ आसेरे,
6मान्ठाभनॆ पारभुऎ आसा वोकु खोसॆ आक्क याॽमि नाम्नाम् पिसिकु,
खोसॆ खोम् पासाचि कामानुङ् लोमिम्पा चोब्न याॽमिचि खोसॆ डान्डा पिकुचि।”#आयुब ५:१७; हिटोपाडेस ३:११-१२
7आन्नॆ निवाँहाङ्मि ग डुखा आङ्मा सिॽमार, निवाँहाङ्ऎ आन्ना खोम्न पासाचिर मिन्मानुङ् पाइमॆ पाइ कामानुङ् मिॽलाआनॆ। माल् नुऎ लाम्फुबि लाम्ढुमिस्सि आपाऎ डुखा मान्पिॽमिम्पा पासा खाङ्डाम्निहॆ? 8हाङ् चोब्न खोम् पासाचिऎ टक्चामिम्पा आक्क डुखा आन्नॆ मान्टक्चाआम्नि हाङ्ग, आन्ना खोम् चाइबानऎ पासाचि हॆॽनॆ, टर होइढाचिम्न पासाचि यो। 9कानि कानिम् आपाचिऎ किसिमाबि युङि हाङ् कानिऎ खोचि ङॆबुक्मि। माल् आक्कबाङ्स डिरिक् कानिम् लावाबिऎ आपामि किसिमाबि पेन्से डुखा आङ्से हिङ्चामा पाप्निहॆ?
10याॽलि नुऎ लाम्फुबि टामामि लागि डुखा चामॆ लोमॆ साजिलो लिनि हाङ् याॽमिचिऎ नेन्चोउचिनि, टर नुऎ लाम्फुबि टामामि लागि डुखा आङ्खुबा याॽमि डॆङ्पि निवाँनेन् लि हाङ् सान्टिऎ हिङ्खामा टक्चाकु। 11हाङ् कानि लाम्फुबि टॆःॽमार काम्नुऎबाङ्स डुखा लि टर गसॆ कानि लाम्फुबि टाखुबाचि निवाँहाङ्मि ङारिङ्बि नुऎ याॽमि मुकि। हाङ् निवाँनेन् याॽमिबि चुऎ सान्टिमि खानावाँ नेन्चाखुबा मुकि।
12मसॆ आन्नामि हुक् हाङ् लाङ्डाङ्खु योम्पक्न आपिक्खुबा ऎमुसाम्नॆ टर आक्खा चॆकुवॆ मुसाम्नॆ। 13हाङ् निवाँहाङ्ऎ नेन्चाकुवॆ लाम्फुबि लाम्ढुसानॆ हाङ् निवाँयुङ्पि चॆकुमिनिहा होइढाचिऎ सङ्क आन्ना टिङुकानि।
सॆङ्सॆङॆ लिमानुङ् हिङ्चाआनॆ
14हाङ् चोब्न याॽमिचि नुङ् सान्टिबि पेन्माबि हाङ् सॆङ्सॆङॆ हिङ्खामा हिङ्चामाबि निवाँ टिसानॆ मान्ठभनॆ सॆङ्सॆङ मान्लिबाग आसॆस पारभु खाङ्टकुचिनि। 15नुःर पेनानॆ, आसॆस निवाँहाङ्मि नाम्नावाँबाङ् कुम्लॆॽमा आसिॽल। आन्नामि निवाँबि खिक्कॆ लिमानुङ् आटङ्चामॆ आलिर, हॆॽनॆ हाङ्ग होइढा डिरिक् याॽमिचि आक्कसॆ काइसॆ मुकु। 16हाङ् आसास ङेसिमा लुऎ योम्पक् यिक्खुबा आलिमिर हाङ् एसाव रक्मा निवाँहाङ्ऎ लोमिम्पा आखेम्खुबा आलिर। खोसॆ ग एक्खेपा चामामि लागि याॽल जान्म लिमिम्पा याॽमिऎ टक्चामॆ ढुप्पाट्टन इन्चाइखॆट्टु। 17आन्नॆ ग लेकाम्निन, डॆङ्पि खोसॆ उम्पाबाङ् आसिका टाक्चामा मिनु टर मान्टक्चाउ। खोसॆ इन्चाइखॆॽमिम्पा ढुप्पाट्ट हाप्से यक्मार सङ्क मान्टक्चाउ।
18आन्ना हुक्ऎ डिन्चाहिऎ सिनाइ लोमॆ पङ्पङ्मामि कॆक्पि टामिम्पा हॆॽनॆ। हाङ् एट्टान कुसे ज्वालाबि, माॽयाक्ट खिन्दुमाबि, एट्टान माॽयाक्टबि हाङ् ढ्या हिॽयापानुङ्मा वारिबि सङ्क माटाटिटानि। 19आन्नॆ मान्खेम्मिम्पा ढ्या साम्लाऎ पॆँपिलिमामि किॽमालुऎ साम्लाबि सङ्क माटाडानि। गरक्मा निवाँहाङ्मि साम्ला याॽमिचिऎ खेम्मार “गरक्मा साम्ला खेम्मा आसिॽल” कामानुङ् निवाँहाङ् लोसुचि। 20मान्ठाभनॆ “पोसुऎढारि सङ्क ग पॆस्सङ् डिन्चाउ भनॆ आक्क लुङ्कॽवाऎ डॆसिटाम्नॆ”#पारास्ठान १९:१३ कामानुङ् लोमिम्पा निवाँहाङ्मि खानावाँ खोचिऎ आङ्मा माहेसुचि। 21मोसाऎ सङ्क आक्क खानावाँ एट्टान किॽमालुऎ लॆटा मसॆ “काङा ग किसिमाऎ यङ्मॆ पाइङा”#यायेॽमा ९:१९ लोडु।
22टर आन्ना ग सियोन पॆस्सङ् हाङ् हिङ्चाऎ निवाँहाङ्मि हाटा पारु रक्मा यारुसालेमबि टाडानि। ऎॽवा ह ऎॽवा ङॆप्सिनिहा निवाँखाटॆखुबाचि चेन्चामॆ ठालबि टाडानि। 23हाङ् आन्ना याॽलि जान्म मिमिम्पा वाठाङ्पा पासाचि खोम्मिम्पा ठालबि टाडानि खोचिमि निङ् पारुबि साप्डा। आन्ना चोब्नमि न्याये लॆखुबा निवाँहाङ्बिॽन टाडानि। आन्ना निवाँहाङ्बि सॆङ्सॆङॆ मुमिम्पा निवाँनेन् याॽमिचिम् लावामि लुम्पि टाडानि। 24हाङ् आन्ना निवाँहाङ् नुङ् याॽमिचिमि लुम्पि उम्चङ् चुप्लाङ् ठुब्पिखुबा येसुबि टाडानि। आन्ना हाबिलऎ पिॽमिम्पा हारि बाङ्स काम्नुऎ खानावाँमि चुप्लाङ् ठुॽखुबा येसुमि हारिबि टाडानि।#१२:२४ टुम्मि बुबु काइनऎ उम् नुसा हाबिल् सेॽमार, हाबिलमि हारिऎ निवाँहाङ् काङा खाङ्ङॆ कामानुङ् लोसु, टर याॽमिचिऎ पारभु येसु सेॽमार चाइ खोमि हारिबाङ् याॽमिचिऎ उम्चि हिङ्वामि यङ्निमा टक्चाउचि।
25नुःर पेनानॆ, आन्नानुङ् यामुखुबामि खानावाँ आखेम्खुबा आलिसानॆ। मोसा ग बाखाटेम्बिऎ याॽमि यो। मोसाबाङ् खोसॆ यामुमिम्पा खानावाँ आखेम्खुबा इस्राएलि याॽमिचि निवाँहाङ्ऎ डान्डा पिकुचि हाङ्ग, कानिऎ पारुबाङ् यामुखुबामि खानावाँ ऎखेम्मार खोसॆ डान्डा पिकि। 26खो सिनाइ पॆस्सङ्पि यामुमार बाखाटेम यङ्पकु। टर ह ग खोसॆ गर कामानुङ् चुप्लाङ् ठुःब्डु, “हस ऎक्खेपा काङॆ बाखाटेम् टेःॽन हॆॽनॆ, टर पारु सङ्क यङ्पॽमिकुङ्।”#हाग्गाइ २:६ 27हाङ् ग “हस एक्खेपा” लोमॆ खानावाँऎ चोब्न सिरिस्टि यङ्प हाङ् माइखॆ टर सङ्पॽनिहा खानावाँ लिढाङ् लोमॆ रेम।
28मसॆ यङ्पॽमिॽहिनॆ पारुमि हाङ्डाम् कानिऎ टक्चामिम्पाबि निवाँहाङ् ओहाक् पिट्टुम्ये। हाङ् खोसॆ नेन्चाकुवॆ पाराऎ खोम् निङ् ठेस्से किसिसे चुङुम्ये। 29मान्ठाभनॆ कानिम् निवाँहाङ् ग माक्सिखुबा मि यो।
ទើបបានជ្រើសរើសហើយ៖
हिबुरु 12: LBR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society