हिबुरु 11
11
निवाँयुङ् हाङ् योम्पक्
1निवाँयुङ् चाइ टाङ्पॆ हुङ्मिम्पा खानावाँ निवाँहाङ्ऎ पिकिन मिन्मॆ रेम हाङ् माखाङ्मिम्पा खानावाँ टक्चाकुङ्न लोमॆ रेम। 2निवाँयुङ्बाङ्न कानिम् पाप्पा टुबाचिऎ निवाँहाङ् चेन्चामिट्टुचिमि।
3हाङ् निवाँयुङ्बाङ्न कानिऎ ग खानावाँ वाबुक्, निवाँहाङ्मि खानावाँबाङ् बाखाटेम् सिरिस्टि लिसा हाङ् कानिऎ खाङ्टहा खानावाँ खाङ्मुनिहा खानावाँबाङ् टाआ।#उट्पाटि १:१
4हाङ् निवाँयुङ्बाङ्न हाबिलऎ निवाँहाङ्बि कायिनमि बाङ्स काम्नुऎ खानावाँ सङ्टिसु। हाङ् हाबिल निवाँयुङ्बाङ्न निवाँहाङ्मि ङारिङ्पि निवाँनेन् याॽमि लिसा हाङ् निवाँहाङ्ऎ खोसॆ सङ्टिॽमिम्पा खानावाँ लासु। हाबिल याॽलिन सिखारा हाङ्स खोसॆ लॆःॽमिम्पा निवाँयुङ्ऎ हस कानि चिन्मे पाइकि।#उट्पाटि ४:३-१०
5हाङ् निवाँयुङ्बाङ्न हनोक मान्सिखॆॽरे पारुबि ठेट्टि खारा हाङ् आसॆस खो माखाङ्टकुचि मान्ठाभनॆ निवाँहाङ्ऎ खो लाफॆटु।#उट्पाटि ५:२१-२४ मान्ठाभनॆ खो पारुबि लाखॆॽमाबाङ् याॽल खो निवाँहाङ्मि निवाँऎ चोमिम्पा याॽमि लॆटा निवाँनेन् साब्चिराऎ लोकु। 6हाङ् निवाँयुङ् मॆड्डिङ् निवाँहाङ् चेन्चामिॽमा हेनि। मान्ठाभनॆ आसा निवाँहाङ्बि टामा मिनुकु, खोसॆ निवाँहाङ् चु हाङ् खो चाइबान यक्खुबाचि खोसॆ इनाम पिकुचि कामानुङ् निवाँयुङ् लॆःॽमान लॆ।
7हाङ् निवाँयुङ्बाङ्न योवाबाङ् खोम् खिम्पिहा याॽमिचि हिङ्चामिॽमाम् लागि नुहाऎ एक्क ढ्या योवाखङ् मुसु। याॽलि हानाम्स मालिमिम्पा खानावाँमि बारेबि निवाँहाङ्ऎ खो नुःर लोमार खोसॆ लोमिम्पा खेमु। खोमि निवाँयुङ्ऎ, बाखाटेम्पिहा चोब्न याॽमिचिऎ काइसॆ योम्पक् यिगुचि कामानुङ् खाङ्मुसा। हाङ् खोसॆ निवाँयुङ्बाङ् टक्चाऎ निवाँनेन् खानावाँ टक्चाउ।#उट्पाटि ६:१३-२२
8हाङ् निवाँयुङ्बाङ्न निवाँहाङ्ऎ आबाराहाम “आनाम् खिम् याइडाऎहाङ् काङॆ पिक्ना कामानुङ् लोमिम्पा होइक ठालबि खारॆ” कामानुङ् लोमिम्पा खेमु। हाङ् खो काङा हाबि खॆॽमॆ पाइङॆ लोमॆ मालेरे खाइटा। 9हाङ् निवाँयुङ्बाङ्न निवाँहाङ्ऎ खो पिक्ना कामानुङ् लोमिम्पा ठालबि होइक हाङ्टेम्पिऎ याॽमि लिमानुङ् एक्क पाला हेबुहाङ् पेना। आक्रहाङ्न निवाँहाङ्ऎ इसाहाक नुङ् खोम् पासा याकुब नुङ् सङ्क चुप्लाङ् ठुबुहाङ् खोचि सङ्क आक्रहाङ्न होइक हाङ्टेम्बिऎ याॽमिचि लिमानुङ् पेनाचि।#उट्पाटि ३५:२७ 10मान्ठाभनॆ आबाराहामऎ निवाँहाङ्ऎन खोम् निवाँ रक्न हेप्मिम्पा हानाम्स लिढाङ्ऎ हाटा यक्मॆ पाइटु।
11हाङ् आबाराहाम एट्टान पासिङ् पिक्खारा हाङ्स निवाँयुङ्बाङ्न आपा लिहिसा। हाङ् खोम् खिम्टाङ्मा सारा सङ्क चाचा टक्मॆ लःन पाङ्फॆॽमिम्पा मासिङ्मा पिक्खॆमिम्पा लॆटा। हाङ्स निवाँहाङ्ऎ ठुॽमिम्पा चुप्लाङ् खोसॆ मान्ट हाङ्स लॆकु लोमॆ आबाराहामऎ निवाँयुङ् लॆटु। 12मसॆॽन पासिङ् पिखॆम्पा बेला एक्क याॽमिबाङ्कॆ नाम्फलिॽवाबिहा साङ्कॆम्मा हाङ् ङेनङेब्सिहेनिहा पॆरॆरॆमाबिऎ बालुवा रक्न पिसानासाचि लिबकामि।
13हाङ् आक्खा चोब्न याॽमिचि निवाँहाङ्ऎ खोचिनुङ् ठुॽमिम्पा चुप्लाङ् निवाँयुङ् लॆःॽमानुङ् सिखारामि। खोचिऎ निवाँहाङ्ऎ ठुॽमिम्पा चुप्लाङ्न ग माटक्चाउचि, टर खोचि म खानावाँ मिउबाङ्न खाङुचि हाङ् नुःर लोसुचि। खोचिऎ टाङ्पा ग बाखाटेम्बि लाम्ढुखुबा होइक हाङ्टेम्बिऎ एक्क हिच्चि डिनाऎ टाबाङ्चि टेःॽन कामानुङ् मिॽलाउचि।#उट्पाटि २३:४; खोम्मिम्पासाम् ३९:१२ 14गर काखुबा याॽमिचिम् खानावाँबाङ् माङ् वाबुक् भनॆ खोचिऎ टाङ्पाम्न एक्क हाङटेम् यक्मॆ पाइकुचि। 15खोचिऎ याॽलि याइडामिम्पा हाङ्टेमम्बिॽन उम्चि निवाँ टिसुचिग खोचि आक्कुब्न ऎन्टाहिखुबा लॆटामि। 16टर खोचिऎ ग आक्कबाङ्स काम्नुऎ पारुबिऎ हाङ्टेम टक्चामॆ निवाँ मुमिम्पा लॆटुचि। मसॆॽन निवाँहाङ्ऎ सङ्क “काङा खोचिम् निवाँहाङ्ङा” कामा मान्ङेसि मान्ठाभनॆ निवाँहाङ्ऎ खोचि पिॽमॆ हाटा मुसिपिॽमिम्पा लॆटुचि।
17हाङ् निवाँहाङ्ऎ आबाराहाम ठाःक्मार निवाँयुङ्बाङ्न खोसॆ टाङ्पामि पासा इसाहाक सङ्टिॽमा परक्मिम्पा लॆटा। आबाराहामऎ निवाँहाङ्मि चुप्लाङ् टक्चामिम्पा लॆटु मरहाङ्स खोम् चुऎ एक्क टेःॽन पासा सङ्टिॽमा परक्मिम्पा लॆटा। 18निवाँहाङ्ऎ इसाहाकमि बारेबि आबाराहाम गरहाङ् लोमिम्पा लॆटु, “इसाहाकबाङ्न आनाम् पासा याङ्मिन्चि फुबःक्मि।”#उट्पाटि २१:१२ 19इसाहाक् सिखॆ हाङ्स निवाँहाङ्ऎ खो होइखेपा सङ्क हिङ्पिक्मिहिकु लोमॆ आबाराहामऎ निवाँयुङ् लॆःॽमिम्पा लॆटु। चाइबान लोमार, खोसॆ इसाहाक् सिखॆॽमिम्पाबाङ् हिङ्खामा टक्चामिम्पा रक्मान लिसा।
20हाङ् निवाँयुङ्बाङ्न इसाहाकऎ खोम् पासाचि याकुब नुङ् एसाबमि टाहा डिनामि लागि आसिका पिट्टुचि।
21हाङ् पासिङ् पिक्खॆॽमानुङ् सिखॆॽमॆ बेला सङ्क निवाँयुङ्बाङ्न याकुबऎ योसेफमि पासाचि आसिका पिट्टु। हाङ् टाङ्पामि टोम्राङ्ऎ सॆन्मानुङ् निवाँहाङ् चुङु।#उट्पाटि ४८:१-२०
22हाङ् निवाँयुङ्बाङ्न योसेफऎ टाङ्पा सिखॆॽमॆ बेला इस्साएलि याॽमिचिऎ मिस्र हाङ्टेम् इॽया याइडाकुचि लोमॆ इसु। खोसॆ खोचि मिस्रबाङ् खाइमार खोम् सॆकॽवा मिस्रबाङ् लाखॆटाम्नॆ कामानुङ् इस्राएलि याॽमिचि लोसुचि।#उट्पाटि ५०:२४-२५; पारास्ठान १३:१९
23हाङ् मोसा जान्म लिसा हाङ् निवाँयुङ्बाङ्न खोम् आपा आमॆ सुम्चि माहिनाढारि चुम्से युङाचु।#११:२३ मिस्रासा हाङ्टेम्बिऎ हाङ्ऎ हिबुरु चोब्न वाठाङ्पा चाचाचि हङ्माबि कॽमानुङ् सेराम्चिनॆ लोमिम्पा लॆटा निवाँहाङ्ऎ खोचि “एक्क काम्नुऎ चाचा पिडि” कामानुङ् मिॽलाआचु हाङ् खोचिऎ हाङ्ऎ लोमिम्पा खानावाँ चेन्मा सङ्क माकिसिआचि।#उट्पाटि २:२
24हाङ् मोसा पुबकाहाङ्, निवाँयुङबाङ्न फारो हाङ्मि सम्सामामि चाचाङा लोमॆ खानावाँबि खो माखासि। 25हाङ् खोसॆ ऎक्छक्मि लागि हिङ्वाबि काम्नुऎ हिङ्खामा हिङ्चामाबाङ्स निवाँहाङ्मि याॽमिचि नुङ् डुखा आङ्मॆ खानावाँन काम्निटु। 26हाङ् खोसॆ मिस्र हाङ्टेम्बिऎ चासुम् टक्चामाबाङ्स खिरिस्टमि लागि डुखा आङ्मा काम्नुऎ लि मिनु मान्ठाभनॆ खोसॆ निवाँहाङ्ऎ युङ्पिॽमिम्पा डॆङ्पिऎ इनामा खाङ्मिम्पा लॆटु।
27हाङ् निवाँयुङ्बाङ्न मोसाऎ हाङ्मि सिरि सङ्क माङ्स मामिन्रे मिस्र हाङ्टेम याइडाउहाङ् खाइटा। हाङ् खाङ्मुनिऎ निवाँहाङ् सङ्क खाङ्टॽमिम्पार लॆःॽमानुङ् खोसॆ हानाम्स निवाँ गरमर मालॆटु। 28हाङ् निवाँयुङ्बाङ्न मोसाऎ इस्राएलि याॽमिचि फाक्मॆ चाडा मानालॆटानॆ कामानुङ् लोसुचि। हाङ् इस्राएलिचिम् याॽलि जान्म लिमिम्पा ठुक्पाचि सेक्खुबा निवाँहाङ्मि खानावाँ टॆखुबाऎ ऎसेरुर कामानुङ् लम्भॆरेङ्मा सङ्पिटु हारि चेप्टिसाम्नॆ कामानुङ् लोसुचि।#पारास्ठान १२:२१-३०
29हाङ् निवाँयुङ्बाङ्न इस्राइलिचिऎ हार्रापॆ पॆरॆरॆमाबि हॆङ्खॆॽमिम्पा बाखाबाङ् लाम्ढुसे पाङ्फॆटुचि। टर आक्रहाङ्न मिस्र हाङ्टेम्बिहा याॽमिचिऎ पॆरॆरॆमा पाङ्खॆॽमा यगामिर चोब्न योवाबि टाप्सिआमि।
30हाङ् निवाँयुङ्बाङ्न इस्राएलि याॽमिचिऎ वाङ्चि डिना यारिहो हाटा यिसामि हाङ् आक्क हाटा बॆङ्मिम्पा गारन टॆःग्लिहिङ्खारा।#याहोसु ६:१२-२१ 31हाङ् आसानुङ् सङ्क इम्चाटिक्खुबा राहाब लोमॆ मेॽनुङ्मा निवाँयुङ्बाङ्न निवाँहाङ्मि खानावाँ एखेम्खुबाचिनुङ् सिखॆॽमा मासि। निवाँहाङ्ऎ खो हिङ्पक्मिट्टु मान्ठाभनॆ खोसॆ आक्क ठालबि खानावाँ वाप्सि कुम्से खॆॽमिम्पा इस्राएलि याॽमिचि नुःर लॆःॽमिम्पा लॆटु।#याहोसु ६:२२-२५
32ह गबाङ् सङ्क होइढा खानावाँ माल् इमॆ? गिडोन, बाराक, सिमसोन, यिप्टा, डाउड, सामुएल हाङ् निवाँहाङ्मि खानावा लोखुबाँचिमि निवाँयुङ्मि बारेबि खानावाँ इमा काङानुङ् लः माआ। 33निवाँयुङ्बाङ्न खोचिऎ डिरिक् योम्पक् यिगुचि। निवाँयुङ्बाङ्न खोचिऎ हाङ्टेम् हेचाउचि हाङ् नुःर न्याये लॆटुचि। हाङ् निवाँहाङ्ऎ पिकानि कामानुङ् लोमिम्पा चुप्लाङ् सङ्क टक्चाउचि हाङ् किःबामि या चुब्खॆमिट्टुचि। 34हाङ् हाऎ मि सेरुचि, फेयाऎ बक्सिॽमाबाङ् लेप्पकामि। खोचि चॆक्मावा मॆड्डिङ्मा याॽमिचि लॆटामि टर ह चॆक्मावा नुङ्मा लिसामि। हाङ् खोचि सिच्चाखुबाचिनुङ् ढ्या निवाँबाङ् चुङामि हाङ् चोब्न हेचाइटुचि। 35हाङ् निवाँयुङ्बाङ्न मेॽनुङ्माचिऎ टाङ्पामि सिखॆम्पा याॽमिचि फेरि हिङ्पॽमिम्पान टक्चाउचि। हाङ् ऎॽवाचिऎ सिखॆॽमाहाङ् हिङ्पक्मार काम्नुऎ हिङ्खामा टक्चाङार कामानुङ् फाक्मॆ खानावाँ सिच्चामानुङ् डुखान आङुचि। 36हाङ् निवाँहाङ्बि निवाँयुङ् लॆखुबा ऎॽवाचि इचामा हाङ् कर्राऎ रःग्चामा टुम्चाआमि हाङ् ऎॽवाचि चाइ ठुब्मानुङ् सॆक्चिम्पि सॆक्ढिङ्खारामि। 37हाङ् होइढा याॽमिचिऎ खोचि लुङ्कॽवाऎ डॆसिटुचिमि, आराऎ चिसुचिमि हाङ् फेयाऎ चॆक्सिटुचिमि। हाङ् खोचि माङ्स आचुखुबा लिसामिहाङ् सामुङ् नुङ् मेठुबामि साखक्ऎ सालुङ् डॆगुचि। हाङ् होइढा याॽमिचिबाङ् डुखा टक्चासे वाइटिटामि। 38इघा नुचाक्मिहा याॽमिचिमि लागि बाखाटेम् नुऎ मान्ले। हाङ् खोचि आसास पेन्मिनिहा ठालबि, पङ्पङ्हा ठालबि, गुफा नुङ् बाखाटेम्बिहा ढाँडाबि कुम्से पेन्मा सिट्टामि।
39हाङ् निवाँयुङ्बाङ्न आक्खा चोब्न याॽमिचिऎ निवाँहाङ् चेन्चामिट्टुचि, टक्चाउचि, टर आसॆ सङ्क निवाँहाङ्ऎ ठुॽमिम्पा चुप्लाङ् मान्टक्चामिम्पा लॆटुचि। 40मान्ठाभनॆ निवाँहाङ्ऎ कानिम् लागि एट्टान काम्नुऎ खानावाँ टङ्पिॽमिम्पा लॆटि। हाङ् कानिनुङ् टेःॽन आक्खा याॽमिचि सङ्क सॆङ्सॆङॆ लिमिर लोमॆ निवाँहाङ्ऎ मिॽमिम्पा लॆटु।
ទើបបានជ្រើសរើសហើយ៖
हिबुरु 11: LBR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society