एफिसि 6
6
पासाचि हाङ् आपाआमाचि
1पासाचि, टाङ्पामि आपा आमाऎ लोमिम्पा खेमानॆ, मान्ठाभनॆ आक्क खानावाँ चाइ निवाँहाङ्ऎ नेन्चाकु। 2“टाङ्पामि आपा नुङ् आमाऎ लोमिम्पा खेमानॆ” लोमॆ खानावाँ चाइ निवाँहाङ्ऎ चुप्लाङ् हिःक्से पिॽमिम्पा याॽलिऎ खानावाँ यो। खोसॆ ग खानावाँ गरक्मा चुप्लाङ् हिःक्से पिट्टि, 3“आक्र लॆटानि हाङ्ग आन्नामि लागि काम्नुऎ लिः हाङ् बाखाटेम्पि डिरिक् हिङ्चाकानि।”
4हाङ् आपाआमाचिऎ चाइ टाङ्पामि पासाचि हुन्न सोम् आखेॽमिटाम्चिनॆ, टर खोचि पारभुमि खानावाँ नुङ् किसिमाबि कुबकाम्चिनॆ।
योम्पक् मुखुबाचि हाङ् टुङ्घङ्पाचि
5योम्पक् मुखुबाचि, आन्नॆ चाइ चाइबान खिरिस्टमि योम्पक् मुसिन्टक्न आम्नि बाखाटेम्पिहा टुङ्घङ्पाचि नुङ् किसिसे ङेःप्मानुङ् खोचिऎ लोमिम्पा खेमानॆ। 6हाङ् आन्नामि योम्पक् चाइ याॽमिचिमि कॆक्पि काम्नुऎ खाङ्मिॽमाम् लागि हॆॽनॆ, टर निवाँहाङ्ऎ मिन्मिम्पा रक्न खिरिस्टमि योम्पक् निवाँ टिःसे यिगानॆ। 7याॽमिचिमि लागि हॆॽनॆ, टर पारभुमि योम्पक् यिक्मॆ पाइङा मिन्से चेन्चासे योम्पक् मुसानॆ। 8हाङ् योम्पक् मुखुबा लॆः हाङ्स लॆःॽनि हाङ्स आसॆ चाइ काम्नुःर योम्पक् यिगुकु, पारभुऎ खो आसिका पिःकु लोमॆ लेकाम्निन।
9हाङ् टुङ्घङ्पाचि, आन्नॆ सङ्क आन्नामि योम्पक् मुखुबाचि नुःर लॆटाम्चिनॆ। खोचि आवोसाम्चिनॆ मान्ठाभनॆ आन्ना हिप्पामिन पारुबि एक्क पारभु चुः कामानुङ् मिॽलापाम्नॆ। खोसॆ चोब्न याॽमिचि एक्क मिगॆ खाङ्कुचि।
निवाँहाङ्मि आप्चिरा
10ग डॆङ्पि, आन्ना पारभुमि ढ्या चॆक्मावाऎ चॆकुवॆ लिसानॆ। 11साइटानबाङ् टाःहाः चोब्न चॆन्टुबाङ् खानावाँ हेचामाम् लागि निवाँहाङ्मि चोब्न आप्चिरा खिनानॆ। 12मान्ठाभनॆ कानिमि चुङ्मॆ खानावाँ चाइ याॽमिचि नुङ् हॆॽनॆ, टर खाङ्हिनिहा चॆक्मावा नुङ्, काइसॆ खानावाँमि टुङ्घङ्पाचि नुङ्, माॽयाक्ट बाखाटेम्पि हाङ्डाम् लॆखुबा लावा नुङ्मा चॆक्मावा नुङ् हाङ् नाम्फलिॽवाबिहा काइसाहा चॆक्मावा नुङ् लिः। 13मसॆ निवाँहाङ्मि चोब्न आप्चिरा खिनानॆ। आक्र लॆटानि हाङ्ग, साइटान आन्नाबि टाःक्र पाइहिकानि हाङ् चोब्न योम्पक् यिक्से डॆङ्पिढारि येब्हिकानि।
14मसॆ टाङ्पामि मिचिक् चाइबानऎ खानावाँमि हम्डङ्ऎ चिन्से सॆङ्कॆरॆक्बि निवाँनेन्मि ढाला#६:१४ ग चाइ सॆङ्कॆरॆक्बि वेमॆ कक्नाम् यो हाङ् गसॆ याॽमिचि कोप्मॆडोःप्मॆ योम्पक् यिगुकु। खिन्से पगानॆ। 15हाङ् नुऎ खानावाँबाङ् टाऎ सान्टिमि सुःॽमारा चाङ्से आन्ना परकानॆ। 16हाङ् निवाँयुङ् चाइ टाङ्पा हिङ्चामिक्खुबा ढाला यो। मसॆ ग चाइ हानाम्स याङ्ढाङ्सानॆ हाङ् मिः नुङ् टाःहा ठुक्लाङ् सङ्क हेचाहिकाम्नि। 17हाङ् हिङ्पक्मिक्खुबा टोपिऎ चाइ अन्नामि निवाँ कोबुकुडोबुकु। हाङ् सॆङ्सॆङॆ लावामि फेया वेढाङ्सानॆ आक्क चाइ निवाँहाङ्मि खानावाँ यो।
18हानाम्स पारठाना लॆःसे चोब्ठकाबि निवाँहाङ् नुङ् चॆक्मावा ङागानॆ। हाङ् सॆङ्सॆङॆ लावाबि लिःसे पारठाना लॆढाङ्सानॆ। हाङ् नुःर पेन्से निवाँयुङ् लॆखुबा चोब्न बुबुनानुसाचिम् लागि पारठाना लॆटानॆ। 19हाङ् काङामि लागि सङ्क पारठाना लॆपिॽङानॆ हाङ् काङा यामुॽङार निवाँहाङ्ऎन खानावाँ पिॽङार। काङॆ यामुमॆ चॆक्मावा टक्चाङार हाङ् नुऎ खानावाँमि हङ्सिहा खानावाँ माङ्रटा कामानुङ् होइढाचि सङ्क खेम्मिहिसुङ्चिर। 20हाङ् ग योम्पक्मि लागिन काङा पाङ्कुचा लिडिङॆ यो। हाङ् काङा सॆक्चिम्पि चुःॽङा हाङ्स काङा मान्टहाङ् यामुमा लॆःॽङॆ आक्रहाङ्न चॆक्मावा नुङ् यामुहिङार कामानुङ् पारठाना लॆपिॽङानॆ।
डॆङ्पिऎ स्यामिॽमिम्पा
21कानिऎ नाम्नाम् पिसिॽमिम्पा हाङ् पारभुमि योम्पक् मुखुबा नुसा टुखिकासऎ काङामि चोब्न खानावाँ आन्ना इःबिकानि। 22काङ्का माङ् लॆःॽमॆ पाइकिङ्कॆ लोमॆ खेमाम्नॆ हाङ् आन्नामि निवाँबि चॆकुवॆ लिसानॆ कामानुङ् काङॆ खो आन्नाबि पाहाङ्डुङ। 23चोब्न बुबुनानुसाचिबि निवाँहाङ् आपा हाङ् पारभु येसु खिरिस्टऎ सान्टि, नाम्नावाँ हाङ् निवाँयुङ् पिट्टानिर। 24कानिम् पारभु येसु खिरिस्ट नाम्नाम् पिसिखुबाचिनुङ् हानाम्स निवाँहाङ्मि नाम्नावाँ लिःडाङ्र।
ទើបបានជ្រើសរើសហើយ៖
एफिसि 6: LBR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society