कालास्सि 3
3
1मसॆ आन्ना सङ्क खिरिस्ट नुङ्न हिङ्पडानि हाङ्ग पारुबिऎ खानावाँबि निवाँ टिसानॆ। आक्कुबि खिरिस्ट चु हाङ् निवाँहाङ्मि चुब्ठिङ् हुक् पाट्टा पेन्डा।#खोम्मिम्पासाम् ११०:१ 2हाङ् बाखाटेम्पिहा खानावाँबि हॆॽनॆ, टर पारुबिहा खानावाँबि निवाँ टिसानॆ। 3मान्ठाभनॆ आन्ना ग सिखॆडानि, हाङ् आन्नामि चाइबानऎ हिङ्खामा चाइ निवाँहाङ्बि खिरिस्ट नुङ् चुम्भुङ्डा। 4आन्नामि चाइबानऎ हिङ्खामा चाइ खिरिस्ट न हाङ् खो बाखाटेम्पिहा याॽमिचि नुङ् खाङ्मुःक्र आन्ना खोनुङ्न खोम् निङ्लावाबि खाङ्मुकानि।
याॽलऎ हाङ् उम्चङ् हिङ्खामा
5आन्नॆ बाखाटेम्पिऎ आम्नामि सालुङ्बिहा हिङ्वा याइटाम्नॆ हाङ् हस आक्क खानावाँबि आलागालिसानॆ, ब्याबिचारामि योम्पक्, ङेसिमा लुऎ खानावाँ, निवाँबि काइसॆ मिस्से टक्चामॆ खानावाँ, काइसॆ निवाँ हाङ् लोभा ग योम्पक् चाइ मुर्टि चुङ्मॆन यो।
6इघा खानावाँऎन, निवाँहाङ्ऎ लोमिम्पा आखेम्खुबाचि सक्पि#३:६ ऎॽवा साब्चिरा चाइ “लोमिम्पा आखेम्खुबाचि” लोमॆ खानावाँ माआ। खोम् ढ्या सिरि सिॽमेपाइ। 7आन्ना सङ्क आक्रल बाखाटेम्पि गरहाङ्न पाइयुक्सानि।
8टर आन्नॆ ह आन्नामि सिरि, याॽचिमिम् काम्नुऎ योम्पम्पि काइर मिॽमॆ, याक्चामॆ, इचामॆ हाङ् टाङ्पाम् याबाङ् आम्पहा काइसाहा खानावाँ याइटाम्नॆ हाङ् हस आक्कबि आलाम्ढुसानॆ। 9हाङ् आन्नॆ एक्कसॆ होइक बङ्सिपॆ आचुआनॆ मान्ठाभनॆ आन्नॆ आन्नामि याॽलहा हिङ्चामॆ नुङ् पाइमॆ पारान याइखॆडाम्नि।#एफिसि ४:२२ 10हाङ् ह चाइ आन्ना ग उम्चङ् याॽमि लिडानि। हाङ् खोबि निवाँयुङ् लॆखुबाचि खो रक्मान लिमिर कामानुङ् सिरिस्टि लॆखुबा निवाँहाङ्ऎ आनाम् उम्चङ् लिमॆ खानावाँ चाइ उम्चङ् उम्चङ् मुःसे लाखॆकु। गरहाङ् आनॆ खो काम्नुःर लेहिकुना। 11मसॆ ग उम्चङ् हिङ्खामाबि गिरिक् नुङ् याहुडिचिम् लुम्पि हाङ् खाट्ना नुङ्मा नुङ् खाट्ना मॆड्डिङ्हाचि हाङ् निवाँ मॆड्डिङ्मा नुङ् माङ्स आलेक्खुबाचिम् लुम्पि, योम्पक् मुखुबा नुङ् आसाम्स ढुप्पाट्टबि पेन्मा पाप्नॆ याॽमिमि लुम्पि फाक्मॆ लोमॆ लिनि, टर खिरिस्ट न चोब्न खानावाँ रेम हाङ् खोनबिॽन चोब्न चु।
12मसॆ निवाँहाङ्ऎ सॆगिन्टक्न आन्ना सॆङ्सॆङॆ मुसानि हाङ् नाम्नाम् पिसिटानि, नाम्नावाँ नुङ्मा, नुऎ लिमॆ, मिःछुॽमा लिखुबा, गरमर निवाँ आफॆक्खुबा हाङ् हुङ्हिखुबा लिसानॆ। 13हाङ् एक्कसॆ होइक आङ्पे चुआनॆ। एक्क याॽमिमि होइकनुङ् आब्डिक्मि खानावाँ चु हाङ्ग यङ्निपिप्पे चुआनॆ। मान्टहाङ् पारभुऎ आन्ना यङ्निमा लॆटानि, आक्रहाङ्न आन्नॆ स यङ्निटाम्नॆ।#एफिसि ४:३२ 14इघा चोब्न खानावाँबाङ् नाम्नाम् पिसिॽमॆ योम्पक् चाइ डिरिक् यिगानॆ। गसॆ कानि चोब्न एक्क निवाँ मुसि ठुप्भुङ्खॆकि। 15हाङ् खिरिस्टमि सान्टिऎ आन्नाम् निवाँबि हाङ्डाम लॆटुर। चाइबान इग सान्टिमि लागिॽन आन्ना एक्क सालुङ्बि सेःॽमिम्पा लॆटानि। आन्ना हानाम्स ओहाक् पिक्खुबा याॽमि लिसानॆ। 16हाङ् आन्नामि निवाँ चाइ खिरिस्टमि खानावाँऎ चेप्खॆटुर। हाङ् एक्कसॆ होइक टाङ्पाम् चोब्न काम्नुऎ चेन्टुबाँ निवाँऎ खानावाँ चिनुर हाङ् इटुर। हाङ् टाङ्पामि निवाँ हङ्सिॽयुबाङ्न ओहाक् पिॽमाम् लागि चोब्न खालाहा साम् इसानॆ। 17हाङ् आन्नॆ माङ्माङ् यामुकानि हाङ् योम्पक् यिगुकानि, आक्खा चोब्न पारभु येसुमि निङ्पि लॆटानॆ हाङ् खोबाङ्न निवाँहाङ् आपा ओहाक् पिट्टाम्नॆ।#एफिसि ५:१९-२०
खिरिस्टियान हिङ्खामा
18खिम्टाङ्माचि, आन्नॆ पारभुऎ नेन्चामॆ गारि टाङ्पामि खिम्टाङ्पामि खानावाँ खेमाम्नॆ।#एफिसि ५:२२
19हाङ् खिम्टाङ्पाचि, आन्नॆ सङ्क टाङ्पामि खिम्टाङ्माचि छाक्कॆ निवाँ माकाप्ले नाम्नाम् पिस्सिटाम्चिनॆ।#एफिसि ५:२५
20हाङ् पासाचि, आन्नॆ स आन्नामि आपाआमाचिऎ लोमिम्पा चोब्न खानावाँ खेमाम्नॆ, मान्ठाभनॆ गर लॆॽमार पारभु चेन्चाक।#एफिसि ६:१
21आपाचि, आन्नॆ टाङ्पाम् पासाचि मरक्न सोम् आखेॽमिटाम्चिनॆ। हॆॽनि हाङ्ग आक्खाचिम् निवाँ काइसॆ लिबिकुचि।#एफिसि ६:४
22हाङ् योम्पक् मुखुबाचि, आन्नॆ ग बाखाटेम्पिऎ आन्नामि टुङ्घङ्पाचिऎ लोमिम्पा चोब्न खानावाँ खेमाम्नॆ। खोचिऎ आन्ना खाङ्टःक्मिर टेःॽन चेन्चामिॽमाम् लागि हॆॽनॆ, टर आखाङ्टमार स पारभुमि किसिमाबि पेन्से काम्नुऎ निवाँ नुङ् योम्पक् मुसानॆ। 23हाङ् आन्ना माङ् लॆकानिर, याॽमिचिम्र हॆॽनॆ, टर पारभुमि योम्पक् यिगिन्ट निवाँ टिसे योम्पक् यिगानॆ। 24मान्ठाभनॆ पारभुऎ आन्ना पिकानि कामानुङ् लोमिम्पा खानावाँ पिकानिन लोमॆ आन्नॆ लेकाम्नि। आन्नॆ पारभु खिरिस्टमि योम्पक् मुमे पाइकाम्नि। 25मन्ठाभनॆ काइसाहा योम्पक् लॆखुबॆ काइसॆन डान्डा टक्चाकु। निवाँहाङ्ऎ चोब्न याॽमिचि एक्क मिगॆॽन खाङ्कुचि।#एफिसि ६:५-९
ទើបបានជ្រើសរើសហើយ៖
कालास्सि 3: LBR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society