कालास्सि 2
2
1काङॆ आन्नामि लागि हाङ् लाउडिकियाबि चुक्मिहा निवाँयुङ् लॆखुबाचिम् लागि हाङ् कानुङ् हानाम्स माचुॽमिम्पा निवाँयुङ् लॆखुबाचिम् लागि ऎॽवा पारठाना लॆॽङा लोमॆ वाबाम्नॆ मिनुॽङा। 2मसॆ आन्ना चोप्पसॆ पाङ्नुमा टक्चाआनॆ हाङ् नाम्नाम् पिसिॽमॆ खानावाँबि एक्क लिमिर। आक्र लिसा हाङ्ग, आन्ना चोप्पसॆ ढ्या आसिका टक्चासे डिरिक् खानावाँ वाप्खुबा लिकानि हाङ् निवाँहाङ्मि खानावाँ वाप्हिखुबा लिकानि हाङ् निवाँहाङ्मि हङ्सिहा खानावाँ वाबुकाम्नि। आक्क हङ्सिऎ खानावाँ चाइ खिरिस्ट न रेम। 3खोबिॽन निवाँहाङ्बि चुऎ चोब्न निवाँ नुङ् खानावाँ चु। ग चाइ एट्टान ढ्या चासुम् रक्मा यो।
4कॆ आन्ना गर लोकानि मान्ठाभनॆ खेम्मार नुऎन खेम्टहा खानावाँ टर नुःर पेनानॆ आक्खा हुन्नहा खानावाँऎ आन्ना ऎफोप्सिॽमिर। 5मान्ठाभनॆ काङा सालुङ्बि आन्नानुङ् माइङ् हाङ्स, निवाँबि ग चुःॽङा। हाङ् खिरिस्टबि आन्ना टङ्चासे काम्नुऎ नुङ् चॆकुवॆ निवाँयुङ् खाङ्मिम्पासॆ एट्टान चेन्चाडिङ।
खिरिस्टबि उम्चङ् हिङ्खामा
6मसॆ मान्टहाङ् आन्नॆ खिरिस्ट येसु आन्नामि पारभु कामानुङ् टक्चाआम्नि, आक्रहाङ्न खोबिॽन हिङ्चाढाङ्सानॆ। 7हाङ् आन्नामि साम् खोबि डॆन्से पुमिटाम्नॆ हाङ् आम्नामि हिङ्खामा खोबि हिङ्चामिट्टाम्नॆ। हाङ् आन्ना लोसिन्टक्न आन्नामि निवाँयुङ् चाइबान चॆकुवॆ लिः हाङ् आन्ना हानाम्स ओहाक् पिॽहिखुबा याॽमि लिकानि।
8आन्ना नुःर पेनानॆ मसॆ चेन्टुबाँवाँ खानावाँऎ आन्ना ऎफोप्सिमिर। आक्रक्मा खानावाँ चाइ खिरिस्टबाङ् टामिम्पा हॆॽनॆ, टर याॽमिचिऎ मुकॆॽमिम्पा योम्पक् नुङ् बाखाटेम्पिहा खानावाँबाङ् चिन्मिम्पा यो। 9मान्ठाभनॆ खिरिस्टमि सालुङ्पिॽन निवाँहाङ्मि चोब्न खानावाँ चु। 10हाङ् आन्ना खिरिस्टबि चुकानि हाङ् खेःॽल हिङ्खामाऎ चेप्खॆडानि। खोन चोब्न हाङ्डाम नुङ् ढुप्पाट्टमि सङ्पिऎ रेम।
11आन्ना खिरिस्टबि टाआनि हाङ् आन्नामि सालुङ्मि खाट्ना हॆॽनॆ, टर आन्नामि हिङ्वा नुङ्मा पाइमॆ निवाँबाङ् फाक्मानुङ् खिरिस्टऎ आन्ना आन्नामि लावामि खाट्ना लॆटानि। 12हाङ् बाप्टिस्मा लामार आन्ना खोनुङ्न हुम्सि खॆॽमिम्पा लॆटानि। हाङ् खिरिस्ट सिखॆम्पाबाङ् हिङ्पक्मिक्खुबा निवाँहाङ्मि चॆक्मावा नुङ्मा योम्पक्पि आन्नॆ निवाँयुङ् लॆमिम्पासॆ आन्ना सङ्क खोनुङ्न हिङ्पडानि।#रोमि ६:४ 13हाङ् आन्ना आम्नामि काइसॆ योम्पक् हाङ् हिङ्वा योम्पक् यिक्मा यक्खुबा निवाँबाङ् माफाक्मिम्पासॆ आन्ना लावाबि सिखॆम्पा लॆटानि। ग खानावाँ हस आन्नॆ मान्लेहाङ्पा लॆटाम्नि। निवाँहाङ्ऎ कानिम् चोब्न हिङ्वा यङ्पिॽमानुङ् खिरिस्ट नुङ्न हिङ्खामाबि हिङ्पक्मिडि।#एफिसि २:१-५ 14हाङ् कानि काइर लॆखुबा साब्चिराबि चुहा यायेॽमा कुरुसाबि काँटि रॆःक्ठाङ्मानुङ् लुक्पिटु।#एफिसि २:१५ 15हाङ् खिरिस्टऎ लावाबिहा हाङ्डाम् नुङ् आक्कमि ढुप्पाट्ट ङाप्लाङ्सु हाङ् कुरुसाबि आक्खा खानावाँ हेचाइटु हाङ् आक्खाचि याॽमिचिम् लुम्पि ङेसिमा लुलु मुसुचि।
16मसॆ आसॆस आन्ना चामाडुङ्माबि, याहुडि चाडा मानालॆॽमॆ खानावाँ, आउसि हाङ् नाचामॆ डिनामि बारेबि आब्डिक् आटिमिर।#रोमि १४:१-६ 17आक्खा चोब्न खानावाँ ग डॆङ्पि टाऎ खानावाँमि लवा टेःॽन यो, टर चाइबानऎ खानावाँ ग खिरिस्ट न यो। 18हाङ् आसॆस आन्ना टाङ्पामि सालुङ्मि डुखा आङ्मिॽमॆ खानावाँ, निवाँखाटॆखुबाचि चुङ्मॆ खानावाँ, खोचिऎ काङॆ सेन्चि खाङुङ्का कामानुङ् लोमॆ खानावाँ हाङ् टाङ्पामि काइसॆ निवाँबि काङानङायॆ मिन्मानुङ् मरक्न आन्नॆ टक्चामॆ नाम्याक् टक्चामाबि आब्डिक् आटिमिर। 19हाङ् आक्खाचि चाइ सालुङ्मि चोब्बाङ् सङ्पिऎ निङ्टँवाँ खिरिस्टबि पेन्मा याइडुचि। आक्खा खानावाँ खिरिस्टबि चक्टि खॆस्से आक्कसॆ पुमे खानावाँ टक्चाकु। आक्कबाङ्न सालुङ् चाइ निवाँहाङ्मि निवाँ रक्न पुःसे खॆ।#एफिसि ४:१६
खिरिस्ट नुङ्न सिखॆॽमॆ हाङ् हिङ्चामॆ खानावाँ
20आन्ना ग बाखाटेम्पिहा मुकॆॽमिम्पा योम्पक्मि लागि खिरिस्ट नुङ्न सिखॆडानि हाङ् खोसॆ आक्खा लॆकॆॽमिम्पा योम्पक्बाङ् फाक्डानि। मसॆ मान्ठा आन्ना हस बाखाटेम्पिहा खानावाँ टिङुकाम्निहा, 21“ऎडिन्चाऎ, ऎसेबॆ हाङ् ऎलाबॆ” कामानुङ् मान्ठा काकानिहा? 22इघा चोब्न खाङ्मुहा खानावाँ ग मुखॆसे लाखॆॽमार लुक्खॆ। आक्खा खानावाँ याॽमिचिऎ चिन्मिम्पा हाङ् लोमिम्पा रक्नऎ लॆ। 23निवाँहाङ् चुङ्मॆ खानावाँ डुखा नुङ्मा मुमॆ, निवाँनेन् लिखाङ्मॆ खानावाँ हाङ् काम्नुःर पाइटिॽमॆ खानावाँ चाइ निवाँटाङ्पा र खाङ्मु, टर यायेॽमाऎ सालुङ्मि काइसॆ खानावाँ ऎक्मॆ योम्पक्बि गसॆ माङ्स योम्पक् यिगुनि।
ទើបបានជ្រើសរើសហើយ៖
कालास्सि 2: LBR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society