सॆःक्ढुङ्पा 26
26
अगिरिपा हाङ्मि लुम्पि पावलमि खानावाँ
1अगिरिपा हाङ्ऎ पावल लोसु, “ह आनाम् खानावाँ युङ्हिकुना।”
हाङ् पावलऎ खोम् हुक् ठेप्पक्मानुङ् उम् खानावाँ गरहाङ् युङु, 2“टुङ्घङ्पा अगिरिपो, काङा याहुडिचिऎ टिमिम्पा आब्डिक्मि बारेबि आनाम् लुम्पि काम् खानावाँ युङ्टक्मिम्पासॆ आइ काङा एट्टान चेन्चाडिङ। 3मान्ठाभनॆ आनॆ काम्नुःर याहुडि चालाना हाङ् कानिम् लुम्पि लिडॆ याटक्माटक्मि बारेबि वाप्डुना। मसॆ नुःर काम् खानावाँ खेम्पिॽङॆ।
4“काङा मिछुॽमा बाङन टाङ्पाम् हाङ्टेम्पि हाङ् यारुसालेम्पि मान्टहाङ् पुसिङॆ लोमॆ चोब्न याहुडिचिऎ लेकुचि। 5डिरिक् याॽलऎबाङ् खोचिऎ काङा लेःॽङामि हाङ् मिनुचि हाङ्ग खोचिऎ ग खानावाँ लोसलोहिकुचि। काङा निवाँनेन् यायेॽमाबाङ् गरमर ऎपाइखुबा फारिसि लोमाह् याॽमिचिबाङ्ऎ एक्क याॽमि लॆटिङ। 6कानिम् टुबालाबाचि निवाँहाङ्ऎ पिॽमिम्पा चुप्लाङ्पि कॆ निवाँयुङ् लॆःॽमिम्पासॆ काङा आइ गुबि आन्नामि लुम्पि न्यायमि लागि येप्मा सिडिङ। 7ग चुप्लाङ्बिॽन निवाँयुङ् लॆःॽमानुङ् कानिम् एपङ्हि सामॆक्बिहा याॽमिचिऎ निवाँहाङ्बि निवाँ टिमानुङ् लेन्टा हाङ् सेन्टा चुङुकुचि। हाङ् कॆ सङ्क ग खानावाँप्न निवाँयुङ् लॆःॽमिम्पासॆ याहुडिचिऎ काङा आब्डिक् टिॽङामि। 8निवाँहाङ्ऎ सिखॆम्पा याॽमिचि हिङ्पक्मिकुचि लोमॆ खानावाँबि मान्ठा आन्नॆ निवाँयुङ् लॆःॽमा हेसाम्निनॆ?
9“कॆस नासरटमि येसुमि निङ्पि लाम्ढुखुबाचि डिरिक् डुखा पिॽमा लॆःॽमि कामानुङ् मिन्युक्सिङ। 10कॆ यारुसालेम्पि आक्रक्न लॆटुङ। हाङ् ढ्या याटाङ्पाचिबाङ् ढुप्पाट्ट भॆट्टकुङ्हाङ् निवाँनेन् याॽमिचि सॆक्चिम्पि टिसुङ्चि। आक्र टे हेॽनॆ टर खोचि सेॽमार कॆ सङ्क नुक् नुक् लोसुङ्चि। 11डिरिक् खेपा काङा याहुडिचि खोम्ठम् खिम्पि खॆस्से आक्खाचि उम्चि निवाँयुङ् याइमिॽमाम् लागि डान्डा पिट्टुङ्चि। काङा खोचिनुङ् गरढारि याक्चाइङ् कि, काङा होइढा हाङ्टेम्बिऎ हाटाबि सङ्क आक्खाचि डुखा पिस्सि खारिङ।
टाङ्पॆ निवाँयुङ् लॆःॽमिम्पा बारेबि पावलमि खानावाँ
(सॆःक्ढुङ्पा ९:१९; २२:६-१६)
12“गरहाङ् काङा इॽया ढ्या याटाङ्पाचिबाङ् निवाँयुङ् लॆखुबाचि लाप्टक्मॆ ढुप्पाट्ट हाङ् साब्मारा याङ्मानुङ् डमास्कसबि खॆॽमॆ पाइटिङ। 13टुङ्घङ्पो, आक्क लेन्टा काङा खॆॽमॆ पाइमार पारुबाङ् नाम्बाङ् सङ्क डिरिक् हामिम्पा उजेल काङा हाङ् कानुङ् लाम्ढुखुबाचिम् गॆअङमॆअङ् हासा। 14काङ्का चोब्न लाम्फुबि टॆप्रङ्ट टॆःक्लिङ् खारिङ्का। हाङ् काङॆ हिबुरु खाप्पि गर लोमिम्पा एक्क साम्ला खेमुङ्, ‘सावाल, ओ सावाल, आनॆ काङा मान्ठा डुखा पिःॽङानॆ? चिचिङ्पि सिक्मार आनाम् लाङ्न टुगुग्।’
15“हाङ् कॆ सिमुङ्, ‘पारभु आना आसानारो?’ पारभुऎ गर कामानुङ् खानावाँ ऎम्पिटिङ्, ‘काङा आनॆ डुखा पिङानॆ येसुङा। 16ह पगॆ, आना काम् योम्पक् मुखुबा हाङ् चुमॆक्सङ् पिक्खुबा मुमाम् लागि आइ आनानुङ् खाङ्मुडिङ। आनॆ काङाबि खाङ्डुनाह् हाङ् वेन्डा सिन्डा कॆ खाङ्मिनॆ खानावाँमि चुमॆम्सङ् पिॽमा लॆ। 17कॆ आना याहुडि हॆॽनिबारेक्चि हाङ् होइढा हॆॽनिबारेक्चिम् लुम्पि पाङ्हाङ्ना। हाङ् उम्चि हुक्बाङ् जोगालॆखाना। 18आनॆ खोचिम् मिक् हेम्पक्पिट्टॆचॆ, हाङ् युट्राम्पाबाङ् उजेलबि टामिटॆचॆ। हाङ् साइटानमि चॆक्मावाबाङ् ऎम्पक्मिट्टॆचॆ। मसॆ खोचिऎ उम्चि हिङवामि यङ्निमा टक्चाकुचि। हाङ् काङा निवाँयुङ् लॆखुबाचिऎ भॆट्टक्मॆ एक्क भाग भॆट्टकुचि।’
19“मसॆ हाङ् अगिरिपो, ग पारुबाङ् टक्चामिम्पा सेन्चिऎ लोमिम्पा खानावाँ चेन्मा माहेङा। 20चोब्बाङ् याॽल डमास्कसबि हाङ् यारुसालेमबि हाङ् चोब्न याहुडियाबि नुङ् होइडा हॆॽनिबारेक्चिम् लुम्पि सङ्क आन्नामि हिङ्वा याइसे निवाँहाङ्बि ऎम्पकनॆ हाङ् हिङ्वाबाङ् ऎम्पक्पा रक्न पाइटानॆ कामानुङ् खेम्मिटुङ्चि। 21ग योम्पक् यिक्मिम्पासॆ याहुडिचिऎ काङा निवाँहाङ्मि खिम्पि लाबिङ्मिहाङ् सेॽमा यगिङ्मि। 22टर आइडारि काङा निवाँहाङ्ऎ खाङ्डिङ। मसॆ काङा गुबि आन्ना टुङ्घङ्पा नुङ् मिछुॽहाचिम् लुम्पि येसुमि चुमॆक्सङ् पिस्सि येःप्डिङ। कॆ मोसा नुङ् होइढा निवाँहाङ्मि खानावाँ लोखुबाचिऎ लि लोमिम्पाबाङ् डिरिक् माङ्स मालोटिॽङा। 23खोचिऎ याॽलन खिरिस्टऎ डुखा आङ्मान लॆ, हाङ् सिखेम्पाचिबाङ् चोब्बाङ् याॽल हिङ्चाखुबा लिमानुङ् याहुडिचि नुङ् होइडा हॆॽनिबारेक्चि निवाँहाङ्मि ओप्लिङ् रक्मा खानावाँ खेम्मिकुचि कामानुङ् लोसुचि।”
24गरहाङ् पावलऎ टाङ्पामि खानावाँ नुऎ यो लोमॆ पाइमार फेस्टसऎ ढ्या साम्लाऎ पावल लोसु, “ओ पावल, आना ग ङाङ्पखाराना। आम् डिरिक् निवाँऎ आना ङाङ्पक्मिडा।”
25टर पावलऎ लोसु, “फेस्टस टुङ्घङ्पो, का माङाङ्पखॆटिॽङा। टर चाइबानऎ नुङ् काम्नुऎ खानावाँ इमॆ पाइकुङ।” 26अगिरिपा हाङ्ऎ सङ्क ग खानावाँ नुःर लेकु, मसॆ खोम् लुम्पि आँटानुङ् यामुहिङा। कॆ लेकुङ् चोब्न खानावाँ खोम् निवाँबि चु, मान्ठाभनॆ इघा खानावाँ चुम्से लॆःॽमिम्पा हॆॽनॆ। 27हाङ् अगिरिपो, निवाँहाङ्मि खानावाँ लोखुबाचिबि निवाँयुङ् लॆकुनॆ? कॆ लेकुङ् आनॆ निवाँयुङ् लॆकुना।
28अगिरिपा हाङ्ऎ पावल लोसु, “एक्छक्पिॽन आनॆ काङा सङ्क निवाँयुङ् लॆखुबा मुमा मिङाना!”
29पावलऎ खानावाँ एम्पिसे लोसु, “ह हाङ्स डॆङ्पि हाङ्स, निवाँहाङ् नुङ् गर कामानुङ् पारठाना लॆःॽङा, आना टे हॆॽनॆ टर काम् खानावाँ खेम्खुबा चोब्न याॽमिचि काङा रक्मान लिमिर। टर काङार आहिक्टिखॆॽमिर।”
30आक्क डॆङ्पि अगिरिपा हाङ्, टुङ्घङ्पा फेस्टास हाङ् बरनिकि मभाङ् आक्कुबि पेन्डामिह् चोब्न याॽमिचि पग्लिङ्खारामि। 31आक्कबाङ् बाहिर आम्पक्से पाइमार खोचि टाङ्पा टाङ्पाबि गर कासामि, “ग याॽमिऎ सिखॆॽमॆ डान्डा हाङ् सॆक्डिङ्खॆॽमॆ माङ्स योम्पक् मॆनासॆलॆटिटु।”
32हाङ् अगिरिपा हाङ्ऎ फेस्टस लोसु, “गसॆ काइसरबि उम् खानावाँ माटॆटुग लेहाङ्मा सङ्क नुसा।”
ទើបបានជ្រើសរើសហើយ៖
सॆःक्ढुङ्पा 26: LBR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society
