सॆःक्ढुङ्पा 22
22
1“बुबुनुसाचि हाङ् आपाआमाचि खेमाम्नॆ, ह कॆ आन्नामि लुम्पि काङा मान्ठा आब्डिक् मॆड्डिङ्मा लॆःॽङॆ कामानुङ् नुःर खेम्मिकानि।” 2पावलऎ हिबुरु खाप्पि यामुमिम्पा खेमुचिहाङ् खोचि याॽलऎबाङ् सङ्क एट्टान यङ् उक्खॆटुचि। हाङ् पावलऎ गर लोसुचि,
3“काङा सिलिसियामि टारससबि जान्म लिमिम्पा याहुडिङा। टर ग यारुसालेम हाटाबिॽन गमालिएलमि टिङ्खुबा लिमानुङ् पुडिङॆ। कानिम् पाप्पा टुबाचिम् यायेॽमा रक्न कॆ चोब्न यायेॽमा नुःर चिन्डिङ। आइ आन्नॆ निवाँहाङ्बि ऎॽवा निवाँ टिडाम्नि, का सङ्क आक्रक्मान लॆटिङ। 4मसॆ पारभुमि लाम् लाम्ढुखुबाचि हेर डुखा पिट्टुङ्चि। हाङ् मेॽनुङ्मा नुङ् वाठाङ्पाचि लाबुङ्चि हाङ् सॆक्चिम्पि सॆगुङ्चि। 5चोब्बाङ् ढ्या याटाङ्पा नुङ् याहुडिचिम् न्याय लॆखुबा चोब्न टुङ्घङ्पाचिऎ स कॆ लोमिम्पा ग खानावाँ चाइबानऎ कामानुङ् इहिकुचि। खोचिबाङ् कॆ डमासकसबि पेन्खुबा बुबुनुसाचि लाप्टक्मॆ ढुप्पाट्ट नुङ्मा साब्चिरा भॆट्टकुङ। मसॆ काङा येसुबि निवाँयुङ् लॆखुबाचि यारुसालेम्पि लाप्टॆॽसे डान्डा पिॽमाम् लागि डमासकसबि खॆॽमॆ पाइटिङ।
6“काङा डमासकस कॆक्पि टामार आक्रक्न लेन्टाऎ माढ्ये डिना लिमिम्पा लॆटा। मरक्लन नाम्फलिॽवाबाङ् काम् गॆअङमॆअङ् नाम्टुरुङ्मार हासा। 7काङा बाखाबि टॆप्रङ्ट टॆःक्ढिन्खारिङ। हाङ् गरक्मा एक्क साम्ला खेमुङ्, ‘सावाल! सावाल! आनॆ काङा मान्ठा काइर लॆॽङानॆ?’
8“हाङ् कॆ सङ्क सिमुङ् ‘पारभु आना चाइ आसानारो?’ खोसॆ लोसिङ्, ‘काङा आनॆ डुखा पिॽमिम्पा नासरटमि येसुङा।’ 9आक्कुबि कानुङ् सोरि लाम्ढुखुबा याॽमिचिऎ नाम् रक्मा हामिम्पा चाइ खाङुचि, टर कानुङ् यामुखुबामि साम्ला मान्वाबुचि।
10“फेरि कॆ सिमुङ्, ‘पारभु ह माङ् लॆःॽमाङॆ?’ पारभुऎ लोसिङ्, ‘पगॆहाङ् डमासकसबि खारॆ। आक्कुबि आनॆ लॆःॽमा लॆऎ चोब्न योम्पक् एक्कसॆ इबि।’ 11आक्क हामिम्पा उजेलऎ काम् मिक् टिरमिरा लिसा, मसॆ मिक् खाङ्मा माहेङा। हाङ् कानुङ् सोरि लाम्ढुखुबा लाङ्काम्चिऎ हुक्पि लाॽमानुङ् डमासकसबि लाखॆटिङ्मि।
12“आक्कुबि हनानिया लोमॆ एक्क याॽमि चुआ। खो मोसामि यायेॽमा रक्न पाइखुबा निवाँनेन् याॽमि लॆटा। हाङ् आक्कुबिहा चोब्न याहुडिचिऎ ङॆप्युक्सुचि। 13खो का चुःॽङॆ ठालबि टाआहाङ् लोसिङ्, ‘नुसा सावाल, आना फेरि खाङ्हिखुबा लिसे।’ मरक्लॽन का मिक् खाङ्खुबा लिसिङ् हाङ् खो खाङ्टकुङ।
14“हाङ् खोसॆ काङा लोसिङ्, ‘कानिम् पाप्पा टुबाचिम् निवाँहाङ्ऎ आना खोम् निवाँ वाप्मा, खोम् निवाँनेन् याॽमि येसु खाङ्मा हाङ् खोम् खानावाँ खेम्माम् लागि सॆःक्डा। 15मान्ठाभनॆ आना खोम् चुमॆक्सङ् लिक्ना। हाङ् आनॆ खाङ्मिम्पा नुङ् खेम्मिम्पा खानावाँ चोब्न याॽमिचि खेम्मिकुचिना। 16मसॆ ह माङ् हुङ्कुनॆ? पगॆहाङ् बाप्टिस्मा लासे। हाङ् खोम् निङ् लामानुङ् आनाम् हिङ्वाबाङ् सॆङ्सॆङॆ लिसे।’
17“आक्क डॆङ्पि का यारुसालेम्पि ऎम्पकिङ् हाङ् निवाँहाङ्मि खिम्पि पारठाना लॆसॆ लॆःॽमार निवाँन माखारिङ। 18कॆ पारभु खाङ्टकुङ् हाङ् खोसॆ का लोसिङ्, ‘सॆॽल यारुसालेम याइडाऎ मान्ठाभनॆ गुबिहा याॽमिचिऎ आनॆ काम् बारेबि इमिम्पा चुमॆक्सङ् नेन्चाउचिनि।’
19“कॆ लोसुङ्, ‘ओ पारभु, कॆ मान्टहाङ् याहुडिचि खोम्ठाम् खिम्पि खॆॽसे आनाबि निवाँयुङ् लॆखुबाचि लाप्से रगुङ्चि हाङ् सॆक्चिम्पि सॆगुङ्चि लोमॆ खानावाँ चोप्पसॆ लेकुचि। 20हाङ् आनामि चुमॆक्सङ् पिक्खुबा इस्टिफनस हारि बिरिरि मुमानुङ् सेॽमार, का सङ्क सेक्खुबाचिनुङ् टङ्से उम्चि चे हुङ्मानुङ् कॆक्पिॽन येप्मिम्पा लॆटिङ। 21टर पारभुऎ काङा लोसिङ्, आना खारॆ, मान्ठाभनॆ आना कॆ डिरिक् मिउढारिबिहा ठालबि होइढा हॆॽनिबारेक्चिबि पाङ्हाङ्ना’।”
22खोचिऎ पावलमि खानावाँ गरढारि टे खेमुचि। हाङ् खोचि “ग सेॽमान लॆ, खो बाखाटेम्पि हिङ्चामिॽमा फॆन्नि” कामानुङ् ढ्या साम्लाऎ याकाबकामि।
23गरहाङ् याॽमिचि उम्चि चेः कग्से हाङ् बाखा नाम्फलिॽवा सक्पिटु फुबक्मानुङ् याकाबकामि।
पावलऎ रोमि ढुप्पाट्ट नुङ्मा याॽमिङा लोमिम्पा
24ग खाङुहाङ् टुङ्घङ्पाऎ याॽमिचि मान्ठा सोम् खेरुक्मिह् कामानुङ् लेॽमाम् लागि पावलऎ इकुयॆ रु मिम्मानुङ् टिलिङ्गाचिम् खिम् हङ्सिॽयु लाटॆॽमिटुचि हाङ् रगाम्नॆ लोसुचि। 25टिलिङ्गाचिऎ कोर्रा टिमाम् लागि खो हिःक्मा परक्मार, पावलऎ खोम् कॆक्पि येप्ढाङ्खुबा कप्टान लोसु, “रोमि ढुप्पाट्ट नुङ्मा याॽमि आब्डिक् मॆड्डिङ् कोर्रा टिमा रोमि यायेॽमाऎ पिऎ?”
26कप्टान रोमि टुङ्घङ्पाबि खाराहाङ् लोसु, “टुङ्घङ्पो, आनॆ ग माङ् लॆःॽमा परक्मिम्पा? ग याॽमि ग रोमि ढुप्पाट्ट नुङ्मा याॽमि रे हॆम।”
27आक्क रोमि टुङ्घङ्पा टाआहाङ् पावल सिमु, “चाइबान आना रोमि ढुप्पाट्ट नुङ्मा याॽमि हॆ?” पावलऎ “एम” कामानुङ् लोसु।
28आक्क टुङ्घङ्पाऎ लोसु, “कॆ डिरिक् याङ्ऎ ग रोमि याॽमिमि ढुप्पाट्ट इम्मिम्पा।” पावलऎ खानावाँ ऎम्पिटु, “काग पिसाबाङ्नन रोमिङा।” 29ग खेम्मा अक्सि पावल खानावाँ सिम्मा परक्मिम्पा याॽमिचि खाइटामि। पावल रोमि ढुप्पाट्ट नुङ्मा याॽमि लोमॆ खानावाँ लेटकुचिहाङ् आक्क रोमि टुङ्घङ्पा सङ्क किसिखारा। मान्ठाभनॆ खोसॆ पावल हिक्मिम्पा लॆटा।
पावल याहुडि टुङ्घङ्पाचि खोम्ठाम् ठालबि
30रोमि टुङ्घङ्पाऎ मान्ठा याहुडिचिऎ पावल आब्डिक् टिमिम्पा कामानुङ् लेॽमॆ निवाँ मुसु। मसॆ वेन्डा ढ्या याटाङ्पाचि नुङ् याहुडि टुङ्घङ्पाचि खोम्ठाम् खिम्पिहा टुङ्घङ्पाचि खानावाँ इसि खोमानॆ कामानुङ् पावल लेॽहाङ्सु। हाङ् वेन्डाक् लाम्पॆ पावल आक्खाचिम् लुम्पि येॽमिटु।
ទើបបានជ្រើសរើសហើយ៖
सॆःक्ढुङ्पा 22: LBR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society
