सॆःक्ढुङ्पा 21
21
पावल यारुसालेम खॆॽमिम्पा
1ह एफिससबिऎ मान्डालिबिहा टुङ्घङ्पाचि नुङ् फागिङ्का। हाङ् गरमर मालॆःॽरे योवाखङ्बाङ् कोस लोमॆ योवाऎ ऎक्मिम्पा ठालबि रुक्टाइङ्का। आक्कमि वेन्डाक् लाम्पॆ रोडोस लोमॆ ठालबि टाइङ्का। आक्कबाङ् पटारा हाटाबि टाइङ्का। 2आक्कुबि फोनिसिया लोमॆ ठाल पोट्टा खॆऎ एक्क योवाखङ् भॆट्टकुङ्का। हाङ् आक्कुब्न ठाङिङ्का हाङ् खारिङ्का। 3साइपरस लोमॆ हाङ्टेम् खाङ्ङुबक्का, हाङ् काङ्का आक्कमि चुप्ठिङ् पोट्टा लिसे सिरिया पोट्टि खारिङ्का। टायर लोमॆ ठालबि योवाखङ्ऎ कग्नाम् लाबक्मा लॆऎसॆ काङ्का आक्कुबि आम्पकिङ्का। 4आक्कुबि निवाँयुङ् लॆखुबा बुबुनुसाचि यगुङ्का, हाङ् खोचिनुङ् वाङ्चि डिना पेनिङ्का। खोचिऎ सॆङ्सॆङॆ लावाबाङ् पावल यारुसालेम ऎखारॆ कामानुङ् लोसुचि। 5हाङ् कानिम् आक्कुबि पेन्मॆ लः लुक्खारा हाङ् काङ्का योवाखङ्पि ठाङ्माम् लागि लाम्फु लागालिसिङ्का। आक्कुबिहा निवाँयुङ् लॆखुबाचि उम्चि खिम्टाङ्माचि हाङ् पिसाचिढारि काङ्का चिःक्टिडासि हाटा बाहिरढारि टाआमि। हाङ् काङ्का पॆरॆरॆमा कॆक्पि पुम्रुॽवा ठक्मानुङ् पारठाना लॆटिङ्का। 6हाङ् खाइटिङ्कायो कामानुङ् काङ्का योवाखङ्पि ठाङिङ्का। खोचि सङ्क उम्चि खिम्पि ऎम्पकामि।
7काङ्का टायरबाङ् टुलेमियास लोमॆ हाटाबि टाइङ्का हाङ् योवाखङ्बाङ् आम्पकिङ्का। आक्कुबि निवाँयुङ् लॆखुबाचिबि खारिङ्का हाङ् इॽया खोचिनुङ्न पेनिङ्का। 8वेन्डाक् लाम्पॆ सिजरियाबि टाइङ्का हाङ् नुऎ खानावाँ खेम्मिखुबा फिलिपमि खिम्पि खारिङ्का। खो सॆःक्ढुङ्पाचि मुबाक्खुबा वाङ्चि जाना टुङ्घङ्पाचिबाङ् एक्क लॆटा। 9डॆङ्पि लिखुबा खानावाँ याॽलन यामुखुबा उम् रिचि जाना भ्या मालिम्पा साम्सामाचि चुआमि।
10काङ्का आक्कुबि एक्क हिप्चि डिना पेन्मार, डॆङ्पि लिखुबा खानावाँ याॽलन यामुखुबा एक्क अगाबस लोमॆ याॽमि याहुडिया लोमॆ ठालबाङ् उक्सा। 11आगाबास काङ्काबि टाआहाङ् खोसॆ पावलमि हम्डङ् हेम्बकु हाङ् खोसे टाङ्पाम् लाङ् हुक् ठुबुहाङ् गर कासा, सॆङ्सॆङॆ लावाऎ गर लोकु, “ग हम्डङ्मि टुङ्घङ्पा यारुसालेम्पि याहुडिचिऎ गरहाङ्न ठुबुकुचि। हाङ् होइढा हॆॽनिबारेक्चिम् हुक्पि पिकुचि।”
12हाङ् काङ्कॆ ग खानावाँ खेमुङ्काहाङ् काङ्का हाङ् आक्कुबि चुक्मिहा याॽमिचिऎ पावल यारुसालेम ऎखारॆ कामानुङ् नुःर लोसुङ्का। 13टर खोसॆ काङ्का गर लोसिङ्का, “आन्नॆ मान्ठा हाप्से काम् निवाँ टुक्मिकाम्नॆ? काग यारुसालेम्पि पारभु येसुमि लागि सॆक्ढिङ्खॆॽमा टेःॽन हॆॽनॆ टर सिखॆॽमा सङ्क हेकुङ।” 14काङ्कॆ खो उम् निवाँबाङ् ऎम्पक्मा हेःनॆ खानावाँ वाप्टकुङ्का हाङ् “पारभुमि निवाँ रक्न लिर” कामानुङ् यङ् उगिङ्का।
पावल यारुसालेम्पि
15आक्क डॆङ्पि कॽनाम टङुङ्का हाङ् यारुसलेम खारिङ्का। 16सिजरियाबिऎ एक्क हिप्पा निवाँयुङ् लॆखुबाचि काङ्का नुङ्न लङामि। हाङ् खोचिऎ काङ्का साइपरस लोमॆ ठालबिऎ मनासोनमि खिम्पि पेन्मा कामानुङ् लाखॆटिङ्का। मनासोनऎ डिरिक् याॽलन निवाँयुङ् लॆःॽमिम्पा लॆटा।
17हाङ् काङ्का यारुसालेम टामार आक्कुबिहा निवाँयुङ् लॆखुबाचिऎ नुःर लॆटिङ्का। 18हाङ् वेन्डाक् लाम्पॆ पावल काङ्कानुङ् याकुबमि खिम्पि खारा। आक्कुबि मान्डालिबिहा चोब्न टुङ्घङ्पचि खोम्टि खॆॽमिम्पा लॆटामि। 19पावलऎ खोचि चोब्न स्यामिटुचिहाङ् निवाँहाङ्ऎ खोम् हुक्बाङ् होइढा हॆॽनिबारेक्चिबि मान्टहाङ् योम्पक् लॆटुवॆ लोमॆ चोब्न खानावाँ खेम्मिटुचि।
20खोचिऎ पावलमि खानावाँ खेमुचिहाङ् निवाँहाङ्मि निङ् ठेरुचि। हाङ् पावल गर लोसुचि, “नुसा, खाङॆ, गुबि सङ्क डिरिक्बाङ् डिरिक् याहुडिचिऎ निवाँयुङ् लॆडुचि। हाङ् खोचि मोसामि यायेॽमा रक्न पाइक्मि। 21खोचिऎ होइढा हॆॽनिबारेक्चिम् लुम्पि पेन्खुबा याहुडिचि मोसामि यायेॽमा रक्न लॆःॽमा पाब्नि। हाङ् वाठाङ्पा पासाचिम् खाट्ना स लॆःॽमा पाब्नि हाङ् याहुडिचिम् चालाना स मुमा पाब्नि कामानुङ् आनॆ चिनुकुचिना कामानुङ् खेम्डुचि। 22मसॆ ह माङ् लॆःॽमॆ? मान्ठाभनॆ खोचिऎ आना गुबि टाडाना कामानुङ् खानावाँ खेमुकुचिन। 23मसॆ काङ्कॆ लोसिन्ट लॆटॆ। गुबि निवाँहाङ् नुङ् चुप्लाङ् हिक्खुबा रिचि जाना याॽमिचि चुक्मि। 24खोचिऎ ठुॽमिम्पा चुप्लाङ्मि लः लुक्खॆडा। इघा याॽमिचि चिःक्खॆटॆचॆ, हाङ् खोचिनुङ्न आना सङ्क सॆङ्सॆङॆ लिसॆ। खोचिऎ सङ्टिॽमार पाबुहा चोब्न ठका आनॆ टङ्पिटॆचॆ। हाङ् खोचिऎ उम्चि टाङाक् खोसुचिर। गरहाङ् आनॆ यायेॽमा रक्न पाइमिम्पा याहुडिऎ खाङ्कुचि। हाङ् आनाम् बारेबि खेम्मिम्पा खानावाँ चाइबनऎ हॆॽनॆ कामानुङ् लेटकुचि। 25टर निवाँयुङ् लॆखुबा होइढा हॆॽनिबारेक्चि, मुर्टिबि टिमिम्पा ठका, हारि हाङ् पॆॽला यिङ्मानुङ् सेॽमिम्पा पोसुचिम् सा ऎचाआनॆ, हाङ् हाबि ग हाबि याॽमिचि नुङ् इम्चाटिॽमॆ योम्पक्बाङ् मिउ पेनानॆ कामानुङ् काङ्काम् खानावाँ साब्डुङ्का।”
पावल लाबुकुचि
26पावल उम्चि खानावाँबि खासिआ। हाङ् वेन्डाक् लाम्पॆ आक्खा रिचि जाना याॽमिचि चिःक्मानुङ् खारा। हाङ् खोचिनुङ् सोरि सॆङ्सॆङॆ लिसाहाङ्, सॆङ्सॆङॆ लिमॆ डिना हानाम् लुक्खॆऎ, हाङ् चोप्पसॆ हानाम् सङ्टिकुचॆ लोमॆ याटाङ्पा खेम्मिसि पावल निवाँहाङ्मि खिम्पि खारा।
27हाङ् सॆङ्सॆङॆ लिमाम् लागि वाङ्चि डिना लिमा ठाबाक्मिम्पा लॆटा। एक्क हिप्पा एसिया ठालबिहा याहुडिचिऎ पावल निवाँहाङ्मि खिम्पि खाङुचि। हाङ् चोब्न याॽमिचि चोम्पक्से लाबुचि 28हाङ् गरहाङ् याकासामि, इस्राएलि बुबुनुसाचि, गुबि काङ्का मुबाक्चिमॆ। ग याॽमिन इस्राएलिचि काइर लोसे याॽयेॽमा रक्न पाइमा पाब्नि काखुबा, हाङ् निवाँहाङ्मि खिम्मि चुङ्मा स पाब्नि काखुबा। गरटे हॆॽनॆ, गसॆ स होइढा हॆॽनि बारेक् याॽमिचि निवाँहाङ्मि खिम् हङ्सि भॆम्मिडुचि हाङ् निवाँहाङ्मि खिम् काइसॆ मुडु। 29मान्ठाभनॆ खोचिऎ एफिससबाङ् टामिम्पा टोरोफिमस लोमॆ याॽमि हाटाबि खोनुङ् वाइमे सिऎ खाङुचि। हाङ् पावलऎ खो निवाँहाङ्मि खिम् हङ्सि लाटॆटु कामानुङ् मिनुचि।
30हाङ् हाटाबि ढ्या याटक्माटक् लिसा। हाङ् हाटाबिहा चोब्न याॽमिचि पिन्टाआमि। खोचिऎ पावल लाबुचि हाङ् सॆस्से निवाँहाङ्मि खिम्पाङ् लाबाकुचि। हाङ् मरक्लॽन निवाँहाङ्मि खिम्मि लम्भॆरॆङ्मा सॆक्ठाङ्सुचि। 31हाङ् खोचिऎ पावल सेॽमा परक्मार, यारुसालेम्पि ढ्या याटक्माटक् लिमॆपाइ कामानुङ् रोमि टुङ्घङ्पाऎ खेमु। 32मरक्लॽन खो एक्क हिप्पा कप्टानचि नुङ् होइढा टिलिङ्गाचि चिःक्मानुङ् याॽमिचि पोट्टा पिन्मानुङ् युढारामि। खोचि टामिम्पा खाङुचिहाङ् याॽमिचिऎ पावल रःक्मा याइटुचि।
33आक्क टुङ्घङ्पा पावलमि कॆक्पि खाराहाङ् लाबु, हाङ् हिच्चि पाडाक्ऎ हिगाम्नॆ लोसुचि। हाङ् खोसॆ याॽमिचि “ग याॽमि आसार हाङ् गसॆ माङ् लॆटुयॆ?” कामानुङ् सिमुचि। 34हाङ् खोम्टिखॆम्पा याॽमिचिबाङ् एक्कसॆ एक्क खानावाँ हाङ् होइकसॆ होइक खानावाँ इमानुङ् याकासामि। आक्खाचि डिरिक् याकाम्पासॆ टुङ्घङ्पाऎ उम्चि खानावाँ मॆवाब्हिसु। मसॆ खोसॆ पावल टिलिङ्गाचिम् खिम्पि लाटॆटाम्नॆ कामानुङ् लोसुचि। 35हाङ् खोचि टिलिङ्गाचिम् खिम्मि ठाङ्कङ् ठाङ्मे सिसामिर, सयक्पयक् लॆःॽमानुङ् याॽमिचि पावल सेस्सि टाआमि। मसॆ टिलिङ्गाचिऎ पावल ठेख्खॆटुचि। 36मान्ठाभनॆ ऎॽवाहा ऎॽवाह याॽमिचि “पावल सेराम्नॆ” कामानुङ् याकासे खोचि डॆङ्डॆङ् टिङुचि।
पावल याॽमिचि नुङ् यामुमिम्पा
37टिलिङ्गाचिऎ पावल खोचि पेन्ठाम् खिम् हङ्सिॽयु लाखॆॽमा ठाबाकुचिर, पावलऎ टुङ्घङ्पा लोसु, “टुङ्घङ्पो, आना नुक् काग्ना हाङ्ग, कॆ मिःक्म खानावाँ इकुङ।” टुङ्घङ्पाऎ लोसु “माल आनॆ गिरिक् खाप् सङ्क लेकुनॆ? 38माल् आना आक्क मिसिरि टुङ्घङ्पानान हॆॽनॆ, खोसॆ याटक्माटक् लाबक्मानुङ् रिबङ् जाना हाङ्टेम् नुङ् खिखुबाचि आसास पेम्मिनिहा ठालबि लाखॆम्पा लॆटुचि।”
39पावलऎ लोसु, “काङा आक्क याॽमि हॆॽङानॆ। टर सिलिसियामि टारसस लोमॆ हाटाबिऎ ढुप्पाट्ट नुङ्मा याॽमिङा। इघा याॽमिचि नुङ् याम्मा पिॽङॆ।”
40टुङ्घङ्पाऎ सङ्क यामुसॆम्टा कामनुङ् लोसु। हाङ् पावल ठाङ्कङ्बि येप्पकाहाङ् याॽमिचि हुगॆ यामिटुचि। मसॆ याॽमिचि यङ् उग्टिखारामि हाङ् पावल आक्खा याॽमिचि नुङ् हिबुरु खाप्पि यामुबक्का।
ទើបបានជ្រើសរើសហើយ៖
सॆःक्ढुङ्पा 21: LBR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society
