२ ठेसलोनिकि 3
3
पावलऎ पारठाना लॆपिचिमॆ लोमिम्पा
1बुबुनानुसाचि, खानावाँ लुक्पिॽमा ठाबाक्मार लोकानि, काङ्काम् लागि सङ्क पारठाना लॆपिचिमॆ। मसॆ सॆॽलन पारभुमि खानावाँ फुबक्ल हाङ् याॽमिचिऎ निवाँयुङ् लॆटुचिर। म योम्पक् आन्नाम् लुम्पि स लिमिम्पा लॆटा। 2हाङ् निवाँहाङ्ऎ काङ्का काइसॆ नुङ् निवाँ नासॆलिमिम्पा याॽमिचिबाङ् हिङ्चामिट्टिङ्कार, मान्ठाभनॆ चोब्न याॽमिचिऎन ग निवाँयुङ् लॆटुचिनि। 3टर पारभु चाइ निवाँयुङ्मा लॆ। खोसॆ आन्ना चॆक्मावा पिकानि हाङ् काइसॆ साइटानबाङ् मिउ युङ्कानि। 4हाङ् काङ्कॆ आन्ना लोमिम्पा रक्न लॆःॽमॆ पाइकानि लोमॆ खानावाँ आन्नॆ लॆःॽमॆ सङ्क पाइकाम्नि लोमॆ खानावाँ काङ्कॆ पारभुबि निवाँयुङ् लॆकुङ्का। 5हाङ् पारभुऎ आन्नामि निवाँहाङ्मि नाम्नाम् पिस्सिॽमॆ खानावाँबि हाङ् खिरिस्टऎ आङ्मॆ लाम्फुबि लाम्ढुमिॽमिर।
आन्नॆ योम्पक् मुमा लॆ
6बुबुनानुसाचि, काङ्कॆ पारभु येसु खिरिस्टमि निङ्पि आन्ना नुःर लोकानि, ऎट्टुबाङ् नुङ् आन्नॆ काङ्काबाङ् खेम्मिम्पा रक्न आपाइखुबा चोब्न बुबुनानुसाचिबाङ् मिउ पेनानॆ। 7मान्ठाभनॆ काङ्का पाइसिन्टक्न कानि पाइमा लॆ कामानुङ् आन्नॆॽन लेकाम्नि। हाङ् काङ्का आन्नानुङ् चुइङ्कार माऎस्सिइङ्का। 8हाङ् आन्नॆ काङ्का हिङ्टिखॆॽमा आसिॽल कामानुङ् याङ् माफङ्रे आन्ना आसाम्स माङ्स माचाइङ्का हाङ् माडुङिङ्का। बोरु लेन्लेन् सेन्सेन् हेमाहे योम्पक् मुसिङ्का। 9काङ्काम् लागि आन्नॆॽन चोब्न ठका टङ्मा लॆ लोमॆ ढुप्पाट्ट काङ्कानुङ् चुआ हाङ्स आन्नामि लुम्पि एक्क टिङ्मा लॆऎ याॽमि लिमाम् लागि आक्र पाइटिङ्का। 10मसॆ काङ्का आन्नानुङ् चुइङ्कार योम्पक् आमुखुबॆ चामा सङ्क आचाउर कामानुङ् लोमिम्पा लॆटानि।
11मान्ठाभनॆ ऎॽवाचि चाइ ऎट्टुबाङ्चि लॆःॽमि हाङ् माङ्स योम्पक् मुमिनि, टर होइढाचिऎ मुमॆ पाइमिम्पा योम्पक्पि हुक् डॆन्से फोप्सिॽमॆ पाइकुचि लोमॆ खानावाँ खेम्मे पाइकुङ्का।
12हाङ् आक्रहा याॽमिचि काङ्कॆ पारभु येसु खिरिस्टमि निङ्पि नुःर लोकुङ्का, खोचि यङ् उःक्मानुङ् टाङ्पाम् बःक्मि लागि योम्पक् मुचामिर। 13हाङ् बुबुनानुसाचि, आन्ना चाइ नुऎ योम्पक् मुमा हानाम्स आयाइटानॆ। 14हाङ् काङ्कॆ ग साब्चिराबि साप्हाङ्पा रक्न पाइमा आखासिखुबा याॽमिचि चाइ आन्नॆ लेभुङ्साम्चिनॆ हाङ् आक्क याॽमि नुङ् मिउन पेनानॆ। मसॆ खो ङेसिमाबि सिट्टिखॆॽल हाङ् खो नुःर पाइर। 15हाङ्स आक्रॽमा याॽमि काइर मिॽमान आसिच्चाआम्नॆ, टर टाङ्पाम् नानानुसार मिन्से नुःर लोसिटाम्नॆ।
पावलमि डॆङ्पिऎ खानावाँ
16सान्टि पिक्खुबा पारभुऎ खोम् सान्टि हानाम्स आन्ना आम्नि चोब्न योम्पक्पि पिट्टानिर। हाङ् पारभु आन्नानुङ् लिर।
17काङा पावलमि हुगॆॽन ग स्यामिॽमॆ खानावाँ साप्मे पाइकुङ। काङॆ साप्मिम्पा चोब्न साब्चिरा गरहाङ्न साब्डुङ। ग चाइ कॆ साब्मिम्पा खानावाँमि चुमॆक्सङ् यो।
18कानिम् पारभु येसु खिरिस्टमि नाम्नावाँ आन्ना चोब्ननुङ् लिर।
ទើបបានជ្រើសរើសហើយ៖
२ ठेसलोनिकि 3: LBR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society