२ कोरेन्ठि 6
6
1काङ्का निवाँहाङ्मिन योम्पक् मुखुबा लिमिम्पासॆ काङ्कॆ आन्ना नुःर लोखाचिम्, आन्नॆ खोबाङ् टक्चामिम्पा नाम्नावाँ हुन्नहा आमुसाम्नॆ। 2मान्ठाभनॆ निवाँहाङ्ऎ गरहाङ् इकु,
“काम्नुऎ लःबि कॆ आनामि पारठाना खेमुङ् हाङ् याॽमिचि
फाक्मा लॆऎ डिनाबि काङॆ आन्ना पाइबाकानि।”#यासाइया ४९:८
खाङानॆ, ह निवाँहाङ्मि काम्नुऎ लः नुङ् याॽमिचि फाक्मॆ डिना यो।
3काङ्कॆ निवाँहाङ्मि लागि यिक्मिम्पा योम्पक्बि आसॆस माङ्स काइसॆ खानावाँ इहिसुचिनि मसॆ काङ्का याॽमिचिम् लाम्फु ऎक्खुबा याॽमि आलिसिङ्कार। 4टर काङ्कॆ चाइ हेमाहे निवाँहाङ्मि योम्पक् मुखुबा याॽमिचि कामानुङ् खाङ्मुकुङ्का। काङ्कॆ आङ्मॆ आङ्से, डुखाबि, माङ् लॆःॽमॆ माङ् आलॆःॽमॆबि सिॽमार, निवाँबि माङ्स चेन्चामॆ खानावाँ आटक्चामॆ खानावाँ आङ्कुङ्का।#सॆःक्ढुङ्पा १६:२३ 5काङ्कॆ रःक्मा टुम्चाइङ्का, सॆक्मा खाइहाङ्चाङ्का हाङ् याॽमिचिबाङ् बुःप्मा खाइहाङ्चाङ्का। हेमाहे योम्पक् मुडिङ्का, माइम्चारे हाङ् साक्मेन्चा स पेन्डिङ्का। 6हाङ्स काङ्कॆ सॆङ्सॆङॆबि, निवाँऎ, आङ्हिमॆ खानावाँ नुङ् नाम्नाम पिस्सिमाऎ, सॆङ्सॆङॆ लावाऎ, चाइबानऎ नाम्नाम् पिसिॽमाऎ, 7खानावाँ इसे हाङ् निवाँहाङ्मि चॆक्मावाऎन काङ्का खोम् योम्पक् मुखुबाचि यो कामानुङ् खाङ्मुडुङ्का। याॽमिचि नुङ् खिमाटुमा सिट्टा हाङ्स हाङ् खोचिबाङ् टाङ्पा हिङ्चामा सिट्टा हाङ्स काङ्कानुङ् एक्क आप्चिरा चुः। आक्क आप्चिरा चाइ निवाँहाङ्मि ङारिङ्बि नुऎ योम्पक यिग्मॆ रेम। 8याॽमिचिऎ काङ्का ङेबुक्मि हाङ्स हाङ् सिच्चाआमि हाङ्स काङ्कामि निङ् ठेरुकुचि हाङ्स हाङ् चेनुकुचि हाङ्स, याॽमिचिऎ काङ्का बङ्चाखुबाचिर लॆटिङ्का हाङ्स चाइबानऎ खानावाँ खेम्मिकुङ्का। 9काङ्का आसॆस मालेमिबा याॽमिर लॆकिङ्का हाङ्स चोब्पासॆ लेःॽमि। सिखॆॽमिम्पार लॆकिङ्का हाङ्स हिङ्चाडिङ्का। रःक्मा टुम्चाकिङ्का हाङ्स सेॽमा माखॆॽयाङ्चाडिङ्का। 10हाङ् काङ्का निवाँ टुःक्डिङ्का हाङ्स हानाम्स हाङ्हाङ् मिनुकिङ्का। हाङ् आचुखुबार लॆकिङ्का हाङ्स याॽमिचि चासुम्टाङ्पा मुकुङ्चिगा। हाङ् माङ्स माइन्ट खाङ्मुकिङ्का हाङ्स चोब्ठका चुचाकिङ्का।
11कोरेन्ठिबिहा लाङ्काम्चि, काङ्कामि निवाँ ढ्या मुमानुङ् आन्ना चोब्न खानावाँ नुःर इबिडाचिम्। 12काङ्कॆ आन्ना नाम्नाम् पिसिॽमा मायाइटिटुङ्का, टर आन्नॆ रे काङ्का नाम्नाम् पिसिॽमा याइसे खॆःॽडानि। 13ह काङॆ आन्ना टाङ्पामि पासाचिर मिस्से लोकानि, आन्ना काङ्का रक्मान लिसानॆ। मिःछुपा निवाँ नुङ्मा हॆॽनॆ, टर ढ्या निवाँ नुङ्मा लिसानॆ।
निवाँयुङ् लॆखुबा नुङ् आलॆखुबा एक्कन हॆॽनॆ
14खिरिस्टबि निवाँयुङ् आलॆखुबाचिनुङ् एक्कन आलिसानॆ। निवाँनेन् नुङ् निवाँनेन् मॆड्डिङ्मा खानावाँ टङ्ऎ टा? बिऎ नुङ् माॽयाक्ट एक्क ठालबि लिऎ टा? 15खिरिस्ट नुङ् साइटानमि खानावाँ मान्टक्ल टङ्ऎ? हाङ् निवाँयुङ् लॆखुबा नुङ् आलॆखुबा याॽमिमि सङ्क माङ्स खानावाँ टङ्नि। 16एक्क मुर्टि नुङ् निवाँहाङ्मि खिम्मि माङ्स टङ्नि। मान्ठाभनॆ कानि चाइ हिङ्चाऎ निवाँहाङ्मि खिम् रेम। निवाँहाङ् गरहाङ् काडा,
“काङा काङाम् याॽमिचि नुङ् पेनुॽङा
हाङ् खोचिनुङ्न लाम्ढुङ्ङा
काङा खोचिम् निवाँहाङ् लिःॽङा
हाङ् खोचि काङाम् याॽमि लिक्मि।”#१ कोरेन्ठि ३:१६; ६:१९; लेबि २६:१२; इजाकिएल ३७:२७
17मसॆॽन निवाँहाङ्ऎ गर काडा,
“आन्नॆ आक्खाचि याइटाम्नॆ
हाङ् आक्खाचिबाङ् मॆॽयङ् पेनानॆ।
हाङ् चोब्न काइसाहा खानावाँ आडिन्चाआनॆ
हाङ् कॆ आन्ना काङामि ङारिङ्पि लाटॆकानि।”
18“हाङ् काङा आन्नामि आपा लिःॽङा
हाङ् आन्ना काङामि पासाचि लिकानि।
ग खानावाँन चोब्बाङ् चॆक्मावा नुङ्मा पारभुऎ लोमिम्पा यो।”#२ सामुएल ७:१४; १ इटिहास १७:१३; यासाइया ४३:६; यारमिया ३१:९
ទើបបានជ្រើសរើសហើយ៖
२ कोरेन्ठि 6: LBR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society