२ कोरेन्ठि 5
5
1मान्ठाभनॆ काङ्कॆ लेकुङ्का कानिम् ग सा नुङ् सॆकॽवामि सालुङ् एक्क गोठ्ठा रक्मान म लुक्खॆ। टर निवाँहाङ्ऎ पारुबि कानि पिऎ सालुङ् चाइ याॽमिमि हुगॆ मुमिम्पा नासॆलिखुबा खिम् रक्मा हॆॽनॆ, टर हानाम्स लिढाङ्खुबा यो। 2चाइबान लोमार, कानि हिङ्चाकिहा सालुङ्बि याक्टासे खॆडि। ग सालुङ्पि कानि हिङ्चाम्मिम्पाबि डुखा मिनुकि। बोरु आक्क पारुबि टक्चाऎ सालुङ् चाइ चे चाङ्मिम्पार चाङ्माम् लागि हॆङ्मा लु। 3मान्ठाभनॆ आक्क पारुबिऎ चे चाङ्मार कानि सालुङ् मॆड्डिङ्मा लिसिनि। 4ग बाखाटेम्पिऎ सालुङ्पि हिङ्चारढारि निवाँ टुक्मॆ खानावाँऎ कानि याक्टासे खॆकि। ग लोमिम्पा चाइ साः नुङ् सॆकॽवा नुङ्मा सालुङ्पि सिखॆॽमॆ खानावाँबि हॆङ्मिम्पा ग हॆॽनॆ, टर आक्क पारुबिऎ सालुङ् चाइ हानाम् टक्चामॆ कामानुङ् हॆङ्मिम्पा रेम। गरहाङ् ग लुक्खॆऎ सालुङ् आक्क लुक्खॆॽनॆ हिङ्खामाबि खाइहाङ। 5कानि आक्रक्मा मुखुबा निवाँहाङ्न। खोसॆ कानि डॆङ्पि पिऎ खानावाँ चाइबान पिकानि कामानुङ् खाङ्मिॽमाम् लागि सॆङ्सॆङॆ लावा पिडि।
6मसॆ हानाम्स काङ्कॆ काङ्कामि निवाँ सेरुम्कानि। काङ्का ग बाखाटेम्पिऎ सालुङ्पि हिङ्चारढारि पारभुबाङ् मॆअङ् लिकि लोमॆ काङ्कॆ लेकुङ्का। 7मसॆ काङ्कॆ खाङ्मिम्पासॆ हॆॽनॆ, टर निवाँयुङ्ऎ हिङ्चाकिङ्का। 8काङ्कॆ ग खानावाँ नुःर वाप्डुङ्का, पारुबिऎ हिङ्खामा टक्चासे पारभु नुङ् पेन्माम् लागि काङ्कॆ ग सालुङ्बिऎ हिङ्खामा याइमा मिनुकिङ्का। 9काङ्का बाखाटेम्बिऎ हिङ्खामाबि चुकिङ्का हाङ्स, पारुबिऎ हिङ्खामाबि चुकिङ्का हाङ्स, निवाँहाङ्ऎ नेन्चाकुवॆ योम्पक् टे यिक्मा मिनुकिङ्का। 10मान्ठाभनॆ कानि चोब्न खिरिस्टमि ङारिङ्पि इॽयाक् न्यायमि लागि येब्मान लॆ। चोब्न याॽमिचिऎ सालुङ्पिऎ हिङ्खामाबि काइसॆ काम्नुऎ माङ्टक्मा योम्पक् यिक्डुचि म रक्न नाम्याक नुङ् डान्डा टक्चाकुचि।#रोमि १४:१०
खिरिस्टबाङ् याॽमिचि निवाँहाङ्पि टॆःॽमॆ
11मसॆ निवाँहाङ्मि किसिमाबि मान्टहाङ् पेन्मा लॆऎ लोमॆ खानावाँ काङ्कॆ काम्नुःर लेमिम्पासॆ होइढा याॽमिचि सङ्क पारभु लेस्सि टाआनॆ कामानुङ् लोटिकुङ्का। हाङ् निवाँहाङ्ऎ काङ्का मान्टक्मा याॽमि कामानुङ् लेकिङ्का हाङ् आन्नामि ङारिङ्पि स काङ्कामि हिङ्खामा मान्टऎ लॆऎ लोमॆ नुःर खाङ्मुडा कामानुङ् मिङ्ङा। 12काङ्कॆ फेरि टाङ्पॆ टाङ्पाम्न निङ् ठेॽमा परक्मिम्पा हॆॽनॆ। बोरु काङ्कॆ आन्ना काङ्कामि बारेबि नाबुक् ठेॽमॆ लः पिॽमॆ पाइकानि। मसॆ आन्नॆ खाङ्मुनिहा नुहा खानावाँबि हॆॽनॆ, टर होइढा खानावाँबि काङानङाये मिन्खुबा याॽमिचि नुङ् खानावाँ ऎन्मा हेखुबा लिकानि। 13हाङ् काङ्का ङाङ्पखॆडिङ्का हाङ्ग निवाँहाङ्मि निङ्पिॽन ङाङ्पडिङ्का, हाङ् काङ्का निवाँ चुचाखुबा लॆकिङ्का हाङ्ग आन्नामि लागिॽन काङ्का आक्रक्मा याॽमि लिडिङ्का। 14खिरिस्टमि नाम्नाम् पिसिॽमाऎन काङ्का लाम् खाङ्मिकिङ्का, चोब्न याॽमिचिमि लागि एक्क सिखारा हाङ् मसॆॽन चोब्न सिखारामि। 15हाङ् खो चोब्नमि लागि सिखारा। हाङ् ह हिङ्चाखुबाचि टाङ्पामि लागि हिङ्चामॆ हॆॽनॆ, टर खोचिमि लागि सिखॆम्पाबाङ् हिङ्चाखुबा खिरिस्टमि लागि हिङ्चामा लॆःॽमि।
16मसॆ हयेबाङ् आसास काङ्कॆ सालुङ्मि मिगॆ खाङुम्कानि। चाइबान लोमार खिरिस्ट सङ्क काङ्कॆ याॽल मरहाङ्न खाङ्युक्सुङ्का। ह चाइ काङ्कॆ खो आक्रहाङ् खाङुम्कानि। 17मसॆ हाम्पॆ याॽमि खिरिस्टबि चु आक्क उम्चङ्ऎ सिरिस्टि यो। याॽलहा खानावाँ लुक्खॆडा, खाङाम्नॆ, उम्चङ् पिक्खॆडा। 18इघा चोब्न योम्पक् यिक्खुबा निवाँहाङ्न। खोसॆ कानि खिरिस्टबाङ् खोबि टङ्चामिट्टि हाङ् होइढा याॽमिचि स खोबि टङ्चामिॽमॆ योम्पक् कानि पिट्टि। 19खिरिस्टबाङ् बाखाटेम्पिहा याॽमिचि निवाँहाङ्ऎ फेरि खोबि टङ्पॽमे पाइटुचि। निवाँहाङ्ऎ याॽमिचिमि हिङ्वामि आब्डिक् टिसुचिनि। हाङ् निवाँहाङ्ऎ याॽमिचि टङ्चामिम्पा खानावाँ खेम्मिॽमॆ योम्पक् खोसॆ काङ्का पिःडिङ्का। 20मसॆ काङ्का निवाँहाङ्मि पाङ्कुचाचि रेम हाङ् निवाँहाङ्ऎ काङ्काबाङ् आन्ना नुःर लोमॆ पाइकानि। हाङ् खिरिस्टमि निङ्पि काङ्कॆ आन्ना गरहाङ् नुःर लोकानि, “खोनुङ् टङ्चामॆ योम्पक् यिक्इटानॆ।” 21मान्ठाभनॆ खिरिस्टबि माङ्स हिङ्वा मान्चु, हाङ्स निवाँहाङ्मि ङारिङ्पि कानि खिरिस्टबाङ् निवाँनेन् याॽमि मुमाम् लागि खिरिस्ट सक्पिॽन कानिम् हिङ्वा युङु।
ទើបបានជ្រើសរើសហើយ៖
२ कोरेन्ठि 5: LBR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society