Ɓalɔma 3
3
Ɗɨa ʉpanʉ yɨndanaka ɨtaka kʉ iɓomu
1Kʉ ɓwanɨ, kuɓio 'Uyuda ya tiga nʉ dada tɨmanɨ? Nʉ kutiniso ganza yanʉ dada tɨmanɨ? 2Lɨngbaa lʉ moni dyepini ngilalɛ kʉ liɓomu la tʉkʉ nʉ dada akʉ lɨngbaa lʉ moni kʉ liɓomu. Asʉɓɨɨ a꞉kpanga‑zʉ naɓɔ kunzo ʉpanʉ nguangɔ tʉkʉ ɛɓɔ Ɓayuda aka ekoo ngia ɓɔ ɓʉuɓoto. 3Ka꞊sigo tiga ɓata ɨmanɨ? Ndʉ ɓambukuɓio jɛnɛ nʉ baya ekoo ʉ ɓombi ngana ngana ati ʉndaɓʉ, ajʉ ikanzi yɨ moni ngikʉnanɨ yakwanana kunicho baya ngia yɨ Asʉɓɨɨ ɓiɛ? 4Chʉkɔɔ, yambukunicho gʉkʉ ɗɛkɛkɛ! Ɨkyɛmɨngana, moni ngika kʉkwanana kʉmbɨa engo ka ɓɔ Asʉɓɨɨ aakyɨa yangɔ tʉkʉ moni kingono, abana ndʉ mombi kʉ uɓomu anʉ yakanaka kititi kʉndʉ Mubio kʉ Asʉɓɨɨ kakusigo ɓɔ:
« Asʉɓɨɨ Tidoo, ɓombi ɓʉkwanana ɓʉmbɨa ɓɔ moni ngika waayaka ka tʉkʉ kingono.
Nʉ ndʉ mombi anʉnapɨa nʉ 'ʉkɔmbɔ ɓio tʉkʉ nʉ ɨbɨba! »#Popoko Mʉm 51:6
5Kʉ ɓwanɨ, ndʉ ɓʉɓɨɓɨ ngiɓa isu kaakyɨa ɓakʉpana ɓɔ Asʉɓɨɨ anʉ ingono, ka꞊sigo tɔ ɓata moni tɨmanɨ? Ajʉ yakusigo ɓɔ Asʉɓɨɨ ambʉkɔmʉ nʉ ingono ati ngia a‑ɔɔ nisu kʉnapɨa nʉ 'ʉkɔmbɔ ɓiɛ? (Makʉyaka ɓwanɨ nʉ itungwio yɨ iɓombi.) 6Yambʉkɔmʉ ɓwanɨ! Ambʉ́ ndʉ Asʉɓɨɨ ambikinye ngbingbii, ambʉ́ a꞉kwanana jɛnɛ tiga kʉtɨna 'ʉkɔmbɔ wʉ ɨtaka ɨkyɨkyɨɓʉmʉ tanɨ?
7Ɨkyɛmɨngana, ndʉ ingono ngia yɨ Asʉɓɨɨ yanyɨa 'upi akʉ yakanaka ngiisɛmɛ kʉpana ɨbɨba ngiangɔ, jʉtanɨ tiga ɓa kwanana nɛmɛ kʉnapɨa nʉ 'ʉkɔmbɔ ndʉ mombi ʉ ɓʉɓɨɓɨ? 8Ndʉ itungwio ngiindɛsʉ yaɓio ɓwanɨ, ka꞊faniso tiga kusigo ɓɔ: « Ajʉ kuɓio kʉkyɨa ɓʉɓɨɓɨ ambʉ ɓʉɓɨɓɨ ngiɓʉnanɨ ɓunziso ɓuɗo ɓiɛ? ». Kingono yanʉ ɓombi ɓɔmɔ iɓa ɓaanachwa nʉ yakanaka ɓɔ ɛmɛ kʉ ma꞉yaka ɓwanɨ. Ɓombi ngiɓʉnanɨ ɓa꞊kwanana naɓɔ kʉnapɨa nʉ 'ʉkɔmbɔ ndʉ akʉ yɨkwananaka‑ɔɔ naɓɔ!
Mombi ɔɔ ngbingbii apɛɛ ʉ Asʉɓɨɨ ambʉkɔmʉ
9Kʉ ɓwanɨ, ɨmanɨ tɔ ɓata kakwanana kusigo? Isu Ɓayuda kʉɓaa‑zʉ ɓombi ɓʉ lɨkʉmbʉ nga lɔmɔ nʉ ɨmanɨ? Yambʉkʉmʉ nʉ ɨkyɛmɛ gʉkʉ mɨngana iya kʉɓʉɓaa nayɔ! Mʉ꞉nɨpana kusigo ɓɔ Ɓayuda kʉndʉ ɓombi ngiɓa ɓambʉkɔmʉ Ɓayuda ɓa tʉkʉ ɛsɨ ʉ angu wʉ ɓʉɓɨɓɨ. 10Ya ngbanga tʉkʉ ndʉ aka ɓa꞉tɨndakɨa‑ɔɔ amati ʉ Mubio kʉ Asʉɓɨɨ ɓɔ:
« Mombi ɔɔ ngbingbii ambʉkɔmʉ gʉkʉ mʉngana!
11Mombi ʉ mbɨmbanaka ambʉkɔmʉ gʉkʉ mʉngana,
Mombi ngia aahata Asʉɓɨɨ ambʉkɔmʉ gʉkʉ mʉngana.
12Ɓombi kʉ ɓuɓomu ɓa꞉paa ɨngbaa ngia yɛɛ iɗo paa,
ɛɓɔ kʉ ɓuɓomu ɓambʉyangaa. Mombi ngia aakyɨa moni kɔɔ muɗo
ambʉkɔmʉ gʉkʉ mʉngana.
13Lihoo lʉ moni ngilʉndaɓʉ la ngbanga ndʉ manzaʉ ngika ka kʉ uno no,
maɗaɗa ngikʉndaɓʉ kaakyɨa tʉkʉ kʉpɨtaka ɓangɛ,
lɨmbambɨ lʉ moni ngilʉndaɓʉ laaiso tʉkʉ uchongi ndʉ uwa wʉ zɨɨ.
14Moni ngikʉndaɓʉ kuhuo tʉkʉ nʉ ʉɗaɗa wɔɔ kɔɨ uwa wɔɔ gbose ɓombi.
15Mɨtɨndɨ ngiindaɓʉ ya gagaa kʉsa kʉwa ɓombi.
16Ɓaatambiso kumbo kʉ uɓomu, nʉ dyiso ɓombi ikoko mʉa kʉ uɓomu akʉ ɓaaɓaa‑ɛɛ.
17Ɓambakakʉnda kʉhata ɨngbaa yɨ majɨɔ,
18nʉ ɛɓɔ ɓambakakumo Asʉɓɨɨ gʉkʉ ɗɛkɛkɛ. »#Popoko Mʉm 14:1-3; 53:2-4
19Kʉ ɓwanɨ, kakʉmbɨa ɓɔ moni kʉ muɓomu ngika mapanʉ kakusigo engo, ka kʉkanga tʉkʉ ɓombi ngiɓa ɓaakpata mapanʉ. Ya kusigo ɓɔ yeeɓio nʉ mombi gʉkʉ mʉngana iya a꞊kwanana kʉtata ɓɔ ambʉkʉ nɨngbaa yɨ moni. Nʉ ɓombi kʉ ɓuɓomu ɓʉmbɨa ɓɔ ɓanʉ 'ʉkɔmbɔ apɛɛ Asʉɓɨɨ. 20Jʉ mombi ɔɔ ngbingbii apɛɛ ʉ Asʉɓɨɨ ambʉkɔmʉ gʉkʉ mʉngana, nʉ yambʉkɔmʉ aka ekoo ʉ kpata mapanʉ. Ʉpanʉ waasalɨa mombi tʉkʉ nayɔ kumbiiso ɓɔ ʉ꞉kyɨa ɓʉɓɨɓɨ.
Mombi aaka ngbingbii apɛɛ ʉ Asʉɓɨɨ tʉkʉ 'upi akʉ baya
21Ɨkyɛmɨngana, ɨtakɨ‑takɨ ngiakɛ, Asʉɓɨɨ a꞉pana ɨngbaa ngia aanicho‑ɔɔ mombi kʉka ngbingbii apɛɛ angɔ, chʉkɔmʉ aka ekoo ʉ mapanʉ. Lɨtaɓʉ lʉ mapanʉ nʉ lɨgbɛ laayaka moni ekoo ɔngɔ ɓɔ, 22mombi ngia a ngbingbii apɛɛ ʉ Asʉɓɨɨ ya tʉkʉ mombi kʉ uɓomu ngia akʉbaya Yeso Klisito. Jʉ ɛɓɔ kʉ ɓuɓomu ɓa tʉkʉ ngbanga, 23jʉ ɛɓɔ kʉ ɓuɓomu ɓa꞉kyɨa ɓʉɓɨɓɨ, ɓambʉya ɨbɨba ngia yɨ Asʉɓɨɨ.
24Ɨkyɛmɨngana, aka ekoo iɗo ngia yɨ Asʉɓɨɨ, ɓa꞉kwanana tiga kʉka ngbingbii tʉkʉ ɨsʉkʉɓwanɨ 'upi akʉ Yeso Klisito iya a꞉ɓʉɓwanakiso akʉ ɓʉɓɨɓɨ. 25-26Asʉɓɨɨ a꞉nzo Yeso ndʉ apɛpɛ aka ekoo ngia ɓɔ 'upi akʉ ingyo ngiangɔ, ɓombi ngiɓa ɓamʉbaya ɓʉkwanana kʉnyɨa nʉ ʉpɨa wʉ ɓʉɓɨɓɨ ngiɓʉndaɓʉ. Asʉɓɨɨ a꞉kyɨa ɓwanɨ tʉkʉ aka ekoo pananiso ingono ngiangɔ. Jɛnɛ pɛɛ, aka ekoo ʉ 'ʉtʉma wɔɔ ʉta nguangɔ, Asʉɓɨɨ a꞉sɨa kʉtɨna 'ʉkɔmbɔ wʉ ɓʉɓɨɓɨ ɓʉ ɓombi. Ɨkyɛmɨngana, ɨtakɨ‑takɨ ngiakɛ, akʉpana ɓɔ ɛyɔ a tʉkʉ ngbingbii. Abana jɛnɛ pɛɛ i꞉nye kʉ ɓwanɨ, ɨkyɛmɨngana ɨtakɨ‑takɨ ngiakɛ akʉpana ingono ngiangɔ, ambʉ uɓio mombi ʉ ingono nʉ kʉnɨtanakiso mombi kʉ uɓomu ngia anʉ baya akʉ Yeso kʉka mombi ɔɔ ngbingbii.
27Ɨngbaa yɨ moni tɨmanɨ ɓata‑zʉ iya ɓombi ɓa꞊kwanana‑ɔɔ kuɓio nʉ 'ʉtʉma wɔɔ ʉja? Yambʉkɔmʉ! Yambʉkɔmʉ jʉtanɨ? Jʉ moni kɔɔ maja yambʉkɔmʉ tʉkʉ kʉkpata mapanʉ, ɨkyɛmɨngana ya tʉkʉ kʉbaya Yeso. 28Jʉ kakʉna ɓɔ mombi aaka ngbingbii apɛɛ ʉ Asʉɓɨɨ tʉkʉ 'upi akʉ baya, chʉkɔmʉ aka ekoo ʉ ɓamoni ngiɓa mapanʉ ka kutitio engo. 29Ajʉ ya kusigo ɓɔ Asʉɓɨɨ a tʉkʉ wʉ Ɓayuda ɓiɛ? Ajʉ ambʉkɔmʉ kʉ wʉ ɓombi ngiɓa ɓambʉkɔmʉ Ɓayuda ɓiɛ? Ya kingono kusigo ɓɔ a kʉ Asʉɓɨɨ wʉ ɓombi ngiɓa ɓambʉkɔmʉ Ɓayuda, 30jʉ Asʉɓɨɨ a tʉkʉ mʉngana. Kʉ ɛyɔ a꞉tɨna kusigo ɓɔ Ɓayuda nʉ ɓombi ngiɓa ɓambʉkɔmʉ Ɓayuda ɓa ngbingbii 'upi akʉ baya ngia yɨ mombi kʉ nangana nangana. 31Kʉ ɓwanɨ, ajʉ yakusigo ɓɔ ndʉ kaɓio nʉ baya ajʉ ka꞊na tii mapanʉ tʉkʉ ɨsʉkʉɓwanɨ ɓiɛ? Chʉkɔɔ, kakʉmbɨa ɓɔ mapanʉ ka tʉkʉ nʉ ɨjangɨa.
ទើបបានជ្រើសរើសហើយ៖
Ɓalɔma 3: BudKoya
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2021, Wycliffe Bible Translators, Inc.
