Ɓalɔma 2
2
Asʉɓɨɨ a꞊tɨna ʉkɔmbɔ wʉ ɓombi
1Ɔwɛ gwa ngia wakʉtɨna 'ʉkɔmbɔ wʉ ɓombi nga ɓɔmɔ, ɓambʉkʉkwanana nɔwɛ kʉpɨa gʉkʉ ɗɛkɛkɛ, abana ndʉ waɓio anɨ. Jʉ ati ngia wa‑ɔɔ kʉtɨna 'ʉkɔmbɔ nga wʉ ɓangɛ, yakusigo ɓɔ wakʉtɨnana 'ʉkɔmbɔ kʉ ɔwɛ makʉɔngɔ, jʉ ɔwɛ waakyɨa moni kɔɔ ɓɨɓɨ kʉndʉ ɛɓɔ. 2Kaambɨa kusigo ɓɔ Asʉɓɨɨ aatɨna 'ʉkɔmbɔ wʉ ɓombi ngiɓa ɓaakyananaka ɓwanɨ tʉkʉ akʉ ɓingono. 3Kʉ ɓwanɨ, ɔwɛ waatɨna 'ʉkɔmbɔ wʉ ɓombi ngiɓa ɓaakyɨa ikanzi yɨ moni ngikʉnanɨ, ʉna tɔ, ɔwɛ makʉɔngɔ wa nakɔ kʉ kʉkyɨa. Ajʉ ɔwɛ wakuyo ɓɔ wa꞊ɓwanaka akʉ 'ʉkɔmbɔ ngua wʉ Asʉɓɨɨ ɓwanakanɨ ɓiɛ?
4Ajʉ wakʉna iɗo yɛɛ ɨja ngia yɨ Asʉɓɨɨ, 'ʉtʉma wʉ majɨɔ, nʉ 'ʉtʉma wɔɔ ʉta nguangɔ tʉkʉ ɨsʉkʉɓwanɨ ɓiɛ? Ajʉ wambʉkɔmʉ kʉmbɨa ɓɔ iɗo ngiangɔ ya꞊kwanana nɔwɛ kʉkɨndakiso kʉɓʉya kunicho 'ʉtʉma kʉsɨa ɓʉɓɨɓɨ ɓiɛ? 5Ɨkyɛmɨngana, ɔwɛ wa ɨkyɨkyɨɓʉmʉ nʉ wa 'ʉtʉma ɓʉmʉ. Iiya ɓɔ wakʉnapɨana 'ʉkɔmbɔ wɔɔ ʉja isiya 'ʉnganga ngua wʉ Asʉɓɨɨ wa꞊pananɨa‑ɔɔ, nʉ aka a꞊tɨna sina‑ɔɔ 'ʉkɔmbɔ nguangɔ wɔɔ ngbingbii. 6Jʉ Asʉɓɨɨ a꞊nzo sina mombi kʉ nangana nangana 'ʉkʉa nguangɔ kʉkpatanakɨa tʉkʉ nʉ ɨkyananakɨa ngiangɔ.#Popoko Mʉm 62:13; Min 24:12 7Ɓiga ngiɓa ɓakʉkyɨa lɨngbaa lʉ moni lɔɔ manzanza chʉkɔmʉ nʉ ndokono, nʉ kʉhata imbangumba nʉ ɨbɨba nʉ ʉɓɨɨ wʉ mɨtʉ yɨ ɨpá nʉ mɨtʉ yɨ ɨpá, Asʉɓɨɨ a꞊munzo ʉɓɨɨ wʉ mɨtʉ yɨ ɨpá nʉ mɨtʉ yɨ ɨpá nzoo.
8Ɨkyɛmɨngana, ɓombi ngiɓa ɓaaɓundo mapanʉ kʉ Asʉɓɨɨ nʉ ɓaayaa moni ngika kingono, iɓa ɓaakpata yɨndaɓʉ tʉkʉ moni kɔɔ ɓɨɓɨ, 'ʉnganga wʉ Asʉɓɨɨ wa꞊ka ekoo ʉndaɓʉ. 9Ɓombi kʉ ɓuɓomu ngiɓa ɓaakyɨa ɓʉɓɨɓɨ, ɓa꞊dya ikoko nʉ ɓʉka‑ɓʉkaɨ, kufaniso nʉ Ɓayuda, mbise ɔngɔ tiga ɓombi ngiɓa ɓambʉkɔmʉ Ɓayuda. 10Ɨkyɛmɨngana, ɓombi kʉ ɓuɓomu ngiɓa ɓaakyɨa moni kɔɔ muɗo, Asʉɓɨɨ akwanana naɓɔ kunzo imbangumba, ɨbɨba, nʉ majɨɔ kufaniso nʉ Ɓayuda mbise ɔngɔ tiga ɓombi ngiɓa ɓambʉkɔmʉ Ɓayuda. 11Jʉ Asʉɓɨɨ ambʉkɔmʉ nʉ 'ʉtʉma wɔɔ mbomboke ɓombi.
12Ɓombi ngiɓa ɓaakyɨa ɓʉɓɨɓɨ ɓambikinye kupimiso mapanʉ kʉ Mʉsa, ɓa꞊dʉka sina ɓʉtɨnenikɔmʉ 'ʉkɔmbɔ nguʉndaɓʉ kʉkpatanakɨa nʉ mapanʉ ngikʉnanɨ. Ɨkyɛmɨngana, ɓiga ngiɓa ɓakʉkyɨa ɓʉɓɨɓɨ ɓinyeni kupimiso mapanʉ kʉ Mʉsa, 'ʉkɔmbɔ nga wʉndaɓʉ ɓa꞊ʉtɨna kʉkpatanakɨa tʉkʉ nʉ mapanʉ ngikʉnanɨ.
13Yambʉkɔmʉ kusigo ɓɔ ɓombi ngiɓa ɓaakyɨa ndʉ ɓakʉkɔ mapanʉ ɓa ngbingbii apɛɛ ʉ Asʉɓɨɨ, ɨkyɛmɨngana ɓombi ngiɓa ɓa ngbingbii apɛɛ ʉ Asʉɓɨɨ ya tʉkʉ ɓiga ngiɓa ɓaakyananakɨa mapanʉ. 14Ɓombi ngiɓa ɓambʉkɔmʉ Ɓayuda ɓambʉkɔmʉ nʉ mapanʉ kʉ Mʉsa. Ɨkyɛmɨngana, ndʉ ɓombi ngana ngana ati ʉ ɓombi ngiɓʉnanɨ ɓaɓio kʉkyananakɨa mapanʉ tʉkʉ ndʉ aka yɨkwanana‑ɔɔ chʉkɔmʉ ɛɓɔ kupimiso engo, iinanɨ yakusigo ɓɔ ɓanʉ mapanʉ akʉ mɨtʉma ngiindaɓʉ ɓakʉɓɔngɔ. 15Kʉ ɓwanɨ, ɓakʉpananiso ɓɔ moni ngika ka amati ʉ mapanʉ ɓa꞉kʉtɨndakɨa amati ʉ mɨtʉma ngiindaɓʉ. Iyo yɨ mɨtʉma ngiindaɓʉ ya naɓɔ kʉ kʉnapɨa nʉ 'ʉkɔmbɔ, nʉ itungwio ngiindaɓʉ yanaɓɔ kʉ kʉchʉngɨa, nʉ yanaɓɔ kʉ kʉɓʉya isingo. 16Moni ngikʉnanɨ ɨkɔ ika ka꞊kyananakɨa sina ati ngia Asʉɓɨɨ a꞊tɨna sina‑ɔɔ 'ʉkɔmbɔ wʉ moni kʉ ɓaɗi kʉ ɓombi ɨngbaa akʉ Yeso Klisito, kʉndʉ aka Ɨsaʉ yɛɛ Iɗo ngia makʉpanɨa engo ya‑ɔɔ kusigo.
Ɓayuda ɓu꞉ɓundo mapanʉ
17Ɨkyɛmɨngana, ɔwɛ ngia wakusukunio ɓɔ wa 'Uyuda, wa 'ʉmaɨ ekoo mapanʉ nʉ wakʉɨngyɨa Asʉɓɨɨ ngiasɔɔ, 18waambɨa ɓʉkʉnda ngiɓangɔ kingono, nʉ mapanʉ ka꞉napanɨa kʉkyɨa moni kɔɔ muɗo, 19ɔwɛ waana ndʉgʉ kʉ ɔwɛ waakɨndakiso ɓombi ngiɓa ɓambakana, nʉ ɓɔ wa wanga wʉ ɓombi ngiɓa ɓa amati ʉ umomo, 20waasigo kʉ ɓɔ wa mʉpananakɨa wʉ ɓombi ngiɓa ɓambʉkɔmʉ nʉ mbɨmbanaka nʉ ɓɔ wa mʉpananakɨa wʉ ɓana, jʉ wanʉ mbɨmbanaka ɨja kingono ekoo mapanʉ.
21Kʉ ɓwanɨ, ɔwɛ ngia waapanɨa ɓombi nga ɓɔmɔ, jʉtanɨ‑zʉ wambʉkʉpananɨa kʉ ɔwɛ makʉɔngɔ? Ɔwɛ ngia waapanɨa ɓɔ yambʉkɔmʉ iɗo kuɓo, jʉtanɨ wa ɓata kʉ kuɓo? 22Ɔwɛ ngia waasigo ɓɔ yambʉkɔmʉ iɗo kʉkyɨa ɨndambʉ, jʉtanɨ wa ɓata kʉ kʉkyɨa ɨndambʉ? Ɔwɛ ngia waayaa ɓamʉngʉ ɓʉ yakanaka, jʉtanɨ wa ɓata kuɓo kumbo ngia a amati ɨkáa ngiindaɓʉ?#2:22 Ɓayuda ngana ngana ɓi꞉nye ɓo kumbo ngia ɓombi ngiɓa ɓambikinye Ɓayuda ɓi꞉nye nzo akʉ ɓamʉngʉ ngiɓʉndaɓʉ amati ʉ ɓana ɓʉ lɨkáa lʉ ɓamʉngʉ ngiɓʉnanɨ. Ɓi꞉nye liɓo aka ekoo tambanaka lɨkáa ngilʉndaɓʉ yɛmɔ nalɔ kʉgaba. Ʉna tɔ, ɓinye kʉkyɨa moni ngika mapanʉ kʉ Mʉsa ki꞉nye kʉgbʉmeni gbʉmaa. Popoko Tung 7:25. 23Waabɨbana ɓɔ waambɨa mapanʉ, ɨkyɛmɨngana wakʉna Asʉɓɨɨ tʉkʉ ɨsʉkʉɓwanɨ 'upi akʉ ɓundo mapanʉ ngikʉnanɨ! 24Jʉ kʉndʉ ɓa꞉tɨndakɨa amati ʉ Mubio kʉ Asʉɓɨɨ ɓɔ: « Ya aka ekoo ʉndɛnʉ iya ɓa‑ɔɔ kʉzɨaka ino ngia yɨ Asʉɓɨɨ ati ʉ ɓombi ngiɓa ɓambʉkɔmʉ Ɓayuda. »#Popoko Ɨsa 52:5
25Ya kingono kusigo ɓɔ kutiniso ganza yanʉ dada tʉkʉ ambʉ wakʉkpata mapanʉ. Ɨkyɛmɨngana, wʉkpatenikɔmʉ mapanʉ, ɓa꞊nachɨka tʉkʉ ndʉ mombi ngia ambutinisokɔmʉ ganza. 26Nʉ ndʉ mombi ngia ambutinisokɔmʉ ganza aɓio kʉkpata moni ngika mapanʉ kakutitio engo, ajʉ Asʉɓɨɨ ambʉkɔmʉ amʉchɨka ndʉ mombi ngia a꞉tiniso ganza ɓiɛ? 27Mombi ngia a꞉tinisokɔmʉ ganza akʉ ndʉtʉ, ɨkyɛmɨngana ambuɓio kʉkpata mapanʉ, a꞊kwanana nɔwɛ kʉnapɨa nʉ 'ʉkɔmbɔ ɔwɛ ngia wakuɓundo mapanʉ, abana ndʉ waɓio ɓɔ waambɨa kupopoko mubio kʉ mapanʉ muɗo nʉ kʉndʉ waɓio wʉ꞉tiniseni ganza.
28Jʉ yambʉkɔmʉ kusigo ɓɔ ɓaambɨa mombi ɓɔ a 'Uyuda gbagba tʉkʉ nayɔ kʉna ndʉtʉ ya aɓei, gʉ yɛmɔ ɓɔ jʉ a꞉tiniso ganza akʉ ndʉtʉ ngiangɔ. 29Ɨkyɛmɨngana, 'Uyuda gbagba ya tʉkʉ gwa ngia a 'Uyuda amati ngiangɔ, iya a꞉tiniso ganza amati ʉ 'ʉtʉma nguangɔ, nʉ ganza ngia aɓio utiniseni, ya ganza ngia akʉʉngwanakɨa nʉ 'Ʉtʉma wʉ Asʉɓɨɨ chʉkɔmʉ nʉ mapanʉ ngika ɓa꞉kʉtɨndakɨa amati ʉ mapanʉ kʉ Mʉsa. Ɨbɨba yɨ ɓombi ikanzi ngiɓaɓɛ yambakaʉngwa ɔɔ ɓombi, ɨkyɛmɨngana yaaʉngwa tʉkʉ ɔɔ Asʉɓɨɨ.
ទើបបានជ្រើសរើសហើយ៖
Ɓalɔma 2: BudKoya
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2021, Wycliffe Bible Translators, Inc.
