1 Ɓakolito 12
12
Apɛpɛ kʉ di di di ngia wʉ 'Ʉtʉma wɔɔ Tu
1Inu ɓambinoo, makʉkʉnda yaka moni ekoo apɛpɛ kʉ di di di ngia wʉ 'ʉtʉma wɔɔ Tu. Makʉkʉnda ɓɔ mbɨeni moni ngika kɔɔ ngbingbii ekoo ɔngɔ. 2Nakʉmbɨa iɗo ɓɔ ati ngia ni꞉nye‑zʉ‑ɔɔ kʉ ɓombi ngiɓa ɓambʉkɔmʉ Ɓayuda, ɓamʉngʉ ɓʉ mɨkakaʉ ngiɓa ɓambakayaka ɓi꞉nye ninu kiitotoko nʉ ninu kudingonikiso. 3Iiya ɓɔ makʉkʉnda ɓɔ pimiseni ɓɔ mombi ngia 'ʉtʉma wʉ Asʉɓɨɨ wa amati angɔ, ambʉkʉkwanana kusigo ɓɔ: « Yeso ʉjʉnganaka jʉnganakaa. » Mombi ambʉkʉkwanana kusigo ɓɔ: « Yeso a Makʉʉɓɨɨ » yambikinye tʉkʉ 'Ʉtʉma wɔɔ Tu wʉmʉsalɨa.
4Mɨgbʉ yɨ apɛpɛ wʉ 'ʉtʉma wɔɔ Tu ya kʉ di di di, ɨkyɛmɨngana tʉkʉ 'Ʉtʉma wʉ Asʉɓɨɨ mungono nguʉnanɨ waanzo mɨgbʉ yɨ apɛpɛ ngiinanɨ kʉ iɓomu. 5Lɨngbaa lɔɔ lɨkyananakɨɛ Asʉɓɨɨ la kʉ di di di, ɨkyɛmɨngana Makʉʉɓɨɨ ngia kanayɔ kʉkyananakɨa a tʉkʉ mʉngana. 6Mɨgbʉ yɨ kuu ya kʉ di di di, ɨkyɛmɨngana Asʉɓɨɨ a tʉkʉ Mʉngana iya aakyɨa kuu kʉ iɓomu amati ʉ ɓombi kʉ ɓuɓomu.
7Ɨkyɛmɨngana, angu ʉ 'Ʉtʉma wʉ Asʉɓɨɨ aapananɨa amati ʉ mombi kʉ nangana nangana, ambʉ ɓombi kʉ ɓuɓomu ɓʉnyɨa nʉ ɨjangɨa yɛngɔ. 8'Ʉtʉma wɔɔ Tu waanzo mombi apɛpɛ ɔɔ yakɛ moni nʉ 'ʉtʉma wɔɔ pimise moni, waanzo mombi nga wɔmɔ tʉkʉ apɛpɛ ɔɔ yakɛ moni kʉ mbɨmbanaka nadɨndɨ. 9Tʉkʉ 'Ʉtʉma mungono nguʉnanɨ waanzo mombi baya yɛɛ ɓʉmʉ, wambunzo mombi ɔmɔ angu ɔɔ hiise ɓombi ɓʉ ɓakwisikiso. 10'Ʉtʉma nguʉnanɨ waanzo mombi ɔmɔ angu ɔɔ kyɨɛ ɓamoni ɓɔɔ ɓʉmbangɛ. Waanzo mombi ɔmɔ angu ɔɔ yakɛ ɓamoni ngiɓa ɓaaʉngwa ɔɔ Asʉɓɨɨ. Waanzo mombi ɔmɔ angu ɔɔ pimise mɨtʉma yɨ yakanaka, nʉ 'ʉtʉma ngua wʉ ingono. Waanzo mombi ɔmɔ angu ɔɔ yakɛ maɗaɗa kɔɔ ɨkyɨkyɨɓʉmʉ, wɔmɔ angu ɔɔ ngakanakise maɗaɗa ngikʉnanɨ. 11Moni ngikʉnanɨ kʉ muɓomu kakʉʉngwanakɨa nʉ 'Ʉtʉma wɔɔ Tu tʉkʉ mungono uwa waanzo mombi kʉ nangana nangana apɛpɛ kʉ di di di tʉkʉ ndʉ akʉ aɓio‑ɔɔ kʉkʉnda.
Lizi lʉ ndʉtʉ kʉ di di di amati ʉ ndʉtʉ mɨngana
12Kʉ ɓwanɨ, Klisito a ndʉ ndʉtʉ iya yanʉ lizi lɨja. Abana ndʉ ndʉtʉ yanʉ lizi lɨja kititi, la lɨmʉmanɨɛ tʉkʉ amati ʉ ndʉtʉ mɨngana. 13Isu kʉ ɓuɓomu, yiɓio Ɓayuda, kʉndʉ ɓombi ngiɓa ɓambʉkɔmʉ Ɓayuda, yiɓio ɓabayo kʉndʉ ɓombi ɓɔɔ ɓuɓununikie, ɓa꞉ɓuɓatiso tʉkʉ uɓatiso mungono 'upi akʉ 'Ʉtʉma wɔɔ Tu nisu kujobo tiga ndʉtʉ mɨngana, kambʉmwa kʉ 'Ʉtʉma mungono nguʉnaa.
14Ndʉtʉ yambʉkɔmʉ izi tʉkʉ mɨngana, ɨkyɛmɨngana yanʉ lizi lɨja. 15Ndʉ 'ʉtɨndɨ wasigo ɓɔ: « Jʉ mambʉkɔmʉ ɨkɔndɔ, kʉ ɓwanɨ mambʉkɔmʉ 'ujubunie nʉ ndʉtʉ nga yɛmɔ », abana ɓwanɨ kititi yaɓio tʉkʉ izi mɨngana yɨ ndʉtʉ. 16Ndʉ 'uchwei wasigo ɓɔ: « Mambʉkɔmʉ ɛmɛ iso, kʉ ɓwanɨ mambʉkɔmʉ 'uɗitinie nʉ ndʉtʉ nga yɛmɔ. » Ʉna tɔ, ya tʉkʉ izi yɨ ndʉtʉ. 17Ndʉ ndʉtʉ kʉ iɓomu yaɓio tʉkʉ iso, mombi a꞊kɔ tiga tanɨ? Ndʉ ndʉtʉ kʉ iɓomu yaɓio tʉkʉ 'uchwei, mombi a꞊kɔ tiga imbo yɨ ɨkyɛmɛ tanɨ? 18Ɨkyɛmɨngana, Asʉɓɨɨ a꞉napioko lizi lʉ ndʉtʉ kʉ nangana nangana, tʉkʉ ndʉ aka ɛyɔ i꞉nye‑ɔɔ kʉkʉnda. 19Ambʉ́ ndʉ ndʉtʉ ya izi tʉkʉ mɨngana, ambʉ́ ndʉtʉ yambʉkɔmʉ. 20Kʉ ɓwanɨ, lizi lʉ ndʉtʉ la lɨja, ɨkyɛmɨngana ndʉtʉ ya tʉkʉ mɨngana.
21Nʉ iso yambʉkɔmʉ yasigio ɨkɔndɔ ɓɔ: « Mambʉkɔmʉ nʉ taa yɨsɔɔ », kʉndʉ 'ʉtʉ wambʉkʉsigio mɨtɨndɨ ɓɔ: « Mambʉkɔmʉ nʉ taa yɨndɛnʉ. » 22Kʉɓaana nadɨndɨ, lizi lʉ ndʉtʉ ngila laanyɨa ndʉ lambʉkɔmʉ nʉ ɨjangɨa, ɨlɔ lanʉ ɨjangɨa nadɨndɨ. 23Nʉ lizi lʉ ndʉtʉ ngila lambʉkɔmʉ nʉ ɨbɨba, kaalinzo tiga ɨbɨba nadɨndɨ kʉɓaa ila lɔmɔ. Nʉ lizi lʉ ndʉtʉ ngila laanziso soni, kaalɨpɨmakɨa tiga nadɨndɨ. 24Ʉna tɔ, lizi lʉ ndʉtʉ ngila lɔɔ manzanza lambʉkɔmʉ kʉta ɓɔ ɓʉlɨpɨmakɨa tiga nadɨndɨ ɓwanɨ. Ɨkyɛmɨngana, Asʉɓɨɨ a꞉ɗitinikiso ndʉtʉ, ambʉnapɨa lizi ngila lambʉkɔmʉ nʉ ɨbɨba ɓɔ luɓio tiga nʉ ibɨba nadɨndɨ. 25Aka ekoo ngia ɓɔ lizi lʉ ndʉtʉ lɔɔɓiokɔmʉ nʉ ɗuɗono ati ʉndaɓʉ, ɨkyɛmɨngana luɓio tʉkʉ kʉpɨmanakɨa ati ʉndaɓʉ. 26Ndʉ izi mɨngana yambʉmbana, ila lɔmɔ kʉ liɓomu lambʉmbana kʉ mbʉmbanaa ɨzɔ nayɔ. Ndʉ izi mɨngana yɨ ndʉtʉ yanyɨa nʉ ɨbɨba, ila lɔmɔ kʉ liɓomu lakwa ɨgyagya kʉ ɨzɔ nayɔ.
27Kʉ ɓwanɨ, inu na ndʉtʉ yɨ Klisito, nʉ mombi kʉ nangana nangana ati ʉndɛnʉ a izi yɨ ndʉtʉ ngiinanɨ. 28Ngbanga kʉ ɓwanɨ, amati ʉ kanisa, Asʉɓɨɨ aakpanga‑zʉ napɨa pɛɛ tʉkʉ ɓatitima, ɓombi ɓʉ ɓepini lɨgbɛ, iɓa ɓʉ ɓeetu ɓapananakɨa, tiga aanzo ɓombi nga ɓɔmɔ apɛpɛ ɔɔ kyɨɛ ɓamoni ɓɔɔ ɓʉmbangɛ, tiga iɓa ɓaahiiso ɓombi ɓʉ ɓakwisikiso, nʉ iɓa ɓaasalɨa ɓangɛ, nʉ iɓa ɓaakɨndakiso ɓangɛ, nʉ iɓa ɓaayaka maɗaɗa kɔɔ ɨkyɨkyɨɓʉmʉ.
29Ajʉ ɓombi kʉ ɓuɓomu ɓa tʉkʉ ɓatitima ɓiɛ? Ajʉ ɓombi kʉ ɓuɓomu ɓa tʉkʉ lɨgbɛ ɓiɛ? Ajʉ ɓombi kʉ ɓuɓomu ɓa tʉkʉ ɓapananakɨa ɓiɛ? Ajʉ ɓombi kʉ ɓuɓomu ɓa tʉkʉ nʉ angu ɔɔ kyɨɛ ɓamoni ɓɔɔ ɓʉmbangɛ ɓiɛ? 30Ajʉ ɓombi kʉ ɓuɓomu ɓa tʉkʉ nʉ ʉpanʉ wɔɔ hiise ɓombi ɓʉ ɓakwisikiso ɓiɛ, nʉ apɛpɛ ɔɔ yakɛ maɗaɗa kɔɔ ɨkyɨkyɨɓʉmʉ, nʉ apɛpɛ ngia ɔɔ ngakanakise maɗaɗa ɓiɛ? 31Kʉ ɓwanɨ, tananɨeni kʉnyɨa nʉ mbɨmbanaka ngia yɛɛ ɨja nadɨndɨ.
Ɨkyɛmɨngana, ɨtakɨ‑takɨ ngia ma tiga ninu kʉpana ɨngbaa ngia yɛɛ iɗo nadɨndɨ kʉɓaa ila lɔmɔ kʉ liɓomu.
ទើបបានជ្រើសរើសហើយ៖
1 Ɓakolito 12: BudKoya
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2021, Wycliffe Bible Translators, Inc.