1 Ɓakolito 13
13
Apɛpɛ ngia ɔɔ ʉja ya ɓʉkʉnda
1Abana ndʉ mayaka maɗaɗa kʉ ɓombi nʉ ika kʉ ɓamalaika, ɨkyɛmɨngana ndʉ mambukuɓio nʉ ɓʉkʉnda, iinanɨ kʉ iɓomu ya tʉkʉ ɨsʉkʉɓwanɨ, ma ndʉ uko ngua waakyɨa kʉɓɨka ɓʉ ngba ngba ngba, nʉ ndʉ kengele ngia aakyɨa kʉɓɨka ɓʉ nge nge nge. 2Abana ndʉ maɓio ɨgbɛ nʉ mbɨmbanaka yɛɛ ɨja, nʉ pimiso ɓamoni ɓɔɔ ɨkyɨkyɨɓʉmʉ, nʉ kuɓio nʉ baya ikanzi ngia yɛɛ nze angu ɔɔ hukise lɨkpangba, ndʉ mambukuɓio nʉ ɓʉkʉnda, ambʉ mambʉkɔmʉ ɨkyɛmɛ. 3Abana maɨpaka kumbo ngiasɛmɛ kʉ uɓomu kʉdyakakiso ɓombi ɓʉ ɓanangyɨa, abana munzo ndʉtʉ ngiisɛmɛ ɓɔ yisioko akʉ dyaa, ndʉ mambukuɓio nʉ ɓʉkʉnda, yambʉkʉmʉ nʉ ɨjangɨa akʉ ɛmɛ.
4Ɓʉkʉnda ɓaanzo 'ʉtʉma wɔɔ ʉta nʉ 'ʉtʉma wɔɔ uɗo. Ɓʉkʉnda ɓambakanzo imi yɛɛ ɓɨɓɨ, ɓambakanzo 'ʉtʉma wɔɔ ʉja gʉ ɓɔ 'ʉtʉma wɔɔ bɨbanɛ. 5Ɓʉkʉnda ɓambakyiiso moni kʉ soni, ɓambakahata ɓuɗo tʉkʉ akʉ mombi makʉɔngɔ, ɓambakanzo 'ʉnganga, ɓambakanzo ikosi. 6Ɓʉkʉnda ɓambakakwa ɨgyagya akʉ moni kɔɔ ɓɨɓɨ, ɨkyɛmɨngana ɓaakwa ɨgyagya akʉ moni kʉ ingono. 7Ɓʉkʉnda ɓambaka ndokono ɨngbaa yɨ moni, ɓaabaya moni kʉ muɓomu, ɓaanapɨa itungwio ekoo moni kʉ muɓomu, nʉ ɓaapɨa moni kʉ muɓomu.
8Moni kʉ lɨgbɛ ka꞊sio sina sioo. Mbɨmbanaka kʉyaka maɗaɗa ngika ɓombi ɓambakambɨa ya꞊sio sina kʉ sioo. Abana mbɨmbanaka yɨ ɨkʉʉ ya꞊sio sina kʉ sioo. Ɨkyɛmɨngana, ɓʉkʉnda pɛpɛ ɓambʉkʉsio sina. 9Jʉ kambakambɨa moni kʉ muɓomu, nʉ moni kʉ ɨgbɛ kambakatɨpana moni kʉ muɓomu. 10Ɨkyɛmɨngana, ati ngia mbɨmbanaka gbagba ya꞊ka sina‑ɔɔ, mbɨmbanaka ngia ya igbiti yɛngɔ yambʉngɨtɨa.
11Ati ngia mi꞉nye‑ɔɔ mwana ɔɔ ɗɛkɛkɛ, mi꞉nye yaka kʉndʉ mwana, nʉ mi꞉nye tunguo moni kʉndʉ mwana nʉ kʉkanganakɨa moni ngbanga kʉndʉ mwana. Ati ngia ma꞉ka tiga‑ɔɔ 'ʉkʉʉ, mambʉsɨa ɨɓwana ɓwana. 12Jʉ ɨtakɨ‑takɨ ngia kakʉna moni ndʉ akʉ ɨkanganɨa yɛɛ ɓulu ɓulu, ɨkyɛmɨngana akʉ wati ngua wakʉka ka꞊na tiga moni ɓʉ ngbɛlɛ ngbɛlɛ. Ɨtakɨ‑takɨ ngia mambʉkɔmʉ kʉmbɨa moni kʉ muɓomu, ɨkyɛmɨngana tiga akʉ wati ngua wakʉka, ma꞊mbɨa sina tiga moni muɗo kʉndʉ iya Asʉɓɨɨ a‑ɔɔ nɛmɛ kʉmbɨa iɗo.
13Kʉ ɓwanɨ, ɨtakɨ‑takɨ ngiakɛ, yanʉ moni kaatʉ ika kaagbalɨa ɓʉ ndɨɨ ndɨɨ ka ɓɔ: baya, napɨa itungwio, tiga nʉ ɓʉkʉnda. Ɨkyɛmɨngana, ɨkyɛmɛ ngia yɛɛ ɨja ati ʉ moni ngikʉnanɨ kaatʉ ya tʉkʉ ɓʉkʉnda.
ទើបបានជ្រើសរើសហើយ៖
1 Ɓakolito 13: BudKoya
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2021, Wycliffe Bible Translators, Inc.