1 Ɓakolito 11
11
1Kpateni isisinio ngiisɛmɛ kʉndʉ ɛmɛ makʉkpata iya yɨ Klisito.
Ipinyinikie ngia yɨ moi wati wɔɔ bibise Asʉɓɨɨ
2Maninu kʉbɨba jʉ naakyɨa nɛmɛ tʉkʉ kutunguo amati ʉ lɨngbaa lʉ moni kʉ liɓomu, nʉ naakyɨa tʉkʉ kʉkpata mapanʉ ngika ma꞉nɨpanɨa. 3Ɨkyɛmɨngana, moni mʉngana ngika makʉkʉnda pimiseni ka ɓɔ: Klisito a 'ʉtʉ wʉ gue kʉ 'uɓomu. Nʉ gue a 'ʉtʉ wʉ moi angɔ, nʉ Asʉɓɨɨ a 'ʉtʉ wʉ Klisito. 4Ndʉ gue aɓio kʉta Asʉɓɨɨ, yɛmɔ kʉngaka moni kʉʉngwa ɔɔ Asʉɓɨɨ 'ʉtʉ ukute, iinanɨ akʉndapiso Makʉangɔ. 5Ɨkyɛmɨngana, ndʉ moi aɓio kʉta, yɛmɔ kʉngaka moni kʉʉngwa ɔɔ Asʉɓɨɨ 'ʉtʉ kʉ uno, iinanɨ ya kʉndapiso swaɨ ngia a 'ʉtʉ nguangɔ, jʉ a tiga ndʉ moi ngia ɓa꞉mʉtɨna ɨngɔngɔɔ. 6Ndʉ moi a꞊yaa kuɓongo ɨtambala, yɨkwanana ɓɔ utiniso ndii kʉ tinisoo. Ʉna tɔ, ndʉ yaɓio moni kʉ soni moi kuɓio nʉ ɨngɔngɔɔ, yɨkwanana uɓongo ɨtambala akʉ 'ʉtʉ.
7Gue ʉkwananakɔmʉ kuɓongo ɨtambala akʉ 'ʉtʉ ati ngia a‑ɔɔ kʉta, jʉ a isisinio yɨ Asʉɓɨɨ iya aapananiso imbangumba ngia yɨ Asʉɓɨɨ. Ɨkyɛmɨngana, moi akʉpananiso imbangumba ngia yɨ swaɨ. 8Jʉ ɓa꞉kyɨakɔmʉ gue kʉɓʉa amati ʉ moi, ɨkyɛmɨngana ɓa꞉kyɨa moi kʉɓʉa amati ʉ gue. 9Nʉ ɓa꞉kyɨakɔmʉ gue aka ekoo ʉ moi, ɨkyɛmɨngana ɓa꞉kyɨa moi aka ekoo ʉ gue. 10Iiya ɓɔ, moi ʉkwanana kuɓio nʉ ɨkyɛmɛ yɛɛ kute 'ʉtʉ, kʉpananiso ɓɔ anʉ ʉpanʉ wɔɔ tɛ Asʉɓɨɨ jʉ ɓamalaika ɓa mesu ekoo angɔ.
11Abana ɓwanɨ kititi, aka ekoo jubunio ngiindɛsʉ nʉ ɔɔ Makʉʉɓɨɨ, moi ambʉkʉkwanana kʉdya ʉɓɨɨ chʉkɔmʉ nʉ gue, nʉ gue ambʉkwanana kʉdya ʉɓɨɨ chʉkɔmʉ nʉ moi. 12Jʉ abana ndʉ moi a꞉ɓʉa nʉ ndʉtʉ yɨ gue kititi, gue aanʉtanɨa kʉ nʉ moi. Moni ngikʉnanɨ kʉ muɓomu ka kʉʉngwa tʉkʉ ɔɔ Asʉɓɨɨ.
13Kanganieni‑zu inu ɓakʉɓɔngɔ, ajʉ ya iɗo moi kʉta Asʉɓɨɨ 'ʉtʉ kʉ uno ɓiɛ? 14Ajʉ nambakana‑zʉ akʉ ʉɓɨɨ ngua Asʉɓɨɨ a꞉kyɨa‑ɔɔ mombi, ɓɔ ya soni gue kuɓio nʉ ndii yɛɛ ɨta ɨta ɓiɛ? 15Ʉna tɔ, ndʉ moi aɓio nʉ ndii yɛɛ ɨta ɨta, ya andɔngɔ ɨbɨba jʉ yamunyiiso ndʉ ɨpʉkʉ yɛɛ kute 'ʉtʉ. 16Ndʉ mombi ahata kuchwiso wai ekoo moni ngikakɛ, ʉmbɨa ɓɔ isu kambakakyɨa ikanzi yɨ moni ngikʉnanɨ, abana kʉ ɓakanisa ɓʉ Asʉɓɨɨ.
Idyo ngia yɨ Makʉʉɓɨɨ
17Aka ekoo moni ngika maninu kʉmɨnya nakɔ akɛ, mambʉkʉ kwanana ninu kʉbɨba, jʉ majunikio ngiindɛnʉ yaanisingo wati kʉ uɓomu tʉkʉ amati ʉ ɓʉka‑ɓʉkaɨ chʉkɔmʉ akʉ ɓuɗo. 18Pɛɛ‑zʉ, ati ngia naajunikio‑ɔɔ ɨzɔ, ɓaanaɓɨa ɓɔ naakyɨa tʉkʉ kʉkyɨkyanaka mangɔnɔ ati ʉndɛnʉ. Nʉ maabaya moni kɔmɔ ɓɔ ka tʉkʉ kingono. 19Yɨkwanana ɓɔ ɓieni tʉkʉ kʉkyɨkyanaka mangɔnɔ ati ʉndɛnʉ, ambʉ yɨmbɨanɨa ɓɔ aanɨ iɓa ɓakʉkɨndaka akʉ ɓungbingbii ati ʉndɛnʉ. 20Ati ngia naajunikio‑ɔɔ kʉdya idyo nga naadya chʉkɔmʉ iya yɨ Makʉʉɓɨɨ. 21Jʉ ati ngia naakyɨa‑ɔɔ kʉdyakaka, mombi kʉ 'ʉɓomu aawana kʉchɨka‑zʉ tʉkʉ idyo ngiangɔ makʉɔngɔ. Ɓombi ɓɔmɔ ɓa꞉kyɨa tiga nʉ taa, ɓombi nga ɓɔmɔ ɓambʉdamoko. 22Mɛɛ‑zʉ nakʉ nʉ ɓandɛnʉ akʉ nakwanana‑ɛɛ kʉdyakaka nʉ nɨmwa. A tiga nakʉkʉnda tʉkʉ kʉna kanisa ngia wʉ Asʉɓɨɨ ɨsʉkʉɓwanɨ, nʉ kunziso ɓombi ɓʉ ɓanangyɨa soni. Nakʉkʉnda munisigio tiga tanɨ? Ajʉ mʉnɨbɨba bɨbanɨ ɓiɛ? Chʉkɔɔ, mambʉkʉnɨbɨba akʉ moni ngikʉnanɨ.
23Moni ngikʉnanɨ Makʉʉɓɨɨ a꞉napanɨa jɛnɛ nʉ ɨkɔ ika ma꞉niɓaisio tiga inu kusigo ɓɔ: Nuɓutu ngia ɓa꞉nzo‑ɔɔ Makʉʉɓɨɨ Yeso akʉ lɨkɔndɔ lʉ ɓakwa, a꞉chɨka mukati, 24ambutuisio Asʉɓɨɨ ɨbɨba, ambuuɓundo ambusigo ɓɔ: « Ndʉtʉ ngiisɛmɛ iya, iya mu꞉ninzo inu. Kyɨeni ɓwanɨ nɛmɛ kutunguo. » 25Ngbanga kʉ ɓwanɨ, mbise ʉ dyakaka ambʉchɨka ʉpata wʉ vinyo ambusigo ɓɔ: « Vinyo ngiakɛ a agɔmɔ wʉ ɨtakɨ‑takɨ ngia Asʉɓɨɨ a꞉napɨa ati angɔ nʉ ɓombi, 'upi akʉ miniki ngikʉsɛmɛ ka꞉chichio. Ɓʉkyɨeni ɓwanɨ ati kʉ 'ʉɓomu ngia na꞊ɓʉmwa‑ɔɔ nɛmɛ kutunguo. » 26Jʉ ati kʉ uɓomu aka na꞊ɓʉdya‑ɔɔ mukati ngua nʉ kʉmwa ʉpata wʉ vinyo ngia, nakʉɓɨakɨa ɨsaʉ yɨ ingyo yɨ Makʉʉɓɨɨ kʉɓʉya tʉkʉ akʉ aka‑ɔɔ.
27Kʉ ɓwanɨ, mombi ngia a꞊dya mukati nguakɛ nʉ mwa ʉpata wʉ vinyo ngiakɛ ambikinye 'ʉkwananakɛ, akʉkyɨa ɓʉɓɨɓɨ akʉ ndʉtʉ nʉ miniki ngika kʉ Makʉʉɓɨɨ. 28Ɨkyɛmɨngana, mombi ʉkwanana kʉkanganɨa ʉɓɨɨ nguangɔ makʉɔngɔ, mbise ɔngɔ ambʉdya tiga mukati nguakɛ nʉ kʉmwa ʉpata wʉ vinyo ngua. 29Jʉ ndʉ mombi adya mukati nguakɛ nʉ mwa ʉpata wʉ vinyo ngiakɛ ambikinye 'ʉkwananakɛ, ambʉ ʉdya nʉ nɨmwa tʉkʉ 'ʉkɔmbɔ wangɔ makʉɔngɔ, ʉmbɨenikɔmʉ inyi yɨ ndʉtʉ ngia yɨ Makʉʉɓɨɨ. 30Iiya ɓɔ ɓombi ɓaja ati ʉndɛnʉ ɓakukwisikiso nʉ kwa ndʉtʉ gʉta gʉta, nʉ ɓombi ɓɔmɔ ɓaja ɓakʉdʉka. 31Ambʉ́ ndʉ kaakanganakɨa ʉɓɨɨ nguʉndɛsʉ, Asʉɓɨɨ ambʉkɔmʉ piɛ atɨnapɨa nʉ 'ʉkɔmbɔ. 32Ɨkyɛmɨngana, ati ngia Makʉʉɓɨɨ a‑ɔɔ kʉtɨna 'ʉkɔmbɔ nguʉndɛsʉ nʉ nisu kuyumo, ya jʉ ɔɔtɨnakɔmʉ 'ʉkɔmbɔ nguʉndɛsʉ ɨzɔ nʉ ɓombi ɓʉ ɨtaka ngia. 33Kʉ ɓwanɨ, ɓayoo ɓʉsɛmɛ, ati ngia najunikio‑ɔɔ kʉdya idyo yɨ Makʉʉɓɨɨ, siɓoneni siɓonoo. 34Ndʉ mombi aɓio nʉ taa, ʉdyakaka kʉ andɔngɔ ambʉ Asʉɓɨɨ ɔɔnɨnapɨakɔmʉ nʉ 'ʉkɔmbɔ ati ngia najunikio‑ɔɔ. Lɨngbaa lʉ moni nga lɔmɔ lutukuo ma꞊lɨtambanaka tiga ati ngia ma꞊ka‑ɔɔ na andɛnʉ.
ទើបបានជ្រើសរើសហើយ៖
1 Ɓakolito 11: BudKoya
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2021, Wycliffe Bible Translators, Inc.