Romans 1
1
CHAPTIR ANE.
The heathen soud ken mair oʼ God than they div. Their unco vileness and thrawartness.
1Paul, a servitor oʼ Christ Jesus, a bidden Apostle, sutten apairt to Godʼs Joyfuʼ‐message,
2Whilk he promised afore, throwe his prophets iʼ the holie writins,
3Anent his Son, wha cam oʼ Dauvidʼs seed by the flesh,
4Wha was owned to be Godʼs Son wiʼ micht, eʼen as to the Spirit oʼ Holiness, by a Risin‐frae‐the‐deid #1:4 Paul made aye muckle oʼ the Risin oʼ the Lord Jesus. In Acts 13:33, he seems to expone the words, “My son art thou, this day hae I begotten thee,” as gloriously fulfilled at his Risin‐frae‐the‐deid. — Jesus Christ oor Lord:
5By wham we had gien till us tender love and Apostleship, toward lealness oʼ faith in aʼ nations, for his nameʼs sake:
6Oʼ wham are ye, as weel; bidden anes oʼ Jesus Christ;
7To aʼ thae that are in Rome, Godʼs beloved, bidden saunts; tender love till ye, and peace, frae God oor Faither, and the Lord Jesus Christ!
8First, I am giean thanks to my God, by Jesus Christ, anent ye aʼ for that yere faith is made mention oʼ in aʼ the warld.
9For God is witness for me, him that I serʼ in my spirit, iʼ the Joyfuʼ‐message oʼ his Son, hoo constantly I am speakin oʼ ye;
10Aye in my prayers makin request, gin that by some means, eʼen noo at ony time I soud see a gate to gang, wiʼ the wull oʼ God, till ye.
11For I am fain to see you, that I may gie some spirit‐gift tʼye, that ye may be made siccar;
12That is, that we may hae a comfortin thegither by oor common faith — yours and mine.
13But I wadna ye war misleared, brethren, hoo that aft I ettled to come tʼye — but was hinderʼt, eʼen till noo — that I micht hae some frute amang you, eʼen as amang the lave oʼ the nations.
14Baith to Greeks and barbarians, baith to wyss and simple, am I debtor:
15Thus am I sae fain to gie oot the Joyfuʼ‐message, eʼen to you, that are in Rome.
16For I am na blate anent the Joyfu‐message; for it is Godʼs pooer to save ilka ane wha lippens; first to the Jew, and eke to the Greek.
17For the richtousness oʼ God, throwe faith, to thae that hae faith, is thus made plain, eʼen as it is putten doon, “The just sal leeve by faith.”
18For Godʼs wrath is made kent frae Heeven, again aʼ ungodliness and wickedness oʼ men, wha in wickedness haud the truth under:
19Inasmuckle as that whilk may be kent oʼ God is made plain amang them; for God has made it kenspeckle.
20For the invisible things oʼ him, eʼen frae the warldʼs creation, are made plain to be seen by the things that are creatit — eʼen his eternal pooer and Godheid; that they micht hae nae excuse:
21For, comin to ken God, they magnifyʼt him‐na as God, nor gied him thanks; but their reasons war feckless, and their doitit heart was mirk.
22Settin‐up to be wyss, they becam fules;
23And changin, they tint the glorie oʼ the incorruptible God in the form oʼ an image oʼ corruptible man, and birds, and fowr‐fittit beass, and crawlin things.
24Sae God eʼen gied them ower to vileness, iʼ the uncleanness oʼ their hearts; sae as eʼen to dishonour their ain bodies amang theirsels:
25Wha trokit awa Godʼs truth for a lee, and gied worship and service to what is made, raither than to the Maker — wha is blessed for aye; Amen!
26Sae for this, God gied them up to vile passions; for eʼen their weemen did change the natʼral use for what is contrar to natur;
27And eʼen sae the men, quattin the wumman, burned wiʼ desire ane to anither; men wiʼ men actin unseemly, and receivin in theirsels the reward oʼ their error as was due.
28And eʼen as they didna seek to keep God iʼ their mind, God gied them ower to a reprobate heart, to do things no fittin:
29Bein fuʼ oʼ aʼ unholiness, wickedness, selliness, malignity; fuʼ oʼ envie, blude, strife; twa‐faced; spitefuʼ; tale‐pyets;
30Backbiters, haters oʼ God, insolent, liftit‐up, boasters, inventors oʼ ill, risin up again parents,
31Wantin sense, breckers oʼ covenants, wantin natʼral affection, wantin kindness;
32Wha, kennin the holie sentence oʼ God, that they wha dae sic things are wordie oʼ death, no alane dae them, but are colleaguin wiʼ thae that sae practeese.
ទើបបានជ្រើសរើសហើយ៖
Romans 1: SCO1904
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Translated by Rev William Wye Smith. Published in Paisley, Scotland in 1904.
