Nʋnʋgbɩɩ 19

Pɔlʋ ‑mʋ Efɛzɩduu'

1'Tänyɩɛ 'mnö Apolɔsʋ ‑kʋ bhlä Kolɛtɩduu' nä, kä Pɔlʋ ghlää‑ Azii‑bhlɩɛɛ' 'küküü' 'lëkpëa 'mnö, 'nɩ ɔ yi Efɛzɩduu' ŋëë. Ɔ ‑mʋ lä nä, ɔ nii‑ ‑mɔɔ Kwlienyɔɔ' 'kʋgënyʋä zio. 2'Nɩ ɔ yiwa 'ylä, ɔ lä a ŋoo‑ lä Kwlienyɔɔ' 'Nägädöö 'kʋ nä, a nii‑ bhä Laagɔɔ' Kplɔɔkplɔɔ‑wugɔɔ ‑a? 'Nɩ wa yio soo, wlä ‑aa ‑läzä Kplɔɔkplɔɔ‑wugɔɔ' yëkuu' wälɩ 'nu. 3'Nɩ Pɔlʋ yiwa 'ylä, ɔ lä anyɩa 'nyu 'wlu ‑ŋʋlɩɩ nä, säsä ɩ nʋɔ bhää? Wlä Zään 'nyuu 'wlu ‑ŋʋsaa, sɔɔ wa ŋʋ‑anyɩ lä 'nyu wlu. 4'Nɩ Pɔlʋ yiwa soo, ɔ lä Zään nä, nyɩkpaa ‑wa ylä bhlä nynä ‑wa 'gä waa' nʋnʋgbɩɩ 'cɩcɩ nä, wamä Zään ŋʋʋ‑ lä 'nyu 'wlu. 'Nɩ ɔ sonʋwa bhä 'sɩɩ nynä nyɩkpɔɔ' ‑lɔmɔ ‑ɔ yio bhlä klë nä, wa 'ŋʋɔ waa' pɔlötɛtɛ 'kʋ. Zozii 'mɔ ɔ sä bhlä. 5Nyɩkpaa nuu‑ lä sä Pɔlʋ cii‑ lä nä, wa ŋoo‑ 'nɩ Pɔlʋ yiwa 'nyu 'wlu 'ŋʋ Kwlienyɔ Zozii' 'ŋnöö 'mnö. 6'Nɩ ɔ yiwa ‑klɔgbö 'wlu gbɛɛ, 'nɩ Kplɔɔkplɔɔ‑wugɔɔ yiwa 'kʋ kwlii. Ʋ kwlienʋwa‑ lowu‑wälɩ nëë' 'nɩ, Laagɔ cinʋwa bhä nëë'. 7Wa ‑yi bhä nyɩkpaa 'kʋgbä 'sɔ bhlü.

8Pɔlʋ nä, ɔ yi yi bhä 'Zufʋnyʋaa' Laagɔ‑bhutuu 'mnö 'kʋ. Ɔ bhlüü‑ 'cɩ taa 'kʋ 'nɩ, ɔ ‑yʋwa 'sɔ cii‑. Ɔ ‑sonʋwa Laagɔɔ' 'Leyiduu' yëkuu' wälɩ. 'Nɩ ɔ nʋ bhä saa 'fɩɩn ‑yä ‑wa puo bhlä 'nyukwli nä, wa 'kɔ ciciwälɩɩ 'kʋ ŋoo. 9‑Mä bhutukpä ‑kʋ bhä ‑mɔɔ 'nɩ wa 'tɛmä bhä 'nyukwlii'. Waa' 'ylä bhɔɔ nynä wa 'ka Laagɔwälɩ 'kʋ ŋoo. 'Nɩ wa nyɩänɩ bhä ‑jlëë' 'mʋ. 'Nɩ Pɔlʋ yiwa yëku ‑bha. Ɔ bhlüü‑ 'kʋgënyʋa 'kʋ 'nɩ ɔ ‑yʋwa 'sɔ ‑zigbë. 'Nɩ ylɩɩ 'fɩɩn 'kʋ, nyɩkpɔɔ wa laa bhlä Tilanusö nä, ɔɔ' ‑sukluugbëa 'mnö, ɔ ‑yʋwa 'sɔ ‑kʋ ‑mɔɔ 'nɩ wa ci bhä Laagɔwälɩ. 10Pɔlʋ ‑nʋ sɔɔ ‑aaa, 'ylʋbɔ 'sɔ. Ɩ ‑gbä bhɛ nä, nyɩkpaa 'fɩɩn ‑wa kʋ bhlä ‑mɔɔ Azii‑bhlɩɛ 'mnö nä, 'ŋʋʋ‑ 'Zufʋnyʋa ‑yä 'Glɛkönyʋa 'sɔ, wa nuu‑ Kwlienyɔɔ' 'Nägädöö.

Sevaa ‑yowliee' yëkuu' wälɩ

11‑Maa, Laagɔ ghlää bhä Pɔlʋ 'kʋ 'nɩ, ɔ nʋ bhä 'yiziziogbɩɩ' plɛkʋ 'ninielɩɩ. 12Nyɩkpa lä bhä lokwü ‑yä 'kɔkɩ ‑laapeli, 'nɩ wa konɩ bhä Pɔlʋ. 'Nɩ wa mʋ bhä 'nɩ wa konɩ bhä gupanyʋä, 'nɩ ‑lɔɔ' gupanyʋa yamä bhä, 'nɩ ‑zizinyenyi bhʋwa bhä 'sɩɩ kätää'. 13‑Maa, 'Zufʋnyʋää' ‑nänʋä ‑kʋ bhä ‑lɔɔ 'nɩ wa bi bhä 'nɩ, wa tlü bhä ‑zizinyenyi. Nä, nyɩkpaa' ‑lʋa ‑zizinyenyi ‑kʋ bhlä kätää' nä, wa tää bhä nynä wa 'kwanyɩ kätää' ‑sä Kwlienyɔ Zozii' 'ŋnöö 'mnö. Wa soo bhä ‑zizinyenyii, wlä Zozii, ‑ɔnö wälɩ Pɔlʋ bie lä nä, ɔɔ' 'ŋnöö 'mnö, a ‑bha ‑pɛpɛɛ nyɩkpayɩ kätää'! 14‑Wa nʋ bhlä sɔɔ nä, wa ‑bhlü bhä nyɩkpa ‑ngbɔɔsɔ. 'Zufʋnyʋää' 'Cibhisänyʋaa' 'cifio wa laa bhlä Seva nä, ɔɔ' 'yua 'mää‑ nʋ bhlä sɔɔ. 15'Ylʋʋ ‑bhlo ‑kʋ ‑lɔɔ 'nɩ, wa ‑kʋ ‑zuzunyënyu 'tlüdä 'nɩ, ʋ ‑sonʋwa, ʋ lä Zozii a sä lä nä, n ‑yio, 'nɩ n ‑yi 'sɩɩ ‑lɔɔ ‑ɔ plöö‑ lä Pɔlʋ nä! ‑Mä anyɩ nä, a plöö‑ bhää? 16'Nɩ nyɩkpɔɔ ‑zuzunyënyuu ‑kʋ bhlä kätää' nä, ɔ yiwa 'kʋ bluu‑. ‑Mä ‑zuzunyënyuu ‑kä bhä kpänyɩ 'tɛtɩ 'nɩ ʋ ‑zi bhä waa' ‑lefɩɩn. Ɩ ‑kä 'ŋnö nä, ʋ ‑bhütuwa 'nɩ ʋ ŋʋwa‑ 'jü, 'nɩ ʋ döwa‑ wlu, 'nɩ waa' 'mëklü ‑lʋa, wa yi guu‑ 'nɩ wa yi ‑lɔɔ' 'gbëa 'mnö ‑bha. 17‑Mä ‑mɔɔ Efɛzɩduu' nä, kä wälɩɩ' kplü bhlüü‑ ‑mɔɔ 'kʋ. ‑Mɔɔ' 'Zufʋnyʋa ‑yä ‑mɔɔ' 'Glɛkönyʋa 'fɩɩn nui‑ 'nɩ, ‑ŋänö yiwa plä. Ɩ ‑kä 'ŋnö 'nɩ wa ŋʋ bhɛ kpänyɩ Kwlienyɔ Zozii' 'ŋnöö 'klʋkpää'. 18Nyɩkpaa ‑wa ŋoo‑ bhlä Kwlienyɔɔ' 'Nägädöö 'kʋ nä, waa' nëdëë' bhutukpä sä bhä 'nyu nëë'. Wälɩɩ 'fɩɩn wa ‑nʋ lä 'nɩ ‑ɩ ‑nyu lä nä, wa cinɩ bhä ‑jlëë'. 19'Nɩ nyɩkpaa' ‑lʋa ‑kä bhlä 'sëkëa nä, wa lä bhä waa' guu‑bɔɔgwɩɩ 'nɩ wa sienɩ bhä ‑jlëë'. 'Bɔɔgwɩnɩ wa ‑sie bhlä nä wa ‑zɛɛ ɩɩ' 'kpä. Ɩ yi bhä ‑flëëgiyii' ‑bhɛgöö gwlɩ 'sɔ 'nɩ 'kʋgbä (50.000) nʋ.#19.19 Lebhenʋnyɔɔ' monie wa 'pɛnöɔ lä ylʋʋ nä, ɛ nʋ bhä ‑flëëgie ‑bhlo. 20A ni 'sää ɩ plöö‑ lä 'kʋ 'nɩ, Kwlienyɔɔ' 'päwa 'mnö, ɔɔ' 'Nägädöö ‑ŋëë lä dää 'fɩɩn, 'nɩ ɩ ‑kä bhlä 'tɛtɩ.

Efɛzɩ‑dunyʋä ‑gbä 'mʋ 'nɩ wa ‑lä Pɔlʋ zɔgblö

21‑Nɩnɩ 'fɩɩn plöö‑ ylä nä, kä Pɔlʋ ŋʋʋ‑ nynä ɔ 'kä Masedʋanö‑bhlɩɛ ‑yä Akayii‑bhlɩɛ 'mnö ghlää, ‑yä ɔ 'kä Zolizalɛmʋduu' mʋ. Ɔ cii‑ bhä, ɔ lä n kä yɩ ‑mɔɔ ‑ŋëë nä, ɩ ‑ŋwa 'sɩɩ 'kʋ nynä ‑mä, n mʋ Wlɔmʋduu'. 22Pɔlʋʋ' 'kʋnämʋnyʋa 'sɔ, Timotee ‑yä Elasö, ɔ ‑fʋwa Masedʋanöbhlɩ 'kʋ, 'nɩ ɔmɔ, ɔ ‑too Aziibhlɩ 'kʋ ylɩɩ' zioo' ‑za.

23‑Lɔɔ' 'tänyɩɛ 'mnö nä, Kwlienyɔɔ' Blɔɔ' yëkuu' wälɩɩ' ‑za, kplü gbä bhä Efɛzɩduu'. 24A ni 'sää wälɩɩ plöö‑ lä 'kʋ. Dlɛɛ‑ŋunyɔ ‑bhlo, ɔmɔ wa laa bhä Demetlusö. Ɔ ŋu bhä dlɛ 'nɩ, ɔ bhlie 'kʋ 'nɩ, ɔ maa bhä ‑zlëa wa laa lä Atemisö#19.24 Atemisö: ‑Zlüüŋnɔ ‑bhlo lä. Kä ɔɔ' bʋbɔnyʋä ci bhä nynä ‑mä ɔmɔɔ‑ gbä 'nɩ zëkpëkʋʋ' ‑lɩɩ 'fɩɩn namä 'kʋ. Wlä kɔ gbä 'nɩ 'yugälʋ yi. 'Nɩ 'kläplänyʋä bhlä mna. nä, aa ‑bhitiyuë 'nɩ, ɔ ŋʋwa bhä 'kpä. Lebhenɛ gbä bhä 'nɩ ɔɔ' lebhe‑nʋnyʋa ni bhä kpänyɩ monii. 25Demetlusönɔ, ɔɔ' lebhe‑nʋnyʋa ‑yä nyɩkpaa 'fɩɩn ‑wa nʋ bhlä ɔmɔ 'bhisäkʋʋ' lebhee nä, 'tänyɩ ‑kʋ ‑lɔɔ 'nɩ, ɔ 'kanʋwa‑. Ɔ 'wlänʋwa 'wlu 'nɩ ɔ ‑sonʋwa, ɔ lä ‑aawlisɩnyɩ‑! ‑Anyɩa dlɛɛ‑ŋʋlebhenɛ, a ‑yi 'sɔɔ nynä ‑mä, ɛmɛ 'mnö ‑a sä lä anyɩa 'nää! 26A nu wälɩnɩ, 'nɩ a nii 'sɩɩ 'yi. ‑Ɛɛ ‑wʋ ‑mää Efɛzɩduu' ‑bhlogbee‑, ‑mä, Azii‑bhlɩɛ 'fɩɩn 'mnö, Pɔlʋ nyima nyɩkpa ‑bhutukpä 'wlu, 'nɩ ɔ 'ylɩbha waa' pɔlöö. Ɔ soo nyɩkpa nynä ‑laagwɩɩ' ‑lɩɩ nyɩkpɔ maa lä wlɩɩ nä, ɩɩ' ‑wʋ ‑laagwɩ plöö‑. 27Kä Pɔlʋʋ nʋnʋgbɩɩ 'kä lä gbä ‑yä, ‑anyɩa dlɛɛŋu‑lebhee 'kä bhusu. 'Nɩ ‑ɛɛ ‑wʋ 'sɩɩ ‑anyɩa lebhee ‑bhlo ‑mä, ‑anyɩa ‑zlüüŋnɔ 'kädɔɔ, Atemisö nä, ɔɔ' ‑bhutuu' ‑läyɩɔ gba kää. 'Nɩ, Atemisö‑ nyɩkpa 'fɩɩn fään bhlä 'ŋnu nä, wa 'nöɔ ‑läyɩɔ 'mänyɩ. ‑A cie yɩ Azii‑bhlɩnɛ 'mnö ‑aaa ‑yä, ‑a ŋëë yɩ 'ylʋzɔɔ' 'bhlɩɩ 'fɩɩn 'mnö nä, nyɩkpa 'nöɔ ‑läyɩɔ 'mänyɩ.

28Demetlusö cii‑ lä sɔɔ nä, nyɩkpaa 'fɩɩn ‑wa ‑puo bhlä 'nyukwlii' nä, kä waa' 'mnö ‑nyimo, nä wa woo bhɛ. Wlä Efɛzɩ‑dunyʋää' ‑zlüüŋnɔ, Atemisö‑! ‑Nn ‑wʋ 'ghlünɔɔ' 'bɛ! 29'Nɩ duu yi 'mʋ gbä. Nyɩkpaa 'fɩɩn ‑paa 'nɩ wa ‑mʋ 'clɩkpä 'kädaa 'mnö. Gayusö ‑yä Alisötakö ‑wa ‑yä Pɔlʋ 'sɔ nää bhlä nä, wa ‑klʋwa 'nɩ wa ‑fʋwa ‑mɔɔ 'clɩkpää'. Gayusö ‑yä Alisötakö 'sɔ nä, wa ‑glö bhä Masedʋanöbhlɩ 'kʋʋ nyɩkpa. 30Pɔlʋ ‑tään nynä ɔ 'kä ‑jlëë' mʋ ‑mä, 'cɔcɩnyʋa 'nöɔ ‑wʋ 'casɩɛ nyɛɛ‑. 31'Govlää' nyɩkpa 'kädʋa, waa' ‑nänʋä ‑kʋ bhä Aziibhlɩ 'kʋʋ' 'lëkpëyɩ 'mnö, 'nɩ wa plöö‑ bhä Pɔlʋʋ' 'nagwɩä nä, wa ‑lɔɔ 'dö, 'nɩ wa ‑sonöɔ nynä ‑mä ɔɔ' mʋ lä ‑mɔɔ 'clɩkpää'.

32‑Mä ‑lɔɔ' 'tänyɩɛ 'mnö nä, ‑jlëa 'mnö kplü gbä. Nyɩkpɔ nyɩkpɔ woo bhä ɔɔ' sä ‑waa lä nä. ‑ Bhutukpä ‑kʋmʋ bhä 'sɩɩ ‑lɔɔ 'nɩ wälɩklëa ‑anözä wa 'wlää‑ bhlä 'wlu nä, wa 'nöa bhɔɔ ‑yi. 33'Nɩ nyɩkpɔ ‑bhlo wa laa bhlä Alɛzadlö nä, wa yio ‑jlëë' slüa. Ɔmɔ 'Zufʋnyʋa 'ŋʋʋ‑ bhlä wälɩɩ' 'yikʋ. 'Nɩ Alɛzadlö yi ‑jlünyʋa sɔ 'pää nynä wa kʋ ‑siin. Ɔ tään bhɛ nynä ɔ 'kä ‑jlë wälɩɩ' ‑säsä. 34‑Mä wa nii‑ lä 'yi nynä ɔ glö bhä 'Zufʋyu nä, kä wa cie woolɩ 'kʋ. Waa woo bhä, wlä Efɛzɩ‑dunyʋää' ‑zlüüŋnɔ Atemisö‑! ‑Nn ‑wʋ 'ghlünɔɔ' 'bɛ. Wa ‑kʋ woodä ‑aaa, yiosä 'gliyi 'sɔ ‑totobhë. 35'Nɩ Efɛzɩ‑dunyʋää' nëkʋcinyɔɔ yi yi. 'Nɩ ɔ yi gbä 'nɩ ‑jlëa yi ‑plɩɩ kʋ. 'Nɩ ɔ yiwa soo, ɔ lä Efɛzɩ‑dunyʋänyɩ‑, ‑anyɩa ‑zlüüŋnɔ Atemisö, ɔɔ' bʋbɔlɩɩ nä, ‑anyɩ Efɛzɩ‑dunyʋä, ‑anyɩ‑ ‑kʋ lä ɩɩ' ‑tëbhuu' 'yikʋ. Suyuo, Atemisö, ‑ɔ ‑bha lä ‑laagɔɔ' 'nɩ ‑ɔ ‑bhlü ‑lä ‑zɔɔ nä, ‑anyɩ Efɛzɩ‑dunyʋä, ‑anyɩ ‑kä lä ɔɔ' bʋbɔlɩɩ' ‑tëbhuu. 36'Nɩ nyɩkpɔ ‑bhlo 'coo ‑wʋ ‑kʋ ‑yä ɔ 'kä ‑lɔɔ' wälɩklëa cɛɛ. Naa, ɩ ‑ŋwa 'kʋ nynä ‑mä, a mnaa 'mʋ. A mnaa 'mʋ ‑yä aa' kä ‑kä wälɩ‑nynenyi nʋ. 37Nyɩkpanä a ‑lä lä nä, waa' ‑wʋ ‑anyɩa ‑zlüüŋnɔɔ' 'cibhisädaa' lʋʋ ‑nyima, 'nɩ waa' ‑wʋ 'sɩɩ ‑anyɩa ‑zlüüŋnɔɔ' wälɩ nyenyi cii‑. 38Naa, Demetlusö ‑yä ɔɔ' lebhe‑nʋnyʋa nä, kä wa kä nyɩkpɔɔ' wälɩ 'mnö ‑kä nä, 'zuzunyʋä ‑kʋ 'dunʋ 'mnö. 'Nɩ ‑lɔɔ' tlobinaa ‑kä 'sɩɩ aa ylɩɩ. Nä, ɔ kuu ‑lɔɔ' nyɩkpɔɔ tʋ! 39'Ɩɩ ‑zä kä wälɩklë kä yɩ bʋkʋ ‑lɔɔ ‑kʋ 'nɩ, a kä ‑wa nynä a cio nä, a yia ‑kɛ ‑jlëë' ‑lä, 'nɩ ‑a yia ‑mɔɔ cii. 40Wälɩnɩ ‑ɩ plöö lä ‑zɩkä ‑lää 'kʋ nä, a 'nɩɩ plɛ ‑fä nä, ɩ yi gbä 'nɩ wa yi ci nynä ‑mä, kä ‑a ŋʋ kplü ‑dʋdʋkʋ. ‑Ɔnöza bhää? ‑Lää' 'wlu 'wläälɩɩ ‑a 'wlää‑ lä ‑lää 'wlu nä, aa ‑lä ɩɩ' gbaa' cilɩ mii. 41Alɛzadlö cii‑ lä sɔɔ nä, kɔ ‑gbä 'nɩ nyɩkpɔ nyɩkpɔ yi ɔɔ' bhäädä mʋ.

ទើបបានជ្រើសរើសហើយ៖

Nʋnʋgbɩɩ 19: god

គំនូសចំណាំ

ចែករំលែក

ចម្លង

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល

ស្វែងយល់បន្ថែមទៀតអំពី GOD - u2