Nʋnʋgbɩɩ 20

Pɔlʋ ‑mʋ Maseduanöö' ‑yä Glɛköbhlɩ 'kʋ

(1 Kolɛ 16.1‑7; Wlɔmʋ 15.25‑27)

1'Tänyɩɩ' kplüü ‑yi ylä ‑dʋdʋkʋ nä, kä Pɔlʋ 'wlää‑ 'cɔcɩnyʋa 'wlu. Ɔ ŋʋwa‑ 'fɩa 'tɛtɩɩ' 'nɩ, ɔ yi ‑blɔɔ zlaa. Ɔ ‑bha yɩ ‑mɔɔ 'nɩ ɔ yi Masedʋanöbhlɩ 'kʋ mʋ. 2Ɔ ‑sää kpänyɩ 'mʋ ‑yä ɔ 'kä ‑mɔɔ' 'cɔcɩnyʋa plɛɛ' bhlüa. Ɔ ‑kʋ sɔɔ ‑aaa, 'nɩ ɔ yi ‑lɔɔ' 'lëkpëa 'tɔɔ. 'Nɩ ɔ yi 'Glɛköbhlɩ 'kʋ ŋëë. 3Ɔ ‑sä 'Glɛköbhlɩ 'kʋ 'cɩ taa. Ɔ tää bhɛ nynä ‑mä ɔ 'kä 'mɩɩ plä ‑yä, ɔ 'kä Siliibhlɩ 'kʋ mʋʋ. ‑Mä ɔ nuu‑ nynä 'Zufʋnyʋa 'ŋʋʋ‑ bhä 'kʋ ɔɔ' ‑za. Ɩ ‑kä 'ŋnö nä, kɔ cii‑ nynä ɔ 'kä 'ylɩbhɔ ‑yä ɔ 'kä Masedʋanö‑bhlɩɛ 'mnö ghlää. 4Ɔ mʋ bhɛ lä nä, nyɩkpa ‑ngbɔɔsɔ ‑fänöɔ ‑blɔkʋ. ‑Bhlo wa lɔɔ Sopatɛɛ, Beleeduu' nyɩkpɔɔ wa laa bhlä Pilusö nä, ɔɔ' ‑yowli bhlä. Lʋä 'sɔ ‑kʋ bhä lɔɔ 'nɩ wa plöö‑ bhä Tesaloniköduu' nyɩkpa, wa laa bhä ‑bhlo Alisötakö, 'nɩ wa laa bhä ‑bhlo Segɔdusö. Dɛböduu' nyɩkpɔ ‑kʋmʋ bhä 'sɩɩ, ɔmɔ wa laa bhä Gayusö. ‑Bhlo plöö‑ bhä Timotee. 'Nɩ Aziibhlɩ 'kʋʋ nyɩkpa 'sɔ ‑kʋmʋ bhä 'sɩɩ. Wa laa ‑bhlo Tisikö, 'nɩ wa laa ‑bhlo Tlofimö. 5Nyɩkpanä 'plöö‑ 'yikʋ 'nɩ wa yi‑anyɩ Tlʋwasöduu' ‑bɛɛ ‑kää mʋ. 6‑Anyɩ nä, 'Zufʋnyʋaa' ‑glɩsɩɩsɩɛ ‑ɛnö 'tänyɩɩ wa lü lä 'flɔɔ ‑ʋʋ 'bha ‑wʋ lä nä, ɛ plöö‑ lä nä, ka ‑a ‑plä yɩ 'mɩɩ 'nɩ ‑a bha Filipʋduu'. 'Ylɩɩ ‑ngbü plöö‑ 'fɩa, 'nɩ ‑a yi ‑mɔɔ' ‑lʋwa Tlʋwasöduu' ŋëë. ‑A ‑sä ‑lɔɔ Tlʋwasöduu' sɔlɩcë.

Pɔlʋ ‑kʋ Tlʋwasöduu'

7'Sää 'sɔlɩcëa' tɛɛtɛɛ 'kʋ, ‑a 'wlää‑ bhä 'wlu ‑yä ‑a 'gä Kwlienyɔɔ' Kplɔɔkplɔɔ‑lülülɩɩ lü.#20.7 Zɛɛ 'sɩɩ Nʋnʋ 2.42. Ɩyä zeli 'kä ‑ze Pɔlʋ 'kä mʋ. 'Nɩ ɔ cie‑ cilɩ 'kʋ. Ɔ ‑kʋ bhɛ ‑jlëa soo dä 'nɩ, ɔ ‑tlʋmä 'mʋ. Ɔ ‑kʋ cidä ‑aaa, 'nɩ dodoogä doo‑ 'mʋ. 8‑Mä ‑bhutuklëa ‑a 'wlää‑ bhlä 'mnö 'wlu nä, 'tasɩ 'wluu ‑bhutuklë bhlä. 'Nɩ 'näpö ‑bhutukpä ‑kʋ bhä ‑mɔɔ. 9Nyëbluu ‑bhlo, ɔmɔ wa laa bhä Etikusö. Ɔ ‑kʋ bhä 'ŋwɩdɛɛ' nëkʋ sä 'nɩ Pɔlʋ sää bhlä 'mʋ. ‑Mä Pɔlʋ ‑kʋ 'mʋ ‑säädä 'nɩ, 'ylaa yi Etikusö 'mʋ zii. Ɩ ‑gbä nä, ɔ ‑bha 'tasɩɛ taana ‑bhutuklëa 'mnö, 'nɩ ɔ ‑bhlü ‑zɔɔ. Wa lä wa bhɛlɩɔ 'kʋ nä, ɔ kuu‑. 10'Nɩ Pɔlʋ yi 'tasɩɛ 'wlu ‑bha 'nɩ ɔ yi kwli. 'Nɩ ɔ yi 'kʋ kwlio 'nɩ ɔ yi nyëbluo 'kʋ 'bhlü. 'Nɩ ɔ yiwa soo, ɔ lä plɛɛ' wlɔnö'anyɩ ‑lä 'mnö ‑mä, ɔɔ' kätö‑zuzuu ‑kʋ ‑lɔɔ. 11'Nɩ Pɔlʋ yi bʋkʋ 'tasɩɛ 'wlu ‑gblää. 'Nɩ ɔ yi Kwlienyɔɔ' kplɔɔkplɔɔ‑lülülɩɩ dëë 'nɩ wa yi lü. Ɔ ‑kʋ yɩ bʋkʋ 'mʋsäädä ‑aaa 'nɩ, zeli ‑ze. Ɔ ‑bhɩä lä cilɩ nä, 'nɩ ɔ yi 'plö 'nɩ ɔ yi mʋ. 12‑Mä nyëbluo ‑yamä 'nɩ, wa ‑fɔɔ gbëë'. 'Nɩ nyɩkpaa 'fɩɩn pɔlöö yi ɩɩ' daa yi.

Pɔlʋ ‑bha Tlʋwasöduu' 'nɩ ɔ ‑mʋ Mileeduu'

13‑Nɩnɩ 'fɩɩn plöö‑ lä nä, ‑anyɩ, kä ‑a ‑plä 'mɩɩ 'nɩ ‑a plöö‑ ‑bhlɛ, 'nɩ ‑a yi Asɔsöduu' mʋ. ‑Mɔɔ ‑a 'gä bhɛ Pɔlʋ 'kʋ 'bhlüü. Kä Pɔlʋ cii‑ bhä nynä ɔ 'kä bhɩɩ' nämnö ‑yä ɔ 'kä‑anyɩ ‑mɔɔ ŋëë. 14Pɔlʋ ‑ŋënö‑anyɩ lä Asɔsöduu' nä, 'nɩ ‑a yio 'kʋ 'bhlü 'nɩ, ‑a yi Mitilɛnöduu' mʋ. 15‑A ‑ghlää jie 'klʋ ‑aaa, zeli 'kä ze 'nɩ ‑a yi Kioduu' ŋëë. Zeli ‑ze lä bʋkʋ nä, 'nɩ a yi Samɔsöduu' ŋëë. ‑Lɔɔ' zelii ‑ze lä bʋkʋ nä, 'nɩ ‑a yi Mileeduu' ŋëë. 16Pɔlʋ nä, kɔ ŋʋʋ‑ bhä nynä ɔ 'kä Efɛzɩduu nëkʋ 'tɔɔ, ‑mä, ɔɔ' ‑lä ‑lɔɔ 'nynigo. Ɔɔ' 'ylä bhɔɔ nynä ɔ 'kä bʋkʋ ‑lɔɔ Aziibhlɩ 'kʋ 'tänyɩ plüë. ‑Ɔnöza bhɛɛ? Kɔ 'susuë bhlä 'kʋ ‑yä, ɔ kä mii‑ nä, ɔ 'kä Patekɔtöylʋʋ 'kʋ Zolizalɛmʋduu ŋëë.#20.16 Zɛɛ 'sɩɩ Nʋnʋ 2.1.

Pɔlʋ zlaa Efɛzɩduu' 'cɔcɩɛɛ' 'tienyʋa ‑blɔ

17‑A ‑kʋ ‑lɔɔ Mileeduu' 'nɩ Pɔlʋ ‑fä Efɛzɩduu' 'cɔcɩɛɛ' nëkʋʋ' kʋnyʋa 'dö nynä wa ŋënöɔ ‑lɔɔ Mileeduu'. 18Wa ‑yi lä ‑lɔɔ nä, kɔ ‑sonʋwa, ɔ lä dä n 'nö bhlä Azii‑bhlɩnɛ 'mnö ‑bho slüa nä, cie yɩ tɛɛtɛɛylʋʋ 'kʋ ‑aaa, ‑yä ŋëë yɩ ‑zɩkä nä, sä n ‑klä lä n yëku anyɩa' ‑za nä, a ‑yi sɔɔ. 19Nn' ‑wʋ ‑täkpɔ. Kä n ‑nʋ Kwlienyɔɔ' lebhee. N ‑nʋnɩɛ 'mɩɔɔ 'mnö, 'nɩ n ‑nʋnɩɛ nyäkälɩɩ 'mnö. ‑Ɔnöza bhää? Kä 'Zufʋnyʋa ŋʋʋ‑ 'naa ‑za. 20Wälɩɩ' ‑lɩɩ ‑ɩ ‑ŋwa bhlä 'kʋ nynä a yibhë nä, ɩmɩ n cɩa‑anyɩ lä. N nö'anyɩ ‑wʋ wälɩklë 'yi ‑zizie. N cɩanö'anyɩ ‑jlëë', 'nɩ n cɩanö'anyɩ gbëë'. 21N laa‑ 'Zufʋnyʋä, 'nɩ n laa‑ 'Glɛkönyʋä. 'Nɩ n ‑sonʋwa nynä wa tlaa Laagɔ 'klʋ ‑yä, wa 'ŋʋ Kwlienyɔ Zozii waa' pɔlötɛtɛɛ 'kʋ.

22‑Pɛpɛɛ nä, Kplɔɔkplɔɔ‑wugɔɔ 'mʋʋ suu'u lä nynä n mʋ ylä Zolizalɛmʋduu' nä, kä n mʋ ylä ‑mɔɔ ‑mä, wälɩklëa ‑a 'gä'ä lä ‑mɔɔ ŋënö nä, n 'nöa ‑wʋ ‑yi. 23‑Mä sä n plöö lä 'dii 'mnö nä, sɔɔ Kplɔɔkplɔɔ‑wugɔɔ sonö'ö nynä ‑mä 'kwlɩ yi'i kpänyɩ bhɩä, 'nɩ n yi 'sɩɩ ‑jɩɩ nʋ. 24‑Amʋ 'naa ‑za nä, 'naa zëkpëa 'mää‑ nö'ö ‑wʋ gbʋ kää. 'Naa 'klëa n tää lä nä, amää‑ plöö‑ lä nynä ‑mä, n nʋ 'naa lebhee ‑aaa ‑yä n bhɩɛ ‑zɔɔ. Wälɩɩ 'fɩɩn Kwlienyɔ Zozii 'ylänö'ö lä nä, ɩ ‑ŋwa 'kʋ nynä ‑mä n nʋɩ. ‑Lɔɔ' lebhee 'mɛɛ‑ plöö‑ lä nynä ‑mä n ‑sää Kwlienyɔɔ ‑wawʋʋ' 'Nägädöö.

25‑Pɛpɛɛ' nä, anyɩmɔ ‑ɔnö duu' n ‑ghlää, 'nɩ n ‑sää lä Laagɔɔ' 'Leyiduu' 'Nägädöö nä, 'naa 'klʋnʋ, a 'nʋ ‑läyɩɔ bʋkʋ 'yi 'ni. 26'Ɩɩ ‑zä n sonö'anyɩ lä ‑zɩkä 'kpätaa nynä anyɩa nëëdëë' nyɩkpɔ kä mnɔɔ‑ 'nɩ ɔ kä yɩ ‑too, ‑ɛɛ ‑kä yɩɔ 'naa wälɩ ‑aa! 27‑Ɔnöza bhää? N nö'anyɩ ‑wʋ wälɩ 'yi ‑zizie. Sä Laagɔ ‑waa lä nynä ‑a nää nä, kä n panö'anyɩ sɔɔ wɩa. 28Nä, a wloo ‑kɛ a yëku 'kʋ aa! Ɩyä 'cɔcɩnyʋa Kplɔɔkplɔɔ‑wugɔɔ nyɩ'anyɩ lä 'kʋ wloodä nä, a wluwa ‑kä 'sɩɩ 'kʋ aa! Laagɔɔ 'cɔcɩɛ nä, kä Kwlienyɔ ‑jɛɛ ɔɔ' 'yɛkɛɛ' doluu sä ɛɛ' ‑za. Nä, ɩ ‑ŋwa 'kʋ nynä ‑mä a wlue 'kʋ 'nägäsä. 29N yi sɔɔ nynä ‑mä, n bha lä ‑mää nä, nyɩkpa yi'anyɩ nëëdë yi nynä vëvëmna 'nɩ wa yi 'cɔcɩnyʋa nyenyi nʋ. 30'Nɩ anyɩ 'titi, anyɩa' nëëdë nyɩkpa yi ‑mɔɔ ‑bha 'nɩ wa yi ‑kpläkplö wälɩ cɩa. 'Nɩ ɩ yi gbä 'nɩ wa yi 'kʋgënyʋä 'ni. 31Nä, a gblɩmä! A 'nä bë ‑lä nynä ɩ nʋ yɩ 'ylʋbɔ taa 'nɩ, 'naa 'tutulɔɔ, n gblɩmä lä anyɩa nëëdëë' nyɩkpɔ nyɩkpɔ ‑gägäzëlü ‑yä 'sabo.

32‑Pɛpɛɛ nä, kä n nyɩ'anyɩ ylä Laagɔ 'wlɩ, 'nɩ n tü'anyɩ lä ʋʋ' ‑wawʋʋ' wälɩɩ. Laagɔ nä, ʋmʋʋ‑ ‑kä lä 'päwä, 'nɩ ‑ʋ yi'anyɩ lä 'tɛtɩɩ 'ŋʋ. Ʋ yi gbä 'nɩ a ‑yä nyɩkpaa 'fɩɩn ‑wa plöö‑ lä ʋʋ' lʋä nä, a ‑yʋwa 'sɔ yi jaa 'kʋ känö. 33Nn' ‑wʋ nyɩkpɔɔ' monii ylää‑. Nn' ‑wʋ 'sɩɩ nyɩkpɔɔ' ‑sikaa ylää‑. 'Nɩ nn' ‑wʋ nyɩkpɔɔ' 'kotu ylää‑. 34Anyɩ 'titi, a ‑yi sɔɔ nynä ‑mä, 'naa wlɩɩnɩ kä n bhlii‑ 'kʋ 'nɩ, n ‑nʋ lebhe. Sɔɔ n ‑nʋ 'nɩ 'naa näänyʋa n ‑wluwa lä 'kʋ, 'nɩ n ‑wloo lä 'sɩɩ n yëku 'kʋ. 35‑Amʋ nä, kä n ‑nʋ saa 'fɩɩn ‑yä n 'kanyɩ pana nynä ɩ ‑ŋwa 'kʋ nynä nyɩkpɔ nä, 'sää ɔ lɔ nʋ ‑yä ɔ 'kä ŋäzönyʋa klää. Ɩ ‑ŋwa 'kʋ nynä a luë Kwlienyɔ Zozii' wälɩklënää' dä 'kʋ. Kɔ cii‑, ɔ lä nyɩkpɔɔ' lɔɔ ‑ɔ 'nyɛmʋ lä ɔ ‑lie nä, kɔ ni 'nää, 'nɩ ‑ɔ zi nyɩkpɔɔ' ‑lɔɔ wa 'nyɛmʋ lä nä 'kʋ.

36Pɔlʋ ‑bhɩä ylä cilɩ nä, kɔ paa‑ ‑kokoowli glu 'nɩ, ɔ ‑yʋwa 'sɔ yi bhibhie. 37‑Mä 'cɔcɩnyʋa tu bhä waa' ‑lefɩɩn, 'nɩ wa gbënöɔ bhä. 38Wälɩklëa Pɔlʋ cii‑ bhlä nynä ‑mä, wa 'nöɔ ‑läyɩɔ 'ni nä, a ‑kamänʋwa kpänyɩ yëkuu'. 'Nɩ wa yi Pɔlʋ 'nyigbë 'kʋ fä. ‑Mɔɔ 'mɩɩɛ yëku.

ទើបបានជ្រើសរើសហើយ៖

Nʋnʋgbɩɩ 20: god

គំនូសចំណាំ

ចែករំលែក

ចម្លង