Nʋnʋgbɩɩ 18

Pɔlʋ ‑mʋ Kolɛtɩduu'

(1 Kolɛ 1.1‑9; 2.1‑5; 2 Kolɛ 11.5‑12; 12.12‑13)

1‑Nɩnɩ 'fɩɩn plöö‑ ylä nä, kä Pɔlʋ ‑bha Atɛnöduu', 'nɩ ɔ yi Kolɛtɩduu' mʋ. 2Ɔ ‑ŋëë lä Kolɛtɩduu' nä, ɔ nii‑ ‑mɔɔ nyɩkpɔ ‑bhlo, ɔmɔ wa laa bhä Akilasö. Akilasö ‑glö bhä Pɔɔ‑lëkpëa 'mnö nyɩkpɔ. Ɔ ‑yä ɔ 'ŋnɔ Plisii 'sɔ bha lä Yitaliibhlɩ 'kʋ nä, ‑lɔɔ ‑lä bhä tee 'mʋ ‑gwlɛ. Sɩ ‑kʋ bhlä naa, 'loyo 'kädɔɔ wa laa lä Klodö nä, kɔ ‑soo 'Zufʋnyʋa 'fɩɩn nynä wa ‑bha Wlɔmʋ‑duu 'mnö. 'Nɩ Pɔlʋ yi Akilasö ‑yä ɔ 'ŋnɔ Plisii 'sɔ 'yi 'ni käämʋ. 3Ɔ ‑yʋwa 'sɔ cɩä‑ bhlä lebhe‑cëa ‑bhlo nä, kɔ plöö‑ 'nɩ ɔ ‑kʋ ‑lɔɔ wa daa, 'nɩ ɔ ‑yʋwa 'sɔ nʋ bhɛ lebhe. Wa ‑glö bhä 'taplüü‑bhlänyʋä. 4Sabaa‑gwlɛylɩɩ 'fɩɩn 'kʋ nä, kä Pɔlʋ mʋ bhä 'Zufʋnyʋaa' Laagɔ‑bhutuu 'mnö 'nɩ ɔ soo bhä 'Zufʋnyʋa ‑yä 'Glɛkönyʋa 'sɔ ‑yä wa 'kä Kwlienyɔɔ' wälɩɩ 'kʋ ŋoo.

5Silasö ‑yä Timotee 'sɔ bha lä Masedʋanö 'nɩ wa ‑yi lä nä, kä Pɔlʋ nii‑ bhɛ 'tänyɩ. 'Nɩ ɔ yi Laagɔwälɩɩ' cilɩɩ' lebhee' plä 'fɩɔ 'fɩɔ. Ɔ soo bhä 'Zufʋnyʋa nynä Puënyɔɔ‑ 'gä bhlä yi nä, 'nɩ wa laa‑ lä Klisöɔ nä, Zozii 'mɔɔ‑ plöɔ. 6‑Mä 'Zufʋnyʋa nä, waa' ŋoo bhɔɔ 'kwläkwlä, 'nɩ wa 'bhɩsɛ bhä Pɔlʋ. Ɩ ‑kä 'ŋnö nä, kɔ gbɔtɔ ɔɔ' 'kwetii.#18.6 Ɩ cio 'sɩɩ nynä wa gbɔtɔ ‑kokokpü yëkuu' ‑bhabhuu. Kɩ sä lä ‑zɔɔ nynä Pɔlʋ yä waa' wlɩ gbɔtɔ. Zɛɛ 'sɩɩ Nʋnʋ 13.51, Makö 6.11. Kɩ ‑kʋ ylä nynä ‑mä ɔ yä waa' wlɩ gbɔtɔ. Ɔ lä a kä yɩ ‑too nä, ‑ɛɛ yɩɔ 'naa gbʋʋ ‑mä anyɩ 'titi, anyɩa gbʋ yɩ. ‑A 'bhää ylä ‑zɩkä ‑lää 'kʋ nä, lowubhlɩɩ 'mnö n 'kä ylä Laagɔwälɩ cɩa ‑kää mʋ. 7Pɔlʋ ‑bha lä Laagɔ‑bhutuu 'mnö nä, nyɩkpɔ ‑bhlo, wa lɔɔ bhä Titusö Zutusö. Ɔ ŋʋ bhä kpänyɩ Laagɔ 'klʋkpää. Ɔɔ' 'gbëa 'tënö‑ bhä Laagɔ‑bhutuu nä, ‑mɔɔ Pɔlʋ ‑mʋ. 8'Nyɩkpɔɔ wa laa bhlä 'sɩɩ Klipusö nä, ɔmɔɔ‑ ‑kʋ bhlä Laagɔ‑bhutuu nëkʋ. Ɔ ‑yä ɔɔ' gbëë' nyɩkpaa 'fɩɩn, wa ŋoo‑ ‑Kwlienyɔɔ' wälɩɩ 'kʋ. 'Nɩ Kolɛtɩduu' nyɩkpaa ‑wa poo bhlä Pɔlʋ 'nyukwli nä, waa' bhutukpä ŋoo‑ 'sɩɩ Kwlienyɔɔ' wälɩɩ 'kʋ, 'nɩ wa ŋʋʋ‑ 'nyu 'wlu.

9'Tänyɩ ‑bhloo' 'sabo, Kwlienyɔ ‑ghlä Pɔlʋ 'yii, 'nɩ ɔ ‑sonöɔ, ɔ lä Pɔlʋ‑! ‑Naa ‑guu ‑lä! Ɩyä ‑naa bhlü lä 'sɩɩ nëkʋ ‑mä, ‑n ‑sää 'kɔɔkɔ 'naa yëkuu' 'dö! 10‑Ɔnöza bhää? 'Dunʋ 'mnö nä, nyɩkpaa ‑wa plöö‑ lä 'naa lʋä nä, wa ‑zu ‑mɔɔ. Nä, n ‑kʋ‑ʋ yëku. Nyɩkpɔ 'nö‑ö lä wlɩ 'kʋ fä nynä ɔ 'kä‑ä gbenyenyi nʋ. 'Sɔɔ Laagɔ sonöɔ. 11‑Lɔɔ Kolɛtɩduu' nä, Pɔlʋ cɩa‑ ‑lɔɔ Laagɔwälɩ ‑aaa, 'nɩ ɩ ‑nʋ 'ylʋbä ‑yä 'klë.

Wa ‑lä Pɔlʋ ‑gɔmnä Galiyɔɔ dëlüü

12'Tänyɩɛ 'mnö nyɩkpɔɔ wa laa lä Galiyɔɔ nä, ɔ plöö‑ bhlä Akayii‑bhlɩɛɛ' ‑gɔmnä nä, 'Zufʋnyʋa 'ŋʋʋ‑ 'kʋ, 'nɩ wa ‑lä Pɔlʋ zɔgblö. 'Nɩ wa yio klä, 'nɩ wa yio 'zuzu dëlü fä. 13Wlä nyɩkpɔnɔ nä, kɔ soo nyɩkpa nynä sä ‑anyɩa ‑Jlämaa 'ylä ‑wʋ lä nä, wa bʋbɔ sɔɔ Laagɔ. 14Wa cii‑ lä sɔɔ nä, Pɔlʋ 'kä bhɛ në ‑sä 'nɩ, Galiyɔɔ yi 'Zufʋnyʋa soo, ɔ lä kɩ kä bhä plöö‑ nynä ‑mä, nyɩkpɔnɔ ‑nyima ‑o. Kɔ ‑nʋ gbenyenyii' 'cenänä ‑o nä, n yi bhä 'tänyɩ 'kʋ 'bhlü 'nɩ, anyɩ 'Zufʋnyʋä, n yi'anyɩ bhä 'nyukwli poo! 15‑Mä 'ŋnö, ɩyä anyɩa ‑jlamaa' 'mnö wälɩklü, ɩmɩ a bhlää lä 'kʋ. Nä, ‑lɔɔ' 'titee, 'nn ‑lä ɛɛ' 'zuzulɛɛ' nʋlɩ mii. Anyɩ ‑bhlobhlo pää' wälɩ lä. 16‑Gɔmnä Galiyɔɔ cii‑ lä sɔɔ nä, kɔ ‑gbä 'nɩ wa yi tlobinaa 'kʋ ‑bha. 17Ɩ ‑kä 'ŋnö nä, wa ‑klä Laagɔ‑bhutuu' 'kämänyɔɔ Sɔsötɛnö. 'Nɩ ‑lɔɔ tlobina‑jlëa nëëdë wa yio bhütëlɩ 'kʋ cie. ‑Mä ‑gɔmnä Galiyɔɔ 'nʋwa ‑wʋ 'mänyɩ‑.

Pɔlö 'ylɩbhɔ‑ Atɩɔsöduu'

18‑Lɔɔ Kolɛtɩduu' nä, Pɔlʋ ‑gwlɛ ‑lɔɔ ‑jɛjɛsä 'fɩa, 'nɩ ɔ yi bhelia ‑blɔ zlaa. Ɔ ‑plä 'mɩɩ, ɔ ‑yä Akilasö ‑yä ɔ 'ŋnɔ Plisii 'sɔ, 'nɩ wa yi Siliibhlɩ 'kʋʋ ‑blɔ plää. ‑Mä wa ‑ŋëë lä Sankleduu' nä, Pɔlʋ ŋʋʋ‑ bhä 'bë Laagɔ dëlü nä, kɔ ‑kpään 'fɩa 'wlu.#18.18 Pɔlʋ ŋʋʋ‑ bhä 'tänyɩ nä, ‑lɔɔ' tänyɩyɩ 'mnö nä, kɔ ŋʋʋ‑ Laagɔ dëlü nynä ‑mä ɔɔ' ‑lä kpään ‑aaa 'nɩ ‑lɔɔ' 'tanyɩɛ yi glää. Zɛɛ 'sɩɩ Nʋnʋ 21.24; 'Nɔblʋ 6.5‑18.

19Wa ‑ŋëë ylä Efɛzɩduu' nä, kä Pɔlʋ ‑të ‑lɔɔ Akilasö ‑yä Plisii 'sɔ, 'nɩ ɔ yi ‑mɔɔ' Laagɔ‑bhutuu' plä. 'Nɩ ‑mɔɔ' 'Zufʋnyʋa, ɔ ‑yʋwa 'sɔ yi Laagɔwälɩɩ' cilɩ 'kʋ cie. 20'Nɩ wa yio soo, wlä bheeje, ‑n kʋ ‑anyɩ ‑lätee yëku ylɩɩ zioo' ‑za! 21‑Mä Pɔlʋ wʋ ŋoo‑. Ɔ ‑sonʋwa, ɔ lä Laagɔ kä ŋoo‑ nä, n yi'anyɩ bʋkʋ 'yi 'ni kää yi. Pɔlʋ ‑bha ylä Efɛzɩduu' nä, kɔ ‑plä 'mɩɩ 22'nɩ ɔ yi Sezaleeduu' yi. Ɔ ‑bha lä ‑lɔɔ nä, ɔ ‑mʋ 'fɩa Zolizalɛmʋduu' 'nɩ ɔ ‑yi ‑mɔɔ' 'cɔcɩnyʋa bhään. 'Nɩ ɔ yi Atɩɔsöduu' mʋ.

23Ɔ ‑sä ‑lɔɔ Atɩɔsöduu' ylɩɩ' zio 'nɩ ɔ yi 'ylɩbhɔ. Ɔ ‑ghlää yɩ Galatɩbhlɩ 'kʋ ‑yä Fliziibhlɩ 'kʋ 'nɩ ɔ ŋʋʋ‑ ‑mɔɔ' 'cɔcɩnyʋa 'fɩɩn 'tɛtɩɩ.

Apolɔsö ‑mʋ Efɛzɩduu' ‑yä Kolɛtɩduu'

24Nä, 'Zufʋyu ‑bhlo, wa lɔ bhä Apolɔsʋ 'nɩ, ɔ ‑yi ‑mɔɔ Efɛzɩduu'. Apolɔsʋnɔ nä, ɔ ‑glö bhä Alɛzadlii‑duyu. Ɔ plöö‑ bhä 'sɩɩ nyɩkpɔɔ' lɔɔ ‑ɔ ‑yi bhlä cisä nä. 'Nɩ ɔ ‑yi bhä 'sɩɩ 'nägäsä Laagɔ‑bɔɔgʋʋ' 'mnö wälɩɩ. 25Wa cɩɔ‑ bhä Kwlienyɔɔ' 'kʋgëlɩɩ' yëkuu' wälɩ, 'nɩ ɔ ‑su bhä 'sɩɩ 'kpänyɩ 'kʋ. Ɔ ci bhä Laagɔwälɩ, 'nɩ ɔ cɩa bhä 'sää 'titi 'nägäsä Zozii' 'Nägädöö. ‑Mä sä Zään Badisö ŋʋ bhlä nyɩkpa 'nyu 'wlu nä, sɔɔ' ‑bhlo 'coo ɔ ‑yi bhä. 26'Nɩ ‑mɔɔ' 'Zufʋnyʋaa' Laagɔ‑bhutuu 'mnöö' wälɩɩ ɔ ci bhlä nä, ɔ ‑känɩ bhä pɔlötɛtɛ 'kʋ. Akilasö ‑yä ɔ 'ŋnɔ Plisii 'sɔ, wa ‑puo lä 'nyukwli nä, kwa ‑gbä 'nɩ, ɔ ‑yiwa yëku kʋ ‑kää. 'Nɩ wa yio Laagɔɔ' 'kʋgëlɩɩ' blɔɔ' bhlülɩɩ 'mʋ ‑säsä 'nägäsä. 27Nä, 'tänyɩ ‑kʋ ‑lɔɔ 'nɩ Apolɔsö ylää‑ nynä ɔ 'kä Akayii‑lëkpëa 'mnö mʋ. 'Nɩ 'cɔcɩɩ' bhelia ŋʋɔ‑ 'tɛtɩɩ' nynä ɔ mʋ ‑mɔɔ. Wa ‑jɩjlä 'sɩɩ 'bɔɔgʋ 'nɩ wa nyɩɔnyʋ nynä ɔ fʋ ‑mɔɔ Akayii' 'cɔcɩnyʋa. Wa ‑sonʋwa, wlä Apolɔsö nä, wa wluo 'kʋ 'nägäsä. Ɔ ‑ŋëë lä ‑mɔɔ nä, nyɩkpaa 'fɩɩn Laagɔ ‑gbä 'nɩ ‑wa yi lä pɔlötɛtɛɛ' ‑blɔɔ 'kʋ nä, wa nii‑ 'yi nynä ‑mä ɩ ‑ŋwa bhä 'zaazɩ 'kʋ nynä Apolɔsö yi bhä ‑mɔɔ cɩa ‑kää. 28‑Maa ciciwälɩɩ 'mnö nä, kä Apolɔsʋ sɩä bhä 'Zufʋnyʋa. Ɔ bhlü bhä Laagɔ‑bɔɔgʋʋ 'mnö wälɩɩ 'kʋ 'nɩ, ɔ pana bhä nynä Puënyɔɔ ‑ɔ 'gä bhlä yi 'nɩ wa laa lä Klisöɔ nä, Zozii' 'mɔɔ‑ plöɔ.

ទើបបានជ្រើសរើសហើយ៖

Nʋnʋgbɩɩ 18: god

គំនូសចំណាំ

ចែករំលែក

ចម្លង