Деяния 12
12
Амью̄ткатаӷалъық
1Нани тама̄ни пилъыӷми Умӣлгым Иродым амью̄ткысягуткӣ иляңи ухпықат. 2Иоанным аңлыгутаңа Иаков туқутыстыка̄ сявихпахкун. 3Умӣлгым Иродым лӣгиксямигу Иудеяның ыфқуҳтилъыни таўатын пилъыӷмикун, қылӷутка̄ Петр тугусқылъюку. (Таўатын пика̄фтуқ Нықынӷаҳқыңъулюки Закваскалӣмаңилңуӷмың Нықыкшаңлъямың.) 4Петр тугуятху, Умӣлгым Иродым қылӷутка̄ қуля аӷвинлык сӣпнықлъюкуягнун пилъюўаҳтынун кылыңакысқылъюку стамакаҳтӣта кипулъхутақлъюки. Юхтуқами нанқихсюка̄ киңуңаның Пасхам.
5Ынка̄м Петр анусимиңлъяӷвигмытыстыка̄. Иўырңа ухпықат юӷа̄ткыҳлъяка̄т Кияӷныӷмун.
Петырым Анусимиңлъяӷвигмың А̄нылъҳа
6Петр қава̄лӷӣ ма̄лӷук кылыңакистык акулыхкыни, пытугңалӷӣлъю малӷугныҳтыхун қӣпшаӷутытхун. Алъямың анусимиңлъяӷвигым амига кылыңакистылык. Хўа̄ аҳтыкан Иродым тагитыснақңукаңа югнун нанқихтысқылъюку. 7Атанӷым яқулга алӣӷаҳтыкақ, ынка̄м ниӷук кӯкхуткақ анусимиңлъяӷвигым илюңанун. Яқулгым Петр тӯйңакун аӷулялъюку, таҳтуҳлъюку пика̄: «Ыгмӣнақ макытын!» Таўаниңинақ қӣпшаӷутыт ифкақӯткат ӣханың. 8Та̄хкын яқулгым пика̄: «Пилюгуглютын ка̄мгыхкын а̄тикык». Петр писқылъҳатун пикақ. Яқулгым пиля̄тақа̄: «Қа̄слъихкын а̄лъюкык малихтиңа». 9Ынка̄м Петырым малихтыка̄. Ухпықумаңитңўа̄қақсяқаңа а̄нутылъыни, йыӷлыги сюмыҳтаӷақақ ысҳаӷўа̄ӷнилюни. 10Сивулӣтлъю, тӯңлиҳӣлъю кылыңакистыт наӷуҳлъюки ка̄ткак сявикынӷа̄ӷмун амигмун. Амик лъңаның қылъпыӷьян, а̄нлютык иглыҳтыӷңа̄гмык тумытхун яқулык авӣтқаҳтыкақ.
11Та̄хкын Петырым лӣгикңўа̄қа̄ сяматни ынка̄м пикақ: «Та̄ўа ипаңуфтуқ Атанӷым каяхсима̄ яқулыни иқитутысқылъюңа Иродымың, Иудеитлъю сялъыҳқӣтның».
12Лӣгиклъюку сяматни Мариянкунун агляқақ, Иоанн Маркым на̄ңанун. Таўани юлӷун қырңуӷулъюни юӷа̄тыҳлъягулӷӣ қырңаӷми. 13Петр ыслъяклъиҳқун амихкун тыңлюхтуӷьян аӷнаӷа̄м қыпҳаҳтым, Родам қылъпыӷусяҳтуқа̄. 14Лӣсюқсямигу Петырым мыңа, қуяҳлъягым аңталяңаның қылъпыӷутыхпына̄н, йыӷлыги илютмун ӣтқаҳлъюни а̄пқа̄ қакма Петр мануӷамынъилюку. 15Иўырңа пика̄т: «Тымңи пӣтын!» Иўырңа сягиқуткӣ ипаңунилюку. Та̄хкын пика̄т: «Яқулъкынӷитагухўа».
16Қакма Петр тыңлюхтӯмаңинақақ. Қылъпыӷусяқмыхтыху лъңаңуфтуқ ынка̄м сяӷӣӷаюкат. 17Петырым апақукӣ қалъыгнанӣсқылъюки, ынка̄м уңипамсюгутңўа̄қӣ Атанӷым а̄нутылъҳаның анусимиңлъяӷвигмың. Пикӣлъю: «А̄пқаӷнакыфсиңа Иаковымунлъю, ухпықа̄лгутымнъунлъю таўатын пиманилюңа». Та̄хкын а̄нлюни натмун пикақ.
18Аҳтаӷаӷақа̄лъю кылыңакистыт авӣлңақа̄т Петр, алиңруӷумаӷмың кукшиқыхкат сяматаңа. 19Иродым иваҳтысимаяқаңа иўырңа на̄лъкумаңитка̄т. Ынка̄м кылыңакистыт а̄пқуӷа̄ҳтыслъюки налъюксятху туқуқуҳтыстыкӣ.
Та̄м киңуңаның Ирод Иудеямың Кесариялъюни тама̄нтыӷра̄кақ.
Иродым Туқулъҳа
20Умӣлгым Иродым угумиягутыҳлъягукаңи Тирыӷмӣтлъю, Сидоныӷмӣтлъю иўырңа тама̄кумӣт югыт каяхтыкӣт Властымун акузитунъақаҳтысқылъютың Иродымун. Власта иглыӷутистыкыхкаңа Умӣлгым Иродым мыңтыӷаҳлъяган. Ка̄лъютың а̄птыка̄т Власта акузитутаҳтысқылъютың умӣлыгмун. Таўатын пика̄лӷӣт нықыңнаниӷнаюкамың Иродым нунаңаның.
21Таўани аӷныӷми пивихкамыхни Иродым умӣлгусит а̄ткани а̄тқуӷлюки ақумлюни ақумутаҳлъягыгмикун акузикақ. 22Та̄қсян акузиныӷмың югыт акилӷӯкат: «Югунӷитуқ акузилӷӣ, налиқа̄т кияӷныӷыт!» 23Таўаниңинақ Атанӷым яқулган қинуюхтыстыҳлъяка̄ Ирод, қаюҳлъяк тугуклъиқаңа қӯлвалъық Кияӷныӷым пӣңа. Уңуваӷми киңухта̄ҳлъяглюни туқукақ.
24Та̄ўа Кияӷныӷым уңипӣ миңисимаңинақат ынка̄м ўата ю̄к ухпыҳтӯткақ.
25Та̄кук Варнавалъю, Савлалъю апыӷӣӷьямыхтыху қыпҳақаҳтынь Иерусалимыми, Антиохиямун утыӷниқак кылъқылъюку Иоанн Марка.
ទើបបានជ្រើសរើសហើយ៖
Деяния 12: ess2
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2022, Wycliffe Bible Translators, Inc. All rights reserved.
