Mark 9
9
1Pinagatupan Jesus woḵ ḵanana, “Ibagaḵ ḵan diḵayu ḵatuttuwaan, awad da udum ḵan diḵayu we adidapun yan matoy inggana'ḵ ilanda ḵabooḻan Apudyus si ampangatana.”
Sa Nambaliwan Ni Ḵatollongan Jesus
(Mat. 17:1-13; Luk. 9:28-36)
2Naḻaḵpus ḵad onom aḻgaw, inayagan Jesus da Peter, James ya aḵ John ta anagadadae mismu atte antaḵnange beleg. Sa angitotollonganda ḵan Jesus, naobos ḵatollongana, 3ya sumilisiling silupna ḵad amod de itaḵnae naippun miyisuwana'd luta.
4Pune sadi, baag-en nampaila da Moses ḵan Profeta Elijah ḵan didae maḵaug-uggud ḵan Jesus. 5Ḵanan Peter, “Mistulu, atopay baḻun ni annaan taḵu sina. Nu iyunudnu, angwa ḵani'ḵ tuḻu we sigay ta ḵuwam osa, ḵuwan Moses osa ya ḵuwan Profeta Elijah osa.” 6Ippun igammuna'tta inugudna te ummamdan ḵimutda.
7Pune sadi nannaḵunaḵ libuu ḵan dida pun dingngoḻda gingae naḻpu'tte libuu we ḵanana, “Annaya Abengḵu we ay-ayatoḵ. Dongngonyu da ibagana.” 8Baag-en nallangḻangada ḵad, ippun udum aḵ innilada yaḵon abus aḵ Jesus.
9Nan-osogda ḵad, ḵanan Jesus we namilin ḵan dida, “Adiyu ugudon atta ngaiman da innilayu inggana'ḵ umuliyaḵe Abeng Di Tagu.”
10Tinuttuwan da disipulu imbagana woḵ adidapun inug-uggud atta ngaiman. Yaḵon nan-asiimusda nu ngai piona ḵanan atte inugudnae umuli. 11Pun ḵananda ḵan Jesus, “Ngaipan da mimistulun ni lintog ibagae ḵasapuḻane umuna'ḵ Profeta Elijah nu sa Kristu?”#9:11 Malachi 4:5.
12Ḵanan Jesus, “Sa tuttududa tuttuwae umuna'ḵ Profeta Elijah umali ta umoyna iyuḻnus da losan. Awad os si nigili ye Ugud Apudyus mipanggob ḵan saḵone Abeng Di Tagu. Sa imbagana, ḵasapuḻane ampaḵaḻamaḵ ya am-amsewonda bos saḵon.#9:12 Da Psalm 22:1-18; 69:8, 9, 11, 20, 21; 118:22 ya Isaiah 53:3-12. 13Yaḵon ibagaḵ ḵan diḵayu we nagangput ummali'ḵ Profeta Elijah pun ḵingwan da tagu da ngaimane pionda ḵan siya te sadi nigili'tte mipanggob ḵan siya.”#9:13 Matthew 11:13-14; 17:10-13; Mark 6:14-29 ya 11:32.
Sa Namaḻyawan Jesus Atte Aḻan
(Mat. 17:14-21; Luk. 9:37-43)
14Nan-osog ḵad da Jesus, Peter, James ya aḵ John atte belege ummoy atta udume disipulu we tinenanda, innilada da amoamode tagu we nangaligummu ḵan dida. Inninggaw os da mimistulun ni lintoge naḵasossongbat ḵan dida. 15Innilan ḵad da amoamode tagu'ḵ Jesus, amod de nantataagda woḵ daguse nandoḵdoḵasdae ummoy nampakumusta ḵan siya. 16Ḵanan Jesus ḵan dida, “Ngai da nansosongbatanyu ḵan dida?”
17Ḵanan ni osa ḵan dida, “Mistulu, indatongḵu ḵan siḵa abengḵu we naaḻanan. Siya gapun ni naumoḻana. 18Nu dumatong aḻan, pittuwaḵona ya antataḻbutab sungadna ḵan ngumalitod babana ḵad angunduḻ os. Nandagdaguwaḵ atta disipulum ta paḻyawonda aḻan ḵan siya yaḵon adidapun lamog.”
19Ḵanan Jesus, “Diḵayu we ippun pammatiyu si sanae lunap! Ḵamaan ni inggawaḵ ḵan diḵayu ya asi ḵayu amati? Ḵamaan ni ampatinggaan ni anusḵu ḵan diḵayu?” Pun ḵanana'tte aman ni abeng, “Idatongnu abeng ḵan saḵon.”
20Pun inniyoyna abeng ḵan siya. Innilan ḵad ay ni aḻan aḵ Jesus, daguse nabilaw abeng ya pinittuwaḵna woḵ nangayasḵasona pun antataḻbutab sungadna. 21Pun ḵanan Jesus we nangimus atte amana, “Ḵamaan ni nangisaḻdanae ḵaḵna?”
Ḵanan ni amana, “Insaḻadna si ḵaban-ogna. 22Dam-ona ituppang si apuy ya sa danum ta gongatona. Madaguḵa ḵappos ta badangam diḵani nu lamognu.”
23Ḵanan Jesus, “Ngai ḵad ain ḵanam nu lamogḵu? Maḵwa da ngaiman si tagu we awad de pammatina ḵan Apudyus!”
24Pun daguse indangsoḻ ni amanae gumminga woḵ ḵanana, “Amatiyaḵ, yaḵon badanganaḵ ḵappos te potog.”
25Innilan ḵad Jesus we aduadu da tagu we sintotoddaḵe ummoy ḵan siya, sinuppaḵana aḻan woḵ ḵananae namaḻyaw, “Siḵae aḻane nangwa si natuḻongan ḵan naumoḻan ni annae abeng, lumawaḵa ya adiḵa ogon lumnoḵ ḵan siya.” 26Naabus ḵade nantuḵituḵingona ḵan binilawna'ḵ amod, lummawa. Ḵad isun di ladag abeng. Pun sa ḵanan da adu we tagu, natoy. 27Pun innonnan Jesus imana woḵ pinasiḵadna.
28Unipun nillumnoḵ da Jesus ya da disipuluna si boḻoye nandawosanda. Ummabusda ḵad, ḵananda ḵan Jesus, “Ngaipa ḵani adi maḵapaḻyaw atte aḻan si abeng?”
29Ḵanan Jesus, “Sa aḻane ḵatti, aditaḵupun maḵapaḻyaw nu adi taḵu alluwaḻu.”
Sa Nangipigwaan Jesus Nangibag-an Si Matoyana Ḵan Umuliyana
(Mat. 17:22-23; Luk. 9:44-45)
30Pun tinenan da Jesus sadi ye ili woḵ nangoyda'tte probinsiya'd Galilee. Adimpun Jesus pione igammuwon da tagu igawda, 31te nantuttudu'tta disipuluna. Ḵanana, “Saḵone Abeng Di Tagu, mipuḻangaḵ atta ḵabusuḻḵu ya gongatonda saḵon yaḵon umuliyaḵ atte miḵaḵlu we aḻgaw.” 32Yaḵon adidapun naawatan piona ḵanan ḵad adidapun inimus ḵan siya te naḵimtanda.
Sa Ḵangatuwan
(Mat. 18:1-5; Luk. 9:46-48)
33Dummatongda ḵad ad Capernaum, nillumnoḵda'tte boḻoy woḵ inimus Jesus atta disipuluna ḵanane, “Ngai nansosongbatanyu'tte daḻan?” 34Yaḵon gummiginnoḵda te siya nansosongbatanda nu ngai ḵan dida ḵangatuwan. 35Pun tummuḵdu'ḵ Jesus woḵ inayagana da nasawaḻan aḵ duwae disipuluna. Ḵanana ḵan dida, “Sa pionae ambalin aḵ ḵangatuwan, ḵasapuḻane ambalin aḵ napakumbaba ya sammilu'tta losane buḻunna.” 36Pun innaḻana abeng woḵ pinasiḵadna si gaggawada. Binaḵwaḻna woḵ ḵanana ḵan dida, 37“Ngaimane ammangili'tte isuna annae abeng gapu'tte pammatina ḵan saḵon, saḵon minangilina. Ḵad sa ammangili ḵan saḵon, minangilina bos nangibuun ḵan saḵon.”
Da Adipun Sumullagi
(Luk. 9:49-50)
38Ḵanan John ḵan Jesus, “Mistulu, innilani tagu we pinaḻyawna da aḻane inusarna ngadannu. Pun pinadasni igimau te daḵampun aḵ buḻun taḵu.”
39Ḵanan Jesus, “Adiyu igimau te sa angwa'tta nakaskasdaaw gapu si angusarana'tte ngadanḵu, adipun maḵwae an-ugud aḵ lawweng atte mipanggob ḵan saḵon. 40Te ngaimane adipun sumullagi ḵan ditaḵu, buḻun taḵu. 41Ibagaḵ ḵan diḵayu ḵatuttuwaan, ngaimane amainum ḵan diḵayu gapu ta diḵayu da disipulun Kristu, aaddi ye magungunaan ḵan Apudyus.”
Sa Gapun Ni Maḵabasuḻan
(Mat. 18:6-9; Luk. 17:1-2)
42Pinagatupan Jesus woḵ ḵanana, “Ngaimane anulisug ta maḵabasuḻ taḵon ay osa'tta annae ḵamḵamae tagu we amati ḵan saḵon, un-unnoyna nu mitaḵod daḵoḻe binatu we gilingan si bagangna ya miballu'tte baybay. 43-44Nu sa imam gapun ni maḵabasuḻam, puttam! Te unnoyna paḵing imame umoy si biyag aḵ inggana nu sa wadawad duwae imam ya miballuḵa'd infiernu si apuye adipun paat masobsoban.#9:43-44 Da verse 44 ḵan 46, daḵampun aḵ nidoga'tta adu we dadaane ḵasuḻatane nigili si iblun Mark atte Greek. Yaḵon da udume dadaane ḵasuḻatan si iblun Mark naippun da verse 44 ḵan 46 ḵad sa nigili'tta verse 44 ḵan 46 isuna verse 48. 45-46Ḵad nu sa suḵim gapun ni maḵabasuḻam, puttam os! Te unnoyna paḵing suḵime umoy si biyag aḵ inggana nu sa wadawad duwae suḵim ya miballuḵa'd infiernu. 47Ḵad nu sa atam gapun ni maḵabasuḻam, uḵitom. Te unnoyna paḵing atame midoga si ampangatan Apudyus nu sa wadawad duwae atam ya miballuḵa'd infiernu. 48Te ad infiernu, adipun paat matoy da ogose angan atta long-ag da tagu ya sa apuye adipun paat masobsoban.#9:48 Isaiah 66:24.
49“Da losane tagu, ḵasapuḻane ampaḵaḻamda ta bumaḻu ugalida, isuna maḵane ḵasapuḻane maasinan ta pumiya. 50Ambaḻu asin yaḵon nu ippun ogon tamtamna, ngai inonae mipauli tamtamna ḵasin? Ḵad sosomḵonyu mipanggob atte usar ni asin ya an-asibadang ḵayu ta allin-awa ambubuḻunanyu.”
ទើបបានជ្រើសរើសហើយ៖
Mark 9: kml
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2019 Translators Association of the Philippines (TAP), All rights reserved.