Mark 10
10
Sa Mipanggob Atte Idang
(Mat. 19:1-12; Luk. 16:18)
1Pun tinenan da Jesus ad Capernaum woḵ ummoyda'tte probinsiya'd Judea woḵ dummoḻmangda'tte tawwang Jordan. Pune sadi naaligummu bos da amode tagu ḵan siya woḵ ḵasin os nantuttudu ḵan dida te siya ugalina.
2Inninggaw os da Pharisee ye ummoy namadas ḵan siya woḵ ḵananda, “Iyunud ḵamman ni lintog taḵu we idangan ni laḻaḵi asawana?”
3Ḵanan Jesus, “Ngai ḵad ain imbilin Moses ḵan diḵayu'tte awe?”
4Ḵananda, “Iyyunud Moses we angwa laḻaḵi'ḵ ḵasuḻatan aḵ amanoḵnoḵe idangana ya paḻyawona.”#10:4 Deuteronomy 24:1-4.
5Ḵanan Jesus, “Iyyunud Moses we idanganyu da asawayu te tummungitong da somsomoḵyu. 6Yaḵon sa nangwaan Apudyus atte lubung, ḵingwana da tagu'ḵ laḻaḵi ḵan bubai.#10:6 Genesis 1:27; 5:2. 7‘Sadi gapunae tenan ni laḻaḵi da amana ḵan inana ḵad nitipun atte asawana, 8ḵad didae duwa nambalinda'ḵ ossaane long-ag.’#10:7-8 Genesis 2:24. Daḵandapun ogon aḵ duwa yaḵon nan-ossaanda. 9Pun da nantipunon Apudyus, adin oḵyan da tagu dida ansinaon.” 10Nipauli ḵad da Jesus si boḻoyda, inimus da disipuluna nu ngai pion da inugudna ḵanan. 11Ḵanan Jesus, “Ngaimane laḻaḵi ye idangana asawana ya ḵasin angasawa, maḵabasuḻ si dagdagas. 12Ngaiman ose bubai ye idangana asawana ya ḵasin angasawa, maḵabasuḻ si dagdagas.”
Sa Namindisyunan Jesus Atta Abeng
(Mat. 19:13-15; Luk. 18:15-17)
13Sin-aḻgawan ḵad ummoy da udume tagu nan-iyoy atta abengda ḵan Jesus ta ipatayna imana ya bindisyunana dida. Yaḵon sinuppaḵan da disipuluna dida. 14Yaḵon summanga'ḵ Jesus woḵ ḵanana, “Iyunudyu we umali da abeng ḵan saḵon. Adiyu paadiyon dida te da tagu we isuda da midoga'tte ampangatan Apudyus. 15Ibagaḵ ḵan diḵayu ḵatuttuwaan, ngaimane adina awaton ampangatan Apudyus we isun ni abeng, adipun paat midoga.” 16Pun binaḵwaḻna da abeng woḵ impatayna imana woḵ binindisyunana dida.
Sa Baḵnang
(Mat. 19:16-30; Luk. 18:18-30)
17Alliblibbat ḵad da Jesus, inninggaw laḻaḵi ye nanoddaḵ woḵ ummoy si inggawan Jesus. Ḵananae nanalluḵu ḵan siya, “Ambaḻu we Mistulu, ngai ambaḻu we ḵooḵ ta ittanaḵ ḵan Apudyus atte biyag aḵ inggana?”
18Ḵanan Jesus ḵan siya, “Ngaipam saḵon awagan aḵ ambaḻu? Naippun udum aḵ ambaḻu yaḵon abus aḵ Apudyus. 19Igammum da bilin Apudyus we ḵanana, ‘Adiḵa pumatoy, adiḵa maḵadagdagas, adiḵa an-aḵaw, adim taḵdoḻan da tinutuli, adiḵa ankuluk ya dayawom da amam ḵan inam.’ ”#10:19 Exodus 20:12-16; Deuteronomy 5:16-20.
20Ḵanana ḵan siya, “Inggan ni ḵaban-ogḵu, tinuttuwaḵ losan da sadi ye bilin.”
21Naayatan aḵ Jesus we nangitotollong ḵan siya woḵ ḵanana, “Os-ossaan nangkurangam. Inḵa ingina da ḵuḵuwam ya ittom bayadda'tta ḵapus woḵ awad de binaḵnangnu we indulin Apudyus ad langit. Ḵad umaliḵa, tun-udonaḵ.” 22Dingngoḻna ḵad imbagan Jesus, nadismaya woḵ ummoyone andadauy te baḵnabaḵnang.
23Pun nallangḻanga'ḵ Jesus atta disipuluna woḵ ḵanana, “Anḵamnut midog-an da babaḵnang si ampangatan Apudyus.” 24Natataag da disipuluna'tte dingngoḻda imbagan Jesus yaḵon iḵasiḵasinna ḵanane, “Abengḵu, atomagay ḵamnut ni midog-an da tagu si ampangatan Apudyus! 25Naḻaslasu lumnoḵan ni camel atte abut ni tanud nu sa midog-an ni baḵnang si ampangatan Apudyus.”
26Pun amo natataag da disipuluna woḵ ḵananda, “Pun ngai da maḵwae matagu nu?”
27Intotollong Jesus dida woḵ ḵanana, “Naippun paat tagu'ḵ ḵallamog. Yaḵon ḵan Apudyus, lamogna ḵoon da ngaiman.”
28Ḵanan Peter, “Ngai inonni nu? Te tinenanni da losan ta ambalin ḵani'ḵ disipulum.”
29Ḵanan Jesus, “Ibagaḵ ḵan diḵayu ḵatuttuwaan, ngaimane tenana boḻoyna, susunudna, amana, inana, da abengna ya da lutana gapu'tte angunudana ḵan saḵon ya sa angibagabagaana'tte Ambaḻu we Damag, 30awatona si matattaguwana anginsinggasute ḵaadu nu da tinenana. Maatod da naadu we boḻoy, susunud, ina, abeng ya luta. Ḵad ampaḵaḻam os yaḵon sa umali ye timpu, maatod ḵan siya biyag aḵ inggana. 31Sinsadi da adu we tagu we nangatu, mipababada ya da nababae tagu, mipangatuda si umali ye aḻgaw.”
Sa Piḵlun Jesus We Nangibaga Si Matoyana Ḵan Umuliyana
(Mat. 20:17-19; Luk. 18:31-34)
32Anagada ḵad da Jesus ad Jerusalem, ummun-una'ḵ Jesus. Natataag da disipuluna ya naḵimtan da nibuḻun ḵan siya. Pun imbattawan Jesus da nasawaḻan aḵ duwae disipuluna woḵ insaḻadnae angibaga'tta maḵwa ḵan siya. 33Ḵanana, “Dongngonyu, annae anagada taḵu'd Jerusalem. Ḵad nu dumatong taḵu, saḵone Abeng Di Tagu mipuḻangaḵ atta papangat da papadi ya da mimistulun ni lintog. Ḵad ḵoddonganda saḵon aḵ matoy ya ipuḻangda saḵon atta Gentil, 34ta ang-angyagonaḵ, tuptuppaanaḵ ḵan ap-aplitonaḵ ya asidaot saḵon gongaton. Yaḵon sa miḵaḵlu we aḻgaw, umuliyaḵ.”
Sa Ḵindaw Da James Ḵan John
(Mat. 20:20-28)
35Pun ummoy da John ḵan James we da abeng Zebedee ḵan Jesus woḵ ḵananda, “Mistulu, pionni ye ḵoom da ḵodawonni ḵan siḵa.”
36Ḵanan Jesus, “On, ngai ḵad ain pionyu we ḵooḵ ḵan diḵayu?”
37Ḵananda ḵan siya, “Nu madaydayawḵa'tte ampangatam, patuḵduwom ḵappos osa ḵan diḵani si madawinannu ya sa osa'tte madawigim.”
38Ḵanan Jesus, “Ippun igammuyu'tte ḵodawonyu! Maanusanyu ḵammane ampaḵaḻame isun ni ampaḵaḻamaḵ? Lamogyu ḵamman os matuḻodane matoye isun ni anḵaḵatoyḵu?”
39Ḵananda, “On! Lamogni.”
Ḵanan Jesus ḵan dida, “On, isun ni ampaḵaḻamaḵ ampaḵaḻamanyu. Isuna bos anḵaḵatoyḵu anḵaḵatoyyu. 40Yaḵon naippun ḵaḻabbongaḵe ampili nu ngai da tumuḵdu si madawinanḵu ḵan madawigiḵ te da annae saad insaganan Amaḵ atta nagangpute pinilina.”
41Dingngoḻ ḵad da simpuḻu we buḻunda, summangada ḵan James ya aḵ John. 42Pun inayagan Jesus da disipuluna woḵ ḵanana, “Igammuyu we da nibelang aḵ ampangat atta Gentil, ipatutda da pionda'tta ipangatanda. Taḵon ay da nangangatu we tagu, daḵoḻ ḵaḻabbongandae angipangat atta taguda. 43Yaḵon daḵampun oḵyan aḵ ḵaḵnat inonyu we angwa te ngaimane pionae nangatu ḵan diḵayu, ḵasapuḻane anserbi'tta buḻunnae isun di musassu. 44Ḵad nu ngai ḵan diḵayu pionae ambalin aḵ ḵangatuwan, ḵasapuḻane anserbi'tta losane isun di musassu. 45Siya unudonyu saḵone Abeng Di Tagu te daḵampun aḵ ummaliyaḵ ta anserbi da tagu ḵan saḵon. Yaḵon ummaliyaḵ ta anserbiyaḵ ḵan dida ya ittoḵ biyagḵu ta masubut da adu we tagu'tte madusaanda'tta basuḻda.”
Aḵ Bartimaeus We Naḵuḻap
(Mat. 20:29-34; Luk. 18:35-43)
46Pun dummatong aḵ Jesus ya da disipuluna'd Jericho. Ḵesanda ḵad, nibuḻun da amode tagu ḵan dida. Inggaw aḵ Bartimaeus we naḵuḻape abeng Timaeus we tummutuḵdu si igid ni ḵaḻsae antapatapaya. 47Dingngoḻna ḵade awad aḵ Jesus we iNazareth, napapḵaaw woḵ ḵanana, “Jesus we ganaḵ Ari David,#10:47 Ganaḵ David - awag ni uuwayondae Messiah, dam-on da naḵuḻap usarone angawag ḵan Jesus. Bigbigondae siya Messiah baḵon nu Kristu we pinilin Apudyus aḵ Anagu ya An-ari. ḵadaguwanaḵ ḵappos!”
48Adu da ḵanandae nanuppaḵ ḵan siya, “Guminoḵḵa!” Yaḵon amo ḵananae nampoḵaw, “Siḵae ganaḵ Ari David, ḵadaguwanaḵ ḵappos!”
49Dingngoḻ ḵad ay Jesus, nansadang woḵ ḵanana, “Ayaganyu!”
Pun ummoyda inayagan woḵ ḵananda, “Tumuḻodḵa! Tumaḵdogḵa te aḵ Jesus nampaayag ḵan siḵa.” 50Pun daguse iwwaḻsin Bartimaeus taḵḵop ni silupna, nasaniḵad woḵ ummadani ḵan Jesus.
51Ḵanan Jesus, “Ngai piome ḵooḵ ḵan siḵa?”
Ḵanana, “Mistulu, pioḵe maḵaila.”
52Ḵanan Jesus, “Inḵan! Gapu'tte pammatim ḵan saḵon, maḵailaḵa!” Pun daguse naḵaila woḵ nitun-ud ḵan siya.
ទើបបានជ្រើសរើសហើយ៖
Mark 10: kml
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2019 Translators Association of the Philippines (TAP), All rights reserved.