Mark 8
8
Sa Namaḵanan Jesus Atta Opatlibu
(Mat. 15:32-39)
1Da sadi ye aḻgaw, inninggaw da amoamode tagu we ḵasin nadagup ḵan Jesus. Gapu ta naippun ogon ḵanonda, inayagan Jesus da disipuluna woḵ ḵanana, 2“Madaguwaḵ atta annae tagu te inninggawda ḵan ditaḵu'ḵ tuḻun aḻgaw pun ippun ogon ḵanonda. 3Nu paḻyawoḵ didae nauuḻat, angunawa da udum ḵan dida si daḻan te adayu ili ye ayonanda.”
4Pune sadi, ḵanan da disipuluna, “Yaḵon dinu gay angaḻ-an taḵu'ḵ ipaḵan taḵu'tta annae tagu sina si bumbummaaw?”
5Pun ḵanan Jesus we nangimus, “Ḵamaan ni awad ḵan diḵayu we tinapay?”
Ḵananda, “Pitu.”
6Ḵingwan ḵad Jesus, pinatuḵduna da tagu. Pun innaḻana pitu we tinapay woḵ nanggappiya ḵan Apudyus. Naabus ḵad, binisbisaḵna woḵ innatodna'tta disipuluna ta iwaḻasda'tta amoamode tagu. 7Inninggaw os aḵite ugadiwe anḵabaḻan-og. Nanggappiya bos aḵ Jesus ḵan Apudyus woḵ impaiwaḻasna. 8Losanda nangan pun nassugda. Dinagup ḵad da disipuluna da bunada, napnu pitu we danaḵḵoḻe aḵḵubaw. 9Da nangan batug di opat libu. Pun pinaḻyaw Jesus da tagu'tta boboḻoyda.
10Pun daguse nambangkada'tta disipuluna ta umoyda'tte saḵubna'd Dalmanutha.
Sa Paḵwan Da Pharisee Ḵan Jesus
(Mat. 16:1-4)
11Pun inninggaw da udume Pharisee ye ummoy ḵan Jesus. Pionda padason, pun insaḻaddae nansosongbat. Ḵad ḵindawdae ḵoona nakaskasdaawe sinyal ta mapanoḵnoḵane aḵ Apudyus pagay nangibuun ḵan siya.
12Pun ummag-os aḵ Jesus si sigab ni somsomoḵna woḵ ḵanana, “Ngaipa da tagu sinsanae ḵodaḵodawondae angipailaaḵ aḵ nakaskasdaawe sinyal ḵan dida ta amanoḵnoḵe aḵ Apudyus nangibuun ḵan saḵon? Ibagaḵ ḵan diḵayu ḵatuttuwaan, ippun paat mipaila ḵan dida.” 13Imbagan ḵad Jesus sana, tinenana dida woḵ summaḵyatda'tte bangka ta dumoḻmangda.
Sa Tuttudun Da Pharisee Ya Aḵ Ari Herod
(Mat. 16:5-12)
14Pun da disipulun Jesus, naliwatandae nangaḻa'ḵ tinapay aḵ dinaanda. Inninggaw os-ossaane tinapay si bangka. 15Pun ḵanan Jesus we namilin ḵan dida, “Ummanyu ta adi ḵayu maalisan atte yeast da Pharisee ya aḵ Herod.”
16Imbagan ḵad ay Jesus sadi, ḵanandae nan-uugud, “Imbagan ḵammos Jesus ḵaḵnat te naippun tinapay aḵ dinaan taḵu.”
17Inigammun ḵad Jesus da inugudda, ḵanana ḵan dida, “Ngaipa ḵayu ambinsaw atte adiḵayupun nangawit aḵ dinaanyu? Sissiya ḵammane adiḵayupun maḵaawat? Tummungitong ḵamman da pusuyu? 18Taḵon ay nu annat da atayu, ḵuḻḵuḻḻaponyu. Taḵon ay os nu annat da ingayu, tuḻtuḻḻongonyu! Naliwatanyu ḵammane 19sa namisbisaḵaḵ si limae tinapay, pinaḵanan taḵu da lummabos aḵ limallibu we tagu? Ḵad pigae aḵḵubaw nasawaḻe dinagupyu?”
Ḵananda, “Nasawaḻan aḵ duwa.”
20Ḵanana, “Ḵad sa pitu we tinapay, pinaḵanan taḵu da opat libu we tagu. Ḵad pigae aḵḵubaw os dinagupyu we nasawaḻ?”
Ḵananda, “Pitu.”
21Ḵanan Jesus, “Sissiya ḵammane adiyupun maawatan pion ni ugudoḵ ḵanan?”
Sa Naḵuḻape Tagu
22Dummatong ḵad da Jesus ad Bethsaida, inninggaw da nangiyoy si laḻaḵi ye naḵuḻap ḵan siya. Nandagdaguda ta ipatayna imana'tte naḵuḻap ta maḵaila. 23Pune sadi ḵiniwid Jesus naḵuḻap woḵ intallayna si igid ni ili. Pun tinuppaana atan ni naḵuḻap woḵ iyappadna imana ḵan siya. Ḵanana, “Awad pagay ilam?”
24Nantangad woḵ ḵanana, “On. Lamogḵu ilan da tagu yaḵon isudan ḵayu we anadtaddaḻan.”
25Pun impigwan Jesus iyyappad imana'tta atan ni naḵuḻap. Nandiyat ḵad ḵasin, maḵaila te amo pummadda ilana. 26Ḵanan Jesus, “Inḵan aḵ ḵuwayu! Ḵad adiḵa mipauli'tte sadi ye ili.”
Sa Nangipaigammuwan Peter Ḵan Jesus
(Mat. 16:13-20; Luk. 9:18-21)
27Pune sadi ummoy da Jesus atta ili ye adani'd Caesarea Philippi. Sa nanadtaddaḻananda, ḵanan Jesus atta disipuluna, “Ngaiyaḵ atte ḵasomsomḵan da tagu?”
28Summongbat da disipuluna woḵ ḵananda, “Ḵanan da udume siḵa'ḵ John we Ambobonyag. Da udum, ḵanandae siḵa'ḵ Profeta Elijah. Da udum os, ḵanandae siḵa osa'tta profeta atte awe.”
29Ḵanan Jesus, “Diḵayu ḵad, ngaiyaḵ atte ḵasomsomḵanyu?”
Ḵanan Peter, “Siḵa Kristu.”#8:29 Aḵ Kristu siya pinilin Apudyus aḵ Anagu ya An-ari.
30Pun binilin Jesus didae adida ug-uggudon mipanggob ḵan siya'tta ngaiman.
Sa Matoyan Ya Sa Umuliyan Jesus
(Mat. 16:21-23; Luk. 9:22)
31Pune sadi insaḻad Jesus we nangituttudu'tta disipuluna nu ngai maḵwa ḵan siya'tte umali ye aḻgaw. Ḵanana, “Saḵone Abeng Di Tagu, ḵasapuḻane ampaḵaḻamaḵ. Da pallakayon da Judyu, da papangat da papadi ya da mimistulun ni lintog, idiyanda saḵon ya gongatonaḵ. Ḵad sa miḵaḵlu we aḻgaw, mataguwaḵ ḵasin.” 32Impaḵaawat Jesus ḵan dida. Pun imbattawan Peter ta suppaḵana. 33Yaḵon nansagung aḵ Jesus atta disipuluna woḵ ḵananae summanga ḵan Peter, “Ḵumassadḵa Satan! Te sa annat si somsomoḵnu daḵampun si pinion Apudyus yaḵon sa pion da tagu.”
Da Ambalin Aḵ Disipulun Jesus
(Mat. 16:24-28; Luk. 9:23-27; 14:27; 17:33; Jhn. 12:25)
34Pun inayagan Jesus da adu we tagu ya da disipuluna woḵ ḵanana, “Ngaimane pionae angunud ḵan saḵon, ḵasapuḻane an-awidana long-agna, buḵudona de krosna ya mitun-ud ḵan saḵon. 35Te ngaimane angipatog atte long-agna, matoy. Yaḵon sa angiḵatoy si pammatina ḵan saḵon ya gapu'tte Ambaḻu we Damag, itton Apudyus ḵan siya biyag aḵ inggana. 36Te ngai ḵad ain maganab ni tagu nu anḵuwana da losane binaḵnang atte lubung yaḵon taḻaḵona ḵalidodwana ya madusa'ḵ inggana? Naippun! 37Te naippun maḵwa'ḵ ipasanin ni tagu'tte biyagna. 38Ngaimane angibain ḵan saḵone Abeng Di Tagu ya da tuttuduḵ si sanae ḵabasbassuḻane lunap, ibainḵu bos dida nu mipauliyaḵ ad luta. Te nu mipauliyaḵ buḻunanaḵ atta nasantuwane anghel ya ipailaḵ dayaw Amaḵ.”
ទើបបានជ្រើសរើសហើយ៖
Mark 8: kml
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2019 Translators Association of the Philippines (TAP), All rights reserved.