Mark 11
11
Sa Nanaydayawanda Ḵan Jesus Ad Jerusalem
(Mat. 21:1-11; Luk. 19:28-40; Jhn. 12:12-19)
1Madam-an ḵad da Jesus ad Jerusalem, dummatongda'tte domangna'd Bethphage ya ad Bethany atte pon-ad ni Beleg Olives. Pun pinaunana da duwa'tta disipuluna. 2Ḵanana, “Inḵayu si umasi ye ili. Ḵad nu dumatong ḵayu, odasanyu nipungode donkey ye daampun aḵ maḵabayuwan. Ḵad uḵasanyu ya indatongyu sina. 3Nu awad angimus ḵan diḵayu ḵanane, ‘Ngaipayu uḵasan sanat?’ Ḵananyu we, ‘Ḵasapuḻan ni Apu, ḵad ipaulina sinae dagus.’ ” 4Ummoyda ḵad, indasanda donkey atte ḵaḻsae nipungod atte lasin ni boḻoye adani'tte lewangan. Inuḵasanda ḵad, 5inninggaw da asiḵasiḵade ḵananda, “Ngaipayu uḵasan sanat?” 6Imbagada da imbilin Jesus ḵan dida woḵ iyyunud da sadi ye nangila.
7Inniyoyda ḵad ḵan Jesus, iyyap-apda da taḵḵop da silupda si odog ni donkey#11:7 Isaiah 62:11; Zechariah 9:9. Sa donkey isuna banban-oge ḵabayu, sadi ḵabayuda si awe. woḵ nangabayu'ḵ Jesus. 8Ḵaaduwan atta tagu we inninggaw sidi iyyap-apda da taḵḵop da silupda'tte ḵaḻsae ayon Jesus. Da udum ḵad os lummapidda'tta pangan da ḵayu si igid ni ḵaḻsa woḵ iyyap-apda si ḵaḻsae ayona ta idayawda ḵan pasaaḻonda. 9Da ummuna ya da ummun-unud, ḵanandae nanugtug-uy, “Madaydayaw aḵ Apudyus! Madaydayaw oḵyan umali ye imbuun Apudyus!#11:9 Psalm 118:25-26. 10Madaydayaw ampangatan ni annae ganaḵ Ari David! Madaydayaw aḵ Apudyus we ḵangatuwan!”
11Dummatongda ḵad ad Jerusalem, nillumnoḵ aḵ Jesus si paway ni templo we boḻoy Apudyus woḵ nallangḻanga'tta losane inninggaw sidi. Gapu ta mummasdom, ummoyda'tta disipuluna'd Bethany.
Sa Ḵayu We Adipun Amunga
(Mat. 21:18-19)
12Mabigat ḵad, nauḻat aḵ Jesus si nipauliyandae naḻpu'd Bethany. 13Nan-otap ḵad, andi ḵayu we fig we amod de tubuna woḵ ummadani ta ilana nu awad bungana. Dummatong ḵad atte ḵayu, abuse tubu te daampun amungaanda. 14Pun ḵanana'tte ḵayu, “Adiḵapun ogon amunga.” Pun dingngoḻ da disipuluna imbagana.
Sa Namaḻyawan Jesus Atta Allaḵlaḵu Atte Templo
(Mat. 21:12-17; Luk. 19:45-48; Jhn. 2:13-22)
15Pun dummatongda ḵad ad Jerusalem, nillumnoḵ aḵ Jesus si paway ni templo woḵ pinaḻyawna da nallaḵu ya da ngumina'tta midatun ḵan Apudyus. Binalittuwaḵna bos da lamisaan da ansuḵsuḵat aḵ pilaḵ ya da tutuḵduwan da allaḵu'ḵ kalapati. 16Iyyadina bos da ambubuḵude angoy si paway ni templo. 17Pun nantuttudu woḵ ḵanana'tta tagu, “Sa nigili'tte Ugud Apudyus ḵanana, ‘Sa boḻoyḵu ngannonda boḻoye luluwaḻuwan da tagu'tta losane ili.’#11:17 Isaiah 56:7. Yaḵon nambalinonyu'ḵ inggawan da tulisan.”#11:17 Jeremiah 7:11.
18Dingngoḻ ḵad ay da papangat da papadi ya da mimistulun ni lintog da ḵingwan Jesus, singsingngitda nu ngai inondae ampagongat ḵan siya. Te ummogyatda ḵan siya te nataag da aduadu we tagu'tta intuttuduna. 19Lummabi ḵad, tinenan da Jesus sadi ye siyudad.
Sa Maadaḻ Atte Ḵayu We Adipun Amunga
(Mat. 21:20-22)
20Bigbigat ḵad si lummausda'tte sadi ye ḵayu we fig, naḻangu we nidoga da lamutna. 21Pun inḵagasmoḵ Peter imbagan Jesus woḵ ḵanana, “Mistulu, ilam ḵad ḵayu we fig we inaḻawagam woḵ naḻ-uy!”
22Ḵanan Jesus, “Amati ḵayu oḵyan ḵan Apudyus. 23Ibagaḵ ḵan diḵayu ḵatuttuwaan, nu amati ḵayu we adipun anduwaduwa si pusuyu we mituttuwa da ibagayu, maḵwae ḵananyu'tte annae beleg, ‘Ḵumassadḵa ya an-atunḵa si baybay,’ ḵad aaddi ye mituttuwa. 24Pun ngaimane ḵodawonyu ḵan Apudyus, aaddi ye ittona nu patiyonyu. 25-26Ḵad nu alluwaḻu ḵayu ya awad sasangngaanyu'tta asintataguyu te naḵabasuḻda ḵan diḵayu, pakawanonyu ta aḵ Apudyus we Amayu'd langit pakawanona bos da basuḻyu.”
Sa Ḵaḻabbongan Jesus
(Mat. 21:23-27; Luk. 20:1-8)
27Pun nipaulida ḵasin ad Jerusalem. Nanadtaddaḻan ḵad aḵ Jesus atte paway ni templo, ummoy ḵan siya da papangat da papadi, da mimistulun ni lintog ya da pallakayon da Judyu. 28Ḵanandae nangimus ḵan siya, “Ngai ḵaḻabbongame nangwa'tta ḵaḵna? Ngai nangitod ḵan siḵa si annae ḵaḻabbongam?”
29Ḵanan Jesus, “Awad de umunae imusoḵ ḵan diḵayu, ḵad nu songbatanyu, ibagaḵ os ḵaḻabbongaḵe nangwa'tta ḵaḵna. 30Binonyagan ḵad John da tagu, dinu naḻpuwan ni ḵaḻabbongan John we nambonyag? Aḵ Apudyus baḵon nu da tagu?”
31Pun ḵanandae nan-uugud, “Ngai isongbat taḵu? Nu ḵanan taḵu we, ‘Naḻpu ḵan Apudyus,’ ḵanana ḵan ditaḵu, ‘Ngaipayu adi pinati nu?’ 32Yaḵon adipun maḵwae ḵanan taḵu we, ‘Naḻpu'tta tagu.’ ” Umogyatda nu ngai ḵoon da tagu ḵan dida te pinatida losane gattoḵe profeta'ḵ John. 33Pun ḵananda ḵan Jesus, “Naippun igammuni.”
Ḵanan Jesus, “Nu ḵaḵnat, umadiḵ os ibaga nu ngai nangitod si ḵaḻabbongaḵe angwa'tta sana.”
ទើបបានជ្រើសរើសហើយ៖
Mark 11: kml
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2019 Translators Association of the Philippines (TAP), All rights reserved.