Mark 12
12
Sa Pani Atta Gumagammole
(Mat. 21:33-46; Luk. 20:9-19)
1Impanin Jesus we nan-ug-uggud woḵ ḵanana, “Inninggaw tagu we nammuḻa'ḵ aduadu we grape atte lutana. Pun ḵinabitina nampaliḵwos woḵ ummabut atte batu ta mauppunan ni baḻat da de grape nu asotonda. Nantaḵad os aḵ antaḵnange boḻoy ta inggawan da angguwaḻda. Pun impatangḵonna'tta udume gumagammole woḵ ummoy atte adayu we ili. 2Dummatong ḵad timpu we ambuḻasanda'tta de grape, imbuun ni sinḵuwa osa'tta sammiluna'ḵ umoy angaḻa si billayna. 3Yaḵon dummatong ḵad, dinoḵmaanda woḵ inap-aplit da gumagammole woḵ pinaḻyawdae awwakwakkay. 4Pun ḵasinna bos imbuun osa'tta sammiluna yaḵon isuna bose inaplitda uḻuna ya pinabainanda. 5Piḵluna ḵade nangibuun atta sammiluna, gingngatda dida. Adu bos da imbuunna woḵ inap-aplitda da udum ya gingngatda da udum. 6Anungusna ḵad, imbuunna abengnae ay-ayatona te abus aḵ nabun-an, ḵanana'tte somsomoḵna, ‘Patganda pos pay nin abengḵu.’
7“Yaḵon dummatong ḵad abengna, ḵanan da gumagammole ye nantutuḻag, ‘Annaya angilaḵsun si annae mumuḻḻaan atta de grape. Awwayyu, gongaton taḵu ta anḵuwa taḵu da laḵsunna!’ 8Pun dinoḵmaanda woḵ gingngatda. Nagangput ḵad, imballuda'tte lasin ni mumuḻḻaan de ladagna.”
9Ḵanan Jesus, “Ngai nin ay ḵoon ni sinḵuwa'tte mumuḻḻaan atta de grape atta gumagammole? Dumatong ḵad, gongatona dida ya impaayyuwanna mumuḻḻaan atta udume tagu. 10Iḵagasmoḵyu oḵyan binasayu si nigili ye Ugud Apudyus we ḵanana,
“ ‘Sa batu we indiyan da nantaḵad aḵ boḻoy, siya
nambalinon Apudyus aḵ ḵapatogane batu we amapagdot atte boḻoy.
11Sa annae ḵingwan Apudyus, ambaḻubaḻu.
Ḵad nakaskasdaaw atte ḵasomsomḵan taḵu!’ ”#12:10-11 Psalm 118:22-23.
12Pun da papangat da Judyu, pionda doḵmaan aḵ Jesus te inigammudae inugudna pani ye mibusuḻ ḵan dida. Yaḵon tinenanda te naḵimtanda'tta adu we tagu.
Sa Mipanggob Atte Bugis
(Mat. 22:15-22; Luk. 20:20-26)
13Pun nangibuunda'tta grupun Ari Herod ya da udum atta Pharisee ta padasonda nu ankamali songbat Jesus ta siya ambatayandae angidaḻum. 14Pun dummatongda ḵad ḵananda, “Mistulu, igammuni ye tuttuwa da losane ibagam. Ibagam ustu we adimpun biyangan nu ngai ḵasasaad da tagu. Ḵad igammuni bose ippun laḵsigom aḵ tagu yaḵon siya ituttudum da ḵatuttuwaan mipanggob si pinion Apudyus we ḵoonda. Pun ibagam ud ḵan diḵani nu lisalison taḵu lintog Moses nu ambayad ḵani'tta bugis atte Emperor ad Rome baḵon nu umadini?”
15Yaḵon inigammun Jesus we siḵapanda woḵ ḵanana, “Ngaipayu pappadason saḵon? Angidatong ḵayu ud aḵ ossaane palata ta ilaḵ.” 16Nangiyoyda ḵad ḵanana, “Ngai simbosaḻ ḵan singngadan si anna?”
Ḵananda, “Aḵ Emperor.”
17Ḵanan Jesus, “Nu ḵaḵnat ittonyu ḵan Emperor da ḵuwana, ḵad ittonyu bos da ḵuwan Apudyus.” Dingngoḻda ḵad ay da inugudna, nataagda.
Sa Im-imus Atte Umuliyan Da Matoy
(Mat. 22:23-33; Luk. 20:27-40)
18Pun ummoy da udume Sadducee#12:18 Da Sadducee dida da grupu we ḵaaduwan da padi ye ampangat atte templo. Sa ḵasomsomḵanda'tta long-agda nangatngatuda nu da udume tagu ya da udume padi. Da patiyonda ḵan ḵoḵoḵḵonda nisabali'tta Pharisee. Amo umman da pas-oman gubilnun da iRome ta naippun sumullagi'tta iRome ya da Judyu. ḵan Jesus. Dida osa'tta grupun da Judyu we adipun amati ye umuli da matoy. Ḵananda, 19“Mistulu, sa lintog taḵu we inggilin Moses ḵanana, ‘Nu awad laḻaḵi'ḵ angasawa ya natoye ippun abengda, ḵasapuḻane asaw-on os ni sunudna baḻu. Ḵad nu awad abengda, mibelang aḵ abeng ni natoy.’#12:19 Deuteronomy 25:5-6. 20Inninggaw ḵanu da pitu we ansusunude lallaḻaḵi. Nangasawa panguḻu yaḵon natoy atte daandapun maganaḵ. 21Pun nipasani umasi ḵan siyae nambalin aḵ asawan ni baḻu. Pun natoy ose ippun abengda. Isuna bos atte ḵumaḵlu, 22inggana'ḵ inasawana losan da pitu we ansusunud. Ḵad natoy da losane ippun abengda. Anungusna ḵad, natoy os baḻu. 23Sa umali ye aḻgaw atte umuliyan da natoy, ngai ḵan dida ustu we sin-asawa'tte annae bubai te losanda inasawa?”
24Ḵanan Jesus we summongbat, “Nankamali ḵayu te adiyupun naawatan nigili ye Ugud Apudyus ya sa ḵabooḻana. 25Te nu umuli da natoy, adidapun ogon angasawa baḵon nu miyasawa te isuda da anghel ad langit. 26Ḵad sa mipanggob atte umuliyan da natoy, iḵagasmoḵyu oḵyan binasayu'tte inggilin Moses mipanggob si umapuapuye ḵayu we ḵanana, ‘Saḵon Apudyus da Abraham, Isaac ya aḵ Jacob?’#12:26 Exodus 3:6, 15. 27Sa piona ugudon, siya Apudyus da matattagu, daḵampun aḵ Apudyus da natoy. Diḵayu we adipun amati'tte umuliyan da natoy, gattoḵe nankamali ḵayu!”
Sa Ḵapatogan Atta Bilin Apudyus
(Mat. 22:34-40; Luk. 10:25-28)
28Inninggaw mistulun ni lintoge nandodongngoḻ si ug-uggud da Sadducee ya aḵ Jesus woḵ dingngoḻna ustu we insongbat Jesus ḵan dida. Pun ḵanana, “Ngai ḵapatogan atta bilin Apudyus?”
29Ḵanan Jesus, “Annaya ḵapatogan atta bilinna, ‘Andongoḻ ḵayu we ganaḵ Israel, os-ossaan Apu taḵu we aḵ Apudyus, naippun udum. 30Ḵasapuḻane ayatom aḵ Apu we Apudyusnu atte amine pusum ya amine ḵalidodwam ya amine somsomoḵnu ya amine ḵinosdoḻnu.’#12:29-30 Deuteronomy 6:4-5. 31Ḵanan ni ḵumagwae ḵapatogan atta bilinna, ‘Ḵasapuḻane ayatom da asintatagume isun ni an-aayatnu si long-agnu.’#12:31 Leviticus 19:18. Naippun udum aḵ napatpatog nu da annae duwa.”
32Ḵanan ni mistulun ni lintog, “Mistulu, tuttuwa ḵaname os-ossaan Apudyus ḵad naippun udum.#12:32 Deuteronomy 4:35; 6:4; Isaiah 45:21. 33Tuttuwa bos ḵaname ḵasapuḻane ayaton taḵu'ḵ Apu we Apudyus taḵu atte amine pusu taḵu ya amine somsomoḵ taḵu ya amine ḵinosdoḻ taḵu.#12:33 Deuteronomy 6:5. Ḵan ayaton taḵu bos da asintatagu taḵu we isun ni an-aayat taḵu si long-ag taḵu.#12:33 Leviticus 19:18. Napatpatog pagay aḵ amod anuttuwaan taḵu'tta duwae bilin nu sa angidatunan taḵu'tta masgobe ayam ya da udume maatod ḵan Apudyus.”
34Dingngoḻ ḵad Jesus ḵinalaingna'tta songbatna ḵanana, “Madam-anḵa midoga si ampangatan Apudyus.” Pun inggan ni sadi, naippun ogon maḵaituḻode an-imus ḵan Jesus.
Sa Mipanggob Ḵan Kristu
(Mat. 22:41-46; Luk. 20:41-44)
35Nantuttudu ḵad aḵ Jesus atte paway ni templo ḵanana, “Ngaipan da mimistulun ni lintog ibagae aḵ Kristu siya ganaḵ Ari David? 36Te aḵ Ari David we mismu ngannona'ḵ Kristu Apuḵ. Te sa imbagana, impaspasmoḵ ni Ispiritu Santu ḵan siyae ḵanana,
“ ‘Ḵanan Apudyus atte Apuḵ: Tumuḵduḵa'tte madawinanḵu
inggana'ḵ oḻgoḵ da ḵabusuḻnu.’ ”#12:36 Psalm 110:1.
37Pinagatupan Jesus woḵ ḵanana, “Nu ḵanan Ari David we mismu we aḵ Kristu Apuna, ngai inonae ganaḵna bos nu?” Ḵad da amode tagu, pipiondae nandodongngoḻ atta inugudna.
Da Mimistulun Ni Lintog
(Mat. 23:1-36; Luk. 20:45-47)
38-39Pinagatupan Jesus we nantuttudu woḵ ḵanana, “Ummanyu'tta mimistulun ni lintog te piondae alliḵliḵwose ansisillup atta langgoyod. Ampilida'tta ḵabaḻuwane tutuḵduwan atta sinagoga#12:38-39 Sinagoga - ilanyu 1:21. ya pionda bose mapatganda'tta ampakumusta ḵan dida atta lugar we andaḵdaḵngan da adu we tagu. Ḵad pipionda midayawda nu awad gayagaya. 40Allelawonda da baḻu ta aḻanda da ḵuḵuwada ya da boḻoyda ḵad anduanduwonda da luwaḻuda si sinagung da adu we tagu ta analingodda'tta ḵoḵoḵḵonda. Ḵad sana amo amadagson atte madusaanda.”
Sa Atod Ni Baḻu
(Luk. 21:1-4)
41Pun ummoy aḵ Jesus atte templo woḵ tummuḵdu si adanin ni angitub-unganda'tta atode pilaḵ. Intotollongna da ummoy nangitub-ung atta pilaḵda. Adu da baḵnange nangitub-ung aḵ daḵoḻe gatad. 42Ummoy os ḵapuse baḻu woḵ intub-ungna duwae anḵabaḻan-oge ḵulipangpange ḵababaan patogna'tta losane pilaḵ. 43Pun inayagan Jesus da disipuluna woḵ ḵanana, “Ibagaḵ ḵan diḵayu ḵatuttuwaan, naad-adu intub-ung ni annae ḵapuse baḻu nu da losane nangitub-ung si iiggaan ni atod. 44Te da udum, innatodda da nasawaḻ atta binaḵnangda. Yaḵon sa baḻu ḵad, taḵon ay nu ḵapus, innatodna losane iḵataguna.”
ទើបបានជ្រើសរើសហើយ៖
Mark 12: kml
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2019 Translators Association of the Philippines (TAP), All rights reserved.