Matewuji 26
26
Yesu ohowonga akoka zela kwa waye
1Yesu agamanle wonga mazu matene anna, ohawandelaga anamamuharaye eraga: 2<<Inafwanela muiziwe ira vihanle malambo menli ira idjiwe Pwando ya Mavirelo eto tempuwa tcheniyo inafuna Mwana wa Mutu avahediwe mmandani mwa amwidani ira akomeliwe vamuradini.>>
Andimuwa a aJudewu kohopanganela ira kampe Yesu
Markuji 14:1-2; Lukaji 22:1-2; Juwawu 11:45-57
3Evale andimuwa a anamakuta na andimuwa a aJudewu kohogumanelaga palasiyoni wa mundimuwa wa anamakuta wenno aitaniwa Kayafasi, 4aliwa panganela makalelo bavi kafuna atu muhinda Yesu mozembiheya ira kampe. 5Mbwenye kohowonga keraga: <<So kanimpeni muwari mwa Pwando, tawiha ira nnaze nitatamule madugudugu muwari mwa anamwindji.>>
Yesu ohokutuleliwa perefume Betaniya
Markuji 14:3-9; Juwawu 12:1-8
6Mwa enne Yesu agadowile Betaniya vande va mulombwana Simawu wenno aitaniwa maliba maranya, 7ohokalawo muhiyana mmohi azilege wa Yesu. Tempu yenne Yesu afwanyeyaga agali vameza adjaga vande va Simawu vale. Muhiyanole ohokagana mwana garafwa nasakanyiwe na alabaxturu, mwemo mwazanle perefume wa peresu yokwima. Agazile, ohomukutulelaga muru wa Yesu. 8Anamamuharaye kagaonne jejile, kohotakaleliwaga. Evale kohowongaga keraga: <<Kodi mwasiwa gwa nni nongaga kobiri eni? 9Tchoira perefume ula ogogulihiwa kobiri idjindjene, amala kobiriwa kavahiwe atu osimela.>> 10Yesu mbwenye agaiziwile jejile, ohowakulaga, liye kwi: <<Nyo munamukukumulela nni muhiyanola? Liye uhudiirela miyo yengo yapama. 11Tchoira atu osimela kinamala, anakalave na nyo. Mbwenye vasogolro miyo kannakalegeve na nyo. 12Eto liye akutulelaga perefumela maningwaga, unavayela sakanyeda maningwaga miyo dahanakwe ira tempu inakwa miyo, dakoyiwaga, maningwaga kakale osakanyedeyene.#26:12 unavayela sakanyeda maningwaga miyo dahanakwe: Tempu yenno atu kakwa, kakoyiwaga, koheliwa perefume. Yesu ohoiziwa ira: <<Perefumela unafuna alabe ukwa waga mwasiwa miyo nnokwa tchineneva.>> 13Na ibaribari nnouwandelani ira yenno iirile mwana muhiyana ula inerege vweya mwilamboni mwatene mwene mwemo munalaleyiwa Muselu Wapama. Evale liye unerege umbuweliwa.>>
Judasi Iskariyoti ohonguliha Yesu
Markuji 14:10-11; Lukaji 22:3-6
14Yesu agawongile enne, namamuharaye mmohi afwanyeya muwari mwa kumi na ambinli ale, wenno aitaniwa Judasi Iskariyoti, ohomaruwaga, liye dowa afwanya andimuwa a anamakuta, liye awandela ira: 15<<Kodi miyo dauvahedani Yesu mmandani mwinyu, nyo munafuna mudivahe nni?>> Evale aliwa kohonvaha kobiri 30 da parata. 16Roma ora yenno Judasi ohoroma venda tempuwa yafuna liye nvelela Yesu mmandani mwiwa.
Yesu ohodja Pwando ya Mavirelo na anamamuharaye
Markuji 14:12-21; Lukaji 22:7-23; Juwawu 13:21-30
17Siku noroma na Pwando ya Pawu Dohosakanyiwana Leverina, anamamuharaye kohozaga wa Yesu, aliwa nfuka ira: <<Nyo munafuna nasakanyede jodja jiwa uvi ira hiyo na nyo nidje Pwando ya Mavirelo?>>#26:17 Pwando ya Pawu Dohosakanyiwana Leverina… Pwando ya Mavirelo: Zela Pwando ya Mavirelo na Pwando ya Pawu Dohosakanyiwana Leverina, dali pwando mbinli daireya tempu imohive. Va kada yaka aJudewu kadja pwando dambinli dedile kaumbuwelaga makalelo Nabwiya Mulugu aakumihilemo liye aIzarayeli muIjipitu. Mavirelo ali pwando yadja aJudewu moumbuwela mavirelo a Nabwiya Mulugu aapaga aIjipitu eto aavunelaga aIzarayeli muwari mwa mabila kapile atu, kazolihaga sangiri kaxilu ya musuwo. Kuma evo, va kada yaka aIzarayeli kopa mabila, aliwa djaga na makalelo kadja andimuwiwa malambo a mundulri muwa. Nnga aIzarayeli kohovenya ilambo ya Ijipitu mobaranya, tchanna tempu yomunya pawu ira kahiye masa kanyakuwe, amala kawotche. Na mwasa obaranya wewa, aliwa kohowotcha pawu dohosakanyiwana leverina. Kuma evo, va kada yaka aJudewu kodja pawu dohosakanyiwana leverina muwari moumbuwela makalelo a makolwiwa tempu yakuma atu Ijipitu. 18Yesu ohawakulaga, liye ira: <<Muvenye mudowe musidadi. Mwadowa, munonfwanya mulombwana eni. Mwanfwanya mmuwandele muire: <Namafundjiha gunirumile ira: <<Tempu yaga ihiwandamela. Nnafuna didje Pwando ya Mavirelo na anamadiharaga vande vawo!>> > >> 19Anamamuharaye ale kohoirana nnga mwemo mwawongele Yesu, aliwa dowa mala sakanyeda jatene ira kadje Pwando ya Mavirelo.
20Yagafiyile igudugudu, Yesu ohodowa vameza vamohi na anamamuharaye kumi na ambinli. 21Evale aliwa kadjaga, Yesu ohawandelaga eraga: <<Na ibaribari nnouwandelani ira veva vili hiyo va, ukala mutu mmohi unafuna diguliha.>> 22Evale anamamuharaye ale atene kohoroma kukumuwa valukulu, aliwa roma nfuka Yesu mmohi mmohi keraga: <<Nabwiya, aze akale miyo?>> 23Evale Yesu ohawakulaga eraga: <<Mutu wenne unavoda na miyo mparatoni mmohive, gwenno unafuna diguliha.>> 24Yesu ohowonga, liye ira: <<Tchoira na ibaribari Mwana wa Mutu unagulihiwa nnga mulrembele atu mMazuni zela liye. So mbwenye, udilu wa wenno unafuna muguliha! Ali yapama mutu wenno ahabaliwa!>> 25Eto mulombwana Judasi wenno afuna muguliha ohonfukaga eraga: <<Namafundjiha, unafuna ugulihani aze akale miyo?>> Evale Yesu ohowakulaga eraga: <<Weyo guwongile.>>
Yesu ohodja seya na anamamuharaye
26Evale aliwa kadjaga, Yesu ohotukulaga pawu, liye reliha. Agarelihile, ohomeyaga, liye avaha anamamuharaye eraga: <<Tukulani, mudje. Pawu ila ba maningwaga.>>
27Nomala enne, ohotukulaga kopo imohi, liye mutamalelana Mulugu. Noira enne, ohavaha atenene, liye awandela eraga: <<Nyo atene ng'wani kopo ila! 28Tchoira ti sangiri na yopangana.#26:28 sangiri na yopangana: Yesu awongaga zela yopangana, unawonga zela Yopangana Ixa ipanganile liye muwari mwa ukwa waye. Tchoira malambo a mundulrimu, yohokalawo Yopangana ya Wanle. Wanle Yesu ahanaze, atu kapa mabila nari mbuzi nari ng'ombe ira jotega jiwa jiwatcheliwe. Mbwenye muwari mwa sangiri naye, Yesu ohokunga Yopangana Ixa ira mwa sangiri naye neno, mutu awande leveleliwa. Nione Lukaji 22:20. Sangiri naga muwari motatiya, atu adjindji anokurumuweliwa jotega. 29Mbwenye miyo nnouwandelani ira kadiza ding'wa akoka vinyu wa uva ula, fiyeda tempu inafuna miyo ng'wa vinyu muxa, muUmweneni mwa Baba!>>
30Evale kohoimbaga nyumbo. Kagaimbile nyumbo, kohodowaga Mwango wa Mitengo da Azeti.
Yesu ohomuwandela Peduru ira: <<Unodiruna.>>
Markuji 14:27-31; Lukaji 22:31-34; Juwawu 13:36-38
31Noira enne, Yesu ohawandelaga eraga: <<Nyo atenene mahiyu anna mwaona jinafuna diireyela, munoditawa. Dihiiziwa ira nyo munoditawa mwasiwa nkani wenno umala lrembiwa mMazuni. Fwanyeya ira Mazu anawonga ira: <Miyo nnombubuda namakumbuza. Era eno mabilaye anobalaleya.> >> 32Yesu ohowongagave eraga: <<Miyo mbwenye davenyihiwa mokwani, nnosogolra didowe Galileya. Nyo munodowa mwadifwanye wewo.>> 33Evale Peduru ohowakulaga eraga: <<Masiki afwaga atene kautawegeni, miyo kannautawani, nnakalave na nyo!>> 34Evale Yesu ohomuwongana ira: <<Na ibaribari miyo nnouwandela ira mahiyu anna, mutumbi ahananle, weyo unodiruna fendo taru.>> 35Mulombwana Peduru ohowakulaga kwi: <<Masiki dipiwege vamohi na nyo, miyo kadiza durunani.>> Eto na anamamuharaye atene anne kohowongaga mazu mamohive anne.
Yesu agali munda wa Jesemani
Markuji 14:32-42; Lukaji 22:39-46
36Noira enne, Yesu ohodowaga vamohi na anamamuharaye ale nimburo nimohi neriwa Jesemani.#26:36 Jesemani ali nimburo eni nafwanyeya muwari mwa Mwango wa Mitengo da Azeti. Nzina na Jesemani tapulela nimburo nofinya azeti. Yesu ohahiya anamamuharaye eraga: <<Nyo garatini veva. Miyo nnadowa vale dalobele.>> 37Evale adowaga, ohomutukulaga Peduru vamohi na ana Zebedewu ambinlene.#26:37 ana Zebedewu ambinlene anawongiwa eva gu mulombwana Tiyagu na Juwawu. Yesu ohoromaga kumbanya valukulu, liye kukumuwaga mmirimani mwaye. 38Mwa enne ohawandela anamamuharaye araru ale eraga: <<Mmirimani mwaga mwatene muhukala kumbanya undimuwa. Kumbanya unna miyo ku kumbanya undimuwa wowanda dipa. Nyo mbwenye halani veva, muing'anelege vamohi na miyo.>> 39Noira enne, Yesu ohosusagavo, ahiya evale anamamuharaye araru ale, dowa sogolro vang'onove, liye oramiheda kove yaye vati alobelaga eraga: <<Babani, jakala jowandeya, dera mudirambihede kopo ya goyi dinna miyo. Mbwenye kiireye funa waga. So jiireye mofuna mwenyu.>> 40Awelelaga wali anamamuharaye, aafwannyege aliwa kagonaga. Evale liye ohowonga na Peduru eraga: <<Kodi kuwandile ing'anela vamohi na miyo ora imohi bahi?! 41Muing'anelege eto mulobelege ira mwahaxixiwe na yotega. Nyo mmirimani mwenyu, munofuna. Mbwenye maningo komala foka.>> 42Noira eno, Yesu ohodowaga wakoka wene fendo yanembinli alobelaga eraga: <<Babani, akala kajinawandeya ira kopo ya goyi ila iwande vira miyo dahang'wile, jejo jiireye mofuna mwenyu!>>
43Awelagawo aafwannye aliwa kagonaga mwasiwa kohozaleliwaga kove. 44Evale Yesu ohahiyaga akoka, liye dowa lobela fendo yaneraru, awongaga mazu mamohive anne. 45Noira enne, ohowelawo, dowa vali anamamuharaye vale. Agaafwanyile, ohawandelaga eraga: <<Kodi na vano, munagonave eto munave vuma? Kaing'anani, oriwa ihifiya. Mwana wa Mutu unafuna avahediwe mmandani mwa atu otega. 46Kavenyani, nidowegeni. Kaing'anani, ule unadiguliha unaza!>>
Hindiwa wa Yesu
Markuji 14:43-52; Lukaji 22:47-53; Juwawu 18:3-12
47Vawonga liye eno, pazaga Judasi wenno ali muwari mwa anamamuharaye kumi na ambinli vamohi na anamwindji oindjiva kaganna masupada na golromondo. Atwale karumiwe na andimuwa a anamakuta na andimuwa a aJudewu. 48Maliba nguliha Yesu ule ahanafiye wa Yesu, ohokana ionihedo yaavahile liye afwaye ale ira: <<Nafiya, munamuone nyo dinvahaga beju,#26:48 munamuone nyo dinvahaga beju: Wanlevo atu a muibalini mmohive nari mutu na nfwaye kolondjeletchana muwari movahana beju. Nione Roma 16:16; 1 Korinto 16:20; 2 Korinto 13:12; 1 Tesalonika 5:26; 1 Peduru 5:14. mutuwa gwenno, mmuhinde.>> 49Mwa enne aliwa kamuwandamelaga Yesu, mulombwana Judasi ohomusuruma Yesu, liye mulondjela, liye ira: <<Namafundjiha!>> Nomala enne, liye mbejari. 50Yesu mbwenye ohomuwandelaga eraga: <<Moya kairana yenno izele we ira uirena.>> Mwa enne aliwa kohomuwandamelaga, aliwa muhinda na manda, aliwa mmanga.
51Fwanyeya ira muwari mwa anamamuhara Yesu, ohokala mutu mmohi eni atapunle ndanda naye, liye kumiha supada naye, funaga ira amukakatena namalaba mmohi wa mundimuwa wa anamakuta. Mbwenye supada niwa nagwadilege nibaru. 52Mwa enne Yesu ohomuwandelaga eraga: <<Kavolotchiha supada nawo no. Mwasiwa atu atene anatukule supada kaairelana afwiwa yabure, aliwa anoza kakwe na supada. 53Kodi weyo kunaumbuwela ira miyo dahafune, dogonvepa Baba ira adirumihede makuru kumi na menli a angelro#26:53 makuru kumi na menli a angelro: Ora yenno, nikuru nimohi na anyakondo nakana anyakondo 12.000. Yesu muwari mowonga makuru kumi na menli a angelro, aromola indjiva wa angelro okwakwana nnga 144.000. Ku wonga angelro pwi. ira kaze kadikamihede? 54Eto ahakanlege miyo diirana eno nnga jejo jilrembiwe mMazuni zela ukwa waga jafuna jikwakwanele avi?>>
55Noira eno, Yesu ohawongagana anamwindji kazilege muhinda ale eraga: <<Nyo mwazaga na masupada na golromondo ira mudihinde miyo, kodi nyo munadiona nnga dili mbava? Miyo malambo oindjiva dagarati Nyumba ya Yehova, dufundjihagani eto nyo kamwadihindile. 56Mbwenye jatene jeji jinaireya ira jiwande kwakwanela jejo jalrembile anamafiyiheda mMazuni.>> Yesu agamanle wonga mazu anno, anamamuharaye atene kohomuhiya, aliwa tawa.
Yesu atongiwaga na andimuwa a aJudewu
Markuji 14:53-65; Lukaji 22:54-55,63-71; Juwawu 18:12-14,19-24
57Evale alombwana kamuhindile Yesu ale, kohomulandaga, aliwa mudowagana vande va mundimuwa wa anamakuta wenno aitaniwa Kayafasi, vevo vafwanyeya anamafundjiha malamulo adjindjene na andimuwa amohiwa a aJudewu. 58Mwa enne mulombwana Peduru omuharaga Yesu olapela wene fiyeda vatando va mundimuwa wa anamakuta ule. Na liyene ohovolowaga, liye dowa garati na agwarda ira aone pama makalelo kafuna atu muirana Yesu. 59Evale andimuwa a anamakuta na andimuwa a anamatonga atene kohotolatola umboni onama guvi kafuna atu mugwihana mulandu Yesu ira kampe. 60Kohooneya adjindji kazilege roma wongaga jonama johiyana hiyana. Masiki eno tchawandilege fwanya muselu oira kawande mugwihana mulandu. Evale kohooneya alombwana ambinli kawongilege mazu onama keraga: 61<<Mulombwanola ohowonga ira: <Miyo nnowanda bwanyula Nyumba ya Mulugu ila eto mwa malambo mararu nnoimanga akoka.> >>#26:60-61 kohooneya alombwana ambinli kawongilege mazu onama: Amboni ale kafwanyeya kagali amboni onama mwasiwa Yesu kawongile ira: <<Miyo nnobwanyula Nyumba ya Yehova.>> So liye awongile ira: Mubwanyule nyumbela, miyo nnoivenyiha akoka muwari mwa malambo mararu. (Juwawu 2:18-22) Mbwenye liye awonga zela maningo aye.
62Alombwanale kagawongile eno, mundimuwa wa anamakuta ule ohovenyaga, liye nfuka eraga: <<Kavwa eto, jinaunukeda atu ji, kodi weyo kunakanave yowakula?>> 63Yesu mbwenye ohokalagave omiyalene. Mwa enne mundimuwa wa anamakuta ule ohomuwongagana eraga: <<Miyo nnoulumbeliha na nzina na Mulugu Okalawo ira uniwandele akala weyo uli Namatikeliwa, Mwana Mulugu.>> 64Evale Yesu ohowakulaga eraga: <<Nyo gunawonga. Mwa eno, miyo nnouwandelani ira munoza mmuone Mwana wa Mutu agagaratile muwononi odjana wa Mwinnya wa Kopolo Datene. Eto munoza mmuone azaga mmiramboni zulu.>>
65Evale mundimuwa wa anamakuta ule agavwile enne, ohokawulaga jowara jaye awongaga eraga: <<Muhumala vwa, liye eni uhumululuviha Mulugu. Nnga mwasiwa gwa nni nnaafunege hiyo amboni amohiwa? Tchoira eva nyo mwatene muhumala vwa mululuviha waye Mulugu. 66Nnga nimuirena avi mutula?>> Evale atwale kohowakulaga keraga: <<Ifwanele apiwe bahi.>> 67Noira enne, amohiwa kohoromaga mutapela mare wintoni waye, kamukomaga na maxoko eto amohiwa konvahaga makofi wintoni, 68keraga: <<Akala weyo uli Namatikeliwa, kamurohe uvandile!>>
Peduru ohomuruna Yesu
Markuji 14:66-72; Lukaji 22:56-62; Juwawu 18:15-18,25-27
69Fwanyeya ira mwa tempu yenne mulombwana Peduru agaratilege unde, vatando va mundimuwa wa anamakuta. Mwa enne ohozaga namwali mmohi wenno ali namalaba wa vande evale, liye nfwanya Peduru kwi: <<Na wenne wali vamohi na Yesu nkuda Galileya ule!>> 70Mbwenye liye ohorunaga vari va atenene eraga: <<Miyo jinawonga we jo kadiiziwile!>>
71Noira eno, liye ohokumaga, dowaga va mulango. Eto namalaba mmohiwa wa muhiyana afwanyeyaga evale ohowongaga eraga: <<Mulombwana wenna na liyene ali vamohi na Yesu nkuda Nazareti.>> 72Evale liye ohorunaga fendo yanembinli alumbelaga eraga: <<Miyo mulombwana wenno kadimuiziwile!>>
73Noira enne, mwa tempu ya vang'ono ale kafwanyeyaga evale kohomuwandamelaga Peduru keraga: <<Na ibaribari weyo uli muwari mwa nikuru neno. Mwasiwa iwongelo yawo tchi imohive inawonga atu!>> 74Evale liye ohoromaga runa, alumbelaga eraga: <<Akala miyo nnanama, ditembelrelriwe. Tchoira miyo mulombwanoyo kadimuiziwile!>> Nowonga enne, mobaranya mutumbi ohonlaga. 75Evale Peduru ohoumbuwelaga mazu amuwandenle Yesu oira: <<Mutumbi oroma ahananle, weyo unodiruna fendo taru.>> Mwa enne Peduru ohokumaga evale anlaga no kumbanya ulukulu.
ទើបបានជ្រើសរើសហើយ៖
Matewuji 26: iLolo
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2018 Visão Integral
Matewuji 26
26
Yesu ohowonga akoka zela kwa waye
1Yesu agamanle wonga mazu matene anna, ohawandelaga anamamuharaye eraga: 2<<Inafwanela muiziwe ira vihanle malambo menli ira idjiwe Pwando ya Mavirelo eto tempuwa tcheniyo inafuna Mwana wa Mutu avahediwe mmandani mwa amwidani ira akomeliwe vamuradini.>>
Andimuwa a aJudewu kohopanganela ira kampe Yesu
Markuji 14:1-2; Lukaji 22:1-2; Juwawu 11:45-57
3Evale andimuwa a anamakuta na andimuwa a aJudewu kohogumanelaga palasiyoni wa mundimuwa wa anamakuta wenno aitaniwa Kayafasi, 4aliwa panganela makalelo bavi kafuna atu muhinda Yesu mozembiheya ira kampe. 5Mbwenye kohowonga keraga: <<So kanimpeni muwari mwa Pwando, tawiha ira nnaze nitatamule madugudugu muwari mwa anamwindji.>>
Yesu ohokutuleliwa perefume Betaniya
Markuji 14:3-9; Juwawu 12:1-8
6Mwa enne Yesu agadowile Betaniya vande va mulombwana Simawu wenno aitaniwa maliba maranya, 7ohokalawo muhiyana mmohi azilege wa Yesu. Tempu yenne Yesu afwanyeyaga agali vameza adjaga vande va Simawu vale. Muhiyanole ohokagana mwana garafwa nasakanyiwe na alabaxturu, mwemo mwazanle perefume wa peresu yokwima. Agazile, ohomukutulelaga muru wa Yesu. 8Anamamuharaye kagaonne jejile, kohotakaleliwaga. Evale kohowongaga keraga: <<Kodi mwasiwa gwa nni nongaga kobiri eni? 9Tchoira perefume ula ogogulihiwa kobiri idjindjene, amala kobiriwa kavahiwe atu osimela.>> 10Yesu mbwenye agaiziwile jejile, ohowakulaga, liye kwi: <<Nyo munamukukumulela nni muhiyanola? Liye uhudiirela miyo yengo yapama. 11Tchoira atu osimela kinamala, anakalave na nyo. Mbwenye vasogolro miyo kannakalegeve na nyo. 12Eto liye akutulelaga perefumela maningwaga, unavayela sakanyeda maningwaga miyo dahanakwe ira tempu inakwa miyo, dakoyiwaga, maningwaga kakale osakanyedeyene.#26:12 unavayela sakanyeda maningwaga miyo dahanakwe: Tempu yenno atu kakwa, kakoyiwaga, koheliwa perefume. Yesu ohoiziwa ira: <<Perefumela unafuna alabe ukwa waga mwasiwa miyo nnokwa tchineneva.>> 13Na ibaribari nnouwandelani ira yenno iirile mwana muhiyana ula inerege vweya mwilamboni mwatene mwene mwemo munalaleyiwa Muselu Wapama. Evale liye unerege umbuweliwa.>>
Judasi Iskariyoti ohonguliha Yesu
Markuji 14:10-11; Lukaji 22:3-6
14Yesu agawongile enne, namamuharaye mmohi afwanyeya muwari mwa kumi na ambinli ale, wenno aitaniwa Judasi Iskariyoti, ohomaruwaga, liye dowa afwanya andimuwa a anamakuta, liye awandela ira: 15<<Kodi miyo dauvahedani Yesu mmandani mwinyu, nyo munafuna mudivahe nni?>> Evale aliwa kohonvaha kobiri 30 da parata. 16Roma ora yenno Judasi ohoroma venda tempuwa yafuna liye nvelela Yesu mmandani mwiwa.
Yesu ohodja Pwando ya Mavirelo na anamamuharaye
Markuji 14:12-21; Lukaji 22:7-23; Juwawu 13:21-30
17Siku noroma na Pwando ya Pawu Dohosakanyiwana Leverina, anamamuharaye kohozaga wa Yesu, aliwa nfuka ira: <<Nyo munafuna nasakanyede jodja jiwa uvi ira hiyo na nyo nidje Pwando ya Mavirelo?>>#26:17 Pwando ya Pawu Dohosakanyiwana Leverina… Pwando ya Mavirelo: Zela Pwando ya Mavirelo na Pwando ya Pawu Dohosakanyiwana Leverina, dali pwando mbinli daireya tempu imohive. Va kada yaka aJudewu kadja pwando dambinli dedile kaumbuwelaga makalelo Nabwiya Mulugu aakumihilemo liye aIzarayeli muIjipitu. Mavirelo ali pwando yadja aJudewu moumbuwela mavirelo a Nabwiya Mulugu aapaga aIjipitu eto aavunelaga aIzarayeli muwari mwa mabila kapile atu, kazolihaga sangiri kaxilu ya musuwo. Kuma evo, va kada yaka aIzarayeli kopa mabila, aliwa djaga na makalelo kadja andimuwiwa malambo a mundulri muwa. Nnga aIzarayeli kohovenya ilambo ya Ijipitu mobaranya, tchanna tempu yomunya pawu ira kahiye masa kanyakuwe, amala kawotche. Na mwasa obaranya wewa, aliwa kohowotcha pawu dohosakanyiwana leverina. Kuma evo, va kada yaka aJudewu kodja pawu dohosakanyiwana leverina muwari moumbuwela makalelo a makolwiwa tempu yakuma atu Ijipitu. 18Yesu ohawakulaga, liye ira: <<Muvenye mudowe musidadi. Mwadowa, munonfwanya mulombwana eni. Mwanfwanya mmuwandele muire: <Namafundjiha gunirumile ira: <<Tempu yaga ihiwandamela. Nnafuna didje Pwando ya Mavirelo na anamadiharaga vande vawo!>> > >> 19Anamamuharaye ale kohoirana nnga mwemo mwawongele Yesu, aliwa dowa mala sakanyeda jatene ira kadje Pwando ya Mavirelo.
20Yagafiyile igudugudu, Yesu ohodowa vameza vamohi na anamamuharaye kumi na ambinli. 21Evale aliwa kadjaga, Yesu ohawandelaga eraga: <<Na ibaribari nnouwandelani ira veva vili hiyo va, ukala mutu mmohi unafuna diguliha.>> 22Evale anamamuharaye ale atene kohoroma kukumuwa valukulu, aliwa roma nfuka Yesu mmohi mmohi keraga: <<Nabwiya, aze akale miyo?>> 23Evale Yesu ohawakulaga eraga: <<Mutu wenne unavoda na miyo mparatoni mmohive, gwenno unafuna diguliha.>> 24Yesu ohowonga, liye ira: <<Tchoira na ibaribari Mwana wa Mutu unagulihiwa nnga mulrembele atu mMazuni zela liye. So mbwenye, udilu wa wenno unafuna muguliha! Ali yapama mutu wenno ahabaliwa!>> 25Eto mulombwana Judasi wenno afuna muguliha ohonfukaga eraga: <<Namafundjiha, unafuna ugulihani aze akale miyo?>> Evale Yesu ohowakulaga eraga: <<Weyo guwongile.>>
Yesu ohodja seya na anamamuharaye
26Evale aliwa kadjaga, Yesu ohotukulaga pawu, liye reliha. Agarelihile, ohomeyaga, liye avaha anamamuharaye eraga: <<Tukulani, mudje. Pawu ila ba maningwaga.>>
27Nomala enne, ohotukulaga kopo imohi, liye mutamalelana Mulugu. Noira enne, ohavaha atenene, liye awandela eraga: <<Nyo atene ng'wani kopo ila! 28Tchoira ti sangiri na yopangana.#26:28 sangiri na yopangana: Yesu awongaga zela yopangana, unawonga zela Yopangana Ixa ipanganile liye muwari mwa ukwa waye. Tchoira malambo a mundulrimu, yohokalawo Yopangana ya Wanle. Wanle Yesu ahanaze, atu kapa mabila nari mbuzi nari ng'ombe ira jotega jiwa jiwatcheliwe. Mbwenye muwari mwa sangiri naye, Yesu ohokunga Yopangana Ixa ira mwa sangiri naye neno, mutu awande leveleliwa. Nione Lukaji 22:20. Sangiri naga muwari motatiya, atu adjindji anokurumuweliwa jotega. 29Mbwenye miyo nnouwandelani ira kadiza ding'wa akoka vinyu wa uva ula, fiyeda tempu inafuna miyo ng'wa vinyu muxa, muUmweneni mwa Baba!>>
30Evale kohoimbaga nyumbo. Kagaimbile nyumbo, kohodowaga Mwango wa Mitengo da Azeti.
Yesu ohomuwandela Peduru ira: <<Unodiruna.>>
Markuji 14:27-31; Lukaji 22:31-34; Juwawu 13:36-38
31Noira enne, Yesu ohawandelaga eraga: <<Nyo atenene mahiyu anna mwaona jinafuna diireyela, munoditawa. Dihiiziwa ira nyo munoditawa mwasiwa nkani wenno umala lrembiwa mMazuni. Fwanyeya ira Mazu anawonga ira: <Miyo nnombubuda namakumbuza. Era eno mabilaye anobalaleya.> >> 32Yesu ohowongagave eraga: <<Miyo mbwenye davenyihiwa mokwani, nnosogolra didowe Galileya. Nyo munodowa mwadifwanye wewo.>> 33Evale Peduru ohowakulaga eraga: <<Masiki afwaga atene kautawegeni, miyo kannautawani, nnakalave na nyo!>> 34Evale Yesu ohomuwongana ira: <<Na ibaribari miyo nnouwandela ira mahiyu anna, mutumbi ahananle, weyo unodiruna fendo taru.>> 35Mulombwana Peduru ohowakulaga kwi: <<Masiki dipiwege vamohi na nyo, miyo kadiza durunani.>> Eto na anamamuharaye atene anne kohowongaga mazu mamohive anne.
Yesu agali munda wa Jesemani
Markuji 14:32-42; Lukaji 22:39-46
36Noira enne, Yesu ohodowaga vamohi na anamamuharaye ale nimburo nimohi neriwa Jesemani.#26:36 Jesemani ali nimburo eni nafwanyeya muwari mwa Mwango wa Mitengo da Azeti. Nzina na Jesemani tapulela nimburo nofinya azeti. Yesu ohahiya anamamuharaye eraga: <<Nyo garatini veva. Miyo nnadowa vale dalobele.>> 37Evale adowaga, ohomutukulaga Peduru vamohi na ana Zebedewu ambinlene.#26:37 ana Zebedewu ambinlene anawongiwa eva gu mulombwana Tiyagu na Juwawu. Yesu ohoromaga kumbanya valukulu, liye kukumuwaga mmirimani mwaye. 38Mwa enne ohawandela anamamuharaye araru ale eraga: <<Mmirimani mwaga mwatene muhukala kumbanya undimuwa. Kumbanya unna miyo ku kumbanya undimuwa wowanda dipa. Nyo mbwenye halani veva, muing'anelege vamohi na miyo.>> 39Noira enne, Yesu ohosusagavo, ahiya evale anamamuharaye araru ale, dowa sogolro vang'onove, liye oramiheda kove yaye vati alobelaga eraga: <<Babani, jakala jowandeya, dera mudirambihede kopo ya goyi dinna miyo. Mbwenye kiireye funa waga. So jiireye mofuna mwenyu.>> 40Awelelaga wali anamamuharaye, aafwannyege aliwa kagonaga. Evale liye ohowonga na Peduru eraga: <<Kodi kuwandile ing'anela vamohi na miyo ora imohi bahi?! 41Muing'anelege eto mulobelege ira mwahaxixiwe na yotega. Nyo mmirimani mwenyu, munofuna. Mbwenye maningo komala foka.>> 42Noira eno, Yesu ohodowaga wakoka wene fendo yanembinli alobelaga eraga: <<Babani, akala kajinawandeya ira kopo ya goyi ila iwande vira miyo dahang'wile, jejo jiireye mofuna mwenyu!>>
43Awelagawo aafwannye aliwa kagonaga mwasiwa kohozaleliwaga kove. 44Evale Yesu ohahiyaga akoka, liye dowa lobela fendo yaneraru, awongaga mazu mamohive anne. 45Noira enne, ohowelawo, dowa vali anamamuharaye vale. Agaafwanyile, ohawandelaga eraga: <<Kodi na vano, munagonave eto munave vuma? Kaing'anani, oriwa ihifiya. Mwana wa Mutu unafuna avahediwe mmandani mwa atu otega. 46Kavenyani, nidowegeni. Kaing'anani, ule unadiguliha unaza!>>
Hindiwa wa Yesu
Markuji 14:43-52; Lukaji 22:47-53; Juwawu 18:3-12
47Vawonga liye eno, pazaga Judasi wenno ali muwari mwa anamamuharaye kumi na ambinli vamohi na anamwindji oindjiva kaganna masupada na golromondo. Atwale karumiwe na andimuwa a anamakuta na andimuwa a aJudewu. 48Maliba nguliha Yesu ule ahanafiye wa Yesu, ohokana ionihedo yaavahile liye afwaye ale ira: <<Nafiya, munamuone nyo dinvahaga beju,#26:48 munamuone nyo dinvahaga beju: Wanlevo atu a muibalini mmohive nari mutu na nfwaye kolondjeletchana muwari movahana beju. Nione Roma 16:16; 1 Korinto 16:20; 2 Korinto 13:12; 1 Tesalonika 5:26; 1 Peduru 5:14. mutuwa gwenno, mmuhinde.>> 49Mwa enne aliwa kamuwandamelaga Yesu, mulombwana Judasi ohomusuruma Yesu, liye mulondjela, liye ira: <<Namafundjiha!>> Nomala enne, liye mbejari. 50Yesu mbwenye ohomuwandelaga eraga: <<Moya kairana yenno izele we ira uirena.>> Mwa enne aliwa kohomuwandamelaga, aliwa muhinda na manda, aliwa mmanga.
51Fwanyeya ira muwari mwa anamamuhara Yesu, ohokala mutu mmohi eni atapunle ndanda naye, liye kumiha supada naye, funaga ira amukakatena namalaba mmohi wa mundimuwa wa anamakuta. Mbwenye supada niwa nagwadilege nibaru. 52Mwa enne Yesu ohomuwandelaga eraga: <<Kavolotchiha supada nawo no. Mwasiwa atu atene anatukule supada kaairelana afwiwa yabure, aliwa anoza kakwe na supada. 53Kodi weyo kunaumbuwela ira miyo dahafune, dogonvepa Baba ira adirumihede makuru kumi na menli a angelro#26:53 makuru kumi na menli a angelro: Ora yenno, nikuru nimohi na anyakondo nakana anyakondo 12.000. Yesu muwari mowonga makuru kumi na menli a angelro, aromola indjiva wa angelro okwakwana nnga 144.000. Ku wonga angelro pwi. ira kaze kadikamihede? 54Eto ahakanlege miyo diirana eno nnga jejo jilrembiwe mMazuni zela ukwa waga jafuna jikwakwanele avi?>>
55Noira eno, Yesu ohawongagana anamwindji kazilege muhinda ale eraga: <<Nyo mwazaga na masupada na golromondo ira mudihinde miyo, kodi nyo munadiona nnga dili mbava? Miyo malambo oindjiva dagarati Nyumba ya Yehova, dufundjihagani eto nyo kamwadihindile. 56Mbwenye jatene jeji jinaireya ira jiwande kwakwanela jejo jalrembile anamafiyiheda mMazuni.>> Yesu agamanle wonga mazu anno, anamamuharaye atene kohomuhiya, aliwa tawa.
Yesu atongiwaga na andimuwa a aJudewu
Markuji 14:53-65; Lukaji 22:54-55,63-71; Juwawu 18:12-14,19-24
57Evale alombwana kamuhindile Yesu ale, kohomulandaga, aliwa mudowagana vande va mundimuwa wa anamakuta wenno aitaniwa Kayafasi, vevo vafwanyeya anamafundjiha malamulo adjindjene na andimuwa amohiwa a aJudewu. 58Mwa enne mulombwana Peduru omuharaga Yesu olapela wene fiyeda vatando va mundimuwa wa anamakuta ule. Na liyene ohovolowaga, liye dowa garati na agwarda ira aone pama makalelo kafuna atu muirana Yesu. 59Evale andimuwa a anamakuta na andimuwa a anamatonga atene kohotolatola umboni onama guvi kafuna atu mugwihana mulandu Yesu ira kampe. 60Kohooneya adjindji kazilege roma wongaga jonama johiyana hiyana. Masiki eno tchawandilege fwanya muselu oira kawande mugwihana mulandu. Evale kohooneya alombwana ambinli kawongilege mazu onama keraga: 61<<Mulombwanola ohowonga ira: <Miyo nnowanda bwanyula Nyumba ya Mulugu ila eto mwa malambo mararu nnoimanga akoka.> >>#26:60-61 kohooneya alombwana ambinli kawongilege mazu onama: Amboni ale kafwanyeya kagali amboni onama mwasiwa Yesu kawongile ira: <<Miyo nnobwanyula Nyumba ya Yehova.>> So liye awongile ira: Mubwanyule nyumbela, miyo nnoivenyiha akoka muwari mwa malambo mararu. (Juwawu 2:18-22) Mbwenye liye awonga zela maningo aye.
62Alombwanale kagawongile eno, mundimuwa wa anamakuta ule ohovenyaga, liye nfuka eraga: <<Kavwa eto, jinaunukeda atu ji, kodi weyo kunakanave yowakula?>> 63Yesu mbwenye ohokalagave omiyalene. Mwa enne mundimuwa wa anamakuta ule ohomuwongagana eraga: <<Miyo nnoulumbeliha na nzina na Mulugu Okalawo ira uniwandele akala weyo uli Namatikeliwa, Mwana Mulugu.>> 64Evale Yesu ohowakulaga eraga: <<Nyo gunawonga. Mwa eno, miyo nnouwandelani ira munoza mmuone Mwana wa Mutu agagaratile muwononi odjana wa Mwinnya wa Kopolo Datene. Eto munoza mmuone azaga mmiramboni zulu.>>
65Evale mundimuwa wa anamakuta ule agavwile enne, ohokawulaga jowara jaye awongaga eraga: <<Muhumala vwa, liye eni uhumululuviha Mulugu. Nnga mwasiwa gwa nni nnaafunege hiyo amboni amohiwa? Tchoira eva nyo mwatene muhumala vwa mululuviha waye Mulugu. 66Nnga nimuirena avi mutula?>> Evale atwale kohowakulaga keraga: <<Ifwanele apiwe bahi.>> 67Noira enne, amohiwa kohoromaga mutapela mare wintoni waye, kamukomaga na maxoko eto amohiwa konvahaga makofi wintoni, 68keraga: <<Akala weyo uli Namatikeliwa, kamurohe uvandile!>>
Peduru ohomuruna Yesu
Markuji 14:66-72; Lukaji 22:56-62; Juwawu 18:15-18,25-27
69Fwanyeya ira mwa tempu yenne mulombwana Peduru agaratilege unde, vatando va mundimuwa wa anamakuta. Mwa enne ohozaga namwali mmohi wenno ali namalaba wa vande evale, liye nfwanya Peduru kwi: <<Na wenne wali vamohi na Yesu nkuda Galileya ule!>> 70Mbwenye liye ohorunaga vari va atenene eraga: <<Miyo jinawonga we jo kadiiziwile!>>
71Noira eno, liye ohokumaga, dowaga va mulango. Eto namalaba mmohiwa wa muhiyana afwanyeyaga evale ohowongaga eraga: <<Mulombwana wenna na liyene ali vamohi na Yesu nkuda Nazareti.>> 72Evale liye ohorunaga fendo yanembinli alumbelaga eraga: <<Miyo mulombwana wenno kadimuiziwile!>>
73Noira enne, mwa tempu ya vang'ono ale kafwanyeyaga evale kohomuwandamelaga Peduru keraga: <<Na ibaribari weyo uli muwari mwa nikuru neno. Mwasiwa iwongelo yawo tchi imohive inawonga atu!>> 74Evale liye ohoromaga runa, alumbelaga eraga: <<Akala miyo nnanama, ditembelrelriwe. Tchoira miyo mulombwanoyo kadimuiziwile!>> Nowonga enne, mobaranya mutumbi ohonlaga. 75Evale Peduru ohoumbuwelaga mazu amuwandenle Yesu oira: <<Mutumbi oroma ahananle, weyo unodiruna fendo taru.>> Mwa enne Peduru ohokumaga evale anlaga no kumbanya ulukulu.
ទើបបានជ្រើសរើសហើយ៖
:
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2018 Visão Integral