Zakari 1
1
ZAKARI I AOLIA NUN NINNGE NG'Ɔ WUNNIN BE'N
Izraɛlfuɛ'm be nannan'm b'a ti-man ndɛ nga Anannganman kan kleli be'n
1Kɛ be sieli Dariis famiɛn'n i afuɛ nnyɔn'n i anglo mɔcuɛ'n su'n Anannganman'n kannin ndɛ kleli Zakari, Ido i wa Berekia i wa liɛ'n, 2-3Anannganman waan ɔ `se Izraɛlfuɛ'm be kɛ: «Min Anannganman bɔ n sie mɛn wunmuan n fali ya dan kpa amun nannan'm bé wun. Sanngɛ sɛ an sa amun sin ba min sin'n, n kusu n ´sa min sin m ba amun wun. Yɛ m'an kan m'an kle amun lɛ-ɔ. 4Nán an yo kɛ amun nannan'm be sa. Laa'n min nuan ijɔfuɛ'm be seli be kɛ m bɔ n sie mɛn wunmuan'n min waan be `gua be nzuɛn tɛ nin be aeliɛ tɛtɛ'm be ase. Sanngɛ b'a ti-man, b'a fa-man bé ti b'a de-man. Nán an yo kɛ be sa. 5Amun nannan sɔ'm bé nyin nun-man su kun. Min nuan ijɔfuɛ'm be kusu be wieli wu. 6Sanngɛ ndɛ nin mmla nga n fa wlali min sufuɛ nga be ijɔ min nuan'n bé sa nun, kɛ be `fa man amun nannan mun'n, amun nannan'm be wunnin i yɛ be seli kɛ: ‹Sa nga Anannganman b'ɔ sie mɛn wunmuan'n waan sɛ e yo tɛ nan sɛ y'a yaci-man ye aeliɛ tɛtɛ'n ɔ ´fa yo ye'n, yɛ ɔ'a yo i yɛ.› »
Nnɛn kpanngɔ mun
7Kɛ be sieli Dariis i famiɛn'n, i afuɛ nnyɔn'n i anglo blu-nin-kun su'n bɔ be flɛ i kɛ Seba anglo'n, i le ablaɔn-nin-nnan'n su'n, Anannganman'n kannin ndɛ kleli Zakari, Ido i wa Berekia i wa liɛ'n. 8Zakari kɛnnin i kɛ: Kɛ n lali kɔnguɛ'n, like nga n wunnin i'n yɛ. Sran kun wo nnɛn kpanngɔ zoun kun su, ɔ jin mirt waka'm be afiɛn tɔnun'n nun. Nnɛn kpanngɔ wie'm be o i sin lɔ: wie ti zoun, wie ti ble nzue-nzue, wie kusu ti ufue . 9Yɛ n usɛli i kɛ: «?Min Min, nnɛn kpanngɔ sɔ'm be ti nguɛ nzɔliɛ?»
Nan anz ng'ɔ nin min koko yalɛ'n ɔ'a se min kɛ yoo: «N wa kan kle wɔ.»
10Kpɛkuun sran ng'ɔ jin mirt waka'm be afiɛn'n ɔ'a sɔ su, i waan: «Be nga bɔ Anannganman sunmannin be kɛ be `wlan asiɛ'n su'n mun-ɔn.»
11Kpɛkuun sran sɔ'm be seli Anannganman i anz b'ɔ o mirt waka'm be afiɛn lɔ'n kɛ: «E ko wlan-wlannin asiɛ'n wunmuan'n su, sanngɛ y'a wun-man kɛ be di utre lika kun.» 12Yɛ Anannganman i anz'n waan: «Ee! Anannganman, a fali Zerizalɛm klɔ'n nin Zida klɔ'm bé wun ya i afuɛ ableso yɛ. ?Cɛn onin ko nan w'a si be aunnvuɛ?»
13Kpɛkuun Anannganman'n tɛli anz sɔ'n su klanman, ɔ man i wla guali ase.
Anannganman wa fa Siɔn ɔ ´yo i liɛ
14 Anz sɔ ng'ɔ nin min koko yalɛ'n seli min kɛ:
«Ijɔ Anannganman b'ɔ sie mɛn wunmuan'n i nuan se kɛ:
‹Zerizalɛm nin Siɔn be klolɛ nga n fa klo be'n ti dan.
15Ya nga m'an fɛ i nvle
nga be fa bé wla gua be bɔbɔ
be wun su'n, be wun'n, ɔ ti dan.
Ɔ liɛ ya kaan sa bɔ n fɛli
i Izraɛl wun'n, i ti ɔ sacili.
Nvle sɔ'n bé sa o i sacilɛ sɔ'n nun wie.›
16Ɔ man i ti Anannganman'n wan yoo:
‹N ´sa min sin n ´nian Zerizalɛm lika ekun.
Be wa kplan mín sua laa'n ekun.
Be wa sunnzun Zerizalɛm be ´kplɛn i ekun.
Min Anannganman b'ɔ n sie mɛn wunmuan'n yɛ n kan sɔ-ɔ.›
17Kan gua su kɛ: ‹Anannganman
b'ɔ sie mɛn wunmuan'n waan:
Min klɔ'n su ninnge'm be wa yo ye.
N ´fɔnvɔ Siɔn, n ´fɛ i n ´fa yo
min liɛ ekun kɛ laa'n sa.› »
ទើបបានជ្រើសរើសហើយ៖
Zakari 1: BB98
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Baoulé Bible © Alliance Biblique de Côte d'Ivoire, 1998.