Amɔs 3
3
Sa nga Izraɛlfuɛ'm be yoli'n, Nyanmiɛn nin be ´kɛn i ti ndɛ
1Izraɛlfuɛ mun, an `tie, amun bɔ Anannganman'n fali amun Ezipt lɔ bali'n, an `tie amún wun ndɛ ng'ɔ o i klun'n:
2«Sran beblebe nga be wo asiɛ'n su'n,
amun kunngba cɛ yɛ n fali amun
kɛ e nin amun e su nanti-ɔ.
I sɔ'n ti amún sa tɛ kwlaa nga amun yoli'n,
e nin amun e ´kɛn i ngba'n i ti ndɛ.»
Kɛ Anannganman'n ko fa ndɛ ko wlɛ sran nuan'n, san ɔ ´kan
3?Sran nnyɔn bɔ be ´kɔ lika sa'n,
sɛ bé nuan ɔ'a dun-man mmua ɔ'a
sɛ-man bé wun'n, be kɔ likawlɛ sɛ yɛ ɔ yo ye-ɔ?
4?Kɛ asɔmɔli'n wo bo nun lɔ'n,
sɛ ɔ'a tra-man nnɛn wie'n,
be ti i kpanlɛ?
?Kɛ asɔmɔli bɔ ɔ'a kpɛ cro'n
ɔ wo i lawlɛ nun lɔ'n,
sɛ ɔ'a tra-man like'n, ɔ kpan?
5?Aya kun wo sa sɛ
b'a sua-man nun mlɔnmlɔn'n,
nnɛn tɔ nun-ɔn ɔ trɛ i?
?Sɛ kusu b'a suɛ-mɛn i yɛklɛɛ
bɔ like fi ɔ'a tɔ-man nun'n,
ɔ fanndi sa ngbɛn?
6?Klɔ kun su'n sɛ be ´bo awɛ'n,
sran'm be usa-man kɛ nguɛ sa-a?
?Sa onin yɛ ɔ tɔ klɔ kun su sa bɔ
nán Anannganman'n yɛ ɔ mɛn i wun atin-ɔn?
7Nanwlɛ, sa kwlaa nga Anannganman waan ɔ ´yo'n,
san ɔ ´dun mmua kan kle i sufuɛ
nga be ijɔ i nuan'n .
8?Kɛ asɔmɔli kun tian sa'n,
wan yɛ ɔ se kɛ ɔ bo-man bli-ɔ?
?Sɛ Anannganman Nyanmiɛn'n fa ndɛ
wlɛ i sran kun nuan'n,
ɔ lɛ atin se kɛ ɔ kan-man?
Sa ng'ɔ wa tɔ Samari su'n
9Amun `kpan be se Asdɔd famiɛn'n
i awlofuɛ mun nin Ezipt famiɛn'n
i awlofuɛ mun kɛ yoo:
«Be `yia Samari oka'm be su lɔ,
nan be `nian sannganlɛ bɔ ɔ'a sanngan lɔ-ɔ
nin sa kekleekle bɔ ɔ'a ju sran'm be su lɔ-ɔ.»
10Anannganman'n wan yoo:
«Like ng'ɔ ti-man bɔ be yo'n,
yɛ Samarifuɛ'm be yo-ɔ.
Sa kekleekle nga be yo'n,
i nun ninnge nga be nyɛn i'n,
nin sran'm bé bo ninnge nga be fɛn'n,
be tiɛn i nuan bé sua kpakpa'm be nun.»
11I sɔ'n ti Samarifuɛ mun,
Anannganman Nyanmiɛn'n wan yoo:
«Amun kpɔfuɛ'm be wa sin yia amun mɛn'n,
be ´bubu talɛ ng'ɔ si amun klɔ wun'n,
be ´fɛn amún sua kpakpa'm be nun ninnge mun.»
?M'an nyan mín ti wie yɛ?
12Anannganman'n wan yoo:
«Kɛ asɔmɔli tra bua kun'n,
i nga bua kankanfuɛ'n kwla de i nuan nun'n,
yɛlɛ bua'n i ja nnyɔn, wie kusu-ɔ
i sukpɔ nnya'n i bue kan.
Sa kunngba sɔ'n yɛ ɔ wa tɔ Izraɛlfuɛ
nga be tran Samari'n be su-ɔ.
Be bɔ be la bia ndɛnndɛn kpakpa'm be nun'n
nin be bɔ be la bɛ fɔkunfɔkun'm be su'n,
san be nun kaan sa yɛ be ´nyan bé ti-ɔ.»
Nyanmiɛn ɔ'a fua a kle Izraɛlfuɛ mun
13Anannganman Nyanmiɛn'n,
Nyanmiɛn b'ɔ sie mɛn wunmuan'n wan yoo:
«An `sie amún su nan an `fa ndɛ yɛ'n
be `ju Zakɔb osufuɛ'm be nyrun.
14Cɛn nga bɔ n jaso
kɛ n ´tu Izraɛl fɔ'n,
mín sa wa kan sraka yiwlɛ
nga be o Betɛl lɔ'n mun.
Like nga be ti kɛ nnɛn wɛ sa
bɔ be o sraka yiwlɛ sɔ'm be cɔnjɔ'm be su'n,
be ´bubu be ´gua asiɛ wun .
15M ´bubu ayrɛ blɛ sua mun
nin aunyɛyɛ blɛ sua mun.
Sua nga be fa sui je be wlawlali nun'n,
be ´wie bubu.
Sua sroesroe sɔ'm be ´tu lɛ!»
Anannganman'n yɛ ɔ kan sɔ kle amun-ɔn.
ទើបបានជ្រើសរើសហើយ៖
Amɔs 3: BB98
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Baoulé Bible © Alliance Biblique de Côte d'Ivoire, 1998.