2 Ilkorinto 4
4
Ilchumat lo ltau too masaa oo nkulupuok
1Neaku, ore anaa ina naisho iyiook Enkai ena kisiaaiyiare to lng'ur lenye, mikidukenya#4.1 mikidukenya: ashuu mikshalu iyiook. 2Kitejo mikiyieu inkiaasin pooki e nkurruna o nemeeta enkanyit; nikinchu mikiaata ilosekin torrok. Nimikikordil ororei le Nkai kake esipata kiyau enewang pee kirrep ate to ltoilo lo ltau le pooki ng'ae, anaa loodolita Enkai. 3Amu te naa keimulumularo Lomon lang Supati, naa te lelo ake oopuo enkiminata eimulumularo. 4Ore enkai ena kop naa ninye naitamodoo nkonyek e kulo lemeiruk, pee medol ewang'an oo Lomon Supati le nkitoo e Kristo, laa ninye nyaanyukie e Nkai. 5Mme ate kilikioo iyiook; Kristo Yesu kilikioo aajo Olaitoriani, nikira iyiook isinkan linyi, te nkaraki Yesu. 6#Enk 1.3Amu ina Ai natejo, “Inchoo metawang'a ewang'an te naimin,” ninye natawang'a tiatua iltauja lang, ayaki iyiook ewang'an e yiolounoto e nkitoo e Nkai te nkomom e Kristo.
7Kake aikiaata iyiook ele shumati tiatua imasaa oo nkulupuok pee eliooyu nchere ore ina golon magilani naa Enkai eing'uaa, mme atua iyiook maate. 8Eironyitai iyiook te pooki oitoi, kake eitu epurdi iyiook, neimagitae iyiook kake eitu kipalari; nenang'ieki iyiook enkop, nebatati iyiook kake eitu sii emuti, 9neinosieki iyiook osina kake eitu sii eiturrarri iyiook. 10Kinapita anaa ake too seseni lang keeya e Yesu, pee eitoduaari enkishui e Yesu tiatua iseseni lang. 11Amu ore iyiook, hoo nikinchu keishoori ake iyiook pooki kata aaisho keeya te nkaraki Yesu, peyie eitoduaari sii enkishui e Yesu te kulo seseni lang ooye kenya ake.
12Neaku keasisho ake keeya tiatua iyiook, kake enkishui naasisho tiatua intae. 13#Olk 116.10Kake kiaata enkirukoto anaa enajo Ilkigerot inchere, “Enkirukoto apa aata, pee airoro.” Ina kiyang'et ake e nkirukoto kiaata sii iyiook, naa ina sii iyiook pee kiro; 14amu aikiyiolo aajo ore ilo oitopiwuo Olaitoriani Yesu keitopiu sii ninche yiook te nebo Yesu neyau iyiook te nebo intae maetu enetii ninye. 15Naa te nkaraki intae pee etiu kuna pooki. Paa ore anaa enaponari empiris e Nkai too ltung'ana kumok o kulikae ake, neponaa enkishooroto e nashe te nkitoo e Nkai.
Enkishui e nkirukoto
16Te nkaraki e na pee mikidukenya. Ore hoo naa kemusanu ake ele tung'ani li oriong amuta, kake ore ilo tung'ani lang li atua neitang'ejuki nkolong'i pooki. 17Ole nkiti kata ake osina lang, kake eyaki iyiook enkitoo kitok oo ntarasi nemeetae ae toki natemakini, 18amu mme kuna naalioo king'orita kake nena nemelioo. Ore kuna naalioo naa ine nkiti kata; ore nena nemelioo naa inoo ntarasi.
ទើបបានជ្រើសរើសហើយ៖
2 Ilkorinto 4: BIBLIAPRO
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©Bible Society of Kenya, 2018