San Mateo 25
25
Jää tumu'ixen tsoj jä nimajk kiixte'exta
1We'n tyunjet wyena jä kutujken juu jäm tsapjootm ixu'n tujk ook jya'ty jäm ya'apyëjkpa te'expëjkpa wintem: Nimajk jä kiixte'exta tkoonte këjää jä kyunojkenta on jawe yajktuump jäts tsyoonta t'anëjkxeta jä ya'atyëjk juu pëjkwaamp. 2Nimuwooxk jääta ka'tii twinmayta jäts jä nimuwooxk awaata nyapyëëmete 3jä nimuwooxk ka' awaata nyapyëëmete ka tkoonte muniyujk jä y'on; 4jäts jä nimuwooxk awaata jääta nyapyëëmete tkoonte jä y'onta tu'ts jeetp jäts tyajk'utstat jä tujk'nax jä kyunojkenta. 5Wa jä ya'atyëjk juu pëjkwaamp ka' jä tsojk jya'y tanene jää, wa'nit tukëye mya'uuykyëxtene, jäts myanaxkëxtene. 6Jäwäänan wyena tsyu'mat, jäts ojts tmoteta jäts mëjk kyotsta yaaxy jyek: Jä myets jä ya'atyëjk juu pëjkwaamp. Pitsemta jäts xkotspookxtat. 7Wa'nit nyiwijte tukëye jä kiixte'exta jäts tyajk'ooyete tyajkpaatete jä kyunojkenta. 8Wa'nit jä kiixte'exta juu tka' payotyep jäyip tijaty'ej tsojkep tja o'k ixpaatene jäts ka' nyipaatat jä y'onta wa'nit tnïmyete jä kiixte'exta juu awaata nyapyëëmete: Mooky ëëts yïïnam yë m'onta, wa ëëts yë nkunojken pijtsnep. 9Jäts jä kiixte'exta juu awaata nyapyëëmete y'atsoote: Ka' ëëts nyaket, tumya ëëts njää kyanipaatat ni miitsa ni ëëtsa. Jä oy ku miits mnëjkxtat jäm juma tyeeke, jäts xjuytat miits mkë'ëm jääta. 10Jäts jä nimuwooxk kiixte'exta të wyena nyëjkxta on juuywa, wa'nit jyay jä ya'atyëjk juu pëjkwaamp, jäts kiixte'exta juu awaatan naajk'itetep jää ya'atyëjk juu pëjkwaamp tmëëtëjkete jäp tïjkp juma nyapyëjk'wajneta, wa'nit jä tejk akëë atujkne. 11Ix'ook y'ok jya'tyene jä nimuwooxk kiixte'exta, jäts wya'anta: Wintsën, wintsën, yajk'awatse tëjk. 12Wa'nit jää y'atseew: Tïwam ëts nwa'any ka' miits n'ixeta.
13Jotjuuky miits mnaajk'itetat—Jesús jyak wa'any—, jääkëx ku miits xka' nijaweta tii xëë tii xaaxp wyena.
Jä meen tumu'ixa
(Lc 19.11-27)
14Nawye'n tyunjet jä Kunuukxtee kyutujken we'n ixu'n tujk jä ya'atyëjk, juu tsoonwaamp nëjkx waamp jatujk ijt jatujk naax, jäts twatseew jä tyuumpata jäts mejk tuketeke jäts t'ixetat tsuj jä meen. 15Jäts nitujk jääta tmooy muwooxk mil puxen meen, jä tujk tmooy mäjtsk mil jäts jatujk tmooy tujk mil: We'n tmooy jä meen pën'tsoj t'a'ixa tujk jä nitujk. Wa'nit tsyeen nyijkx wiitpa. 16Jä tuumpa juu t'axaje muwooxk mil ojts tu'ajuy jäts ojts yajky tyeek mëët jä puxen meen nawyen ojts jyak niyuka jä muwooxk mil puxen meen. 17Jäts naywe'n juu ojts yajkmee iipx mokepx nawyen ojts tyajkmaya iipx mokepx. 18Jäts jää juu t'axaje tujk mil jä meen ojts tyu'ts nyijkx jäts tnitaje jä wyintsën myeen. 19Kujeknem jä wintsën wimpijt jää tuumpa wintsën, jäts ojts jä meen matsyootene. 20Jayip jä jya'y juu jä meen t'axaje muwooxk mil puxen meen, jäts tjak mooyne jä wyintsën jä muwooxk mil puxen meen, jäts tnïmye: Wintsën, wa mits xyajky muwooxk mil, xyajts njak yajky jä muwooxk mil të nyajkmaya. 21Jäts jä wyintsën nyë'ëmxe: Oy'ej, oy tuumpa mits'ej we'n juu xtun ixu'n yajktsejk; oy'ej xyajktun juuwe wään, niyujk may mits njaktujketëkat. Tëjka jäts mxoontket mëët ëts. 22Wa'nit jya'y jatujk jä tuumpa juu t'axaje iipx mokepx jä puxen meen, jäts nïmye: Wintsën, wa ëts mits xmooy iipx mokepx puxen meen, të ëts njak yajkmaya nay jä iipx mokepx. 23Jäts jä wyintsën nyë'ëmxe: Oy'ej tuumpa mits'ej we'n juu xtun ixu'n yajktsejk; oy tse xyajktun juuwe wään, niyujk may mits njaktujketëkat. Tëjka jäts mxoontket ëts mëët.
24Ku jya'y jä tuumpa juu t'axaje tujk mil puxen meen, jäts tnïmye jä wyintsën: Wintsën, nijawep ëts jäts wa mits mëjk tijaty xnipayo'oy, jäts xtsijk jä pëëmtejk juma mka ni'p jäts xpëjkmujk juma kya koowajkx. 25Paaty ëts ntsëjka, tnitaje ëts jä meen naax'jeetp. Xyaj mits jä meen juu mits mja'ep. 26Jäts jä wintsën y'atseew: Mits nuux ka'oy tuumpa, pën mnijawep mits jäts ntsijkp ëts jä pëëmtejk juma ëts nka' ni'p jäts nkonmujkp ëts juma kya' koowajkx, 27Jäm jaaxïp xajknïjkx ëts jä nmeen jäm tëjkm juma jä meen tyajkmayeta, jäts ëts, ku jaaxïp nwimpitne, jäts n'axajenet jä nmeen mëët jä meen unejk. 28Jäts jä jayeta juu jäm wyeneta ojts wya'anta: Pëjketa yë tujk mil puxen meen, jäts jää miits mojtap pen pën tmëët majk mil. 29Pën tmëët may niyujk nëjkx jyak yajkme'ej, nëjkx jä wyintaanxe; juu ni tii tka mëët pën tii yïïnem myëët nëjkx jää tyum jäjk'yajkpëjkene. 30Jäts yë tuumpa ti yë wya'net, yajknëjkxta tëjk'aajep jäm pëmta akoots'ijtem. Wa'nit jäm ya'axtat tsyatsypaatat.
Ku jä naaxwiinete jaye nëjkx yajktoken payo'oyta
31Ku jä Naaxwinete jaye Y'unejk myatset, naawiita tmëëtat jä y'ajatejk y'atëjkxek mëët jä tukëye jä y'ángeles, wa'nit nëjk jäm tsyïïna juma kyutujken juu tni'oyep. 32Jäts jä naaxwiinete jaye nyamyukëxetat jää winkujk, jäts jää twinkonet tujk jä nitujk, wen ixu'n jä borrego ix'ijtpa twinkeen jä byorrego mëët jä tyäänts. 33Wa'nit tpëmet jä byorrego y'akaayentsoj jäts tpëmet jä tyäänts y'anajemtsoj. 34Jäts jä mëj yajkutujkpa tnëjmat jä juu jäm y'akaayentsoj: Minta miitsta, ëts jä ntee jä kyunu'kxen mëët miits m'ijta; kupëjkta miits yë kutujken juu awaatan itp jä Kunuukxtee jekan jä tyajk'oya jä it naaxwiin ku ojts tsyoontejk. 35Ku ojts jä yuu njawa, xyajkaatye ëts miits; ku ëts ntëëtse; xmootye ëts jä tsuxknë'ë; ku ëts wiitpa yoywa n'it, miits ëts xkupëjkte mtëjk jootm. 36Ku ëts jä wit jä xox xka'itxe, miits ëts xoxte; ku ëts pëjkep nwena miits ëts xku'ixte; ku ëts puxentëjk tsyinye, xku ixte ëts miits. 37Wa'nit jä oy jayeta tyajktïwetat: Wintsën, junit mits n'ix jäts yuu mjaawep, jäts ëëts mits nyajkaay. Junit mits n'ix jäts mtëëtsep, jäts ëts mits nmee tsuxknë'ë. 38Junit mits n'ix jäts wiitpa yoywa mits, junit ëëts mits nkupïjkp, o'k mwit mxox mka'ijtxe, junit ëëts mits nmee. 39Junit mits n'ix pëjkep o'k puxentïjkp, junit ëëts mits nku'ix. 40Jäts jä mëj yajkutujkpa m'atsowetat: Tïwam ëts nwa'any jäts tukëye pën jaty tputëjke nitujk jä myuwu'kta juu ayoow tyajknajxtep, ëts jawe xtuunetep.
41Jäts jä mëj yajkutujkpa nëjkx nyë'ëmxeta jä juu anajemtsoj: Jëwa'kta, jää miits mtoke'taaketep jä mëjk tsaatsy paaten; nëjkxta jäm jëën jootm xëma këxm juu jä winëëmpa mëët jä y'ángelesta tunipëmeta. 42Ku ojts jä yuu njawa, ka' ëts miits xyajkaatye; ku ëts ntëëtse; ka ëts xmootye jä tsuxknë'ë; 43ku ëts wiitpa yoywa n'it, kä ëts xkupëjkte mtëjk jootm; ku ëts jä wit jä xojx xka'itxe, ka' ëts xojxte; ku ëts pëjkep nwena ka' ëts xku'ixte; ku ëts puxentëjk tsyinye, ka' ëts xku ixte. 44Wa'nit jääta tyajktïwetat: Wintsën, junit mits n'ix jäts yuu mjaawep jäts mtëëtsep, o'k xoywa wiitpa m'ijt, jäts wit xox mka'itxe, o'k pëjkep, o'k puxentijkp, jäts ka' ëëts mits mputëjke. 45Jäts jä mej yajkutujkpa y'atsowet: Tïwa ëts nwa'any tukëye juu xka tunta xka'tuputëketa yë ayoow jayeta, ni ëts këxa xkatunta. 46Jää nëjkxtap tsaatsy paatpa xëma këxm ook'tojkep jääta, jäts jä oy jaye pyatep jä juukyen juu xëma këxm.
ទើបបានជ្រើសរើសហើយ៖
San Mateo 25: JKAYUUK
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
