San Mateo 23
23
Jesús tni'ëëne jä fariseos jäts jä yajk'ixpëjkpa juu tnijaawetep jä kutujken
(Mr 12.38-40; Lc 11.37-54; 20.45-47)
1Ku we'en jyaty, wa'nit jä Jesús tnïmye jä jaye jäts jä y'ixpëjkpatëjkta: 2Jäts jä yajk'ixpëjkpa juu jä kutujken tnijawetep mëët jä Fariseos jää yajkjay'ixetep jä Moisés kyutujken. 3Wa miits yë mumoteta jäts xtuntat tukëye wintsoj myajknëmeta; Jäts ka' miits we'n mjatketat we'n ixu'n yëëta, wintsoj yajk'ixpëjkta ka'ts t'uk patuuntene. 4T'atsumta jä tsïm ju wa'jts jëmets ka' myaanya, jäts jä myugujk tpïïma jäm kyejk'am, jäts jääta kë'ëmta ka'ts jä tnixajawa'anta ni jä kyë'ë unejk tka tuupaat wa'any. 5Jääkëx tunta jäts jä jaye t'ixtat. We'n jä t'oyjaweta jäts tyujktsumtat jä nëjk winjää tso jä jatyan wya'any jäm wimpojkem jäts kye këxm jäts jä wit tpëmta juu ixjawa mëët. 6Wintsëjka natsyoketa kyaytat jäts wintsëjka natsyoketa jäts tsyeenetat jäm ixpëjkentëjkm, 7we'n tsojkta jä jaye kyotspoojkxet wintsejken mëët oy tuu'aay xïp jäts xëë mojtat yajk'ixpëjkpa.
8Jäts miitsta ka' xyajkjatat jäts jä jayeta mtïjetat yajk'ixpëjkpa, paaty ku tukëye wa miitsta wuwu'kta tujkye miits jä myajk'ixpëjkpa. 9Nipëna miits xka' tee niwa'net yaj naxkïx, paaty ku tujkye miits jä mteeta: juu jäm tsapjootm. 10Ka' miits xtsojktat jäts myajktïjtat wintuupëjkepa, paaty ku Cristo jä tujkye wintuupëjk. 11Jäts miitsta tujk juu tnimëjep jäätse tuunap jä myugujk. 12Pën nimëj nyapyëëmjep, nëjkx jä tsyëtyun ix ook; jäts pën nïïjk naaxk napyëëmjep, nimëj jä nëjkx it.
13-14Ayoow miitsta, yajk'ixpëjkpata juu jä kutujken tnijaawetep jäts miitsta jä Fariseos jayeta, miits mäts aa mäts joot, juu tyajk'atujktep jä tëjk'akëë jäm juma kutujken juu jäm tsapjootm jäts ka'tii jä wiink jayeta tyëjketa. Ni kë'ëma miits mka' tëjketat, nixka' yajkjata jäts jä wiink jaye tyëkat juu tjä tsojkp.
15Ayoow miitsta, yajk'ixpëjkpata juu jä kutujken tnijaawetep jäts miitsta jä Fariseos jayeta, miits mäts aa mäts joot, juu tuwiitp tuyo'py jä it jä naax jäts jä maaxy në'ë jääkëx jäts jaye pyayoyetat, jäts të y'ooyxeta, jawe tuketaketep mäjtsk ook jä tsaatsy paaten ka'tii miits kë'ëmta.
16Ayoow miitsta, jä wiints mtuumootyëp, tsoj wya'anta: Pën tuump tujk jä waantejk tsaptëjk këx, ni tii jää tka' nyatyupïjke; kuts wyaantejket jä oro këx juu jäp tsaptïjkp, yojeetp jawe tyan. 17Ka' miits mwijeta mkejeta miits wiinsta. Ti wi'n jäwään tnimëjep: Jä oro, o'k jä tsaptëjk jääkëx jää oro tyan kunu'kx. 18Nawye'en miits mwa'anta: Pën tpëëmp jä wyaantejk jäm yoxpatken këxm, ni tii kya nyatyupïjke jëwajts nyajktanye; ku wya'net ixp yë meen ju jäm yoxpatken këxm, jääts tïïw kuwana yojeetp tyan. 19Miits wiintsta. #23.19 Tiwe niyujk tnimëjep: jää yex o'k jä yo'xpäjtken jääkëx tsa yex kunu'kx tyan. 20Pën waamp ixp yëë yo'xpäjtken, ka' jäyap yo'xpäjtken këx, nawye'en tukëye pën tijaty myëët janyijkxm; 21pën waamp jäts tsaptëjk këx, ka' jäyap tsaptëjk këx, jäts nawye'en jä Kunuukxtee këx, juu jäp itp. 22Pen pën waamp ixp yë tsap, jää nyikotspetp jä Kunuukxtee kyutujken, jäts nawye'en jä Kunuukxtee këx, jää kye'em nyapïme.
23Ayoow miitsta, yajk'ixpëjkpata juu tnijawep jää kutujken jäts miits fariseos jayeta, mäts aa mäts joot miitsta, ku tujk pïjk xpukonta jä myajka jä yex jä aay'uts juu txëë menta, jä anís jäts jä comino jyaa, jäts ka' miits xmëpëmta jä ixpëjken juu niyujk tnimëjep jä kutujken, jä tïw tuunem, jä tumojten jäts wintsejken. Yëë miits'ej mtuntap, jäts ka' miits xmajktsojktat jatuk jëp. 24Miitsta, wiints winjayëpepa, uux m'akaatep, jäts camello miits mjëëntep.
25Ayoow miitsta, yajk'ixpëjkpata juu tnijawep jää kutujken jäts miits fariseos jayeta, mäts aa mäts joot miitsta, janyijkxmye xpu'ta jä m'auuken jäts jä m'atojkxen, jäts ka' jäp jayjeetp wya'tsa tum jää jäp juu ka'oyap. 26Fariseo wiintsta: jayïp jä m'auuken jayjeetp xyajkwajtstat, jäts naywe'en jä wajts janyijkxm tyanet.
27Ayoow miitsta, yajk'ixpëjkpata juu tnijawep jää kutujken jäts miits fariseos jayeta, mäts aa mäts joot miitsta. We'en jää ixu'n jä ookpajut juu poop tjyatne, wajts tsuj tyajk'oyetene tyajkpaatetene janyijkxm, jäts jäp jayjeetp uts jää tum jä ookpa pyajk jäp jäts tukëye jä may jëp juu ka'oyap. 28We'n miitsta: mnaakäxeta jäts oy jaye miits ejta ka' myutsta määtsta, jäts jäp jayjeetp uts miitsta mäts aa mäts joot jäts nawye'en jää ka'oyap.
29Ayoow miitsta, yajk'ixpëjkpata juu tnijawep jää kutujken jäts miits fariseos jayeta, mäts aa mäts joot miitsta, miits xajk'oyeta xyajkpaateta jä ookpa jut jää kukexepa këx jäts oy tsuj tyajk'oyetene jä pyets jä oy jaye jyaata, 30Wa'nit wya'anta: Ku ïïm jaxip jää juunt njuukyem tso jekantejayeta jyuukyete, ka' jaxip nkupëjkem jäts jä kukexepa y'ooktat. 31Tëwan xyaj, të miits ke'em mnatyujaweta jäts jää miits m'apep m'okep juu tyajk'ookte jä kukexepa. 32Yajkukëxeta, juu m'apta m'okta tsyoontejkte.
33Miits tsaanta. Tsaan myuwu'kta. Tsoj ju'n miits xkukäjktat jä tsaatsy paaten juu jäm ko'oy ijtem. 34Jääkëx ëts npakäxet jä kukexepa, jä ixpïjkjayeta jäts jä yajk'ixpëjkpata. Nitujk jääta miits wyena xyajk'ookta jäts xyajkcruzpatat, jäts winkex wyena xtsiijktat xwoptat jäm ixpëjkentëjkm jäts winkex wyena xpawiita kajpen kajpen. 35Miits mtokitaketep jä tsaatsypaaten ku jä wa'ts nïpen juu ka' token mëëtep ojts nyastaxa ku ojts tsyoontejk jää Abel nyïpen oy jaye jää jäts kyukëxa mëët Zacarías nyïpen, jää Berequías myajk, jää juu miits myajk'ookte jäp tsaptëjk itkujk jäm ookpaatken winm. 36We'en ëts miits nëjmeta jäts jä tsaatsypaaten jää tokitaaketep jä jayeta juu xyam.
Jesús tniya'x jä Jerusalén kajpen
(Lc 13.34-35)
37Jerusalén, Jerusalén, mits myajk'eekp jä kukexepa jäts xtsa ka'tsy juu jä Kunuukxtee mtunikäxe. Winju'n ook ëts njatsejk jä m'unejk nyajknamyuket, we'n ixu'n jä tsetaak y'unejk tyajknamyuke jäp kyääken patkep, jäts ka'ts mits xtsejk. 38Ix'tasnit, miits jä mtëjkta wa jä nëjkx tyaane apajk; 39xyam ëts nwa'any jäts, xyamye nëjkx we'en tyan, jäts ka' miits ëts nëjkx x'ok'ixtene konem wyena miits mwa'anta: xoon jää juu miimp mätsp jä wintsën xyë këx.
ទើបបានជ្រើសរើសហើយ៖
San Mateo 23: JKAYUUK
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
