Eclesiástico 6
6
1Mi utset, mach sujtiket ti xts'a'leya,
cha'añ ma'añik ma' ataj wajleñtel yik'ot ts'a' k'elol,
kome che'äch mi' imel jiñi xmulilob.
2Mach awäk' ti sojkel aña'täbal ti kaj chuki mi' mulañ apusik'al,
cha'añ ma'añik mi' ijisañ ap'ätälel che' bajche' joñtolbä tat wakax.
3Itsukulel apusik'al mi' ikaj ijisañ ayopol yik'ot awut
che' jiñi mi' ikaj ikäyet bajche' juñtejk täkiñ te'.
4Kome jiñi ambä itsukulel ipusik'al mi' iyajlel ti jisäñtel,
yik'ot mi' iyäk' ti tse'ñal ti itojlel its'a'leyajob.
Jiñi tojbä lak pi'älob
5Jiñi utsbä t'añ mi' yoñ-esañ ka'bäl lak pi'älob,
yik'ot majki mi' cha'leñ utsbä t'añ,
ti' pejtelel mi' chäñ k'uxbiñob.
6Awilañ ka'bälob uts'at mi' ipejkañet,
ixku ilaj käñäyetbä ti uts'at,
juntikil jach ikäñäbä apusik'al.
7Mi' tsa' ataja akäñäbä api'äl
ñaxañ yom ak'el mi' tojäch;
mach yom se' ma' wäk'eñ apusik'al.
8Kome añ ojlilob mi k'uxbiñoñla che' añ chuki yom icha'añ,
ixku che' kom lak koltañtel ma'añik mi' koltañoñla.
9Yaño'bä mi' isujtelob ti xts'a'leya ti lak tojlel,
che' jiñi mi' laj tsiktesañob jiñi lak mukulbä t'añ.
10Añ juñtikil cha'tikil tijikña ipusik'al che' mi' ik'ux waj la kik'ot,
ixku che' woliyoñla kñusañ wokol,
ma'añik mi' ichäñ päs ibä.
11Che' tijikña ma' añusañ k'iñ,
jump'ejl ipusik'al awik'ot;
ixku che' woliyet añusañ wokol,
mi ikaj ikäyetob ti' bajñelil,
12mi' sujtelob ti xts'a'leya ti atojlel,
ixku ma'añix ma' achäñ k'elob.
13Täts'ä abä ti' tojlel xts'a'leyajob acha'añ,
che' ja'el käñtañ abä ti itojlel api'äl akäñäbä ti' apusik'al.
14Juntikil lak pi'äl xuk'ulbä ipusik'al,
lajaläch che' bajche' jiñi oñbä chu'bä añäl,
yik'ot jump'ejl tsätsbä mäktäjib.
majki mu'bä itaj, muk'ix itaj uts'atbä imajtañ.
15Juntikil lak pi'äl xuk'ulbä ipusik'al mach lak tajbe itojol;
yik'ot mach p'isbilik ik'äjñibal yik'ot tak'iñ.
16Jiñi lak pi'äl xuk'ulbä ipusik'al
mi' ikoltañoñla che' bajche' ts'ak;
jiñi mu'bä ich'ujbiñ Lak Yum mi' ikaj itaje'.
17Jiñi käñäbä lak pi'äl mi' laj ipusik'al bajche'oñla,
yik'ot imelbal lajaläch bajche' kämbil iñuklel.
Iñuklel jiñi ña'täbal
18Kalobil,
sajkañ akäñtesäñtel che' maxto añik aja'bilel,
cha'añ che' k'älä ñoxetix chäñ añ aña'täbal.
19Lak'tesañ abä ti' itojlel che' bajche' juntikil
wolibä ti e'tel ti icholel cha'añ mi' itaj oñ iwut ipäk'äb.
Che' woli amel e'tel ti itojlel,
muk'ix kaj awu'biñ ts'ita alujb-eñal,
mach jalix mi' kajel ak'uxbeñ iwut apäk'äb.
20Jiñi ch'aplombä wiñik yik'ot jiñi machbä añik iña'täbal
ma'añik mi' jak' jiñi käñtesañtel.
21Lajaläch mi' yu'biñob che' bajche' albä xajlel,
che' jiñi mach jalik mi' kaj iñajtä chok majlel ti' tojlel.
22Jiñi käñtesäñtel,
che'äch bajche' mi' iyäl ti' ik'aba,
ma'añik mi' laj tsiktäyel ti' pejtelel wiñikob.
23U'biñ, kalobil,
ch'ujbiñ jiñi jkäñtesa;
mach abi'leñ ktoj-esaya.
24-25Chäñ ajñeñla ti' itojlel jiñi ña'täbaläl
che' bajche' juntikil xk'ämbal ti itojlel,
yik'ot mach la' käy ikäñtesa.
26Ti' pejtelel apusik'al yom ma' läk'tesañ abä ti' itojlel.
sajkañ jiñi ibijlel ti' pejtelel ap'ätälel.
27Tsäkleñ majlel ixämbal, ya'i mi kaj ataj;
che'bä tsa'ix ataja, mach yom ma' akole'.
28Ti wi'il jiñi mi' ikaj iyäk'eñet k'aj-o
ya'i mi' isujtel ti' itijikñäyel apusik'al.
29Jiñi ikäjchib melbilbä ti tak'iñ mi' ikaj ikäñtañet;
yik'ot jiñi ich'ajñeltak, ach'äjlil ti uts'at.
30-31Läpäla che' bajche' la' apislel cha'añ yumäl jiñi ña'täbaläl,
yik'ot ch'älä abä ti uts'ataxbä ch'äjlibtak,
yik'ot ich'ajñeltak, che' bajche' juñtujk' chächäk pisil.
32Kalobil,
mi awomäch, mi' kaj ataj aña'täbal,
mi muk'äch achäñ sajkañ,
mi kaj alaj ña'tañ pejtelel chuki añ.
33Mi muk'äch amulañ añäch'tañ, mi' kaj akäñ;
mi muk'äch awäk' apusik'al awu'biñ, mi akäñtesañ abä.
34Tsäkleñob jiñi tatuchob che' mi' tempañob ibä;
che'bä mi' tsa' awila juñtikil ambä iña'täbal;
läk'tesañ abä ti' itojlel.
35Ak'ä apusik'al añäch'tañ chuki mi itsiktesäñtel,
mach awäk' ti sajtel jiñi ñukbä ikäñtesa t'añ.
36Chäñ k'ele majki ambä ip'iblel iña'täbal;
yom achäñ sajkan yik'ot mach akäy ajulatañ ti' iyotot.
37Ña'tañ ak'uxbiñ jiñi Lak Yum ti Pañchañ,
ak'ä ti' apusik'al cha'añ ixik'ojel;
jiñi mi' ikaj iyäk'eñet ip'iblel ajol
yik'ot jiñi ña'täbal mu'bä amulañ.
ទើបបានជ្រើសរើសហើយ៖
Eclesiástico 6: CholDc
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Biblia Chol de estudio con DC- Derechos reservados por SBM